పుట్టగొడుగుల పెంపకం.. నిత్యం ఆదాయం

స్వయంకృషితో పాలపుట్టగొడుగులు పెంచుతూ లాభాలు ఆర్జిస్తున్నారు కృష్ణా జిల్లా మొవ్వ మండలం ఆవిరిపూడి గ్రామానికి చెందిన మేడిశెట్టి ప్రసన్న. ఆరోగ్యశాఖలో సూపర్‌వైజర్‌గా పనిచేస్తూనే  తల్లిదండ్రుల ప్రోత్సాహంతో పుట్టగొడుగులు పెంచుతున్నారామె.
తక్కువ పెట్టుబడితో, కూలీల ఖర్చు లేకుండా పుట్టగొడుగుల్ని ఎవరైనా పెంచుకోవచ్చు. పట్టణాల్లో పుట్టగొడుగులకు మంచి గిరాకీ వుండటంతో మార్కెటింగ్‌ ఇబ్బందులు కూడా లేవు. దీంతో రాష్ట్రవ్యాప్తంగా పలువురు పుట్టగొడుగులు పెంచుతూ ఆదాయం పొందుతున్నారు. తొలుత ఎండుగడ్డిని అంగుళం సైజులో ముక్కలు ముక్కలుగా కట్‌ చేసుకోవాలి. అనంతరం గడ్డిని ఉడకబెట్టాలి. ఉడకబెట్టిన గడ్డిని 20 శాతం తేమ ఉండే విధంగా ఆరబెట్టుకోవాలి. పాలిథిన్‌ కవర్లను సంచులుగా తయారుచేసుకుని ఆరబెట్టిన గడ్డిని ఐదు వరసలుగా నింపాలి. సంచుల్లో కొద్దిపాటి గడ్డివేసి దానిపైన విత్తనాలు, మరలా దానిపై గడ్డి, దానిపై విత్తనాలు ఇలా ఐదు వరసలుగా సంచిని నింపుకోవాలి. ఈ విధంగా తయారు చేసిన సంచిని గాలి ఆడకుండా గట్టిగా మూసి ఉంచాలి. ఆ సంచికి 25 చిన్న చిన్న రంధ్రాలు పెట్టాలి. ఆ సంచులను 21 రోజులపాటు చీకటి గదిలో ఉంచాలి. పుట్టగొడుగుల తయారీలో భాగంగా మట్టిని సేకరించి దానిని నానబెట్టి తర్వాత ఉడకబెట్టాలి. ఉడకబెట్టిన మట్టిలో చాక్‌ పౌడర్‌ కలపాలి. తదుపరి డార్క్‌ రూమ్‌లో ఉంచిన బ్యాగులను 21 రోజుల తర్వాత బ్యాగును సగానికి కట్‌ చేసి తయారుచేసుకున్న మట్టిని నింపాలి.
అనంతరం ఈ బ్యాగులను వెలుతురు గదుల్లోకి మార్చాలి. 24 గంటల గడిచిన తర్వాత రోజుకు రెండుపూటలా పల్చగా తడుపుతూ ఉండాలి. 15 రోజులకు పుట్టగొడుగులు మొలకెత్తుతాయి. ఈ ప్రక్రియ మొత్తంలో 40 రోజులకు పుట్టగొడుగులు పూర్తిస్థాయిలో తయారవుతాయి. తయారైన పుట్టగొడుగులు రెండు నెలలపాటు కోసుకోవచ్చు. కేజీ విత్తనాలతో ఐదు కిలోల పుట్టగొడుగులు తయారవుతాయి. తయారైన పుట్టగొడుగులను ఆన్‌లైన్‌ ద్వారా కిలో రూ.200లకు హైదరాబాద్‌, కాకినాడ, విజయవాడలో విక్రయిస్తున్నట్లు తెలిపారు. కొనుగోలుదారులు తమ అకౌంట్‌లో ముందుగానే డబ్బులు వేస్తారని, అనంతరం వారి అడ్రస్‌ ప్రకారం సరుకులు పంపిస్తామని తెలిపారు.
ఆంధ్రజ్యోతి ప్రతినిధి, ఆవిరిపూడి (కూచిపూడి)
నెలకు 20 వేల ఆదాయం
కూలీలపై ఆధారపడకుండా కుటుంబసభ్యులే పనిచేసుకుంటే నెలకు రూ.20 వేల వరకు ఆదాయం లభిస్తున్నది. ప్రభుత్వం ప్రోత్సహిస్తే ఎక్కువ విస్తీర్ణంలో పుట్టగొడుగుల పెంపకాన్ని విస్తరించే ఆలోచనలో ఉన్నాను. –
ప్రసన్న
Credits : Andhrajyothi

లాభాల్లో రారాజు ఆ కాకర

  • తెలుగు రాష్ట్రాలు, కర్ణాటక, మహారాష్ట్రలో డిమాండ్‌..
  • తూర్పుగోదావరి జిల్లాలో 700 ఎకరాల్లో సాగు
కూరగాయల్లో రారాజు ఆకాకర. పోషకాల గనిగా పేరుండటం, శాకాహారులతో
పాటు మాంసాహారులు కూడా ఎక్కువగా వినియోగిస్తుడడంతో ఆకాకరకు
తరగని డిమాండ్‌ వుంది. నిరంతరం మంచి ధర పలికే ఆకాకరను సాగు చేస్తూ గణనీయమైన లాభాలు గడిస్తున్నారు తూర్పుగోదావరి జిల్లా గొల్లప్రోలు, ప్రత్తిపాడు మండలాల రైతులు.
కూరగాయల సాగు నిరంతరం ఆదాయం తెచ్చిపెట్టినా కొన్ని కూరగాయల ధరలు ఒక్కోసారి పాతాళానికి పడిపోతాయి. ఫలితంగా రైతులు తీవ్రంగా నష్టపోతున్నారు. ఈ పరిస్థితిని గమనించిన తూర్పుగోదావరి జిల్లాకు చెందిన పలువురు రైతులు నిత్యం మంచి డిమాండ్‌, ధర వుండే ఆకాకర సాగు ప్రారంభించారు. మంచి రుచితో పాటు పోషకాలు పుష్కలంగా వుండటంతో ఆకాకరకు పట్టణాల్లో మంచి గిరాకీ వుంది. దానికి తోడు మంచి ధర పలకడంతో తూర్పుగోదావరి జిల్లా గొల్లప్రోలు మండలం వన్నెపూడి, కొడవలి, తాటిపర్తి గ్రామాలు, ప్రత్తిపాడు మండలం పోతులూరు గ్రామ రైతులు 700 ఎకరాల్లో అకాకర సాగు చేస్తున్నారు. 15 ఏళ్ల క్రితం కొద్ది విస్తీర్ణంలో ప్రారంభమైన ఈ పంట సాగు ఇప్పుడు వేగంగా విస్తరిస్తున్నది. కిలో వంద రూపాయల నుంచి 250 రూపాయలకు పైగా ధర పలికే ఆకాకర సాగు వల్ల అధిక ఆదాయం వచ్చినా ఖర్చులు, శ్రమ కూడా ఎక్కువే అంటున్నారు రైతులు.
 
