ఈ గ్రామం.. రసాయన రహితం

  • సేంద్రియ సాగుతో సిరులు పండిస్తున్న ఏనెబావి రైతులు
పల్లెలకు పాఠం- రైతులకు ఆదర్శం, సమష్టి కృషికి
నిదర్శనం జనగామ జిల్లా ఏనెబావి గ్రామం. క్రిమి
సంహారకాలు లేని సేద్యం గురించి ఎక్కడ మాట్లాడాల్సి వచ్చినా ఏనెబావినే ఉదాహరణగా చూపుతారు. రసాయనరహిత గ్రామంగా పేరొందిన ఆ గ్రామ రైతుల ప్రస్థానం ఇది.
జనగామ జిల్లాలోని లింగాలఘణపురం మండలం మాణిక్యాపురం గ్రామపంచాయతీ పరిధిలోని ఏనెబావి గ్రామ రైతులు సేంద్రియ వ్యవసాయం చేస్తూ సిరులు పండిస్తున్నారు. రసాయనిక ఎరువులు వాడకుండా చీడపీడల బాధ లేకుండా అధిక దిగుబడులు పొందుతూ రాష్ట్రస్థాయిలో గుర్తింపు పొందుతున్నారు. ‘క్రాప్స్‌’ స్వచ్ఛంద సంస్థ సహకారంతో స్వతహాగా ఇంట్లోనే సేంద్రియ ఎరువులు తయారుచేసుకొని వ్యవసాయం చేస్తున్నారు. గ్రామానికి చెందిన 45 మంది రైతులు తమకున్న 145 ఎకరాల్లో వరి, కూరగాయల పంటలు సాగుచేస్తూ లాభాలు గడిస్తున్నారు. చెరువు నుంచి తెచ్చిన మట్టి, ఆవుపేడ, గొర్రెలు, మేకల ఎరువు, గోమూత్రం, వేప కషాయంతో ఈ రైతులు స్వయంగా సేంద్రియ ఎరువులను తయారు చేసుకుంటున్నారు. వానపాములతో వర్మి కంపోస్టు తయారుచేస్తూ పంటలకు బలమైన పోషకాలను అందిస్తున్నారు. ఫలితంగా అధిక దిగుబడులు పొందుతున్నారు. క్రాప్స్‌ స్వచ్ఛంద సేవా సంస్థ ఇచ్చిన శిక్షణతో ఏనెబావి గ్రామంలో ఇంటింటా వర్మి కంపోస్టు తయారీ కేంద్రాలు ఏర్పాటయ్యాయి. అప్పటినుంచి గ్రామాన్ని రసాయన రహిత గ్రామంగా పిలుస్తున్నారు. తక్కువ పెట్టుబడితో అధిక దిగుబడులు సాధించడానికి సేంద్రియ సేద్యమే కారణం అంటున్నారు ఈ గ్రామ రైతులు. ఎకరం కూరగాయల తోట సాగుకు 5 వేల రూపాయలు ఖర్చు చేస్తున్నారు. సేంద్రియ పంట కావడంతో మంచి ధర పలుకుతున్నది. దిగుబడులు అధికంగా రావడంతో రైతులు మంచి లాభాలు ఆర్జిస్తున్నారు. సరైన మార్కెటింగ్‌ సౌకర్యం లేకపోవడం వల్ల సేంద్రియ వరి ధాన్యం, కూరగాయలను నగరాలకు తీసుకెళ్లి అమ్ముకోవాల్సి వస్తోందని రైతులు ఆవేదన చెందుతున్నారు. ప్రభుత్వం సబ్సిడీపై సేంద్రియ ఎరువులు అందించాలని రైతులు కోరుతున్నారు.
అవగాహన పెంచాలి
సేంద్రియ వ్యవసాయంపై రైతుల్లో ఉన్న అపోహలు తొలగించి, అవగాహన పెంచేందుకు ప్రభుత్వం కృషి చేయాలి. అధిక పెట్టుబడులతో రైతులను నష్టాల బాట పట్టిస్తున్న రసాయనిక ఎరువుల వాడకం పూర్తిగా మానుకునే విధంగా ప్రోత్సహించాలి. ఐదెకరాల్లో పదేళ్లుగా కందులు, కూరగాయల పంటలు వేసి లాభం పొందుతున్నాను.
– పొన్నాల తిరుమలేషం, రైతు
Credits : Andhrajyothi

కడక్‌నాథ్‌ కోడికి భలే గిరాకీ!

