కటింగ్‌ యంత్రం.. వరం 

ఆంధ్రజ్యోతి ప్రతినిధి, నంద్యాల: రోజుకు ఎనిమిది ఎకరాల్లో చెరుకు పంటను చకచకా కోసే యంత్రం అందుబాటులోకి వచ్చింది. డబ్బుతో పాటు సమయాన్ని ఆదా చేసే ఈ యంత్రం రైతుకు వరంగా మారింది.
చేతికి వచ్చిన చెరుకు పంటను కోసేందుకు ఇప్పుడు ఆధునిక యంత్రం రైతులకు అందుబాటులోకి వచ్చింది. ఈ యంత్రంతో రోజుకు ఆరు నుంచి ఎనిమిది ఎకరాల చెరుకు పంటను కోసే వీలుంది. చేతికి వచ్చిన చెరకు పంటను కోసేందుకు రైతులు కూలీల మీద ఆధారపడాల్సి వస్తున్నది. టన్ను చెరకు కోసేందుకు కూలీలకు 600 నుంచి 1000 రూపాయల వరకు చెల్లించాల్సి వస్తున్నది. కూలీల కొరత కారణంగా సకాలంలో పంటను కోయలేక రైతులు నష్టపోతున్నారు. ఈ తరుణంలో చెరుకు మిల్లుల యాజమాన్యాలు ఈ కోత యంత్రాన్ని రైతులకు పరిచయం చేశాయి. ఆధునిక పరిజ్ఞానంతో వచ్చిన ఈ యంత్రం వేగంగా చెరుకు కటింగ్‌ చేయడంతో రైతులకు ఎంతో డబ్బు, సమయం ఆదా అవుతున్నాయి.
డబ్బు.. సమయం ఆదా
ఆధునిక యంత్రాల వినియోగం వల్ల రైతులకు నాణ్యమైన పంట చేతికి వస్తుంది. ఖర్చు తగ్గడంతో పాటు సకాలంలో పంటను కోసే అవకాశం వుంటుంది. దీని వల్ల రైతుకు డబ్బు, సమయం ఆదా అవుతుంది. రైతులంతా ఈ ఆధునిక యంత్రాలను ఉపయోగించుకోవాలి.
Credits : Andhrajyothi

శాటిలైట్ సేద్యం

వర్షాభావాలు, వెంటాడుతున్న అప్పులు, పడిపోతున్న ధరలు, పాలకుల నిర్లిప్తతలు… అన్నీ కలిసి అన్నదాతను ఆత్మహత్య వైపు నడిపిస్తున్నాయి. సమస్యలతో కుదేలైపోతున్న రైతన్నకు ఆధునిక టెక్నాలజీతో అండ అందించేందుకు ఓ స్టార్టప్‌ కృషిచేస్తోంది… పేరు శాట్‌స్యూర్‌. ఆ ప్రయోగాలకు వేదిక శ్రీకాకుళం జిల్లా.
దేశ జనాభాలో కోటీ తొంభై లక్షల మందికి కడుపునిండా అన్నం అందడం లేదు. నూట ముప్పై కోట్ల జనాభా ఉన్నప్పుడే పరిస్థితి ఇలా ఉంటే… 2050 కల్లా ఆ జనాభా నూట డెబ్బయి కోట్లకు చేరుకుంటుందే! అప్పుడెలా?
ఆ దుస్థితి దరిచేరకూడదంటే వ్యవసాయమే దిక్కు. సేద్యమే భవితకు ఆధారం. కానీ, ఆ వ్యవసాయాన్ని నమ్ముకున్న రైతుల జీవితం దుర్భరంగా మారిందే!
ఒక పక్క పేదల ఆకలి కేకలు, మరో పక్క అన్నదాతల ఆత్మహత్యలు… ఈ పరిస్థితుల్లో పంటల దిగుబడి పెంచుకోవడమెలా? రేపటి తరానికి మెతుకు భరోసా ఇచ్చేదెలా?
‘పరిష్కారం మేం సూచిస్తాం’ అంటూ ఎన్నో స్టార్టప్‌లు ముందుకు వస్తున్నాయి. ఆధునిక టెక్నాలజీని అంతరిక్షాన్ని చేరుకోవడానికే కాదు… భూమి తల్లిని పచ్చగా మార్చేందుకూ ఉపయోగించుకోవచ్చంటున్నాయి. ఆ లక్ష్యంతో పుట్టుకొచ్చిన సంస్థే శాట్‌స్యూర్‌.
తొలి అడుగు …
యూకేలో పుట్టి… ఇండియాతో పాటు అనేక దేశాల్లో రైతులకు అండగా నిలబడేందుకు ముందుకొచ్చిన స్టార్టప్‌ శాట్‌స్యూర్‌. 2015లో ఇస్రో నుంచి బయటికి వచ్చిన అంతరిక్ష శాస్త్రవేత్తల సృష్టి ఇది. బెంగళూరు కేంద్రంగా పనిచేస్తోంది. స్పేస్‌ టెక్నాలజీని ఉపయోగించి… శాటిలైట్‌ ఫోటోల ద్వారా నేల స్వభావాన్ని తెలుసుకోవడమే శాట్‌స్యూర్‌ చేసే పని. భూమి తత్వాన్ని గ్రహించడం ద్వారా… ఆ నేలలో ఏ పంటలు పండుతాయి? ఎన్ని రోజుల్లో పంటను అందుకోవచ్చు? అక్కడి వాతావరణ పరిస్థితులేంటీ? ఆ తేమకు ఎలాంటి పంటలు వేయడం మంచిది?… వంటి ప్రశ్నలకు జవాబులు దొరుకుతాయి. శాట్‌స్యూర్‌ ఇప్పటికే తన పనిని ఆంధ్రప్రదేశ్‌లోని మారుమూల జిల్లా అయిన శ్రీకాకుళంలో మొదలుపెట్టింది. అనుకున్న ఫలితాలను పొందింది. గతేడాది విశాఖపట్నంలో ఏపీ ప్రభుత్వం, బిల్‌-మిలిందా గేట్స్‌ ఫౌండేషన్‌ సమన్వయంతో నిర్వహించిన ‘గ్లోబల్‌ అగ్‌టెక్‌ పిచ్‌’ కార్యక్రమంలో ఈ స్టార్టప్‌ విజేతగా నిలిచింది. ఆ ఆలోచన నచ్చి ముఖ్యమంత్రి చంద్రబాబునాయుడు ఓ వినూత్నమైన బాధ్యత అప్పగించారు. అందులో భాగంగానే, పైలెట్‌ ప్రాజెక్టుగా సిక్కోలు ప్రాంతాన్ని పరిశోధనలకు ఎంచుకుంది శాట్‌స్యూర్‌.
తొలి విజయం…
ముందుగా, శ్రీకాకుళంలో నేల స్వభావాన్ని తెలుసుకునే ప్రయత్నం చేశారు శాట్‌స్యూర్‌ సభ్యులు. వివిధ ప్రాంతాల్లో మట్టిని సేకరించి… వాటిని భాగాలుగా చేశారు. ఎక్కువ ఎరువులు వేసి పండించాల్సిన భూమి, తక్కువ ఎరువులతో పండించాల్సిన భూమి, అధిక నీరు కావాల్సిన భూమి, తక్కువ నీటితోనే పండే భూమి… ఇలా రకరకాలుగా విభజించారు. ఆ ఫలితాలను కంప్యూటర్‌లో నమోదు చేశారు. పలుచోట్ల వ్యవసాయ క్షేత్రాల్లో ప్రత్యేక యంత్రాల్ని పెట్టి… శాటిలైట్‌కు అనుసంధానం చేశారు. వాటి ద్వారా అందుకున్న సమాచారంతో పాటు ఎప్పటికప్పుడు తీసిన ఫోటోలనూ వివరాలనూ శాస్త్రవేత్తల కంప్యూటర్‌కు పంపింది శాటిలైట్‌. సమాచారాన్ని విశదీకరించి… శ్రీకాకుళంలోని పలు ప్రాంతాల్లో ఎన్ని ఎకరాల్లో… ఏ పంటలు పండే అవకాశం ఉందో గుర్తించి ఓ నివేదిక తయారు చేశారు. దాని ప్రకారం, జిల్లాలోని పాతపట్నం, పాలకొండ ప్రాంతాల్లో పంటల పరిస్థితిని విశ్లేషించారు. ఆ ప్రకారంగానే, మొక్కజొన్న పండేందుకు దాదాపు 1248 హెక్టార్ల భూమి అనుకూలంగా ఉండగా… ప్రస్తుతం 1361 హెక్టార్లలో ఆ పంటను పండిస్తున్నారు. అలాగే చెరుకు 1248 హెక్టార్లలో పండే అవకాశం ఉండగా… ప్రస్తుతం 1083 హెక్టార్లలో పండిస్తున్నారు. మొత్తానికి సిక్కోలులో ప్రారంభించిన పైలెట్‌ ప్రాజెక్టు విజయవంతం అయినట్టే.
భవిష్యత్తులో, రెండు తెలుగు రాష్ట్రాల్లోనూ మరిన్ని పరిశోధనలను చేపట్టేందుకు శాట్‌స్యూర్‌ సిద్ధంగా ఉంది. ఆ కంపెనీ సీఈవో అమర్‌దీప్‌ మాటల్లో చెప్పాలంటే… కేవలం ఒక రూపాయి వ్యయంతో ఎకరా పొలానికి సంబంధించిన విశ్లేషణను రైతులకు అందించేందుకు శాట్‌స్యూర్‌ కృషి చేస్తోంది. నేల నైజాన్ని తెలపడమే కాదు… రైతుకు ఆర్ధికపరమైన భరోసాను అందించడం కూడా సంస్థ లక్ష్యాలలో ఒకటి. ప్రతి రైతు చేతా పంటను బీమా చేయించేందుకు, తేడావస్తే ఇన్సూరెన్స్‌ డబ్బు త్వరగా ఇప్పించేందుకు కూడా.. తమ వంతు సాంకేతిక సహకారం అందిస్తుంది శాట్‌స్యూర్‌.
Credits : Andhrajyothi