పందిరి కోసం అధిక వ్యయం
ఆకాకర రైతులు సొంతంగానే విత్తనాన్ని తయారు చేసుకుంటారు. ఒక పొలంలో పండిన పంట నుంచి విత్తనాలు అదే పొలంలో నాటరు. అలా చేస్తే సరిగా మొలకెత్తదని రైతుల నమ్మకం. తీగ జాతికి చెందిన ఈ పంట సాగులో అధిక భాగం పందిరి వేసేందుకే ఖర్చవుతుంది. మొక్కలు పందిరికి ఎంత బాగా అల్లుకుంటే అంత అధిక దిగుబడి వస్తుంది. దీని సాగుకు ఎకరానికి సుమారు లక్ష నుంచి 1.20 లక్షల వరకూ వ్యయం అవుతుంది. పందరి వేసేందుకే రూ.40 నుంచి 55 వేల వరకూ ఖర్చు చేయాలి. పంట వేసిన 100 రోజులకు దిగుబడులు ప్రారంభమవుతుంది. వారానికి ఒకసారి కాయలను కోస్తారు. ఆరునెలలు పాటు నిరంతరాయంగా దిగుబడులు వస్తాయి. ఎకరానికి సగటున మూడు టన్నుల వరకూ దిగుబడి లభిస్తుంది. పరిస్థితులు అనుకూలిస్తే అత్యధికంగా 4.5 టన్నుల వరకూ దిగుబడి వస్తుందని రైతులు తెలిపారు. విత్తనం వేసిన ఏడాది కాకుండా మరుసటి ఏడాది మొక్కలకు ఉన్న దుంపలతో సాగును కొనసాగిస్తారు. పంట దిగుబడి ప్రారంభంలో 10 కిలోల ఆకాకర ధర రూ.1500 వుంటుంది. పంట చివరి దశకు చేరే కొద్దీ రేటు తగ్గుతూ వచ్చి రూ.500కు చేరుకుంటుంది.
ఈ ప్రాంతంలో పండిన పంటలో 90 శాతం శ్రీకాకుళం, విశాఖపట్టణం, విజయవాడ, గుంటూరు, ఇచ్చాపురం, అనకాపల్లి, గుంటూరు, ఒంగోలు మార్కెట్లతో పాటు తెలంగాణాలోని హైదరాబాదు, ఖమ్మం, వరంగల్‌ మహారాష్ట్రలోని ముంబయి, కర్నాటకలోని బళ్లారి, బెంగుళూరు తదితర మార్కెట్లకు ఎగుమతి అవుతున్నది. వ్యాపారులు రైతుల వద్ద పంట కొనుగోలు చేసి వేరే ప్రాంతాలకు లారీల మీద తరలిస్తున్నారు.
– ఆంధ్రజ్యోతి ప్రతినిధులు,
పిఠాపురం, గొల్లప్రోలు రూరల్‌
ఎకరాకు లక్ష ఆదాయం
15 ఏళ్లుగా ఆకాకర సాగు చేస్తున్నాం. తుఫాన్లు వస్తే తప్ప ఏటా లాభం వస్తూనే ఉంది. అన్ని ఖర్చులూ పోను ఎకరాకు సుమారు లక్ష ఆదాయం వస్తుంది. గతంలో ఆకాకరను పందిరి పంటగా గుర్తించి సబ్సిడీ ఇచ్చేవారు. ఇప్పుడు అది తీసేశారు. విత్తనాలపై రాయితీ ఇచ్చి, సబ్సిడీ ఇస్తే మరింతమంది రైతులు ఈ పంట సాగు చేస్తారు.
– కందా దొరబాబు, కె. చంటిబాబు,
ఆకాకర రైతులు, వన్నెపూడి
మధుమేహానికి చెక్‌
కాకరకాయను పోలి వుండే ఆకాకర పోషకాల గని. ఇందులో శరీరాన్ని శుద్ధి చేసే ఫినోలిక్‌ అధికంగా లభిస్తుంది. దీనికి శరీరంలోని మాలిన్యాలను తొలగించే శక్తి వుండటంతో కేన్సర్‌, ఊబకాయం వంటి వ్యాధులు దరిచేరకుండా వుంటాయి. అకాల వృద్ధాప్యాన్ని ఆకాకర దరిచేరకుండా చేస్తుంది. ఇందులో లభించే లుటిన్‌ వంటి సెరిటోనాయిడ్స్‌ వల్ల కంటి జబ్బులు, గుండె జబ్బులు వచ్చే అవకాశం తక్కువ. రక్తంలో చక్కెర శాతాన్ని తగ్గిస్తుంది. తద్వారా మధుమేహం దరిచేరకుండా చేస్తుంది. వందగ్రాముల ఆకాకరలో కేవలం 17 గ్రాముల కేలరీలు మాత్రమే వుంటాయి. పీచుపదార్ధం కూడా అధికంగా వుండటంతో జీర్ణశక్తిని పెంపొందించడంతో పాటు అలర్జీలను కూడా దరిచేరనివ్వదంటున్నారు నిపుణులు.
Credits : Andhrajyothi