కడక్‌నాథ్‌ కోడికి మరో పేరు ‘కాలిమసి’. అంటే దీని మాంసం నలుపు రంగులో ఉంటుంది. మాంసం రుచిగా, నలుపు రంగులో ఉండి ఔషధ గుణాలను కలిగి ఉంటుంది. ‘మెలనిన్‌’ అనే పిగ్మెంట్‌ వల్ల దీని మాంసం నలుపు రంగులో ఉంటుంది. ఈ కోడి మూడు రంగుల్లో లభిస్తుంది. అవి జెట్‌ బ్లాక్‌, పెన్సిల్‌, గోల్డెన్‌. కడక్‌నాథ్‌ కోడి మాంసంలో 25 శాతం మాంసకృత్తులు ఉంటాయి.
బాయిలర్‌ కోడి మాంసంతో పోలిస్తే కడక్‌నాథ్‌ కోడిలో కొలెస్టరాల్‌ తక్కువగా ఉంటుంది. దీని మాంసంలో 18 రకాల అమైనో ఆసిడ్స్‌, విటమిన్లు (బి1, బి2, బి3, బి12), కాల్షియం, ఫాస్ఫరస్‌, ఐరన్‌ నికోటినిక్‌ ఆసిడ్స్‌ ఉంటాయి. సెంట్రల్‌ ఫుడ్‌ అండ్‌ రీసెర్చ్‌ ఇనిస్టిట్యూట్‌, మైసూర్‌ వారు దీని ఔషధ గుణాలపై పరిశోధనలు చేసి కడక్‌నాథ్‌ కోడి మాంసం హృద్రోగులకు మేలు చేయడమే కాకుండా గుండెకు రక్త సరఫరా పెంచుతుంది.
ఔషధ గుణాల కడక్‌నాథ్‌
కడక్‌నాథ్‌ కోడి మాంసం హోమియోపతిలో, నరాల సంబంధిత వ్యాధులను నయం చేయడానికి వాడతారు. గిరిజనులు కడక్‌నాథ్‌ కోడి రక్తాన్ని దీర్ఘకాలిక వ్యాధుల నివారణలో ఉపయోగిస్తారు. కడక్‌నాథ్‌ కోడి మాంసం తింటే సెక్స్‌ సామర్థ్యం పెరుగుతుందనే నమ్మకం కూడా ఉంది. ఇందులో నిజం కూడా ఉంది. సాధారణంగా వాడే వయాగ్రాలోని సిల్డెనాఫిల్‌ సిట్రిక్‌ రక్త సరఫరా పెంచడం ద్వారా సెక్స్‌ సామర్థ్యం పెంచుతుంది. కడక్‌నాథ్‌ మాంసంలోని ‘మెలనిన్‌’ పిగ్మెంట్‌ కూడా సరిగ్గా అదే పనిని చేస్తుంది.
కడక్‌నాథ్‌ కోడి మాంసం హార్మోన్లు, పిగ్మెంట్స్‌, అమైనో ఆసిడ్స్‌ మానవ శరీరంలోని రక్త కణాలను, హిమోగ్లోబిన్‌ శాతాన్ని పెంచుతాయి. నలుపు రంగు మాంసం క్షయ వ్యాధి, గుండె సంబంధ వ్యాధులు, నరాల సంబంధ వ్యాధులను తగ్గిస్తుంది. స్త్రీలలో గర్భకోశ సంబంధిత వ్యాధులను నయం చేయడంలో కడక్‌నాథ్‌ కోడి మాంసం బాగా పనిచేస్తుందని పరిశోధనల్లో తేలింది. కడక్‌నాథ్‌ కోడి గుడ్డులో తక్కువ కొలెస్టరాల్‌, ఎక్కువ మాంసకృత్తులు ఉండడం వల్ల వీటిని వృద్ధులు, అధిక రక్తపోటుతో బాధపడే వారు కూడా నిరభ్యంతరంగా తీసుకోవచ్చు.
రైతులకు మరింత అదాయం
నాటుకోడి మాదిరిగానే రుచిగా వుండే కడక్‌నాథ్‌ కోళ్లపై మరిన్ని పరిశోధనలు జరగాల్సి వుంది. వీటి పిల్లలను ప్రభుత్వ ఏజెన్సీల ఆధ్వర్యంలో పంపిణీ చేస్తే రైతులకు ఆదాయం పెరుగుతుంది. ప్రస్తుతం ప్రైవేట్‌ సంస్థలు కొన్ని కడక్‌నాథ్‌ కోడి పిల్లలను విక్రయిస్తున్నాయి. ఒక్కో కోడి పిల్ల 65 నుంచి 70 రూపాయల ధర పలుకుత్నుది. ఆరు మాసాల్లో ఇది పెరుగుతుంది. 99599 52345, శంకర్‌పల్లి, హైదరాబాద్‌, 9666880059, బత్తెనపల్లి, సిరిసిల్లతో పాలు పలు ఇతర ప్రాంతాల్లో కూడా ఈ కోడి పిల్లలను విక్రయిస్తున్నారు.
– డాక్టర్‌ గుర్రం శ్రీనివాస్‌, పశువైద్య కళాశాల, కోరుట్ల
Credits : Andhrajyothi

లక్క.. లాభాలు ఎంచక్కా!