అందం.. ఆరోగ్యం 

పెరట్లో, ఇంటి ముందు ఖాళీస్థలంలో, చివరకు ఇంట్లో కూడా ఔషధ మొక్కలు పెంచుకోవచ్చు. గాలిని శుభ్రం చేయడంతో పాటు సువాసనలు వెదజల్లే ఈ మొక్కలు కుటుంబ సభ్యుల ఆరోగ్యాన్ని ఎంతగానో పెంపొందిస్తాయి.
ఇంటి అందాన్ని పెంచే మొక్కలతో పాటు కుటుంబ సభ్యులకు ఆరోగ్యాన్ని పంచే మొక్కలను ఇంట్లోనే పెంచుకోవచ్చు. ఇంటి లోపల కుండీల్లో లేదా కాస్త గాలి, వెలుతురు వున్న వరండా, బాల్కనీ, ప్రహరీగోడల మీద కూడా ఈ మొక్కలను పెంచుకోవచ్చు. ఔషధ గుణాలు పుష్కలంగా వుండే ఈ మొక్కలు కాలుష్యాన్ని తగ్గించడంతో పాటు మధురమైన సువాసనల్ని పంచుతాయి. పెద్దగా శ్రమ లేకుండా, తక్కువ ఖర్చుతో, తక్కువ స్థలంలో ఈ మొక్కల్ని పెంచుకునే అవకాశం వుంది.
తులసి : వేల సంవత్సరాలుగా ప్రతి ఇంట్లో తులసిని పెంచడం సంప్ర
దాయంగా వస్తున్నది. తులసి ఔషధ గుణాలకు నిలయం. తులసి ఆకులను వేడి నీటిలో తేనెతో కలిపి తీసుకోవడం వల్ల జలుబు, దగ్గు నుంచి ఉపశమనం లభిస్తుంది. శరీరంలోని మాలిన్యాలను తులసి శుద్ధి చేస్తుంది. ఇంట్లో కాస్త ఎండపొడ వుండే చోట చిన్న కుండీలో కూడా తులసిని పెంచుకోవచ్చు.
 
లెమన్‌ గ్రాస్‌ : నిమ్మగడ్డికి ఈ కాలంలో మంచి డిమాండ్‌ వుంది. ఎన్నో ఔషధ గుణాలున్న ఈ నిమ్మగడ్డిని కాస్త పెద్ద కుండీలో పెంచుకోవచ్చు. నిమ్మగడ్డి టీ ఆరోగ్యాన్ని పెంపొందిస్తుంది. ఈ ఆకుల్ని ఎండబెట్టి పౌడర్‌గా చేసుకుని తాగితే శరీరానికి ఉత్సాహం లభిస్తుంది. సువాసనలు వెదజల్లే నిమ్మగడ్డి ఇంట్లో క్రిమికీటకాలు రాకుండా కూడా చూస్తుంది.
వాము మొక్క : వాము మొక్కను కాస్త పెద్ద కుండీలో పెంచుకోవచ్చు. ముదురుపచ్చని ఆకులతో ఇంటి అందాన్ని పెంచే వాము మొక్క ఔషధాలకు నిలయం. వాము ఆకులు వంటల్లో వాడుకోవచ్చు. వాము ఆకులు అజీర్తిని తగ్గించి ఆకలిని పెంచుతాయి.
పుదీన : పుదీన మొక్కలను కాస్త పెద్ద కుండీలో పెంచుకోవచ్చు. మంచి వాసన రావడంతో పాటు పుదీనలో ఎన్నో ఔషధ గుణాలున్నాయి. రుచిని, ఆకలిని పెంచే గుణం వున్న పుదీన ప్రతి ఇంట్లో వుండాల్సిన మొక్కల్లో ఒకటి.
సబ్జా మొక్క : పెరట్లో, వరండాలో, బాల్కనీల్లో కుండీల్లో సబ్జా మొక్కలను పెంచుకోవచ్చు. సబ్జా గింజలు వేసవిలో చలవ చేస్తాయి. శరీరాన్ని కాంతివంతంగా చేస్తాయి. బరువు తగ్గేందుకు కూడా సబ్జా గింజలు ఉపయోగపడతాయి.
సుగంధ మొక్క : దోమలను పారద్రోలడంతో పాటు కంటికి ఇంపుగా వుండే సుగంధ మొక్కను చిన్నసైజు కుండీలో కూడా పెంచుకోవచ్చు.
Credits : Andhrajyothi

