‘మకామ్‌’.. మహిళా రైతుల చైతన్య వేదిక

‘మకామ్‌’ అంటే ‘మహిళా కిసాన్‌ అధికార్‌ మంచ్‌’.
‘మకామ్‌’ వేదిక ద్వారా మహిళా రైతుల హక్కులు, వారికందాల్సిన ప్రభుత్వ పథకాలు, ప్రయోజనాల గురించి అవగాహన పెంపొందిస్తున్నాం.
స్ఫూర్తి
డా.రుక్మిణీ రావు… పట్టణాల్లోనే కాదు గ్రామీణ
ప్రాంతాల్లోని మహిళా హక్కుల కోసం… దళిత స్త్రీలు, బాలలు, మహిళా రైతుల హక్కుల కోసం… చట్టాల్లో మార్పులు తేవడం కోసం ఎంతో కీలకంగా వ్యవహరించిన యాక్టివిస్టు. అందుకోసం ఆమె ‘మకామ్‌’ అనే మహిళా రైతుల హక్కుల వేదికను కూడా
ఏర్పాటుచేశారు. ‘మానవతా సమాజస్థాపనే తన లక్ష్యం’ అంటున్న రుక్మిణీరావును ‘నవ్య’ పలకరించింది. ఆ విశేషాలే ఇవి…
మనదేశంలో వ్యవసాయరంగంలో పనిచేస్తున్నది 70 శాతం మహిళా రైతులే. వారు పండిస్తే కాని మన నాలుగు వేళ్లూ నోట్లోకి పోవు. కానీ వారి హక్కుల పట్ల ప్రభుత్వాలతో పాటు సమాజం కూడా నిర్లక్ష్యంగా వ్యవహరిస్తోంది. ఇతర రాష్ట్రాలలో కొనసాగిస్తున్న లాభదాయకమైన వ్యవసాయ విధానాలను, పద్ధతులను ఆ రాష్ట్రాలకు చెందిన మహిళా రైతుల నుంచి తెలుసుకుని నూతన వ్యవసాయ సాగును ‘మకామ్‌’
అభివృద్ధిపరుస్తోంది.
పట్టణాల్లో, గ్రామాల్లో మహిళలపై జరుగుతున్న గృహహింస, వరకట్న వేధింపులు, లైంగిక దాడులు, అత్యాచారాలు… బాలలపై వేధింపులు, అత్యాచారాలకు వ్యతిరేకంగా… అలాగే దళితులు, వెనుకబడిన వర్గాల బాలల విద్య కోసం… బాల్య వివాహాలకు, భ్రూణహత్యలకు వ్యతిరేకంగా… సింగిల్‌ విమెన్‌ రక్షణ విషయంలో… ఇలా ఎన్నో సామాజిక సమస్యలపై గత రెండు దశాబ్దాలకు పైగా డా. రుక్మిణీరావు పనిచేస్తున్నారు. వీటికి సంబంధించి చట్టాలు తీసుకురావడంలో, ఉన్న చట్టాలకు కొత్త సవరణలు చేపట్టేలా కృషిచేయడంలో దేశవ్యాప్తంగా ఇతర యాక్టివిస్టులతో కలిసి పనిచేశారామె.