  • లక్షన్నర పెట్టుబడి.. 4 లక్షల రాబడి
  • ఉద్దానంలో ఊపిరి పోసుకున్న లక్కసాగు
శ్రీకాకుళం జిల్లా కవిటికి చెందిన రాజారావు ఉన్నతస్థాయి ప్రభు త్వ ఉద్యోగిగా పదవీ విరమణ చేశారు. సేద్యంపై ఆసక్తితో అందరిలాగానే వరి, కొబ్బరి సాగు చేపట్టారు. ప్రకృతి వైపరీత్యాల కారణం గా నష్టాలపాలై ప్రత్యామ్నాయంగా లక్క వైపు దృష్టి సా రించారు. కుమారుడు సాయిరాజ్‌తో కలిసి గత ఏడాది తొలి పంట తీశారు. మరో నెలలో రెండో పంటను విక్రయించనున్నారు. ఈ రైతులు జార్ఖండ్‌లోని రాంచీ నుంచి అధిక దిగుబడి ఇచ్చే శ్యామలత రకం విత్తనం తెచ్చారు. విత్తనాలను 45 రోజులు కవర్లలో వుంచితే మొక్కలు వచ్చాయి. 6 నెలలకు ఒక్కో మొక్క కు 6 కొమ్మలు వచ్చాయి. అప్పుడు చెట్టులో మూడు కొమ్మలకు గుడ్డు (బ్రూడింగ్‌) క ట్టారు.
ఈ బ్రూడింగ్‌ను రాంచీలో కొన్నా రు. అలా ఒక్కో చెట్టుకు 50 గ్రాముల చొప్పున గుడ్డు కట్టుకున్నారు. మొత్తం ఎకరాకు అయిదు వేల చెట్లు నాటి అన్నింటికీ ఇదే పద్ధతి అమలు చేశారు. ఈ గుడ్డును జనవరి-ఫిబ్రవరి, జూన్‌ -జూలై నెలల్లోనే కట్టాలి. ఇలా గుడ్డు కట్టిన పదిరోజుల తర్వాత అందులోంచి పురుగులు బయటకు వస్తాయి. అప్పుడు ఆ గుడ్డును విప్పాలి. అలా బయటకు వచ్చిన ఆడ, మగ పురుగులు మొక్క అంతటా విస్తరిస్తాయి. అప్పుడు లక్క తయారౌతుంది.
జూలైలో గుడ్డు కడితే డిసెంబరు లో లక్క పంట కోతకు వస్తుంది. సాగు మొదలుపెట్టిన తొలి ఏడాది వీరికి 3 లక్షలు ఖర్చయింది. ఖర్చులు పోను లక్షకు పైగా లాభం పొందారు. రెండో ఏడాది దిగుబడి రెట్టింపు అయింది. ఖర్చులన్నీ పోగా రూ.4 లక్షలు మిగిలింది. ఒకసారి మొక్క నాటితే పన్నెండేళ్ల వరకు పంట పండుతుంది. లక్క పంటను కోసిన తర్వాత దాన్ని సేకరించిన ఈ రైతులు జార్ఖండ్‌, పశ్చిమబెంగాల్‌లోని బలరాంపురంలో విక్రయించారు. శుద్ధి చేయని కిలో లక్క ధర రూ. 200 వుంది.
బాడీ స్ర్పే.. నెయిల్‌ పాలిష్‌లో
మనం వాడే మాత్రలు ఎక్స్‌పయిరీ డేట్‌లోగా పాడవకుండా, ఫంగస్‌ ఏర్పడకుండా కాపాడడంలో లక్క పూత కీలకం. నాణ్యమైన లక్కను మాత్రలపై పూతగా వేస్తారు. కొన్ని దేశాల్లో ఆహారపదార్థాలను ఎక్కువ కాలం నిల్వ ఉంచి తింటారు. అవి పాడవకుండా లక్క రంగు కలిపి పూత వేస్తారు. గోళ్ల రంగు, బూటుపాలిష్‌లోను వాడతారు. సిల్క్‌ వస్త్రాల తయారీలోను లక్క వినియోగిస్తారు. రెడీమేడ్‌ బంగారు ఆభరణాలు, బాడీ స్ర్పేల్లో లక్కను వినియోగిస్తున్నారు. మనం బాడీ స్ర్పేను కొట్టుకుంటే ఆ రసాయనాలు ఒంటిపై పడి చర్మానికి హాని కలగకుండా చేయడానికి అందులో లక్క కలుపుతారు.
40 ఎకరాల్లో సాగు
40 ఎకరాల్లో లక్క పంట సాగుచేస్తున్నాం. మొదట్లో చాలా కష్టంగా వున్నా క్రమంగా అవగాహన పెంచుకున్నాం. ఖర్చులన్నీ పోగా మొదటి పంటలో రూ.లక్ష, రెండో పంటలో రూ.4 లక్షల వరకు మిగులు కనిపిస్తోంది. మా సమీప పొలాల రైతుల్లో చైతన్యం తెచ్చి వారితో సాగు చేయించి 250 ఎకరాల వరకు సాగు జరిగేలా ప్రణాళికలు వేస్తున్నాం.
– పిరియా రాజారావు, లక్క రైతు
Credits : Andhrajyothi

గోమూత్రం.. పెట్రోలు కంటే ప్రియం!

  • క్యాను రూ.500 పైమాటే
పల్నాడు పల్లెలు పచ్చదనాలకు నిలయాలు. దశాబ్దాలుగా ఇక్కడి రైతులు పత్తి, మిరప పంటలే సాగు చేస్తున్నారు. పంట మార్పిడి అలవాటు లేకపోవడంతో ఆ పంటలకు విపరీతంగా తెగుళ్లు ఆశిస్తున్నాయి. దశాబ్దాలుగా ఆ పంటలకు పురుగుల మందులు వాడటం వల్ల తెగుళ్లు, పురుగుకు రోగనిరోధక శక్తి విపరీతంగా పెరిగింది. ఎన్ని పురుగు మందులు వాడినా ప్రయోజనం ఉండడం లేదు. ఆకుముడత, బొబ్బర తెగులు, రసంపీల్చు పురుగు, కాయతొలుచు పురుగులు పంటలను పీల్చి పిప్పి చేస్తున్నాయి.
దీంతో రైతుల శ్రమ బూడిదలో పోసిన పన్నీరవుతున్నది. ఒకరిద్దరు రైతులు ప్రకృతి వ్యవసాయంతో మంచి ఫలితాలు సాధించడంతో మండలంలోని పలువురు రైతులు ఆ బాటన పట్టారు. దేశీ ఆవుల పంచకం చల్లితే తెగుళ్లు దరిచేరవని రైతులు గ్రహించారు. యర్రబాలెంలోని ఒక దేవాలయం ఆధీనంలో ఉన్న గోశాల నుంచి గోమూత్రం సేకరించి కొందరు రైతులు సత్ఫలితాలు సాధించారు.
ఆ నోటా ఈ నోటా గోమూత్రం విలువ తెలుసుకున్న పలువురు రైతులు యర్రబాలెం బాట పట్టారు. అక్కడ 20 ఆవులు మాత్రమే ఉన్నాయి. రోజంతా గోమూత్రం సేకరించినా 20 లీటర్లకు మించి రావడం లేదు. రెంటచింతల, దుర్గి, మాచర్ల మండలాలకు చెందిన పదికి పైగా గ్రామాల రైతులు క్యూ కట్టడంతో గోమూత్రం సరిపోవడం లేదు. క్యాను గోమూత్రం ధరను 500 రూపాయలుగా నిర్ణయించారు. అయినా రైతులు ఆ డబ్బు చెల్లించేందుకు సిద్ధం అవుతున్నారు.
గో మూత్రంలో 24 ధాతువులు :వెంకటేశ్వర్లు, ఆత్మ బీటీఎం
గోమూత్రంలో 24 రకాల ధాతువులుంటాయి. అమ్మోనియం, రాగి, నత్రజని, గంధకం, పొటాషియం, మెగ్నిషియం వంటి ధాతువులన్నీ మొక్క ఎదుగుదలకు బాగా ఉపయోగపడతాయి. గోవు విసర్జనలో భూమికి ఉపయోగపడే 300 నుంచి 500 కోట్ల జీవరాశులు వుంటాయి. గోమూత్రం, పేడ రైతుకు వరాలు.
Credits : Andhrajyothi