ఇండోర్‌ మొక్కలతో కనువిందు

వరండాలో, పెరట్లో, పోర్టికోలో, టెర్రస్‌ మీద కూడా మొక్కలు పెంచేందుకు ఆసక్తి చూపేవారి సంఖ్య నానాటికీ పెరుగుతున్నది. ఠీవీగా నిలబడే అరుదైన మొక్కలు కార్యాలయాల హుందాతనాన్ని మరింతగా పెంచుతున్నాయి. అపార్టుమెంట్లు, పట్టణ ప్రాంతాల్లో నివసించే వారికి మొక్కలు పెంచుకోవాలనే ఆలోచన వున్నా ఆచరణలో కష్టంగా మారుతున్నది. వారి కోరికను ఇండోర్‌ ప్లాంట్స్‌ తీరుస్తున్నాయి. బెడ్‌రూమ్‌ల్లో, టీవీ వద్ద, డైనింగ్‌ టేబుల్‌ మీద, స్టడీటేబుల్‌ మీద, టీపాయ్‌ మీద, కార్యాలయాలలోనూ సూర్యరశ్మి అందని ప్రదేశాల్లో కూడా పెంచుకునే వీలుంది. హేంగింగ్‌పాట్స్‌లో కూడా ఈ అందమైన మొక్కల్ని పెంచుకునే వీలుంది. ఏడాదికి 4 నుండి 5 అంగుళాలు మాత్రమే పెరుగుతూ ఉండే ఈ ఇండోర్‌ప్లాంట్స్‌ను సన్‌లైట్‌లో పెట్టాల్సిన అవసరం కూడా లేదు.
ఇంటి అందాల్ని రెట్టింపు చేసే కొన్ని ఇండోర్‌ ప్లాంట్స్‌ ఇవి…
అగ్లోనిమా లిప్‌స్టిక్‌ రెడ్‌: ‘‘అగ్లోనిమా లిప్‌స్టిక్‌ రెడ్‌’’ అనే పేరుతో పిలిచే ఈ మొక్క థాయిలాండ్‌ దేశానికి చెందినది. ఈ మొక్క ఎరుపు రంగులో చూడటానికి ఎంతో అందంగా ఉంటుంది. వీటిలో సుమారు 5 నుండి 6 రకాల వరకు ఉన్నాయి. రెండు రోజులకొకసారి మాత్రమే నీరు పోస్తూ జాగ్రత్తగా ఈ మొక్కలు పెంచుకోవాలి. అపుడపుడు బ్లైటాక్స్‌ మందు పిచికారీ చేయాలి.
 
మెరంటా రెడ్‌ : ఈ మొక్క మెరంటా జీబ్రా కుటుంబానికి చెందినది. ఇతర దేశాల నుండి బెంగుళూరు వచ్చిన ఈ మొక్క ప్రస్తుతం కడియం నర్సరీల్లో హాట్‌కేకులా మారింది. ఈ మొక్క ఆకుపై సన్ననిగీతలుంటాయి. ఇందులో ఎరుపు, తెలుపు, పసుపు తదితర రంగుల్లో మొక్కలున్నాయి.
 
అగ్లోనిమా డౌ: కలక త్తాకు చెందిన ఈ ఇండోర్‌ప్లాంట్‌ అగ్లోనిమా జాతికి చెందినది. ఇందులో అగ్లోనిమాడౌ రెడ్‌, అగ్లోనిమాడౌ గ్రీన్‌, అగ్లోనిమాడౌ రాజా అనే రకాలు ఉన్నాయి.
జెనడాగోల్డ్‌: ఫెలోడేండ్రన్‌ జీనాడోగా పిలిచే ఈ మొక్కలో గ్రీన్‌, ఎల్లో వంటి రకాలు ఉన్నాయి. బెంగుళూరు నుండి తీసుకొచ్చిన ఈమొక్క ప్రస్తుతం కడియం నర్సరీల్లో అందాల్ని ఒలకబోస్తుంది.
ఫెలోడేండ్రన్‌ సేలం: బెంగుళూరుకు చెందిన ఈ మొక్క ‘ఫెలోడేండ్రన్‌’ రకానికి చెందినది. ఇందులో గ్రీన్‌, ఎల్లో వంటి రకాలు ఉన్నాయి.
ఇంటి అందాన్ని రెట్టింపు చేయడంతో పాటు కాలుష్యాన్ని తగ్గించడంలో మొక్కల పాత్ర
ఎనలేనిది. అందుకే మొక్కల పెంపకం ప్రతి ఒక్కరి వ్యాపకంగా మారింది.
Credits : Andhrajyothi

ఇజ్రాయెల్‌ ఆగ్రో టెక్నాలజీ వేస్ట్‌!

చిన్న రైతులను నిర్వీర్యం చేసే ఇజ్రాయెల్‌ వ్యవసాయ సాంకేతిక పరిజ్ఞానం పట్ల తెలుగు రాష్ట్రాల రైతులు అప్రమత్తంగా వుండాలని హెచ్చరిస్తున్నారు పాలస్తీనా ప్రజలు, రైతుల సంక్షేమం కోసం 15 ఏళ్లుగా కృషి చేస్తున్న ఉద్యమకారిణి, రచయిత్రి మరెన్‌ మాంటోవని. స్టాప్‌ ద వాల్‌ ఉద్యమం, పాలస్తీనీయుల భూమి పరిరక్షణ ఉద్యమాల్లో కీలక పాత్ర పోషిస్తున్న ఆమె తెలుగు రాష్ట్రాలు ఇజ్రాయెల్‌ ఆగ్రో టెక్నాలజీ ఉచ్చులో ఎలా చిక్కుకుంటున్నారనే అంశంపై హైదరాబాద్‌ లో పాలస్తీనా రైతులతో స్కైప్‌ ద్వారా ఇష్టాగోష్టి ఏర్పాటు చేశారు. ఆ సందర్భంగా మరెన్‌ ‘కృషి’తో మాట్లాడారు.
తెలుగు రైతులూ పారాహుషార్‌!
 