మల్చింగ్‌తో పుచ్చ సాగు

  • ఎకరానికి 25 టన్నుల దిగుబడి .. ఐదు లక్షల లాభం
తనకున్న పదెకరాల సొంత భూమితో పాటు మరో 10 ఎకరాల భూమిని కౌలుకు తీసుకొని గతేడాది నవంబర్‌లో వసుధ రకం పుచ్చను రెండు దఫాలుగా విత్తారు తిరుపతిరెడ్డి. 20 ఎకరాల్లో మల్చింగ్‌ (పాలిథిన్‌ కవర్‌ కప్పు) పద్ధతిలో సాగుచేసి డ్రిప్‌ అమర్చాడు. దీనికిగాను ఒక్కో ఎకరానికి పెట్టుబడిగా విత్తనాలు, పేపర్‌, డ్రిప్‌, వేపపిండి, ఆముదం పిండి, పొటాష్‌, డీఏపీ, యూరియా మొత్తం రూ.70 వేలు ఖర్చయింది. మల్చింగ్‌ విధానంలో కూలీల ఖర్చుతోపాటు ఎరువులు, పురుగు మందుల ఖర్చు తగ్గింది. 75 రోజుల అనంతరం ఎకరానికి మొదటి విడతగా 15 టన్నుల పంట దిగుబడి వచ్చింది. పదెకరాలలో తొలి విడతగా 150 టన్నులు పంట దిగుబడి వచ్చింది. ప్రస్తుత మార్కెట్‌లో టన్ను రూ. ఏడు వేలు ఉండగా, పంట అమ్మగా రూ.10 లక్షలు వచ్చాయి. ఖర్చులు పోను ఐదు లక్షలు నికర లాభం ఆర్జించారు ఈ రైతు. మండల వ్యాప్తంగా ములకలపల్లి, కమలాపురం, జగన్నాథపురం, తిమ్మంపేట, రాజుపేట తదితర గ్రామాల్లో 200 ఎకరాల్లో రైతులు పుచ్చ పంట సాగు చేశారు. వారందరిలో తిరుపతిరెడ్డి ఒక్కరే మల్చింగ్‌ విధానంలో సాగుచేసి లాభం గడించడం విశేషం. వసుధ రకం పుచ్చ సాగుకు ఎకరానికి ఐదు ట్రక్కుల పశువుల ఎరువు, 50 కేజీల వేపపిండి, 50 కేజీల ఆముదం పిండి, 50 కేజీల పొటాష్‌, 50 కేజీల డీఏపీ, యూరియా 100 కేజీలు వాడాను. డ్రిప్‌, మల్చింగ్‌ విధానంతో ఎకరానికి 10 నుంచి 15 టన్నుల పంట దిగుబడి వచ్చింది. సాధారణ పద్ధతిలో ఎకరానికి 10 నుంచి 12 టన్నుల పంట మాత్రమే దిగుబడి వస్తుందన్నారు ఆ రైతు.
మూస పద్ధతికి స్వస్తి పలికి ఆధునిక పద్ధతిలో వ్యవసాయం చేస్తూ అరుదైన ఫలితాలు సాధిస్తున్నారు భద్రాద్రి కొత్తగూడెం జిల్లా ములకలపల్లి మండల కేంద్రానికి చెందిన గాడి
తిరుపతిరెడ్డి. మల్చింగ్‌ పద్ధతిలో పుచ్చ సాగు చేసి 75 రోజుల్లో ఐదు లక్షలు ఆర్జించారు ఆ రైతు.
ఆంధ్రజ్యోతి ప్రతినిధి,
ములకలపల్లి
Credits : Andhrajyothi

ఏజెన్సీకి రబ్బరు మెరుపులు!

  • మారేడుమిల్లిలో 90 హెక్టార్లలో సాగు
  • 40 ఏళ్ల తరువాత రబ్బరు కలప రెడీ
తూర్పుగోదావరి జిల్లా ఏజెన్సీ ప్రాంతంలో రబ్బరు తోటల సాగు గిరిజనుల జీవితాల్లో కొత్త వెలుగులు నింపుతోంది. మారేడుమిల్లి మండలం దేవరాపల్లి, పూజారి పాకలు గ్రామాల్లో 90 హెక్టార్లలో రబ్బరు సాగవుతున్నది. మార్కెట్‌లో మంచి ధర వస్తే రబ్బరు సాగు మరింత లాభదాయకం అంటున్నారు రైతులు.
మారేడుమిల్లి మండలంలోని దేవరాపల్లి గ్రామంలో కేంద్ర వాణిజ్య శాఖ ఆధ్వర్యంలో 1994-99 మధ్యలో 50 హెక్టార్లలో రబ్బరు తోటల సాగు మొదలైంది. ఒకేచోట రబ్బరు తోటల సముదాయం పథకం కింద 35 మంది గిరిజన రైతులతో రబ్బర్‌ గ్రోయర్స్‌ ట్రైబల్‌ వెల్ఫేర్‌ సొసైటీ ఏర్పాటుచేసి 50 హెక్టార్లలో రబ్బరు మొక్కల పెంపకం ప్రారంభించారు. 1998లో పూజారిపాకలలో మరో 40 హెక్టార్లలో 32 మంది రైతులు రబ్బరు సాగు చేపట్టారు. ఈ మొక్కలు వేసిన 10వ ఏడాది నుంచి 40 ఏళ్ల వరకు మాత్రమే పాలు వస్తాయి. మొదట్లో రబ్బరు రైతులకు ఆదాయం వుండదు కాబట్టి పని చేసిన రోజున, రోజుకు రూ.40 వంతున గౌరవ వేతనం చెల్లించారు.
2008 నుంచి చెట్లకు పాలు రావడం మొదలైంది. ఈ చెట్లు ఏపుగా పెరగడానికి యూరియా, పొటాషియం ఎరువుగా వేశారు. హెక్టారుకు సుమారు 490 చెట్ల వరకు ఉంటాయి. చెట్టు మొదటి భాగంలో పెచ్చులు ఊడేటట్టు కత్తితో కోస్తారు. అక్కడ నుంచి చిన్న దారి కింద వరకు గీస్తారు. అక్కడ ఒక కప్పును కడతారు. ఈ పాలు నెమ్మదిగా కారుతూ వచ్చి ఈ కప్పులో పడతాయి. వీటిని రెండు రోజులకు ఒకసారి తెల్లవారుఝామున మూడు నుంచి 7 గంటల వరకు సేకరిస్తారు. ఈ చెట్లకు ఆగస్టు నుంచి జనవరి వరకు మాత్రమే పాలు వస్తాయి. ఒక్కో చెట్టు నుంచి రోజుకు లీటరు నుంచి లీటరున్నర వరకు పాలు వస్తాయి.
ఈ ప్రాంతంలో రబ్బరు తోటలను ఐటీడీఏ 1968లోనే ఆరు వేల హెక్టార్లలో ప్రయోగాత్మకంగా చేపట్టింది. మార్కెట్‌ చేయలేకనో, పర్యవేక్షణ లోపమో కానీ కాలక్రమంలో ఆ తోటలను గాలికి వదిలేసింది. ప్రస్తుతం సుమారు 600 హెక్టార్లలో మాత్రమే చెట్లు మిగిలి ఉన్నాయి. వీటి లావు 100 సెంటీమీటర్లు అయ్యింది. వీటిని ప్రస్తుతం కలపగా ఉపయోగించుకోవచ్చు. రబ్బరు చెట్టు 40 ఏళ్ల తరువాత కలపగా బాగా ఉపయోగపడుతుంది. అయితే రబ్బరు కలపను ప్రొసెసింగ్‌ చేసే రబ్బరు ఉడ్‌ ఫ్యాక్టరీ కేరళలో మాత్రమే వుంది. మన దగ్గర ఆ అవకాశం లేకపోవడంతో రెండు వేల మంది రైతులు ఈ పంట నుంచి ఏ ఫలితం రాక వాటిని వదిలేశారు. ఐటీడీఏ చొరవ తీసుకుంటే పెరిగిన చెట్ల నుంచి వేలాది మంది రైతులకు ఆదాయం వస్తుంది.
రబ్బరుకు గతంలో కేజీకి రూ. 234 ధర వుండేది. ఇప్పుడు 126కు పడిపోయింది. వియత్నాం, మలేషియా, థాయిలాండ్‌ నుంచి దిగుమతులు పెరగడం ధరల పతనానికి కారణం. మన దేశంలో కేరళలో రబ్బరు అధికంగా సాగవుతుంది. వర్షపాతం ఎక్కువగా వుండి, ఉష్ణోగ్రతలు తక్కువగా వుండటం కేరళ ప్రత్యేకత. తూర్పు ఏజెన్సీలో తక్కువ వర్షపాతం, అధిక ఉష్ణోగ్రతలు కూడా రబ్బరు రైతులకు ప్రతికూలంగా మారాయన్నారు రబ్బర్‌ బోర్డు ఫీల్డ్‌ ఆఫీసర్‌ జగన్మోహన్‌రెడ్డి.
రబ్బరు తయారీ ఇలా..
రబ్బరు చెట్ల నుంచి సేకరించిన పాలను ప్రొసెసింగ్‌ యూనిట్లకు తీసుకువస్తారు. అక్కడ రెండు లీటర్లు నీళ్ళు, రెండు లీటర్లు పాలు కలిపి ఒక ట్రేలో వేస్తారు. అంతకుముందే 5 లీటర్ల నీళ్ళలో 50 మిల్లీలీటర్ల ఫార్మిక్‌ యాసిడ్‌ను కలిపి ఒక ట్రేలో ఉంచుతారు. అందులో 200 నుంచి 250 మిల్లీలీటర్ల ఫార్మిక్‌ యాసిడ్‌ కలిపిన నీళ్ళను పాలలో కలుపుతారు. ఒక రోజంతా ఆ ట్రేలోనే ఉంచుతారు. తెల్లవారేసరికి పెరుగులా తోడుకుంటుంది. ఒక తెల్లటి షీట్‌ వస్తుంది. దాన్ని మిషన్‌లో రోలింగ్‌ చేస్తారు. తరువాత ఒకరోజు ఆరబెడతారు. ఆ షీట్‌ను నాలుగు రోజుల పాటు స్మోక్‌ హౌస్‌లో పెడతారు. తరువాత అది తేనె కలర్‌లోకి మారుతుంది. షీట్‌ను వేరు చేసి మార్కెట్‌కు తరలిస్తారు. దాన్ని ఫ్యాక్టరీ వారు కొనుక్కొని రబ్బరు వస్తువులు తయారు చేస్తారు. దీన్ని సియట్‌, ఎంఆర్‌ఎఫ్‌ వంటి కంపెనీలు కొనుగోలు చేస్తాయి.
లాభదాయకమే
రబ్బరు సాగు లాభదాయకంగా ఉంది. రోజూ ఆరు నుంచి ఏడు గంటలు పనిచేస్తాం. ఎవరికి వారే రబ్బరు పాలు సేకరించి, షీట్లు తయారు చేసుకుంటున్నాం. ఈ మధ్యనే ఆరు టన్నుల రబ్బరు షీట్లు అమ్మాం. మంచి ధర వుంటే మరిన్ని లాభాలు వచ్చేవి.
– చిన్నారెడ్డి, లక్ష్మి, రైతులు, దేవరాపల్లి
– ఆంధ్రజ్యోతి ప్రతినిధి, రాజమహేంద్రవరం
Credits : Andhrajyothi