కొత్తిమీర కట్ట రూపాయే

Credits : Andhrajyothi
మదనపల్లె (చిత్తూరు జిల్లా): కొత్తిమీర సాగుచేసిన రైతులు నష్టాలపాలవుతున్నారు. ఎన్నడూ లేని విధంగా ధరలు పాతాళానికి పడిపోవడంతో పంటకు పెట్టిన పెట్టుబడులు కూడా రాలేదని ఆందోళన చెందుతున్నారు. మొన్నటి వరకూ మార్కెట్‌లో కొత్తిమీర కట్ట రూ.30 పలకగా, ఉన్నట్లుండి రూపాయికి పడిపోయింది.మదనపల్లె, పుంగనూరు, పలమనేరు, కుప్పం నియోజకవర్గాల పరిధిలోని సుమారు 600 ఎకరాల్లో కొత్తిమీర సాగవుతోంది. స్థానిక అవసరాలకు పోను మిగిలిన పంటను బెంగళూరు, చెన్నై, హైదరాబాదు ప్రాంతాలకు వ్యాపారులు తరలిస్తుంటారు.వర్షాలకు భూమి ఊటెక్కి పంట పసుపురంగుగా మారడంతో పాటు ఎక్కువ మొత్తంలో పంట దెబ్బతింది. దీంతో 20 రోజుల క్రితం వరకూ కట్ట రూ.20నుంచి 30 పలకగా, ప్రస్తుతం రూపాయి కూడా అమ్ముడుపోవడం లేదు. కొత్తిమీర ఎగుమతి అవుతున్న ప్రాంతాల్లో పంట ఇబ్బడిముబ్బడిగా సాగుకావడమే ధరల పతనానికి కారణమని చెబుతున్నారు.40రోజుల వ్యవధిలో చేతికొచ్చే కొత్తిమీర ఎకరా సాగుకు ఎంత తక్కువన్నా.. రూ.20వేలు ఖర్చవుతుంది. ప్రసుత్తం దిగుబడులు అధికం కావడంతో కట్ట రూపాయి కూడా పోవడం లేదు. దీంతో మూట(150 కట్టలు) కేవలం వందరూపాయలకు అమ్మేస్తున్నారు.కొందరు రైతులు పంటను అమ్మేదానికి ఇష్టపడక ధనియాలకు వదిలేస్తుండగా, మరికొందరు భూమికి సత్తవ వస్తుందని భావిస్తూ రొటోవేటర్లతో దున్నడానికి సిద్ధమవుతున్నారు.
ఎర్ర గోంగూర
తిరుపతి: ఆహారంలో తెలుగుదనానికి ప్రతీకగా గోంగూరను పేర్కొంటారు. తెలుగువాళ్ళకి ఎంతో ఇష్టమైన ఆకుకూర ఇది. పచ్చడి, పులగూర, పప్పు, చికెన్‌లోనూ, మటన్‌లోనూ కలిపి కూడా గోంగూరును వండుకుంటారు. తలచుకోగానే నోరూరించే ఆకుకూర ఇది. తెల్ల గోంగూర కన్నా ఎర్ర గోంగూరకి రుచి ఎక్కువ. పోషక విలువలూ ఎక్కువే. ఐరన్‌ దండిగా ఉంటుంది. రక్త హీనత ఉన్నవారు గోంగూర తింటే మంచిదంటారు. వారినికి ఒక్క రోజైనా గోంగూర తినడం ఆరోగ్యానికి మేలు చేస్తుంది.
నవనవలాడుతూ ఆకర్షించినా సరే మార్కెట్‌లో దొరికే గోంగూరలో రసాయన అవశేషాలుంటాయి. ఎంత కడిగినా అంతరించవు. మన ఇంట్లోనే రెండు మొలకలు నాటుకుంటే చాలు ఏడాది పొడవునా ఇంటికి కావలసినంత గోంగూర పండుతుంది. ఆకే కాదు, లేత కాయలు కూడా పచ్చడి చేసుకోవచ్చు. నాటు గోంగూర అయితే మంచిది. దీని ఆకులు పలుచగా ఉంటాయి.
కుండీ సేద్యం: చిన్న కుండీలో ఒక గోంగూర మొక్కను పెంచవచ్చు. రెండు కుండీలు చాలు ఎదిగేకొద్దీ కత్తిరించు కుంటూ ఉంటే మొక్క పొదలా విస్తరించి పెరుగుతుంది. పదహైదు రోజులకు ఒకసారి పిడికెడు వర్మీకంపోస్టు లేదా పేడ ఎరువు వేస్తూ ఉంటే ఏపుగా పెరుగుతుంది. సాధారణంగా పిండినల్లి ఆశిస్తుంది. తెల్లటి బూజులా ఆకులను కమ్మేస్తుంది. వేప కషాయం గానీ, పుల్ల మజ్జిగ గానీ, బూడిద గానీ చల్లితే చాలు దీనిని ఎదుర్కోవచ్చు.
నాటు గోంగూర విత్తనాలు, మరింత సమాచారం కోసం: 9515872307

అన్నపూర్ణకు ఆక్వా ముప్పు!