ఇజ్రాయెల్‌ ఆగ్రో టెక్నాలజీతో ఎడారిని సైతం సస్యశ్యామలం చేస్తామని చెబుతున్నారు. అందులో నిజం లేదంటారా?
ఇజ్రాయెల్‌కు చెందిన నెటాఫిమ్‌ సంస్థ భారత్‌తో సహా పలు ప్రపంచ దేశాల్లో ఇదే విషయాన్ని ప్రచారం చేసుకుంటున్నది. పాలస్తీనా ప్రజల నుంచి వారి జీవితాలను, భూమిని, వనరులను లాక్కుని, అక్కడి రైతుకు నీరివ్వకుండా, సొంత భూముల్లో సేద్యం చేయనివ్వకుండా ఇజ్రాయెల్‌ దమనకాండ సాగిస్తున్నది. అలాంటి దేశం ప్రపంచానికి అద్భుతమైన వ్యవసాయ సాంకేతిక పరిజ్ఞానాన్ని అందిస్తామని చెబితే ఎలా నమ్మగలం. తెలుగు రాష్ట్రాలకు డ్రిప్‌ ఇరిగేషన్‌ పరికరాలు అందిస్తున్న కంపెనీల్లో ఇజ్రాయెల్‌ దేశానికి చెందిన నెటాఫిమ్‌ కీలకంగా మారింది. ఈ కంపెనీ ఇజ్రాయెల్‌ ప్రభుత్వానికి తొత్తు. కుప్పంలో ఇజ్రాయెల్‌ టెక్నాలజీ ప్రయోగం ఎంతవరకు విజయవంతం అయిందో అందరికీ తెలిసిందే. ఆ టెక్నాలజీ పర్యావరణ హితం కాదని, సుస్థిర వ్యవసాయానికి అనుకూలం కాదని తేలింది. పలు అంతర్జాతీయ సంస్థలు నెటాఫిమ్‌ను నాణ్యత కలిగిన కంపెనీల జాబితా నుంచి తొలగించాయి. అయినా తెలుగు ప్రభుత్వాలు ఇజ్రాయెల్‌ సాంకేతిక పరిజ్ఞానం అంటూ వందల కోట్లు వృధా చేస్తున్నాయి.
పాలస్తీనా రైతులు పడుతున్న కష్టాలకు నెటాఫిమ్‌కు ఎలా సంబంధం వుందంటారు?
గత ఏడు దశాబ్దాలుగా 75 శాతం పాలస్తీనీయులను ఇజ్రాయెల్‌ పాలకులు వారి మాతృభూమి నుంచి తరిమివేశారు. పాలస్తీనీయులకు చెందిన 93 శాతం వ్యవసాయ భూముల్ని లాక్కున్నారు. పాలస్తీనా రైతులు సాగు చేసుకునేందుకు నీరివ్వడం లేదు. బందూకుల పహారా మధ్య రైతులు దైన్యంగా సాగు చేసుకుంటున్నారు. దురాక్రమించిన భూభాగాన్ని విభజిస్తూ ఇజ్రాయెల్‌ భారీగా సరిహద్దు గోడను నిర్మిస్తున్నది. ఈ క్రమంలో పాలస్తీనా రైతులకు ప్రాణాధారమైన లక్షలాది ఆలివ్‌ చెట్లను కూకటివేళ్లతో పెకలించి వేస్తున్నది. దురాక్రమించిన పాలస్తీనా భూభాగంలో ఇజ్రాయెల్‌ పట్టణాలను, పరిశ్రమలను నిర్మించింది. అలా ఏర్పాటైన పరిశ్రమల్లో ఒకటి నెటాఫిమ్‌. ఈ కంపెనీ ఇజ్రాయెల్‌ ప్రభుత్వం ఏజెంట్‌. లక్షల మంది పాలస్తీనీయుల ఉసురుపోసుకుంటున్న అలాంటి కంపెనీతో తెలుగు ప్రభుత్వాలు చేతులు కలపడం ఎంతవరకు సమంజసమో ఆలోచించాలి.
డ్రిప్‌ ఇరిగేషన్‌ను 1966లో ప్రపంచానికి తనే పరిచయం చేశానని నెటాఫిమ్‌ చెప్పుకుంటున్నది కదా?
అందులో ఏమాత్రం నిజం లేదు. చిన్న రైతులు, పాలస్తీనా ప్రజల కన్నీళ్ల మధ్య ఎదిగిన ఆ కంపెనీ తెలుగు రైతుల సంక్షేమం కోసం పనిచేస్తానంటే ఎలా నమ్మగలం? డ్రిప్‌ ఇరిగేషన్‌ పరిజ్ఞానంలో తమకు తిరుగులేదని ఆ సంస్థ తెలుగు ప్రభుత్వాలకు నమ్మబలుకుతోంది. గత ఏడాది తెలంగాణ ప్రభుత్వం డ్రిప్‌ ఇరిగేషన్‌ సబ్సిడీల రూపంలో 274 కోట్లు ఖర్చు చేసింది. ప్రభుత్వం సిఫారసు చేస్తున్న 28 కంపెనీల్లో నెటాఫిమ్‌ ఒకటి. కానీ తెలుగు ప్రభుత్వాలకు ఇజ్రాయెల్‌ ప్రభుత్వ ఏజెంట్‌ అయిన నెటాఫిమ్‌ ముందు నుంచే వల వేస్తున్నది. నెటాఫిమ్‌ పరికరాల నాణ్యతను అధ్యయనం చే సేందుకు తెలంగాణ ప్రభుత్వం వెయ్యి మంది వ్యవసాయ విస్తరణాధికారులను ఇజ్రాయెల్‌ పంపింది. అందుకోసం కోట్లు ఖర్చు చేసింది. ఆ తరువాత వ్యవసాయ అధికారులు సహజంగానే నెటాఫిమ్‌ పరికరాలను రైతులకు సూచిస్తారు. అలా ఆ సంస్థ తెలుగు రైతుల్ని మోసం చేస్తున్నది.
కుప్పం తరహా ప్రయోగం నిష్ఫలం అంటారా?
1995లో కుప్పంలో ఇజ్రాయెల్‌ ఆగ్రో టెక్నాలజీతో చేపట్టిన ప్రాజెక్టు వల్ల చిన్న రైతులు ఎంతో నష్టపోయారు. తెలంగాణ ప్రభుత్వం నేటికీ ఇజ్రాయెల్‌ ఆగ్రో టెక్నాలజీ వెంటపడుతూనే వున్నది. 2015లో జీడిమెట్లలో ఇండో – ఇజ్రాయెల్‌ వ్యవసాయ ప్రాజెక్టు చేపట్టారు. 10 ఎకరాల్లో బిందుసేద్యం, పాలీ, నెట్‌ సాగు పద్ధతుల్లో పండ్లు, కూరలు, పూలు ప్రయోగాత్మకంగా పెంచుతున్నారు. గత ఏడాది ఈ ప్రాజెక్టు కోసం తెలంగాణ ప్రభుత్వం 12.4 కోట్లు ఖర్చు చేసింది. ములుగులో ఇదే తరహాలో 11 కోట్లు ఖర్చు చేసి 50 ఎకరాల భూమిని సిద్ధం చేశారు. అందులో ఇజ్రాయెల్‌ టెక్నాలజీతో పండ్ల తోటల సాగుకు 18 కోట్ల కేటాయించారు. స్థానిక సాగు పద్ధతుల్ని వదిలేసి ఇజ్రాయెల్‌ ఆగ్రో టెక్నాలజీ వెంటపడటం విచారకరం.
తెలుగు ప్రభుత్వాలు, రైతులకు మీరిచ్చే సలహా?
ఇజ్రాయెల్‌ ఆగ్రో టెక్నాలజీ పెద్ద రైతులు, పెద్ద కమతాలను ఉద్దేశించి రూపొందింది. చిన్న రైతులకు అది ఏమాత్రం ఉపయోగపడదని పాలస్తీనా రైతులు ముక్తకంఠంతో చెబుతున్నారు. చిన్న రైతులు అధిక సంఖ్యలో వున్న తెలంగాణ, ఆంధ్రప్రదేశ్‌ రాష్ట్రాలకు ఈ సాంకేతిక పరిజ్ఞానం ఉపయోగపడదు. స్థానిక వనరులు, అవసరాలకు అనుగుణమైన టెక్నాలజీని ఉపయోగించుకుంటే వ్యవసాయం లాభసాటి అవుతుంది.
Credits : Andhrajyothi