ఇక వేసవిలోనూ టమాటా

  • 45 డిగ్రీల సెంటీగ్రేడ్‌లోనూ పండే వంగడం సిద్ధం
  • అభివృద్ధి చేసిన ఇక్రిశాట్‌ శాస్త్రవేత్తలు
పటాన్‌చెరు, జనవరి 18: టమాటాలను ఇక వేసవిలోనూ పండించవచ్చు. 45 డిగ్రీల సెంటీగ్రేడ్‌ ఉష్ణోగ్రతలోనూ పండించ గలిగే టమాటా వంగడాన్ని ఇక్రిశాట్‌ శాస్త్రవేత్తలు కనుగొన్నారు. ప్రపంచ కూరగాయల పరిశోధన కేంద్రం శాస్త్రవేత్తలు అంతర్జాతీయ మెట్ట పంటల పరిశోధనా కేంద్రంలో టమాటాలో మెరుగైన వంగడాలను అభివృద్ధి చేశారు. ఇక్రిశాట్‌లో గురువారం నిర్వహించిన అంతర్జాతీయ సదస్సులో పాల్గొన్న వివిధ దేశాల శాస్త్రవేత్తలు, ప్రముఖ విత్తన కంపెనీల ప్రతినిధులు టమాటా వంగడాలను పరిశీలించారు. వర్షాకాలం, చలికాలంలోనే పండే టమాటా వేసవి కాలంలో కొండెక్కి కూర్చుంటోంది. మిగిలిన రోజుల్లో రూ.5కు లభించే కిలో టమాటా వేసవిలో రూ.100కు చేరుతోంది. ఆలుగడ్డ, ఉల్లి తర్వాత కూరల్లో తప్పనిసరి వేయాల్సి రావడంతో ప్రజలు ఎక్కువ ధరకూ కొనాల్సి వస్తోంది. దీంతో ఇక్రిశాట్‌ శాస్త్రవేత్తలు టమాటా వంగడాలపై ఐదేళ్లుగా విస్తృత పరిశోధనలు చేస్తున్నారు. కూరగాయల పరిశోధనా కేంద్రం రీజినల్‌ డైరెక్టర్‌ వార్విక్‌ ఎస్‌డౌన్‌ మాట్లాడుతూ.. వాతావరణ, మార్కెట్‌ పరిస్థితులకు అనుగుణంగా అభివృద్ధి చేసిన 3 రకాల టమాటా వంగడాలను రైతుల వద్దకు చేర్చేందుకు కృషి చేస్తున్నామన్నారు. అధిక ఊష్ణోగ్రతలను తట్టుకుని 45 డిగ్రీల సెల్సియన్‌లోనూ అధిక దిగుబడులు ఇచ్చే ఏవీటీఓ-1424 రకాన్ని అభివృద్ధి చేశామన్నారు. ఇక టమాటా పంటను తరచూ పీడిస్తున్న ఆకులకు వచ్చే పసుపు పచ్చ తెగులు, ఇతర వైరస్‌ తెగుల్లు, నల్లమచ్చలను తట్టుకునే ఏవీటీఓ-1609, ఏవీటీఓ-1617 రకాలను అభివృద్ధి చేశామన్నారు. ఇవి పరిశీలన దశలోనే ఉన్నాయని, రైతుల పొలాలకు చేరేందుకు మరింత సమయం పడుతుందన్నారు.
Credits : Andhrajyothi