  • ఉప్పునీటి కయ్యలుగా మారుతున్న భూములు
లాభాల వేటలో పడి ఆక్వా సాగులో నిబంధనలకు నీళ్లొదలడంతో ఉభయగోదావరి జిల్లాల్లో సారవంతమైన భూములు ఉప్పునీటి కయ్యలుగా మారుతున్నాయి. సాగుకు పనికిరాని చౌడు భూములు, పంట పండని భూములు, ముంపు భూముల్లో మాత్రమే ఆక్వా సాగు చేపట్టాలి.
సారవంతమైన భూముల్లో అనుమతులు లేకుండా చెరువులు తవ్వడం, మంచినీటితో రొయ్యల సాగు చేస్తామని చెప్పి అనుమతులు తీసుకుని, ఉప్పునీటితో సాగు చేయటం వల్ల భూగర్భ జలాలకు ముప్పు వాటిల్లుతోంది. ఉప్పునీటి కాలువల పక్కన ఉన్న చేలు మాత్రమే ఆక్వా సాగుకు అనుకూలం. సరిహద్దు రైతుల పొలాల్లో ఊటనీరు దిగకుండా చెరువు చుట్టూ మూడు మీటర్లు వదిలేసి ఊటబోదెలను తవ్వాలి. ఇందులోకి దిగిన ఊటనీరు పోవడానికి వీలుగా ఊటబోదెలను మురుగు కాలువలకు అనుసంధానం చేయాలి. ఈ నిబంధనలేవీ రైతులు పాటించడం లేదనే విమర్శలున్నాయి.
ఆక్వా సాగుదారులు భూమిలో 180-300 అడుగుల లోతు వరకూ బోర్లు తవ్వి ఉప్పు నీటిని బయటకు తెస్తున్నారు. రెండున్నర అడుగుల లోతు తవ్వాల్సిన చెరువును ఆరు అడుగుల వరకూ తవ్వుతున్నారు. ఎకరాకు 1.25 లక్షల రొయ్య పిల్లల్ని వేయాల్సి ఉండగా నాలుగు లక్షల వరకూ సీడ్‌ను వేస్తున్నారు.
రొయ్యల ఉత్పత్తి బాగుండాలని యాంటీబయాటిక్స్‌ విపరీతంగా వాడుతున్నారు. చిన్న సన్నకారు రైతులను బలవంతంగా ఒప్పించి వారి భూములను లాక్కుంటున్నారు. అనుమతులు రైతుల పేరన ఉంటాయి. ప్రభుత్వం నుంచి వచ్చే ఆక్వా సబ్సిడీలు, రుణమాఫీలు లీజుదారుల పరమవుతున్నాయి. సెలనీటి శాతం పెరిగిపోయి భూమి పొరల్లో సహజసిద్ధంగా ఉండే మంచినీటి వనరులు పాడైపోతున్నాయి.
పరిమితికి మించిన ఉప్పునీరు, యాంటీబయాటిక్స్‌ నేల పొరల్లో ఇంకిపోయి అంతిమంగా కెమికల్స్‌ కలిసిన ఉప్పుభూమిగా రూపాంతరం చెందుతుంది. సాగు పూర్తయిన తరువాత చెరువుల్లో ఉన్న ఉప్పునీటిని శుద్ధి చేసి మురుగు కాలువల్లోకి దింపాలి. కానీ అలా జరగడంలేదు. శుద్ధి కాని ఆ సాల్ట్‌వాటర్‌నే సాగుకు వినియోగిస్తున్నారు. దీంతో సాగుభూములు కూడా చౌడుబారిపోయే ప్రమాదం తలెత్తింది. మంచి నీటితో రొయ్యల సాగు చేపడతామని అనుమతులు తీసుకుని ఉప్పు నీటితో సాగు చేస్తున్నారు.
దీంతో గ్రామాల్లోని మంచినీటి బావులు, పంచాయతీ చెరువులు, పంట పొలాల్లో తవ్వుతున్న ఫారమ్‌ఫాండ్స్‌ నిరుపయోగమవుతున్నాయి. ప్రభుత్వం విదేశీ మారకద్రవ్య రూపంలో వచ్చే ఆదాయాన్ని చూస్తున్నది తప్ప, సహజసిద్ధమైన వనరులు నాశనమైపోతున్నాయనే వాస్తవాన్ని గ్రహించలేకపోతున్న దంటున్నారు నిపుణలు. ఈ తరహా ఆక్వా సాగు వల్ల సహజసిద్ధంగా లభించే మత్స్య సంపద కూడా అంతరించిపోతున్నది.
ఆక్వాజోన్‌ల ఏర్పాటు: ప్రసాద్‌, మత్స్యశాఖ అభివృద్ధి అధికారి
ప్రభుత్వ ఆదేశాల మేరకు ఆక్వా చెరువుల తవ్వకానికి పలు నిబంధనలు విధించాం. ప్రాంతాలవారీగా గ్రామసభలను నిర్వహించి ఆక్వా జోన్‌లను ఏర్పాటుచేస్తున్నాం. అనుమతులు లేకుండా చెరువులు తవ్వితే చర్యలు తీసుకుంటున్నాం. ఇప్పటికే అమలాపురం, కాజులూరు, కరప తదితర ప్రాంతాల్లో అనుమతులు లేని చెరువులను ఆపేశాం.
Credits : Andhrajyothi