చిన్నరైతుకు పట్టు సిరులు

తక్కువ పెట్టుబడితో అధిక లాభాలు ఆర్జించే అవకాశం వుండటంతో భద్రాద్రి కొత్తగూడెం జిల్లాలోని పలువురు రైతులు మల్బరీ సాగు, పట్టుగూళ్ల పెంపకంపై దృష్టి సారించారు. ప్రభుత్వ సబ్సిడీలు పట్టుసాగును మరింత ఆకర్షిణీయంగా మార్చాయి.
భద్రాద్రి కొత్తగూడెం జిల్లాలోని కొత్తగూడెం, దుమ్ముగూడెం, అశ్వాపురం, మణుగూరు, బూర్గంపాడు, పాల్వంచ, ములకలపల్లి, పినపాక, కరకగూడెం, అశ్వారావుపేట, చుంచుపల్లి, లక్ష్మీదేవిపల్లి గ్రామాల్లో రైతులు మల్బరీ సాగుపై దృష్టి సారిస్తున్నారు. జిల్లాకు చెందిన 60 మంది రైతులు 145 ఎకరాల్లో మల్బరీ సాగుచేస్తున్నారు. ప్రభుత్వం మల్బరీ సాగుపై ప్రత్యేక శద్ధ చూపడం, రాయితీలు ఇచ్చి ప్రోత్సహించడంతో మరింతమంది రైతులు పట్టు సాగు దిశగా అడుగులు వేస్తున్నారు.
పట్టు సాగు వల్ల ఏడాది పొడవునా ఉపాధి లభిస్తుంది. నీటి వసతి తక్కువగా వున్న ప్రాంతాల్లో కూడా, అతి తక్కువ పెట్టుబడితో దీనిని సాగు చేయవచ్చు. చౌడు, నల్లరేగడి భూములు మినహా మిగతా అన్ని రకాల భూముల్లో, అన్ని కాలాల్లో మల్బరీ సాగు చేసుకోవచ్చు. ఏడాది పొడవునా మంచి ఆదా యం పొందే వీలు కూడా వుండటంతో పలువురు రైతులు పట్టు సాగు చేపడుతున్నారు. మల్బరీ సాగు చేసే రైతులకు మహాత్మాగాంధీ జాతీయ గ్రామీణ ఉపాధి హామీ పథ కం ద్వారా పట్టు పురుగుల పెంపకం గది(షెడ్డు) నిర్మాణానికి రూ.1.03 లక్షలు అందిస్తోంది.
సాగు ఖర్చుల కోసం మొదటి ఏడాది రూ.50,468, రెండో ఏడాది రూ.44,269 చొప్పున రైతుకు ప్రభుత్వం అందిస్తున్నది. ఎస్సీ, సన్న చిన్న కారు రైతులకు రెండెకరాల మల్బరీ సాగుకు, పట్టు పురుగుల పెంపకానికి రూ.3.49 లక్షలను ప్రభుత్వం రాయితీపై అందజేస్తోంది. మల్బరీ మొక్కను ఒకసారి నాటితే 15 సంవత్సరాల వరకు దిగుబడి పొందవచ్చు. మల్బరీ తోటను రెండు లేదా మూడు భాగాలుగా సాగు చేస్తే ఏడాదిలో 10-11 పంటలు తీసే వీలుంటుంది. ఆధునిక పద్ధతులలో రేరింగ్‌ గది నిర్మించి తగినన్ని పరికరాలు ఏర్పాటు చేసుకుంటే దిగుబడి పెరిగే అవకాశాలున్నాయి. హైదరాబాద్‌లోని తిరుమలగిరి, జనగామ జిల్లాలోని జనగామలో పట్టుగూళ్లు మార్కెట్లున్నాయి. ఇక్కడ గూళ్ల నాణ్యతను బట్టి ధరలుంటాయి. బీవీ పట్టు గూళ్లపై కిలో రూ.75, సీ, బీ, గూళ్లపై కిలో రూ.40 ప్రభుత్వం ప్రోత్సాహంగా అందజేస్తోంది. ఏడాదికి 20-30 వేలు పెట్టుబడి పెడితే రూ.6 లక్షలు వరకు సంపాదించుకొనేందుకు అవకాశాలున్నాయని అధికారులు పేర్కొంటున్నారు.
అధిక లాభాలు
ఎకరంలో మల్బరీ సాగు చేసి పట్టుగూళ్లు పెంచడం వల్ల 45 రోజుల్లోనే రూ. 2.84 లక్షలు ఆదాయం వచ్చింది. గతంలో పత్తి సాగు చేసేవాడిని. ప్రభుత్వం ప్రోత్సహిస్తున్నదని ఈ ఏడాది పట్టు సాగు చేశా. వరి, పత్తి పంటలకు ప్రత్యామ్నాయం మల్బరీ పంట.
ఎం.ముకుందరెడ్డి, లక్ష్మీపురం రైతు
మల్బరీ సాగు మేలు
సన్న, చిన్నకారు రైతులకు మల్బరీ సాగు ఎంతో లాభదాయకం. పెట్టుబడి తక్కువ. ప్రభుత్వ రాయితీల కారణంగా అధిక లాభాలు కూడా పొందే వీలుంటుంది. పత్తి సాగు చేపట్టి చేతులు కాల్చుకునే కంటే మల్బరీ సాగు చేసి, పట్టు గూళ్లు పెంచకోవడం శ్రేయస్కరం.
Credits : Andhrajyothi

‘వీల్‌హో.. జయహో!