పట్టణాల నుంచి పల్లె మహిళల కోసం…
పట్టణ ప్రాంత మహిళల కోసం పనిచేయడంతో తన పోరాటం ప్రారంభమైందని రుక్మిణి తెలిపారు. తొలుత మహి ళల వరకట్న హత్యలపై దృష్టిసారించారామె. వరకట్న మరణాలకు సంబంధించిన చాలా కేసులను యాక్సిడెంటల్‌ మరణాలుగా పోలీసులు తేల్చడం రుక్మిణిలో ఆలోచనలను రేకెత్తించాయి. ఈ సమస్య పరిష్కారానికి ‘ప్రొ-యాక్టివ్‌ అప్రోచ్‌’ అవసరమని భావించారామె. వరకట్నం పేరుతో ఆడవాళ్లపై జరుగుతున్న హింసకు అడ్డుకట్ట వేయాలని 1981లో ‘సహేలీ రిసోర్స్‌ సెంటర్‌ ఫర్‌ విమెన్‌’ సంస్థను ఏర్పాటు చేశారు. అలా మొదలైన రుక్మిణీ రావు యాక్టివిజం విస్తృతస్థాయిలో కొనసాగుతూనే ఉంది. సమస్యలపై పోరాటానికి గ్రామాలలోని దళితులు, వెనుకబడిన వర్గాల మహిళలను బృందాలుగా ఏర్పరిచి వారిలో నాయకత్వ లక్షణాలను పెంపొందించారామె. ‘మకామ్‌’ కూడా ఈ లక్ష్యంతోనే ప్రారంభించారు. ఈ వేదిక ద్వారా మహిళా రైతుల హక్కులు, వారికందాల్సిన ప్రభుత్వ పథకాలు, ప్రయోజనాల గురించి అవగాహన పెంపొందిస్తున్నారు. ‘మకామ్‌’ అంటే ‘మహిళా కిసాన్‌ అధికార్‌ మంచ్‌’. దీనిని తెలుగులో ‘మహిళా రైతుల హక్కుల వేదిక’ అంటారు. ఈ ఆలోచనను పలు రాష్ట్రాలలోని స్వచ్ఛంద సంస్థలు కూడా అనుసరించడం విశేషం. అసలు గ్రామీణ ప్రాంత ప్రజల కోసం పనిచేయాలన్న ఆలోచన ఎలా వచ్చింది? అని అడిగితే ‘‘పట్టణ ప్రాంత మహిళలలో ఎక్కువమంది మధ్యతరగతి, ఉన్నత మధ్య తరగతి వర్గాలకు చెందినవారు. వారు ఆర్థికంగా కొంతమేర అండదండలున్నవాళ్లు కాబట్టి తమ హక్కుల సాధన కోసం కోర్టులను ఆశ్రయించగలరు. పైగా చట్టాలు, హక్కుల గురించి ఎంతోకొంత చైతన్యం ఉన్న వారు కూడా. కానీ గ్రామీణ మహిళలకు తమకోసం ప్రత్యేక చట్టాలున్నాయని, ఎన్నో హక్కులున్నాయనే విషయం తెలియదు. న్యాయస్థానాల ద్వారా న్యాయం పొందవచ్చని తెలిసినవారు వీళ్లలో చాలా తక్కువ. ఇకపోతే ప్రభుత్వం ఈ మహిళలకు అందిస్తున్న సంక్షేమ పథకాల గురించి అసలే తెలియదు. అందుకే గ్రామీణ మహిళా రైతులలో హక్కుల చైతన్యం పెంపొందించడం కోసం పనిచేయాలనుకున్నా’’ అంటారామె.
మహిళా రైతుల హక్కుల కోసం…
‘‘మకామ్‌’’ వేదికను 2014లో ప్రారంభించాం. మనదేశంలో వ్యవసాయరంగంలో పనిచేస్తున్నది 70 శాతం మహిళా రైతులే. వారు పండిస్తే కాని మన నాలుగు వేళ్లూ నోట్లోకి పోవు. కానీ వారి హక్కుల పట్ల ప్రభుత్వాలతో పాటు సమాజం కూడా నిర్లక్ష్యంగా వ్యవహరిస్తోంది. ఈ నేపథ్యంలో మహిళా రైతులు పడుతున్న శ్రమకు గుర్తింపు లేకపోవడాన్ని గమనించాం. ‘మకామ్‌’ ఇతర రాష్ట్రాలలో కొనసాగిస్తున్న లాభదాయకమైన, అభివృద్ధిదాయకమైన వ్యవసాయ విధానాలను, పద్ధతులను ఆ రాష్ట్రాలకు చెందిన మహిళా రైతుల నుంచి తెలుసుకుని నూతన వ్యవసాయ సాగును అభివృద్ధిపరుస్తోంది. అయితే మహిళా రైతులకు సంబంధించి ప్రస్తావించుకోవాల్సిన అంశాలు చాలానే ఉన్నాయి. మన దగ్గర మహిళా రైతు సంఘాలు లేనే లేవు. సాధారణ రైతు సంఘాలలో మహిళా రైతులు ఎంతమంది సభ్యులుగా ఉన్నారు? వారు అడుగుతున్న డిమాండ్లకు ఏ మేర స్పందిస్తున్నారు? మహిళా రైతుల అవసరాలను గుర్తిస్తున్నారా? ప్రభుత్వ వ్యవసాయ పథకాలు, కార్యక్రమాలు, అభివృద్ధి కార్యక్రమాలలో బడ్జెట్‌లో 30 శాతం మహిళా రైతులకు కేటాయించాలని ఆర్థిక సర్వే ప్రభుత్వానికి సూచించినా ఆ దిశగా ఎటువంటి ప్రణాళికా ప్రభుత్వాలు చేపట్టలేదు. అలాగే పంటలకు మద్దతు ధర పెంచితేనే మహిళా రైతులకు లాభం. ఆదివాసీ ప్రాంతాలలో మహిళా రైతులు సేంద్రియ వ్యవసాయం సాగిస్తున్నారు. వారి పెట్టుబడులకు, కూలీ ఖర్చులకు అధిక కేటాయింపులు కావాలి. అలాగే వ్యవసాయంలో మహిళా రైతుల పనిభారాన్ని తగ్గించడానికి, ఆహార భద్రత కల్పించడానికి కూడా బడ్జెట్‌లో కేటాయింపులు చేయాలి. విచారకరమైన విషయం ఏమిటంటే ప్రభుత్వ గణాంకాలలో మహిళలకు రైతులుగా గుర్తింపు లేదు! జెండర్‌ పరంగా గణాంకాలను రికార్డు చేసే పద్ధతి కరువవడం వలన ప్రభుత్వ చేపడుతున్న చర్యలు మహిళా రైతులకు ఎంతవరకు అందుతున్నాయనేది అంచనా వేయలేని పరిస్థితి.