ఇచ్చోడలోఆర్గానిక్‌ బొప్పాయి

  • లాభాల బాటలో గిరిజన రైతులు
ఆదిలాబాద్‌ అనగానే పత్తి, సోయా పంటలు గుర్తుకు వస్తాయి. ఆ జిల్లా రైతులు దశాబ్దాలుగా ఆ పంటలే సాగు చేస్తూ కష్టనష్టాలు ఎదుర్కొంటున్నారు. కానీ ఈ ఏడాది ఆదిలాబాద్‌లోని పలువురు గిరిజన రైతులు ఉద్యాన పంటల సాగు బాట పట్టారు. పంట మార్పిడికి ప్రాధ్యానత ఇవ్వడం, అంతరపంటలు సాగు చేయడం, నూతన యాజమాన్య పద్ధతుల ద్వారా ఖర్చులు తగ్గించుకుని దిగుబడులు పెంచుకునేందుకు యత్నిస్తున్నారు. ఇచ్చోడ మండలం నర్సాపూర్‌ గ్రామానికి చెందిన రైతు దుర్వ ముండే తనకున్న రెండెకరాల భూమిలో బొప్పాయి సాగు చేపట్టాడు.
మహారాష్ట్రలోని షోలాపూర్‌ నుంచి బొప్పాయి మొక్కలు తీసుకువచ్చాడు. ఒక్కో మొక్క ధర 13 రూపాయలు. 2 వేల మొక్కలు తెప్పించిన దుర్వ ముండే సేంద్రియ పద్ధతిలో సాగు చేపట్టాడు. ఇదే మండలం నవేగామ్‌ గ్రామానికి చెందిన రైతు చోలే మధుకర్‌ తన ఎనిమిదెకరాల భూమిలో పదివేల రెడ్‌ తడి రకం బొప్పాయి మొక్కలను నాటారు. వీటికి రూ.లక్షా యాభై వేలు ఖర్చు చేశారు. డ్రిప్‌ ఇరిగేషన్‌ ద్వారా నీటిని అందిస్తున్నారు.
సేంద్రియ పద్ధతిలో సాగు చేయడం వల్ల ఈ రైతులు పండించిన పంటలకు మంచి గిరాకీ వుంటున్నది. హైదరాబాద్‌, మహారాష్ట్రల నుంచి వ్యాపారులు నేరుగా పొలం దగ్గరకే వచ్చి బొప్పాయి కొనుగోలు చేసి తీసుకు వెళుతున్నారు. దీంతో రైతులకు డబ్బు, శ్రమా ఆదా అవుతున్నది. సేంద్రియంగా సాగు చేయడం వల్ల ఖర్చు తగ్గడంతో పాటు ఆదాయం కూడా పెరిగిందంటున్నారు ఆ రైతులు.
సేంద్రియ ఎరువుల తయారీ ఇలా..
పది లీటర్ల గోమూత్రం, ఐదు కేజీల బెల్లం, రెండు కిలోల పుట్టమట్టి 200 లీటర్లు నీళ్లు కలిపి తయారు చేసి ఎనిమిది రోజులు నిల్వ ఉంచిన తర్వాత రోజు విడిచి రోజు కలియబెట్టాలి. పది రోజుల తర్వాత వెయ్యి లీటర్ల నీటిలో కలిపి ప్రతి చెట్టుకు అర లీటర్‌ చొప్పున పిచికారీ చేస్తే బొప్పాయికి కాచిన పూత రాలదు. దాంతో పాటు చీడపీడలు దరిచేరవు. అధిక దిగుబడి రావడం వల్ల రైతులు లాభపడతారు.
బొప్పాయి సాగు లాభసాటి
పత్తి కంటే బొప్పాయి సాగు లాభసాటిగా వుంది. ఆరేళ్ల నుంచి బొప్పాయి సాగు చేస్తున్నాను. పెట్టుబడి ఖర్చులు తక్కువగా వుండడంతో మంచి ఆదాయం వస్తున్నది.
– చోలె మధుకర్‌, రైతు, నవేగామ్‌
మెళకువలతో అధిక దిగుబడులు
మేలైన విత్తన ఎంపిక బొప్పాయి సాగులో కీలకం. నల్లరేగడి నేలలు బొప్పాయి సాగుకు ఉత్తమం. తక్కువ నీటి తడులతోనే పంట చేతికి వస్తున్నది.
– దుర్వ ముండే, రైతు, నర్సాపూర్‌
 Credits : Andhrajyothi

వేరుశనగకు ఆకుముడత బెడద

మహబూబ్‌నగర్‌ జిల్లా రైతులు భారీ విస్తీర్ణంలో వేరుశనగ సాగు చేస్తున్నారు. వేరుశనగకు ఆకుముడత తెగులు సోకింది. ఈ తెగులుతో పాటు పచ్చపురుగు, వేరుపురుగు, దోమకాటు వస్తున్నాయి. దీంతో దిగుబడులు తగ్గి, భారీగా నష్టపోయే ప్రమాదం వుందని రైతులు ఆందోళన వ్యక్తం చేస్తున్నారు.
రెండెకరాల్లో వేరుశనగ సాగు చేశాను. ఆకుముడత, దోమతో పాటు వేరుపురుగు కూడా వచ్చింది. పంటకు నష్టం వాటిల్లుతోంది. నివారణకు ఏంచేయాలో తోచడం లేదు.
– స్వరూపరెడ్డి రైతు ఇబ్రహీంబాద్‌, హన్వాడ మండలం
సస్యరక్షణ చర్యలు ఇలా…
వేరుశనగ పంటకు సోకుతున్న ఆకుముడత, పచ్చపురుగు తెగుళ్ల నివారణకు రైతులు మందులు పిచికారీ చేయాలి. ఆకుముడత నివారణకు మోనోక్రొటోఫాస్‌ 1.6 మిల్లీలీటర్ల మం దును ఒక లీటర్‌ నీటితో కలిపి లేదా క్లోరోపైరిఫాస్‌ 2.5 మి.లీ. ఒక లీటర్‌ నీటితో కలిపి పిచికారీ చేస్తే తెగుళ్లు సోకవు. పచ్చ పురుగుకు బెంజత్‌ 100 గ్రా. మందును పది లీటర్ల నీటిలో కలిపి ఒక ఎకరాకు పిచికారీ చేయాలి. వేరు తినే పురుగుల నివారణకు గుళికలు ఎకరాకు 6 కేజీలు వేయాలి.
– చంద్రమౌళి, ఏ.ఓ.
Credits : Andhrajyothi

ఎర్రజొన్న … లాభాల్లో మిన్న

 