తేలిగ్గా కలుపు తీసే ‘వీల్‌హో’ యంత్రాన్ని 2015లో జాతీయ వ్యవసాయ ఇంజనీరింగ్‌ సంస్థ, భోపాల్‌ తయారు చేసింది. రైతులకు ఎంతో మేలు చేస్తున్న ఆ యంత్రం విశేషాలు.
వ్యవసాయ పనుల్లో కలుపు తీయడం ఎంతో ప్రధానం. కలుపు తీసేందుకు కూలీల లభ్యత, కూలీ ఖర్చుల వంటి సమస్యలు రైతులను నిత్యం వెంటాడుతూ వుంటాయి. రోజుకు రూ.400 కూలీ చెల్లించినా పనిలో నాణ్యత అంతంత మాత్రమే. దీంతో రైతులకు చివరకు నష్టమే మిగులుతోంది. ఈ సమస్యను దృష్టిలో వుంచుకుని భోపాల్‌లోని జాతీయ వ్యవసాయ ఇంజనీరింగ్‌ సంస్థ ‘వీల్‌హో’ను రూపొందించింది. ఇనుముతో తయారైన ఈ రెండు చక్రాల యంత్రాన్ని తేలిగ్గా నడిపేందుకు హ్యాండిల్‌ అమర్చారు. యంత్రం వెనుకభాగాన కర్రు వుంది. అరడుగు, అడుగు, అడుగున్నర సైజుల్లో కర్రును అమర్చుకోవచ్చు. మగవారే కాదు ఆడవారు కూడా ఈ యంత్రాన్ని తేలిగ్గా నడుపుతూ కలుపు తీసుకోవచ్చు. రైతులకు మేలు చేసే ఈ యంత్రం ధర రూ.1500 మాత్రమే. కూరగాయల తోటలు, ఆరుతడి పంటల్లో కూలీల కొరతను అధిగమించి, తక్కువ ఖర్చు, తక్కువ సమయంలో కలుపు తీసుకోవచ్చు. రోజుకు రెండు, మూడు ఎకరాల్లో కలుపు తీయవచ్చు. ఈ యంత్రాన్ని వాడడం వల్ల కలుపు మొక్క భూమిలోనే కలిసిపోయి భూసారాన్ని పెంచుతుందని, శారీరక శ్రమ కూడా తగ్గుతుందంటున్నారు అధికారులు.
Credits : Andhrajyothi

‘ సైౖలేజ్‌’తో పశుగ్రాసం పుష్కలం

  • సబ్సిడీపై రైతులకు పంపిణీ కరువు ప్రాంతాలకు వరం
కరువు ప్రాంతాలలో పశువులకు గ్రాసం కొరత తలెత్తకుండా ఉండేందుకు, పోషక విలువలతో మేతను సిద్ధం చేసేందుకు వీలుగా సైలేజ్‌ యంత్రాలను రాష్ట్ర ప్రభుత్వం రాయితీపై పశుసంవర్ధక శాఖ ద్వారా అంద జేస్తోంది. దీనిని రైతులకు యూనిట్‌గా కానీ, వ్యక్తిగతంగా కానీ అందజేస్తారు. మూడు కేటగిరీలలో లభించే ఈ యంత్రం మెగా సైలేజ్‌ పరికరం విలువ ఏకంగా రూ.4 కోట్లు వరకు ఉండగా, అందులో రూ.3 కోట్లు ప్రభుత్వం రాయితీ ఇస్తోంది. మీడియం సైలేజ్‌ యంత్రం విలువ రూ.కోటి ఉండగా అందులో రూ.75 లక్షలు సబ్సిడీ ఉంటుంది. ఇక మినీసైలేజ్‌ యంత్రం విలువ రూ.12 లక్షలు ఉండగా అందులో రూ.9 లక్షలు రాయితీగా వర్తిస్తుంది. మిగతా మొత్తాన్ని రైతు వాటాగా చెల్లించాలి. మొక్కజొన్న, పాతర గడ్డిని ఈ యంత్రం తగు మోతాదులో కట్‌ చేసి ప్యాకింగ్‌ చేసే సామర్థ్యం ఉంది. ఇందులో మెగా యంత్రానికి ఏకంగా 400 కేజీల ప్యాకింగ్‌ సామర్థ్యం వుంది. ఇది రోజుకు 10 ఎకరాలలో గడ్డిని కత్తిరిస్తుంది. మీడియం సైజు యంత్రం 150 కేజీల ప్యాకింగ్‌ సామర్థ్యంతో రోజుకు ఐదు ఎకరాలలో గడ్డిని కోస్తుంది. మినీ యంత్రం 80 కేజీల ప్యాకింగ్‌ సామర్థ్యంతో రోజుకు రెండు ఎకరాలలో గడ్డిని కోస్తుంది.
ఈ యంత్రం ప్యాకింగ్‌ చేసిన గడ్డి పోషక విలువలు ఏ మాత్రం తగ్గకుండా ఏడాదిన్నర పాటు నిల్వ వుంచే వీలుంది. చిన్న కమతాలు అధికంగా వున్న మన రాష్ట్రంలో రైతులు మీడియం, మినీ యంత్రాలపై ఆసక్తి చూపుతున్నారు.
పాడి రైతులకు మేలు
సైలేజ్‌ యంత్రాల వల్ల పాడి రైతులకు ఎంతో ప్రయోజనం చేకూరుతుంది. వరి, జొన్న గడ్డిని గాలి తగిలేలా ప్యాకింగ్‌ చేయడం వల్ల అందులో మాంసపు తరహా పోషకాలు ఉత్పత్తి అవుతాయి. ఈ సైలేజ్‌ పాడి పశువులకు దాణాగా అందించడం వల్ల పాల ఉత్పత్తి పెరిగే అవకాశం ఉంటుందని అధికారులు చెబుతున్నారు. దీని వల్ల పూటకు కనీసం ఒక లీటరు వరకు పాల దిగుబడి పెరుగుతుందని చెబుతున్నారు. పైగా పెద్ద రైతులు ఈ సైలేజ్‌ గడ్డి మిశ్రమాన్ని రాయితీ ధరలకు అమ్ముకోనే అవకాశం కూడా వుంటుందని భావిస్తున్నారు.
 ఆంధ్రజ్యోతి ప్రతినిధి, నెల్లూరు వ్యవసాయం
ప్రభుత్వం సబ్సిడీపై అందిస్తున్న అధునాతన సైలేజ్‌ యంత్రం పాడి రైతులకు వరప్రదాయినిగా మారనుంది, చిన్నకమతాలు అధికంగా వున్న తెలుగు రాష్ట్రాల రైతులకు మేలు చేసే సైలేజ్‌ యంత్రం విశేషాలు.
Credits : Andhrajyothi