అలాగే అడవి నుంచి ఆహార సేకరణ చేసే ఆదివాసీ మహిళలకు, అడవుల నుంచి పొందాల్సిన ప్రయోజనాలను దూరం చేస్తున్నారు. అందుకే మహిళా రైతులకు గుర్తింపు, రాయితీలు, అన్ని రకాల పథకాల హక్కులను ఇవ్వాలని ‘మకామ్‌’ డిమాండ్‌ చేస్తోంది. రైతు ఆత్మహత్య కుటుంబాలలో మహిళలకు జీవనోపాధి సహాయం అందించడంతో సహా రుణ మాఫీతో సమగ్ర వ్యూహాన్ని రూపొందించాలి. దీనికి అవసరమైన బడ్జెట్‌ కేటాయింపులుండాలి. భూమి లేని వారికిచ్చే కిసాన్‌ క్రెడిట్‌ కార్డులను మహిళా రైతులకు కూడా ఇవ్వాలి. ఇవే కాకుండా భూమిలేని దళిత మహిళలకు భూమి కొనుగోలు పథకాలు, కనీస మద్దతు ధర, మహిళా రైతులకు డ్రిప్‌, భూగర్భజలాల పథకాలకు ప్రోత్సాహం వంటి వాటికోసం ‘మకామ్‌’ పోరాడుతోంది అని రుక్మిణీరావు అన్నారు.
నాగసుందరి, ఫోటో:ఎల్‌.అనిల్‌కుమార్‌రెడ్డి
Credits : Andhrajyothi

జీడిమామిడికి కొత్త వంగడాల కళ

బాపట్లలోని వ్యవసాయ పరిశోధనా కేంద్రం 11 రకాల కొత్త జీడిమామిడి వంగడాలు రూపొందించింది. ఈ ఏడాది రైతులకు లక్ష జీడిమామిడి మొక్కలు అందించేందుకు బాపట్ల కేంద్రం సన్నాహాలు చేస్తున్నది.
జాతీయ జీడిమామిడి పరిశోధన పథకం కింద బాపట్ల పరిశోధన స్థానంలో 60 ఎకరాల్లో జీడిమామిడి చెట్లు విస్తరించి వున్నాయి. ఈ క్షేత్రంలో శాస్త్రవేత్తలు కొత్తరకాల వంగడాలను తయారుచేయటంతో పాటు ప్రాచుర్యం పొందిన వంగడాల మొక్కల అంటులను తయారుచేసి రైతులకు అందిస్తున్నారు. 60 ఎకరాల విస్తీర్ణంలో ఉన్న చెట్ల నుంచి వచ్చే పంటను వేలంపాట ద్వారా విక్రయిస్తారు. పరిశోధనా స్థానం ఇప్పటివరకు 11 రకాల వంగడాలను విడుదల చేసింది. విడుదలైన వంగడాలలో బిపిపి-8 అత్యధిక ప్రాచుర్యం పొందింది. అధిక దిగుబడి ఇవ్వడంతో పాటు ఈ హైబ్రీడ్‌ రకం గింజ బరువు 7 నుంచి 8 గ్రాములు ఉంటుంది. దీంతో దీనికి జాతీయ వంగడంగా గుర్తింపు లభించింది. అధిక దిగుబడి ఇచ్చే ఈ వంగడం పట్ల తూర్పు, పశ్చిమ గోదావరి జిల్లాలతో పాటు శ్రీకాకుళం రైతులు ఆసక్తి చూపుతున్నారు. నూతనంగా బిపిపి 10, బిపిపి 11 రకాలను కూడా విడుదల చేశారు. ఇవి కూడా అత్యధిక ప్రాచుర్యం పొందాయి. గత ఏడాది బాపట్ల జీడిమామిడి పరిశోధన స్థానం నుంచి 50 వేల మొక్కలు అంటుగట్టి రైతులకు విక్రయించారు. ఈ ఏడాది లక్ష మొక్కలు టార్గెట్‌ పెట్టుకున్నట్లు సీని యర్‌ శాస్త్రవేత్త కె. ఉమామహేశ్వరరావు తెలిపారు. జీడిమామిడికి ఆశించే పురుగు నివారణకు చర్యలు చేపడితే అధిక దిగుబడులు సాధించవచ్చు అని శాస్త్రవేత్తలు చెబుతున్నారు.