  • 40 వేల ఎకరాల్లో సాగు
  • అంకాపూర్‌ రైతులకు సిరిజల్లు
నిజామాబాద్‌ జిల్లా ఆర్మూర్‌ ప్రాంతంలో మూడు దశాబ్దాలుగా 40 వేల ఎకరాల విస్తీర్ణంలో ఎర్రజొన్న సాగు చేస్తున్నారు. తెలంగాణ రాష్ట్రంలో కేవలం ఆర్మూర్‌ ప్రాంతంలోనే ఎర్రజొన్నలు సాగవుతున్నాయి. అంకాపూర్‌ ప్రాంతంలోని రైతుల లోగిళ్లు సిరిసంపదలతో తులతూగడానికి ప్రధాన కారణం అయిన ఎర్రజొన్న సాగు విశేషాలు.
ఎర్రజొన్న గడ్డి జాతిపంట. ఇక్కడ పండిన ఎర్రజొన్నల్ని ఉత్తర భారతదేశం, పాకిస్తాన్‌, బంగ్లాదేశ్‌లలో గడ్డి విత్తనాలుగా వాడుతారు. 1983లో అంకాపూర్‌ గ్రామానికి చెందిన రైతులు ఏలూరు ప్రాంతానికి వ్యవసాయ విజ్ఞాన యాత్రకు వెళ్లారు. అక్కడ ఎర్రజొన్నలు పండడం చూసి తమ ప్రాంతానికి కావాలని ఎపీ సీడ్స్‌ అధికారులను కోరారు. మొదట్లో రెండు వందల ఎకరాల్లో సాగయిన పంట విస్తీర్ణం క్రమేపీ పెరుగుతూ 40 వేల ఎకరాలకు చేరింది. ఎర్రజొన్నలు ఆరుతడి పంట. నీరు ఎక్కువగా అవసరముండదు. దాంతో పాటు లాభాలు బాగా రావడంతో అధిక సంఖ్యలో రైతులు ఎర్రజొన్న సాగువైపు దృష్టి పెట్టారు. ఎర్రజొన్న పంట సాగు చేసిన రైతులు ఏ సంవత్సరంలోనూ నష్టపోలేదు.
ధర ఒక సంవత్సరం ఎక్కువ, మరో సంవత్సరం తక్కువ వున్నా ఇతర పంటల మాదిరి నష్టపోలేదు. ఎర్రజొన్నలు పండించినప్పటి నుంచి ఆర్మూర్‌ ప్రాంత రైతులు ఆర్ధికంగా ఎదిగారు. అంకాపూర్‌తో పాటు ఈ ప్రాంతంలోని అన్ని గ్రామాల్లో రైతులు ఆధునాతన భవంతులు నిర్మించుకుని, కార్లలో తిరుగుతున్నారంటే ఎర్రజొన్నల సాగు కూడా ఒక కారణం. ఎర్రజొన్న పంటకాలం 120 రోజులు. అప్పుడప్పుడు నీటి తడులు ఇస్తే సరిపోతుంది. ఎకరానికి ఆరునుంచి ఏడు వేల వరకు ఖర్చవుతుంది.
దిగుబడి ఎకరానికి 15 నుంచి 20 క్వింటాళ్లు వస్తుంది. ధర ఉంటే పెద్దమొత్తంలో గిట్టుబాటు అవుతుంది. ఎర్రజొన్నలు ఆర్మూర్‌ ప్రాంతంలో పండుతున్నప్పటికీ ఈ ప్రాంతంలో మార్కెటింగ్‌ లేదు. ఇక్కడ పండిన పంట ప్రాసెసింగ్‌ చేసి ఐదుకిలోల ప్యాకెట్లు తయారుచేసి ఉత్తర భారతదేశానికి ఎగుమతి చేస్తారు. అక్కడ వీటిని గడ్డి విత్తనాలుగా వాడుతారు. ఢిల్లీ, గుజరాత్‌, హరియాణ, పంజాబ్‌, రాజస్థాన్‌, యుపితో పాటు పాకిస్తాన్‌, బంగ్లాదేశ్‌లలో ఈ విత్తనాలకు బాగా డిమాండ్‌ వుంది.
ఆర్మూర్‌ ప్రాంతంలో ఎర్రజొన్నలపై రూ. 120 కోట్లపైన వ్యాపారం జరుగుతోంది. రైతుల వద్ద స్థానిక వ్యాపారులు కొనుగోలు చేసి ఢిల్లీ వ్యాపారులకు విక్రయిస్తున్నారు. ఆర్మూర్‌ ప్రాంతంలో 53 ప్రాసెసింగ్‌ యూనిట్లు ఉన్నాయి. ప్రాసెసింగ్‌ యూనిట్లు ఉన్నవారు ఎర్రజొన్నలు కొనుగోలు చేస్తారు. వ్యాపారులు పోటీపడి కొనుగోలు చేస్తే ధర పెరుగుతుంది. రెండేళ్ల క్రితం పోటీపడి కొనుగోలు చేయడంతో నాలుగు వేల పైన ధర పలికింది. గత సంవత్సరం వ్యాపారులు సిండికేట్‌గా ఏర్పడటంతో ధర రెండువేలకు పడిపోయింది. ప్రభుత్వ పరంగా ఎర్రజొన్న రైతులకు ఎలాంటి ప్రోత్సాహం అందడంలేదని రైతులు చెబుతున్నారు.
యాసంగిలోనూ సిరులు
రెండెకరాల్లో 30 ఏళ్లుగా ఎర్రజొన్న సాగు చేస్తున్నాను. వానాకాలంలో సోయా, మొక్కజొన్న పంట తీసి యాసంగిలో ఎర్రజొన్నలు వేస్తాను. ఎక రానికి 20 క్వింటాళ్ల పైన దిగుబడి వస్తుంది. ఖర్చు తక్కువ.. లాభం ఎక్కువ కావడంతో ఏటా ఇదే పంట వేస్తున్నాను.
– ఉట్‌వెల్లి రాజేశ్వర్‌, రైతు, ఆర్మూర్‌
Credits : Andhrajyothi

అంజీర సాగు భళా!

తీవ్ర వర్షాభావంతో సతమతమయ్యే అనంతపురం జిల్లా పండ్లతోటల సాగులో రాష్ట్రంలోనే ఆదర్శంగా నిలుస్తోంది. ప్రధానంగా వేరుశనగ సాగు చేసే జిల్లా రైతులు కరవు పరిస్థితుల్లో ద్రాక్ష, అంజీర, దానిమ్మ, జామ, మామిడి లాంటి పండ్లతోటల సాగుపై దృష్టి పెట్టారు. మార్కెట్‌లో మంచి ధర పలికే అంజీరను అనంతపురం రైతులు అవలీలగా సాగు చేసి అధిక లాభాలు గడిస్తున్నారు.
అనంతపురం జిల్లాలోని కూడేరు, గార్లదిన్నె, బొమ్మనహాళ్‌, డీ హీరేహాళ్‌ మండలాల్లో రెండు వేల ఎకరాలకు పైగా అంజీర పంటను రైతులు సాగు చేస్తున్నారు. సంవత్సరంలో 270 రోజుల పాటు పంట దిగుబడి వస్తోంది. బొమ్మనహాళ్‌ మండలంలోని ఎల్‌బీనగర్‌, ఏళంజి, కొళగానహళ్లి, దేవగిరి క్రాస్‌, ఉంతకల్లు, శ్రీధరఘట్ట, హిర్దేహాళ్‌, సోమలాపురం, అంబాపురం గ్రామాల్లో అంజీర సాగవుతోంది.
సాగు ప్రారంభించిన యేడాదిలో పంట కోతకు వస్తుంది. తొలి యేడాది దిగుబడి తక్కువగా వున్నా రెండవ యేడాది నుంచి పెరుగుతుంది. కురుగోడు నుంచి తీసుకువచ్చిన మొక్కల్ని అంటు పద్ధతిలో పెంచుతున్నారు. డ్రిప్‌ ద్వారా నీటిలో కలిసే ఎరువులను వేస్తున్నారు. యేడాది కాలంలో ఆరు నెలలు పంట దిగుబడి ఎక్కువగా వుంటుందని, ఆ తరువాత తగ్గుతూ వస్తుందంటున్నారు రైతులు.
 