కోకో సాగు భళా

  • కొబ్బరిలో అంతరపంటగా సాగు
  • కోనసీమకు తరగని ఆదాయం
కోనసీమ కొబ్బరి రైతులకు కోకో సాగు లాభాలను తెచ్చిపెడుతోంది. కొబ్బరిలో అంతరపంటగా కోకోను సాగు చేస్తూ తక్కువ ఖర్చుతో అధిక లాభాలు గడిస్తున్నారు. ఉద్యానవన శాఖ కోకో సాగుకు ప్రోత్సాహకాలు అందించడం రైతులకు వరంగా మారింది.
కోకోను కేడ్బరీ చాక్లెట్లు, ఐస్‌క్రీమ్స్‌ వంటి ఉత్పత్తుల్లో ఉపయోగిస్తుంటారు. అంతర్జాతీయంగా మంచి గిరాకీ ఉండ డంతో కోనసీమ రైతులు కోకో సాగుపై దృష్టి పెట్టారు. కొబ్బరితోటల్లో అంతరపంటగా కోకో సాగు చేసేందుకు హెక్టారుకు రూ.20వేలు వంతున ఉద్యానవన శాఖ ప్రోత్సాహకంగా రైతులకు అందిస్తున్నది. సబ్సిడీపై రెండు రూపాయలకే కోకో మొక్కను అందిస్తున్నది. మూడేళ్లపాటు హెక్టారుకు రూ.6వేలు వంతున కోకో మొక్కల ఎదుగుదలకు వీలుగా ఆకులను తొలగించేందుకు రైతులకు ప్రభుత్వం సాయం అందిస్తోంది. వీటితోపాటు చీడపీడల నివారణకు ప్రభుత్వ పథకాలు ద్వారా కూడా ప్రోత్సాహకాలు అందిస్తున్నారు. ఈ నేపథ్యంలో కోనసీమలోని అయినవిల్లి లంకకు చెందిన విద్యావేత్త విళ్ల దొరబాబు తన 24 ఎకరాల కొబ్బరితోటలో కోకోను అంతరపంటగా సాగు చేస్తూ లాభాలు గడిస్తున్నారు. ప్రభుత్వం రాయితీపై అందించిన కోకో మొక్కలను ఎకరాకు 225 చొప్పున నాటారు. రెండున్నరేళ్ల అనంతరం ఏపుగా పెరిగిన కోకో మొక్కలు ఆదాయాన్ని అందించడం మొదలెట్టాయి.
ఒక్కో కోకో మొక్కకు సగటున కిలో గింజలు ఉత్పత్తి అవుతాయి. మొక్కలు దిగుబడికి రావడాన్ని గమనించిన రైతులు ఆ సమాచారాన్ని ఉద్యానవన శాఖాధికారుల ద్వారా కోకో గింజలు కొనుగోలు చేసే ఏజెన్సీలకు అందిస్తారు. దీనిపై ఆ ఏజెన్సీలకు చెందిన ప్రతినిధులు నేరుగా ఎంపికచేసిన ప్రాంతాలతో పాటు రైతుల పొలాల వద్దకు కూడా వచ్చి శుద్ధిచేసిన గింజలను కొనుగోలు చేసి తరలించుకుపోతారు. గతంలో అంతర్జాతీయ మార్కెట్‌లో కిలో రూ.260 ఉండే కోకో గింజలు ధర ప్రస్తుతం రూ. 180 ఽమాత్రమే పలుకుతోంది. ధర తగ్గడం పట్ల రైతులు కొంత నిరాశకు గురవుతున్నారు. ప్రధానంగా కేడ్బరీ కంపెనీకి చెందిన మార్కెటింగ్‌ అధికారులు రైతుల వద్దకే వచ్చి వీటిని కొనుగోలు చేసుకుపోవడం రైతులకు పెద్ద ఊరట. కోకో సాగుతో ఎంత లేదన్నా ఎకరానికి 20 నుంచి 30 వేల రూపాయల వరకు ఆదాయం వస్తుంది. యేడాదిలో రెండుసార్లు దిగుబడి వస్తుంది.
22 ఏళ్లుగా సాగు
ఎంబీఏ, బీఎల్‌ చేసినా వ్యవసాయం అంటే నాకు ఆసక్తి. 22 ఏళ్లుగా కొబ్బరితోటలో కోకో సాగు చేస్తున్నాను. ప్రారంభంలో కోకో గింజల మార్కెటింగ్‌ ఇబ్బందిగా వుండేది. కొనుగోలు చేసేవారు లేకపోవడంతో పంటను వదిలేసిన సందర్భాలూ వున్నాయి. ఉద్యానవన శాఖ చొరవతో ఇప్పుడు మార్కెటింగ్‌ ఇబ్బందులు లేవు. పైగా రాయితీలు కూడా ఇస్తున్నారు. అంతరపంటగా కోకో సాగు కొబ్బరి రైతులకు వరం.
Credits : Andhrajyothi

పిట్ట కొంచెం..లాభాలు ఘనం!