తేయాకు దోమ : జీడిమామిడికి తేయాకు దోమ ఆశిస్తే లీటర్‌ నీటికి 0.6 ఎం.ఎల్‌ కరాటే మందును కలిపి పిచికారి చేసుకోవాలి. జీడిమామిడి ప్రస్తుతం పూత, పిందె దశలో ఉంది కాబట్టి ఈ రకం దోమ ఆశించే అవకాశం ఎక్కువగా ఉంది.
 
గింజతినే పురుగు : ప్రస్తుత దశలో గింజతినే పురుగు ఆశించే అవకాశం ఉంది. ప్రొఫినోఫాస్‌ మందును పిచికారీ చేసి నివారించుకోవచ్చు అని శాస్త్రవేత్తలు చెబుతున్నారు.
Credits : Andhrajyothi

దశ మార్చే దేశీ కోళ్లు 

బీటెక్‌ చదివి ఉద్యోగాల కోసం ఎదురుచూడలేదు ఆ యువకులు.
నాటుకోళ్లకు పెరుగుతున్న డిమాండ్‌ గమనించి అరుదైన నాటుకోళ్ల పెంపకం చేపట్టారు ఖమ్మం పట్టణానికి చెందిన యువకులు బసవ నవీన్‌కుమార్‌, శేరెడ్డి శివారెడ్డి. 20 ఎకరాల భూమిని లీజుకు తీసుకుని అరుదైన నాటుకోళ్లను పెంచుతూ లాభాలు ఆర్జించడంతో పాటు పది మందికి ఉపాథి కల్పిస్తున్న ఆ యువకులు ప్రస్థానం.
ఇద్దరు ఇంజనీర్ల వినూత్నయత్నం
ఖమ్మం రూరల్‌ మండలం పల్లెగూడెం గ్రామానికి చెందిన రుక్మాంగదరావు 20 ఎకరాల తన వ్యవసాయ భూమిలో ఏడాది క్రితం నాటుకోళ్ల ఫారం ఏర్పాటు చేశారు. వివిధ రకాలు, జాతులకు చెందిన నాటుకోళ్లను పెంచి విక్రయించేవారాయన. ఆయన గురించి తెలుసుకున్నారు ఖమ్మం పట్టణానికి చెందిన బసవ నవీన్‌కుమార్‌, శేరెడ్డి శివారెడ్డి. ఏదైనా లాభసాటి వ్యాపారం చేయాలని ఆలోచిస్తూ రుక్మాంగద రావును కలుసుకున్నారు. నాటుకోళ్ల పెంపకం గురించి ఆసక్తిగా అడిగి తెలుసుకున్నారు. మార్కెట్‌ను అధ్యయనం చేశారు. వారి ఆసక్తిని గమనించిన కోళ్ల పారం యజమాని ఫారంను లీజుకిచ్చేందుకు ముందు కొచ్చారు. ఇంజనీరింగ్‌ చదివిన ఆ యువకులు పౌలీ్ట్ర రైతులుగా మారారు. తాము చదువుకున్న విద్యతో, ఒంటబట్టించుకున్న సాంకేతికతను జోడించి పౌలీ్ట్రని లాభసాటిగా తీర్చిదిద్దారు. పదిమందికి ఉపాథి కల్పించే స్థాయికి ఎదిగిన ఆ యువకులు పలువురికి ఆదర్శంగా నిలుస్తున్నారు
 
నెలకు 70 వేల ఆదాయం
వెరైటీ నాటుకోళ్లకు పెరుగుతున్న గిరాకీని గమనించిన ఆ యువకులు ఏపీ తదితర ప్రాంతాల నుంచి కడక్‌నాథ్‌ కోళ్లతో పాటు చీమకోళ్లు, సవేలా, డేగ, టర్కీ, కాకినెమలి, ఇటుక తదితర జాతులకు చెందిన నాటు కోడిపుంజులు, పెట్టలను తీసుకువచ్చి పెంచుతున్నారు. వీటితో పాటు కౌజు పిట్టలను కూడా పెంచుతున్నారు. కేవలం కోళ్ల పెంపకానికి పరిమితం కాకుండా జర్సీ, గిర్‌ జాతులకు చెందిన ఆవులను పెంచుతూ పాలను విక్రయిస్తూ రెండు విధాలా ఆదాయం గడిస్తున్నారు. ఫారంలో నాటు మేకపోతులు, గొర్రెపోతులను కూడా పెంచుతున్నారు ఈ యువకులు. ఈ కోళ్లఫారంలో పెంచుతున్న కోళ్ల నుంచి వచ్చే గుడ్లను ఇంక్యుబేటర్‌ సాయంతో పొదిగించి పిల్లలను ఉత్పత్తి చేస్తున్నారు. నాటుకోడి, కడక్‌నాథ్‌, కౌజుపిట్టల గుడ్లను మిషన్‌ ద్వారా పొదిగించడం విశేషం.