మననేలపై ఆస్ట్రేలియా ద్రాక్ష

  •  ములుగు గిరిజన బిడ్డ విజయప్రస్థానం..
  • తెలంగాణను అగ్రగామిగా నిలుపుతానంటున్న నాయక్‌
ఆస్ట్రేలియా రకం ద్రాక్ష సాగుపై పరిశోధనలు చేసి విజయం సాధించారు జయశంకర్‌ భూపాలపల్లి జిల్లా ములుగు మండలం అన్నంపల్లికి చెందిన పోరిక హరికాంత్‌ నాయక్‌. వ్యవసాయంపై కోయంబత్తూర్‌ విశ్వవిద్యాలయంలో డాక్టరేట్‌ చేస్తున్న ఆ యువకుడు తమిళనాడు, కర్ణాటకల్లో ద్రాక్షపై పరిశోధనలు చేసి ప్రశంసలు అందుకున్నారు. ప్రభుత్వం ప్రోత్సహిస్తే వ్యవసాయంలో తెలంగాణను దేశంలోనే అగ్రగామిగా నిలుపుతానంటున్న ఆ గిరిజన బిడ్డ విజయగాథ ఇది.
ప్రత్యేక వాతావరణ పరిస్థితిలో మాత్రమే పండే ద్రాక్ష పంటపై పరిశోధనలు చేసి విజయం సాధించాడో తెలంగాణ గిరిజన బిడ్డ. ఆస్ర్టేలియా రకం ద్రాక్షను మనదేశ వాతావరణ పరిస్థితులకు అనుగుణంగా మలిచి, అధిక దిగుబడులు సాధించి అందరిచేత శభాష్‌ అనిపించుకుంటున్నాడు జయశంకర్‌ భూపాలపల్లి జిల్లా ములుగు మండలం అన్నంపల్లికి చెందిన పోరిక హరికాంత్‌. హైదరాబాద్‌ ఎన్‌.జి.రంగా వ్యవసాయ విశ్వవిద్యాలయంలో బిఎస్సీ చేసిన హరి కోయంబత్తూరు వ్యవసాయ విశ్వవిద్యాలయంలో ఎమ్మెస్సీ చేస్తూ సీనియర్‌ ఫెలోషి్‌పకు ఎంపికయ్యాడు. ప్రస్తుతం బెంగుళూరులోని ఐసీఏఆర్‌లో పీహెచ్‌డీ చేస్తున్నాడు.
ద్రాక్షపై దీక్ష..
రెడ్‌గ్లోబ్‌ రకం ద్రాక్ష ఆస్ట్రేలియాలో విరివిగా పండుతుంది. లావుగా, మంచి రంగులో, తీయగా వుంటే ఈ ద్రాక్షను భారత్‌లో సాగు చేయాలని కేంద్ర వ్యవసాయ శాఖ భావించింది. దీని సాగుకు కోయంబత్తూరు వాతావరణం అనుకూలంగా ఉన్నట్లు గుర్తించారు. ఈ రకం పంటను అభివృద్ధి చేసే పనిని అక్కడి వ్యవసాయ విశ్వవిద్యాలయానికి అప్పగించారు. అక్కడే ఎమ్మెస్సీ చేస్తున్న హరికాంత్‌ నాయక్‌ ఆ బాధ్యతలు స్వీక రించాడు. విశ్వవిద్యా లయంలో కొంత భూమిని తీసుకుని ఆ విత్తనాలు నాటి సాగు ప్రారం భించాడు. ఎర్రమట్టి నేల, నీరు, తేమతో కూడిన అనుకూల వాతావరణ పరిస్థితులను కల్పిస్తూ ప్రత్యేకమైన యాజమాన్య పద్ధతిలో ఆస్ట్రేలియా రకం ద్రాక్షను విజయవంతంగా సాగు చేశాడు నాయక్‌.
మన ద్రాక్షతో పోల్చితే రెడ్‌గ్లోబ్‌ ఆకారంలో పెద్దది. నీరు శాతం తక్కువగా ఉంటుంది. బరువు కూడా ఎక్కువ తూగుతుంది. ఎక్కువ కాలం పాడు కాకుండా వుంటుంది. ఈ రకం ఆస్ర్టేలియాలో ఏడాదికి ఒక్కసారి మాత్రమే పండిస్తుంటే మనదేశంలో మాత్రం రెండుసార్లు కోతకు వస్తుంది. ఇన్ని సుగుణాలున్న ఆస్ట్రేలియా రకం ద్రాక్షకు విదేశాల్లో మంచి డిమాండ్‌ వుంది. ఈ ద్రాక్షకు కిలో రూ.350 వరకు ధర పలుకుతోంది. రైతులకు క్షేత్ర స్థాయిలో కిలోకు 150 వరకు ఆదాయం వస్తుంది. డిమాండ్‌ను బట్టి ఎకరం సాగు చేస్తే రూ.15 లక్షల వరకు ఆర్జించవచ్చని హరికాంత్‌ నాయక్‌ తెలిపాడు.
రెడ్‌గ్లోబ్‌ రకం ద్రాక్షను భారత వాతావరణ పరిస్థితిలో పండించి అధిక దిగుబడి సాధించిన నాయక్‌ను ఇజ్రాయిల్‌ ప్రభుత్వం తమ దేశానికి ఆహ్వానించింది. ఎడారి ప్రాంతమైన ఇజ్రాయిల్‌లో గ్రీన్‌హౌస్‌, బిందుసేద్యం, పూర్తి యాంత్రీకరణ పద్ధతుల్లో అధిక దిగుబడులు సాధిస్తున్న తీరును ఆయన అధ్యయనం చేశారు. వ్యవసాయరంగంలో నాయక్‌ చేసిన కృషిని గుర్తించిన తమిళనాడు ప్రభుత్వం హరికాంత్‌ను బెస్ట్‌ రీసెర్చ్‌ అవార్డుతో సత్కరించింది. ఆంధ్రప్రదేశ్‌ ప్రభుత్వం యంగ్‌ సైంటిస్ట్‌ అవార్డుకు ఎంపికచేయగా, ఫాదర్‌ ఆఫ్‌ గ్రీన్‌ రెవెల్యూషన్‌ ఎంఎ్‌స. స్వామినాధన్‌ చేతులమీదుగా నాయక్‌ ఆ పురస్కారాన్ని అందుకున్నారు. తమిళనాడు, ఆంధ్రప్రదేశ్‌ రాష్ట్ర మంత్రులు, ప్రభుత్వ ముఖ్య కార్యదర్శితోపాటు పలువురు సీనియర్‌ శాస్త్రవేత్తలు హరికాంత్‌ సాగుచేసిన ద్రాక్ష తోటను సందర్శించి, విరగగాసిన ద్రాక్ష గుత్తులను చూసి అబ్బురపడ్డారు.
రైతే రాజు
ఇజ్రాయిల్‌ తరహా సాగు పద్ధతులు అనుసరిస్తే తెలంగాణ రైతులు రాజులు అవుతారు. ప్రభుత్వం ప్రోత్సాహం అందిస్తే అరుదైన ద్రాక్ష, యాపిల్‌తో పాటు అంతర్జాతీయంగా డిమాండ్‌ వున్న కూరగాయలను తెలంగాణలో సాగు చేస్తాను. సేద్యంలో తెలంగాణను దేశంలోనే అగ్రగామిగా నిలిపేందుకు ప్రయత్నం చేస్తాను.
– హరికాంత్‌ నాయక్‌
Credits : Andhrajyothi