  • కంజు పిట్టల పెంపకం.. కడక్‌నాథ్‌, దేశీ కోళ్లతో అదనపు ఆదాయం
  • మహారాష్ట్ర, ఆంధ్రప్రదేశ్‌ రాష్ర్టాలకు సరఫరా
కంజు పిట్టలతో పాటు కడక్‌నాథ్‌ కోళ్లు, నాటు కోళ్లు పెంచుతూ లాభాలు గడిస్తున్నారు ఆదిలాబాద్‌కు చెందిన రిటైర్డ్‌ ఉద్యోగి పండరి యాదవ్‌. ఆంధ్రప్రదేశ్‌తో పాటు, మహారాష్ట్రలో కంజు మాంసానికి మంచి గిరాకీ వుండటంతో లాభాలకు ఢోకాలేదంటున్నారాయన.
మాంసాహారులకు కంజు పిట్ట మాంసం అంటే మహా ప్రీతి. ఆ మాంసానికి వున్న డిమాండ్‌ను గమనించారు రిటైర్డ్‌ ఉద్యోగి పండరియాదవ్‌. కంజుపిట్టల పెంపకాన్ని చేపట్టి ఫాంను దశలవారీగా విస్తరించారు పెంచిన కంజు పిట్టలను మహారాష్ట్ర, ఆంధ్రప్రదేశ్‌ రాష్ట్రాల్లో విక్రయుస్తున్నారు. ఆసక్తి వున్న రైతులకు కంజు పిల్లల్ని పొదిగించి అందజేస్తున్నారు. అందుకోసం గుడ్లు పొదిగే యంత్రాన్ని ఏర్పాట్లు చేసుకున్నారు. కంజుపిట్టలతో పాటు కడక్‌నాథ్‌, నాటుకోళ్లను కూడా పెంచుతూ అదనపు ఆదాయం పొందుతున్నారు ఆదిలాబాద్‌ జిల్లా కేంద్రానికి చెందిన నూకల పండరియాదవ్‌. ఆదిలాబాద్‌ జిల్లా బట్టి సావర్గాం గ్రామ పంచాయతీ పరిధిలో మొదట 1000 – 1500ల కంజుపిట్టలతో యూనిట్‌ను ప్రారంభించారాయన. ప్రారంభంలో నష్టాలు వచ్చినా వెనకడుగు వేయలేదు. 40 – 50 రోజుల్లో అమ్మకానికి వచ్చే కంజు పిట్టలకు మంచి దాణా వేసి పెంచడం మొదలుపెట్టారు. షెడ్డు నిర్మాణం, నీటి వసతి తదితర పనులకు ఖర్చు ఎక్కువగానే అయింది. అయితే ఏడాది తిరిగే సరికి లాభాలు రావడం మొదలయ్యాయన్నారు పండరి యాదవ్‌.
ఫోన్‌ల మీదే ఆర్డర్లు
ఆదిలాబాద్‌ నుంచి మహారాష్ట్ర, ఆంధ్రప్రదేశ్‌ రాష్ర్టాలకు కంజులతో పాటు పెంపకం పిల్లలను సరఫరా చేస్తున్నారు పండరి యాదవ్‌. ఫోన్‌ ద్వారా ఆర్డర్లు తీసుకుని ఆంధ్రప్రదేశ్‌లోని తిరుపతి, కడప, కర్నూల్‌, ఇతర ప్రాంతాలతో పాటు మహారాష్ట్రలోని నాగపూర్‌, యవత్‌మాల్‌ పట్టణాల్లో కంజులను విక్రయిస్తున్నారు. సొంతంగా ఏర్పాటుచేసుకున్న హేచరీలో ఆర్డర్లకు అనుగుణంగా గుడ్లను పొదిగించి, 21 రోజుల తర్వాత పిల్లలను సరఫరా చేస్తున్నారు. తొలుత కంజుపిట్టల పెంపకాన్ని ప్రారంభించిన పండరియాదవ్‌ అంచలంచెలుగా కడక్‌నాథ్‌, దేశీకోళ్ల పెంపకం చేపట్టి మెరుగైన ఫలితాలు సాధిస్తున్నారు. ఈయన ఫాంలో ప్రస్తుతం కడక్‌నాథ్‌ కోళ్లు గుడ్డు పెట్టే దశలో ఉన్నాయి. వీటి గుడ్లను కూడా పొదిగించి ఒక్కో పిల్లను రూ.120లకు, గుడ్డు ధర రూ.50 నుంచి రూ.60లకు విక్రయిస్తున్నారు. ప్రస్తుతం రోజుకు 100 నుంచి 150 గుడ్లు చేతికి వస్తున్నాయి. కిలో కోడి మాంసం డిమాండ్‌ను బట్టి రూ.1000 నుంచి రూ.1400ల వరకు అమ్ముతున్నారు. ఒక్కో కోడి 2 నుంచి 3 కిలోల వరకు బరువు వస్తుంది. ఈ లెక్కన ఒక్కో కోడి మీద రూ.3 వేల నుంచి రూ.3,400ల వరకు ఆదాయం వస్తున్నది. అలాగే దేశీకోళ్లను స్థానికంగా చికెన్‌ సెంటర్లలో, పెద్ద పెద్ద ఫంక్షన్‌లకు హోల్‌సేల్‌గా విక్రయిస్తూ అదనపు ఆదాయం పొందుతున్నారు ఈ రైతు.
కంజులను పెంచేదిలా..
కంజు పిట్టలను పెంచే ఆసక్తి ఉన్న రైతులు తూర్పు, పడమర దిశగా బాగా గాలి వీచేట్లు షెడ్‌ ఏర్పాటు చేసుకోవాలి. షెడ్‌ చుట్టూ సన్నటి జాలీ అమర్చుకుని, లోపల గదులను ఏర్పాటు చేసుకోవడానికి రూ.5 నుంచి రూ.6 లక్షలు ఖర్చవుతుంది. దాణా, విద్యుత్‌, నిర్వహణ, ఇతర ఖర్చులు పక్షుల సంఖ్యను బట్టి పెరుగుతాయి. 7 నుంచి 10 రూపాయల ధరకు కంజు పిట్టల పిల్లలు దొరుకుతాయి. 40 రోజులు పెంచిన తర్వాత 250 నుంచి 400ల గ్రాముల వరకు బరువు పెరుగుతాయి. మార్కెట్లో డిమాండ్‌ను బట్టి రూ.50 నుంచి రూ.60 వరకు ఒక్కో కంజు పిట్ట ధర పలుకుతుంది. వెయ్యి పక్షులను పెంచితే ఖర్చులు పోను 40 రోజుల్లోనే రూ.20 వేల వరకు ఆదాయం వస్తుంది. వాతావరణ పరిస్థితులు, మార్కెట్‌ డిమాండ్‌ను బట్టి పక్షుల సంఖ్యను పెంచుకుంటే మరింత ఆదాయం వచ్చే అవకాశముంది.
ఆర్డర్లు పెరుగుతున్నాయి
రిటైర్‌ అయ్యాక ఖాళీగా వుండటం ఎందుకని ఈ ఫాం ప్రారంభించాను. కంజు పిట్టలకు మంచి గిరాకీ వుంది. ఆర్డర్లకు కొదవ లేదు. వాటికి తోడు కడక్‌నాథ్‌ కోళ్ల నుంచి కూడా మంచి ఆదాయం వస్తున్నది. శాస్త్రీయంగా కోళ్లను పెంచుకుంటే కంజు పిట్టల పెంపకం ఎంతో లాభదాయకం.
 ఎన్‌. పండరియాదవ్‌