వేరుశనగ నుంచి అంజీర వైపు..
అనంతపురం జిల్లా కూడేరు మండలం జయపురం గ్రామంలో మారుతి అనే రైతు వేరుశనగతో నష్టాలు భరించలేక అంజీర పంటవైపు దృష్టి సారించారు. జిల్లాలోని కణేకల్లు మండల ప్రాంతంలో రైతులు అంజీర సాగు చేస్తుండటంతో అక్కడకు వెళ్లి సాగు పద్ధతులు తెలుసుకున్నారు. కర్నాటక రాష్ట్రంలోని బళ్లారి కుర్రకోడు నుంచి అంజీర మొక్కలు కొని తెచ్చుకున్నారు. ఒక్కొక్కటి రూ. 25 చొప్పున ఐదెకరాల పొలానికి 1750 మొక్కలను కొనుగోలు చేశాడు. హార్టికల్చర్‌ అధికారుల సూచనలతో పంటను కాపాడుకున్నాడు. ఏడాదికే పంట చేతికి వచ్చింది. ప్రస్తుతం రెండు సంవత్సరాల మొక్కలు ప్రతి రోజూ 180 నుంచి 200 కేజీల వరకూ దిగుబడి ఇస్తున్నాయి. తన పొలం వద్ద కిలో రూ. 35 ప్రకారం విక్రయించి రోజుకు రూ.6 వేలకు తగ్గకుండా ఆదాయం పొందుతున్నాడు.
పని తక్కువ ఫలితం ఎక్కువ
అంజీర సాగులో పని తక్కువగా వుంటుంది. దిగుబడి మాత్రం ఆశించిన మేరకు వస్తున్నది. రోజూ అంజీర కాయలను కోయాల్సి వుంటుంది. ఒక రోజు ఆలస్యం అయినా కాయలు దెబ్బతింటాయి. మార్కెట్‌లో ఈ పండ్లకు మంచి డిమాండ్‌ వుంది. రైతులకు అంజీర సాగు వరప్రదాయిని.
– మారుతి, రైతు, 80085 55511
ప్రత్యేక ప్యాకేజీని ప్రకటించాలి
మొదటి యేడాది రూ.19 వేలు, రెండో యేడాది రూ. 4,500 వేలు సబ్సిడీ అందించారు. మూడో యేడాది మాత్రం ఇవ్వలేదు. మార్కెట్‌ వసతితో పాటు ప్రభుత్వం గిట్టుబాటు ధరను ప్రకటించాలి. రాయితీపై మొక్కలను పంపిణీ చేయాలి.
– వై వెంకటేశులు, ఎల్‌బీ నగర్‌, 94415 87382
మంచి దిగుబడులు
అంజీర సాగులో యాజమాన్య పద్ధతులు పాటిస్తే మంచి దిగుబడి సాధించవచ్చు. ఎకరాకు పది టన్నులకు పైగా దిగుబడి వస్తుంది. ఏడెకరాల పొలంలో అంజీర సాగు చేశాను. ప్రభుత్వ ప్రోత్సాహకాలు అందితే అంజీర సాగు రైతుకు ఎంతో లాభం చేకూరుతుంది.
– శీనప్ప, ఉంతకల్లు, 95736 66709
సేంద్రియ పద్ధతిలో సాగు
సంప్రదాయంగా దొరికే పశువుల ఎరువులు, తంగిడ, జిల్లడ, ఎంపిలాకులతో పాటూ పచ్చిరొట్ట ఎరువులను చెట్ల కింద వేయడంతో అంజీర చెట్లు ఆరోగ్యంగా, ధృఢంగా పెరిగాయని మారుతి చెబుతున్నాడు. ప్రకృతి వ్యవసాయ పద్ధతుల వల్ల పెట్టుబడులు బాగా తగ్గాయన్నారు. సేంద్రియ పద్ధతిలో సాగు చేసిన అంజీర పండ్లకు మార్కెట్‌లో మంచి గిరాకీ వుండటం విశేషం.
ఎకరాకు ఎనిమిది టన్నులు
అంజీర పంట ఎకరాకు ఎనిమిది టన్నుల దాకా దిగుబడి వస్తున్నట్లు రైతులు చెబుతున్నారు. పండ్ల తోటల్లోకెల్లా అంజీర సాగు ఆశాజనకంగా వుంటుందంటున్నారు. ఎకరా సాగుకు పెట్టుబడి కింద రూ. 50 వేల దాకా అవుతుంది. పెట్టుబడి పోను ఎకరానికి రూ. 50 నుంచి రూ. 60 వేల దాకా మిగులుతున్నట్లు రైతులు చెబుతున్నారు. మార్కెట్లో కిలో అంజీర ధర రూ. 40 దాకా వుంటోంది. ఇక్కడ పండించిన అంజీరను రైతులు అమరావతి, హైదరాబాద్‌, బెంగళూరు, చెన్నై మార్కెట్లకు తరలిస్తున్నారు. 20 కిలోల బాక్స్‌ రూ. 800 దాకా ధర పలుకుతున్నట్లు రైతులు తెలిపారు.
Credits : Andhrajyothi