మన ఇల్ల్లు.. మన కూరగాయలు

పట్టణ ప్రజలు వారి ఇళ్లలో సేంద్రియ పద్ధతుల్లో కూరగాయలు, ఆకుకూరలు పండించుకునేందుకు వీలుగా తెలంగాణ ప్రభుత్వం సబ్సిడీపై విత్తనాలు, సహజ ఎరువులు, వ్యవసాయ పనిముట్లు అందిస్తున్నది. ఆసక్తి వున్న వారికి కూరగాయలు పండించడంలో శిక్షణ కూడా ఇస్తున్నది.
మార్కెట్‌లో కొంటున్న ఆకు కూరలు, కూరగాయలు రుచీ పచీ వుండవు. మందులు కొట్టి పండించే ఈ తిండి తింటే ఆరోగ్యం ఏమవుతుందో అని అందోళన చెందని పట్టణవాసులు వుండరు. సిటీలో మన ఇంటి డాబా మీద, పెరట్లో, ఇంటి ముందు కుండీల్లో మనం తినే కూరగాయలను మనమే పండించుకుంటే రుచికరమైన కూరగాయలతో పాటు కొండంత సంతృప్తి కూడా మన సొంతం అవుతుంది. ఆ ఆలోచన నుంచి పుట్టిందే మన ఇల్లు – మన కూరగాయల పథకం. జంట నగరాల్లో నివసిస్తున్న ఇలాంటి పర్యావరణ ప్రియుల కోసం తెలంగాణ ప్రభుత్వం మన ఇల్లు – మన కూరగాయలు పథకాన్ని అమలు చేస్తున్నది.
రాష్ట్రీయ కృషి వికాస్‌ యోజన కింద మన ఇల్లు- మన కూరగాయలు పథకంలో భాగంగా అర్బన్‌ ఫార్మింగ్‌ యూనిట్లను ప్రభుత్వం జంటనగరాల ప్రజలకు సబ్సిడీపైన సరఫరా చేస్తున్నది. పట్టణంలో నివసిస్తూ 50 నుంచి వంద చదరపు అడుగుల వరకు ఇంటి పైకప్పు/పెరటి స్థలం/బాల్కనీ ఉండి.. నీటి సదుపాయం ఉన్నవారు ఈ పథకానికి అర్హులు. దరఖాస్తుదారుడు తన అడ్రస్‌ ప్రూఫ్‌తో పాటుగా పాస్‌ పోర్టు సైజు ఫొటోనూ జత చేర్చి ఉద్యానవన శాఖ కార్యాలయంలో దరఖాస్తు చేసుకోవాలి. ఈ పథకం 200 చదరపు అడుగులకు మించి మంజూరు చేయరు.
కిట్‌ – ఏ లో ఉండే వస్తువులు : నాలుగు సిల్పాలిన్‌ కవర్లు(40 ఇంచుల డయా, 12 ఇంచుల లోతు, 250జీఎస్ ఎం), 52 ఘనపు అడుగుల ఎర్రమట్టి, పశువుల ఎరువు, 2:1 నిష్పత్తిలో 20 పాలీ బ్యాగులు), 12 రకాల కూరగాయల విత్తనాలు, 25 కిలోల వేపపిండి, 500 మిల్లీలీటర్ల వేపనూనె, కుర్ఫీ, సికేచర్‌, చిన్న స్ర్పేయర్‌, షవర్‌ వంటి పనిముట్లు ఇస్తారు. కిట్‌ – బిలో ఇచ్చే వస్తువులు : 12 అంగుళాల డయా, 12 అంగుళాల లోతు వున్న 22 బ్యాగులు, 26 ఘనపుటడుగుల మట్టి, పశువుల ఎరువు, 2:1 నిష్పత్తిలో పాలీ బ్యాగుల మట్టి మిశ్రమం, 25 కిలోల వేప పిండి, 500 మిల్లీలీటర్ల వేపనూనె, కుర్ఫీ, సికేచర్‌, చిన్న స్ర్పేయర్‌, షవర్‌ వంటి పనిముట్లు ఉంచిన చేతి సంచిని ఇస్తారు.
ఈ పథకంలో భాగంగా కూరగాయలను గచ్చు/బాల్కనీ/పైకప్పులపై పెంచుకోవచ్చు. 3 నుంచి4 అడుగుల వెడల్పు, 9-20 అంగుళాల లోతు ఉండే బెడ్లను తయారుచేసి పెంచవచ్చు. సూర్యరశ్మి, సాగునీటి లభ్యత చూసుకోవాలి. కాగా.. ఎర్రమట్టి, సేంద్రియ ఎరువులను 2:1 నిష్పత్తిలో ఉపయోగించాలి. సేంద్రియ ఎరువులుగా పూర్తిగా కుళ్లిన పశువుల ఎరువు/వర్మీ కంపోస్టు/కోకాపీట్‌లను లేదా వీటి మిశ్రమాన్ని ఉపయోగించాలి.
మన ఇల్లు మన కూరగాయలు కార్యక్రమంలో ఆకు కూరలు (పాలకూర, మెంతికూర, కొత్తిమీర, చుక్కకూర, గోంగూర, బచ్చలి, తోటకూర, పుదీన తదితరాలు), దుంప కూరలు(ముల్లంగి, క్యారట్‌, ఆలుగడ్డ, ఉల్లిపరక, బీట్‌ రూట్‌), పూల కూరలు(కాలి ఫ్లవర్‌, అరటి, క్యాబేజీ), గింజ కూరలు(బీన్స్‌, బఠానీలు, తీయని మొక్కజొన్న), కూరగాయలు(బెండ, వంకాయ, టమాటా, గోరుచిక్కుడు, తీగజాతి పందిరి రకాలైన సొరకాయ, కాకర, బీర, పొట్లకాయ), పండ్లు(ఆపిల్‌, రేగు, సీతాఫలం, బొప్పాయి)… పండడానికి అనువైన కూరగాయలు, పండ్ల రకాలు. పెరుగుతున్న జనాభా, కూరగాయల ఖర్చు, పోషకాహార లోపం, పట్టణాల్లో స్థలాభావాన్ని దృష్టిలో పెట్టుకుని ఉద్యానవనశాఖ జంటనగరాల్లో ఈ పథకాన్ని అమలు చేస్తోంది. తెలంగాణ రాష్ట్రం ఏర్పడిన దగ్గరినుంచీ ఈ పథకం కింద ఉద్యానవన శాఖ ఇప్పటివరకు 1886 యూనిట్లను లబ్ధిదారులకు అందజేసింది.
పర్యావరణ ప్రేమికులకు ఉచిత శిక్షణ
ఈ పథకంలో భాగంగా కూరగాయలు పెంచేందుకు కావాల్సిన సిల్పాలిన్‌ కవర్లు, మట్టి మిశ్రమం, విత్తన సంచి, వేపపిండి, వేపనూనె, పనిముట్లను సగం సబ్సిడీపైన ఉద్యానవనశాఖ పౌరులకు అందిస్తుంది. ప్రతి ఇంటికీ 2 యూనిట్లను ఇవ్వడంతో పాటుగా సాగుపై ఉచిత శిక్షణా ఇస్తుంది. కిట్‌- ఏ యూనిట్‌ ధర రూ. 6 వేలు కాగా.. సబ్సిడీ పోను రూ. 3 వేలకు అందించనుంది. మట్టి మిశ్రమం లేకుండా అయితే సబ్సిడీ పోను రూ. 2 వేలకు కిట్‌ను అందిస్తుంది. కిట్‌ – బిని మట్టి మిశ్రమంతో అయితే రూ. 1900, మట్టి మిశ్రమం లేకుండా అయితే రూ. 1400కు పంపిణీ చేయనుంది.

