ఆమె ఇల్లు ఉద్యానవనం

ఆమె వయసు 70 ఏళ్లు, గతంలో సర్పంచ్‌గా, ఎంపిటిసి సభ్యురాలిగా పనిచేశారు. వ్యవసాయం కూడా చేశారు. వయోభారంతో పొలం వెళ్లకపోయినా ఇంటినే వ్యవసాయ క్షేత్రంగా మలచుకున్నారు. రుచికరమైన జామ, ద్రాక్ష పండ్లను పెరట్లో పండిస్తూ, ఇరుగు పొరుగులకు ఉచితంగా పంచుతున్నారు.
మేడిశెట్టి సూర్యకాంతం కుటుంబానికి పదెకరాల మాగాణి వుంది. ఖాళీగా కూర్చున్నా ఆమెకు దర్జాగా రోజులు వెళ్లిపోతాయి. కానీ ఆమె ఆ పని చేయడం లేదు. అందరూ వ్యాపకం కోసం టీవీ ముందు కూర్చుంటారు. కానీ ఆమె మాత్రం పండ్ల మొక్కలు పెంచుతూ ఇంటిని వ్యవసాయక్షేత్రంగా మార్చారు. పెరట్లో జామ, ద్రాక్ష పెంచుతూ చుట్టుపక్కల వారికి మధురమైన రుచులను పంచుతున్నారు. రెండేళ్ల క్రితం వైజాగ్‌లోని కుమార్తె దగ్గరకు వెళ్లారు తూర్పుగోదావరి జిల్లా కరప మండలం వాకాడ గ్రామానికి చెందిన సూర్యకాంతం. అక్కడి నుంచి నాణ్యమైన జామపండ్లు తెచ్చారు. ఆ విత్తనాలను జాగ్రత్త చేసి పెరట్లో చల్లారు. వాటి నుంచి 40 మొక్కలు వచ్చాయి. ఆవుపేడతో ఎరువు తయారుచేసి ఈ మొక్కలకు వేశారు. దాంతో జామకాయలు విరగకాశాయి. ఒక్కో కాయ అర కేజీపైనే ఉంటుంది. ఒక్కో చెట్టుకు 30, 40 కాయలు కాస్తున్నాయి. ఇంట్లో కూరల కోసం వంగ, మిరప వంటివీ పెంచుతున్నారు. ఈ కాలంలో మొక్కలు పెంచే తీరిక ఎవరికీ వుండటం లేదు. మార్కెట్‌లో మం దులు వేసి పండించిన కూరలు కొని తింటున్నారు. ఈ పరిస్థితుల్లో ఏడు పదుల మహిళ పెరట్లో కూరల సాగు చేపట్టడం విశేషం.
ప్రతి ఇల్లూ వనం కావాలి
ఇంటి ముందు, పెరట్లో ఖాళీ స్థలంలో కూరలు, పండ్ల మొక్కలు పెంచాలి. దానివల్ల నాణ్యమైన ఆహారం దొరుకుతుంది. ఎవరో కూరగాయలు పండించాలనుకోవడం వల్లే వాటి ధరలు పెరిగిపోతున్నాయి. ఇంట్లో తోటల పెంపకంతో శరీరానికి వ్యాయామం లభించడంతో పాటు నాణ్యమైన కూరలు లభిస్తాయి.
– మేడిశెట్టి సూర్యకాంతం
Credits : Andhrajyothi

Leave a Reply

Your email address will not be published. Required fields are marked *