బాబాగూడ.. కూరగాయల సాగులో భళా 

ఆంధ్రజ్యోతి, శామీర్‌పేట (రంగారెడ్డి జిల్లా): ఆ గ్రామంలోని 180 మంది రైతుల్లో 120మంది యువకులే. చాలా మంది డిగ్రీవరకు చదువుకున్నారు. ఉద్యోగ వేటమాని నేలతల్లిని నమ్ముకున్నారు. ఆధునిక పద్ధతుల్లో తీగజాతి కూరగాయల సాగుతో రైతులకు తలమానికంగా నిలుస్తున్నారు. నీటిని జాగ్రత్తగా వాడుకుంటూ ఏడాది పొడవునా లాభాలు పండిస్తున్న బాబాగూడ రైతుల విజయగాథ ఇది.
తెలంగాణలోని రంగారెడ్డి జిల్లా బాబాగూడ గ్రామ రైతులలో 150 మందికి 3 నుంచి 10 ఎకరాలవరకు పొలాలున్నాయి. కాకర, సొర, బీర, దొండ, పొట్ల వంటి తీగజాతి కూరగాయలను వీరు ఏడాది పొడవునా పండిస్తూ లాభాలు ఆర్జిస్తున్నారు. ఈ ఏడాది 300 ఎకరాల్లో 130మంది కాకర వేశారు. మరో 30 మంది బీర, పొట్లతోపాటు బెండ, టొమాటో సాగుచేశారు. బాబాగూడ ప్రాంతంలో బోరుబావులే సాగుకు ఆధారం. దీనివల్ల కొన్ని సందర్భాల్లో నష్టాలు చవిచూస్తున్నా పట్టుదలతో కూరగాయలు సాగుచేస్తూ తెలుగు రాష్ట్రాల్లోని రైతులకు ఆదర్శంగా నిలుస్తున్నారు.
 

కాకర సాగుతో అద్భుతాలు 
బాబాగూడలో కౌకుట్ల సురేందర్‌రెడ్డి పాతికేళ్లుగా కూరగాయలు సాగుచేస్తూ మిగిలిన రైతులకు మార్గదర్శకుడయ్యారు. పదెకరాల భూమిలో మూడు దశాబ్దాలుగా వ్యవసాయం చేస్తున్న ఈయన, పన్నెండేళ్లుగా తీగజాతి కూరగాయల సాగుపై దృష్టిపెట్టారు. తొలుత 2004లో ఐదెకరాల్లో వేశారు. తర్వాత 2015లో మరో ఐదెకరాల్లో పందిరివేసి బీర, కాకర వంటి కూరగాయలు సాగు చేస్తున్నారు. నిరడు ఐదెకరాల్లో బీర వేసి మంచి లాభాలు గడించారు. ఈసారి మిగతా ఐదెకరాల్లో థాయ్‌లాండ్‌ ప్రాంతానికి చెందిన ఈస్ట్‌వెస్ట్‌ మాయా వెరైటీ కాకర హైబ్రిడ్‌ విత్తనాలను మూడు నెలల కిందట నాటారు. ఇటీవల 15 రోజులుగా ఈ పంట దిగుబడి మొదలవగా రోజు విడిచి రోజు 1500 కిలోల కాకరను మార్కెట్‌కు సరఫరా చేస్తున్నారు. కాగా 15 రోజులముందు కాకర కిలో రూ.60 పలుకగా ప్రస్తుతం రూ.20కి పడిపోయింది. ఎకరా కాకర సాగుకు రూ.1.3లక్షలు ఖర్చవు తుంది. పంట రెండున్నర నెలలపాటు ఉం టుంది. ఐదు నెలల్లో పూర్తిగా అయిపోతుంది. మెదక్‌ జిల్లాలోని ఒంటిమామిడి, నగరంలోని బోయిన్‌పల్లి మార్కెట్‌లకు కాకరను సరఫరా చేస్తున్నారు. తీగజాతి కూరగాయల సాగులో సురేందర్‌రెడ్డికి ప్రభుత్వం మండల ఉత్తమ రైతు అవార్డును ప్రదానం చేసింది. భారతీయ కిసాన్‌ సంఘ్‌ సభ్యుడు, జిల్లా ఉపాధ్యక్షుడు కూడా అయిన ఆయన, మండల, జిల్లా రైతులకు చేదోడు వాదోడుగా ఉంటున్నారు. రాష్ట్ర వ్యవసాయ మంత్రి పోచారం శ్రీనివాస్‌రెడ్డి ఇటీవల ఆయన వ్యవసాయ క్షేత్రాన్ని పరిశీలించి మంచి దిగుబడులు సాధిస్తున్న సురేందర్‌ రెడ్డిని అభినందించారు.

నీటి సంపులకు సబ్సిడీ ఇవ్వాలి 

కూరగాయలు సాగు చేసే రైతులు నీటి సంపులను సొంతగా ఏర్పాటు చేసుకుంటున్నారు. కూరగాయలు సాగు చేసే రైతుల్ని ప్రోత్సహించేందుకు గాను నీటి సంపు నిర్మాణానికి అయ్యే 2 లక్షల 80 వేల రూపాయల్లో 50 శాతం మొత్తాన్ని ప్రభుత్వం సబ్సిడీగా ఇవ్వాలి. నేను డ్రిప్‌ పద్ధతిలో ఉన్న కొద్దిపాటి నీటిని జాగ్రత్తగా ఉపయోగించుకుంటున్నాను. డ్రిప్‌ మీద 90 శాతం సబ్సిడీ వచ్చింది. పందిరి ఏర్పాటుకు రాషీ్ట్రయ కృషి యోజన వారు 70 శాతం సబ్సిడీ ఇచ్చారు. తీగజాతి కూరగాయల సాగుకు కూలీలు ఎక్కువగా కావాలి. కూలీల క్వార్టర్లకు, సంప్‌ నిర్మాణానికి ప్రభుత్వం సబ్సిడీ ఇచ్చి కూరగాయల రైతుల్ని ప్రోత్సహించాలి.
Credits : Andhrajyothi

Leave a Reply

Your email address will not be published. Required fields are marked *