ఈ గ్రామం.. రసాయన రహితం

  • సేంద్రియ సాగుతో సిరులు పండిస్తున్న ఏనెబావి రైతులు
పల్లెలకు పాఠం- రైతులకు ఆదర్శం, సమష్టి కృషికి
నిదర్శనం జనగామ జిల్లా ఏనెబావి గ్రామం. క్రిమి
సంహారకాలు లేని సేద్యం గురించి ఎక్కడ మాట్లాడాల్సి వచ్చినా ఏనెబావినే ఉదాహరణగా చూపుతారు. రసాయనరహిత గ్రామంగా పేరొందిన ఆ గ్రామ రైతుల ప్రస్థానం ఇది.
జనగామ జిల్లాలోని లింగాలఘణపురం మండలం మాణిక్యాపురం గ్రామపంచాయతీ పరిధిలోని ఏనెబావి గ్రామ రైతులు సేంద్రియ వ్యవసాయం చేస్తూ సిరులు పండిస్తున్నారు. రసాయనిక ఎరువులు వాడకుండా చీడపీడల బాధ లేకుండా అధిక దిగుబడులు పొందుతూ రాష్ట్రస్థాయిలో గుర్తింపు పొందుతున్నారు. ‘క్రాప్స్‌’ స్వచ్ఛంద సంస్థ సహకారంతో స్వతహాగా ఇంట్లోనే సేంద్రియ ఎరువులు తయారుచేసుకొని వ్యవసాయం చేస్తున్నారు. గ్రామానికి చెందిన 45 మంది రైతులు తమకున్న 145 ఎకరాల్లో వరి, కూరగాయల పంటలు సాగుచేస్తూ లాభాలు గడిస్తున్నారు. చెరువు నుంచి తెచ్చిన మట్టి, ఆవుపేడ, గొర్రెలు, మేకల ఎరువు, గోమూత్రం, వేప కషాయంతో ఈ రైతులు స్వయంగా సేంద్రియ ఎరువులను తయారు చేసుకుంటున్నారు. వానపాములతో వర్మి కంపోస్టు తయారుచేస్తూ పంటలకు బలమైన పోషకాలను అందిస్తున్నారు. ఫలితంగా అధిక దిగుబడులు పొందుతున్నారు. క్రాప్స్‌ స్వచ్ఛంద సేవా సంస్థ ఇచ్చిన శిక్షణతో ఏనెబావి గ్రామంలో ఇంటింటా వర్మి కంపోస్టు తయారీ కేంద్రాలు ఏర్పాటయ్యాయి. అప్పటినుంచి గ్రామాన్ని రసాయన రహిత గ్రామంగా పిలుస్తున్నారు. తక్కువ పెట్టుబడితో అధిక దిగుబడులు సాధించడానికి సేంద్రియ సేద్యమే కారణం అంటున్నారు ఈ గ్రామ రైతులు. ఎకరం కూరగాయల తోట సాగుకు 5 వేల రూపాయలు ఖర్చు చేస్తున్నారు. సేంద్రియ పంట కావడంతో మంచి ధర పలుకుతున్నది. దిగుబడులు అధికంగా రావడంతో రైతులు మంచి లాభాలు ఆర్జిస్తున్నారు. సరైన మార్కెటింగ్‌ సౌకర్యం లేకపోవడం వల్ల సేంద్రియ వరి ధాన్యం, కూరగాయలను నగరాలకు తీసుకెళ్లి అమ్ముకోవాల్సి వస్తోందని రైతులు ఆవేదన చెందుతున్నారు. ప్రభుత్వం సబ్సిడీపై సేంద్రియ ఎరువులు అందించాలని రైతులు కోరుతున్నారు.
అవగాహన పెంచాలి
సేంద్రియ వ్యవసాయంపై రైతుల్లో ఉన్న అపోహలు తొలగించి, అవగాహన పెంచేందుకు ప్రభుత్వం కృషి చేయాలి. అధిక పెట్టుబడులతో రైతులను నష్టాల బాట పట్టిస్తున్న రసాయనిక ఎరువుల వాడకం పూర్తిగా మానుకునే విధంగా ప్రోత్సహించాలి. ఐదెకరాల్లో పదేళ్లుగా కందులు, కూరగాయల పంటలు వేసి లాభం పొందుతున్నాను.
– పొన్నాల తిరుమలేషం, రైతు
Credits : Andhrajyothi

కొత్తిమీర కట్ట రూపాయే

Credits : Andhrajyothi
మదనపల్లె (చిత్తూరు జిల్లా): కొత్తిమీర సాగుచేసిన రైతులు నష్టాలపాలవుతున్నారు. ఎన్నడూ లేని విధంగా ధరలు పాతాళానికి పడిపోవడంతో పంటకు పెట్టిన పెట్టుబడులు కూడా రాలేదని ఆందోళన చెందుతున్నారు. మొన్నటి వరకూ మార్కెట్‌లో కొత్తిమీర కట్ట రూ.30 పలకగా, ఉన్నట్లుండి రూపాయికి పడిపోయింది.మదనపల్లె, పుంగనూరు, పలమనేరు, కుప్పం నియోజకవర్గాల పరిధిలోని సుమారు 600 ఎకరాల్లో కొత్తిమీర సాగవుతోంది. స్థానిక అవసరాలకు పోను మిగిలిన పంటను బెంగళూరు, చెన్నై, హైదరాబాదు ప్రాంతాలకు వ్యాపారులు తరలిస్తుంటారు.వర్షాలకు భూమి ఊటెక్కి పంట పసుపురంగుగా మారడంతో పాటు ఎక్కువ మొత్తంలో పంట దెబ్బతింది. దీంతో 20 రోజుల క్రితం వరకూ కట్ట రూ.20నుంచి 30 పలకగా, ప్రస్తుతం రూపాయి కూడా అమ్ముడుపోవడం లేదు. కొత్తిమీర ఎగుమతి అవుతున్న ప్రాంతాల్లో పంట ఇబ్బడిముబ్బడిగా సాగుకావడమే ధరల పతనానికి కారణమని చెబుతున్నారు.40రోజుల వ్యవధిలో చేతికొచ్చే కొత్తిమీర ఎకరా సాగుకు ఎంత తక్కువన్నా.. రూ.20వేలు ఖర్చవుతుంది. ప్రసుత్తం దిగుబడులు అధికం కావడంతో కట్ట రూపాయి కూడా పోవడం లేదు. దీంతో మూట(150 కట్టలు) కేవలం వందరూపాయలకు అమ్మేస్తున్నారు.కొందరు రైతులు పంటను అమ్మేదానికి ఇష్టపడక ధనియాలకు వదిలేస్తుండగా, మరికొందరు భూమికి సత్తవ వస్తుందని భావిస్తూ రొటోవేటర్లతో దున్నడానికి సిద్ధమవుతున్నారు.
ఎర్ర గోంగూర
తిరుపతి: ఆహారంలో తెలుగుదనానికి ప్రతీకగా గోంగూరను పేర్కొంటారు. తెలుగువాళ్ళకి ఎంతో ఇష్టమైన ఆకుకూర ఇది. పచ్చడి, పులగూర, పప్పు, చికెన్‌లోనూ, మటన్‌లోనూ కలిపి కూడా గోంగూరును వండుకుంటారు. తలచుకోగానే నోరూరించే ఆకుకూర ఇది. తెల్ల గోంగూర కన్నా ఎర్ర గోంగూరకి రుచి ఎక్కువ. పోషక విలువలూ ఎక్కువే. ఐరన్‌ దండిగా ఉంటుంది. రక్త హీనత ఉన్నవారు గోంగూర తింటే మంచిదంటారు. వారినికి ఒక్క రోజైనా గోంగూర తినడం ఆరోగ్యానికి మేలు చేస్తుంది.
నవనవలాడుతూ ఆకర్షించినా సరే మార్కెట్‌లో దొరికే గోంగూరలో రసాయన అవశేషాలుంటాయి. ఎంత కడిగినా అంతరించవు. మన ఇంట్లోనే రెండు మొలకలు నాటుకుంటే చాలు ఏడాది పొడవునా ఇంటికి కావలసినంత గోంగూర పండుతుంది. ఆకే కాదు, లేత కాయలు కూడా పచ్చడి చేసుకోవచ్చు. నాటు గోంగూర అయితే మంచిది. దీని ఆకులు పలుచగా ఉంటాయి.
కుండీ సేద్యం: చిన్న కుండీలో ఒక గోంగూర మొక్కను పెంచవచ్చు. రెండు కుండీలు చాలు ఎదిగేకొద్దీ కత్తిరించు కుంటూ ఉంటే మొక్క పొదలా విస్తరించి పెరుగుతుంది. పదహైదు రోజులకు ఒకసారి పిడికెడు వర్మీకంపోస్టు లేదా పేడ ఎరువు వేస్తూ ఉంటే ఏపుగా పెరుగుతుంది. సాధారణంగా పిండినల్లి ఆశిస్తుంది. తెల్లటి బూజులా ఆకులను కమ్మేస్తుంది. వేప కషాయం గానీ, పుల్ల మజ్జిగ గానీ, బూడిద గానీ చల్లితే చాలు దీనిని ఎదుర్కోవచ్చు.
నాటు గోంగూర విత్తనాలు, మరింత సమాచారం కోసం: 9515872307

వేరుశనగకు ఆకుముడత బెడద

మహబూబ్‌నగర్‌ జిల్లా రైతులు భారీ విస్తీర్ణంలో వేరుశనగ సాగు చేస్తున్నారు. వేరుశనగకు ఆకుముడత తెగులు సోకింది. ఈ తెగులుతో పాటు పచ్చపురుగు, వేరుపురుగు, దోమకాటు వస్తున్నాయి. దీంతో దిగుబడులు తగ్గి, భారీగా నష్టపోయే ప్రమాదం వుందని రైతులు ఆందోళన వ్యక్తం చేస్తున్నారు.
రెండెకరాల్లో వేరుశనగ సాగు చేశాను. ఆకుముడత, దోమతో పాటు వేరుపురుగు కూడా వచ్చింది. పంటకు నష్టం వాటిల్లుతోంది. నివారణకు ఏంచేయాలో తోచడం లేదు.
– స్వరూపరెడ్డి రైతు ఇబ్రహీంబాద్‌, హన్వాడ మండలం
సస్యరక్షణ చర్యలు ఇలా…
వేరుశనగ పంటకు సోకుతున్న ఆకుముడత, పచ్చపురుగు తెగుళ్ల నివారణకు రైతులు మందులు పిచికారీ చేయాలి. ఆకుముడత నివారణకు మోనోక్రొటోఫాస్‌ 1.6 మిల్లీలీటర్ల మం దును ఒక లీటర్‌ నీటితో కలిపి లేదా క్లోరోపైరిఫాస్‌ 2.5 మి.లీ. ఒక లీటర్‌ నీటితో కలిపి పిచికారీ చేస్తే తెగుళ్లు సోకవు. పచ్చ పురుగుకు బెంజత్‌ 100 గ్రా. మందును పది లీటర్ల నీటిలో కలిపి ఒక ఎకరాకు పిచికారీ చేయాలి. వేరు తినే పురుగుల నివారణకు గుళికలు ఎకరాకు 6 కేజీలు వేయాలి.
– చంద్రమౌళి, ఏ.ఓ.
Credits : Andhrajyothi