           ఈ కోళ్లఫారంలో కేవలం కోడిపిల్లలను మాత్రమే విక్రయిస్తున్నారు. కోళ్లను అమ్మకుండా కేవలం వాటినుంచి వచ్చే గుడ్ల ద్వారా పిల్లలను పొదిగించి.. వాటిని, కోడిగుడ్లను అమ్ముతూ లాభార్జన చేస్తున్నారు. నాటుకోళ్ల నుంచి రోజుకు 30 గుడ్లు, కడక్‌నాథ్‌ కోళ్లనుంచి 20 గుడ్లు వస్తుంటాయి. నెలకు నాటుకోళ్లకు 900 గుడ్లు వస్తే వాటిలో 600 గుడ్లను పొదగేసి.. పిల్లలు ఉత్పత్తి చేయిస్తారు. ఒక్కో కోడిపిల్లను రూ.50లకు విక్రయిస్తారు. అలా నెలకు సుమారు 600 పిల్లలను విక్రయిస్తే రూ.30 వేల ఆదాయం వస్తుందని, కడక్‌నాథ్‌ గుడ్లు కూడా రోజుకు 20 చొప్పున నెలకు 600 వస్తుంటాయి. అం దులో 400 గుడ్లను పిల్లలు చేయించి.. ఒక్కో పిల్లను రూ.100 నుంచి రూ.200 వరకు విక్రయిస్తామని నవీన్‌, శివారెడ్డి చెబుతున్నారు. వాటి ద్వారా నెలకు రూ.40వేల ఆదాయం వస్తుందని చెప్పారు. వాటితోపాటు కౌజుపిట్ట గుడ్లను పొదిగించి వాటిని పెంచి ఒక్కో పిట్టను రూ.50 లకు విక్రయిస్తుంటామని మొత్తం గా… అన్ని కోళ్లు.. కౌజుపిట్టల ద్వారా సుమారు రూ.70 వేల వరకు ఆదాయం ఉంటుందని వారు తెలిపారు.
 ఆంధ్రజ్యోతి ప్రతినిధి, ఖమ్మం రూరల్‌
 
వ్యవసాయం కంటే మేలు
వ్యవసాయానికి భారీగా ఖర్చు పెట్టాలి. కలిసి రాకపోతే అప్పులు మిగులుతున్నాయి. పెద్దగా పెట్టుబడులు లేని, ఖర్చు తక్కువ, లాభాలు ఎక్కువ ఉండే వ్యాపారం చేయాలనుకుని నాటుకోళ్ల వ్యాపారం మొదలుపెట్టానన్నారు ఈ ఫారం యజమాని రుక్మాంగదరావు. ఇప్పుడు యువకుల ఆసక్తిని గమనించి ఫారంను వాళ్లకు లీజుకిచ్చినట్లు వివరించారు.
సొంతంగా ఏదైనా చేయాలని…
బీటెక్‌ చదివినా ఏదో వెలితి. ఊరికి, అయినవారికి దూరంగా ఎక్కడో ఉద్యోగం చేసే కంటే.. సొంతంగా వ్యాపారం చేసి.. స్థిరపడాలనే కోరిక. వ్యాపారంపై మక్కువతోనే ఈ కోళ్ల వ్యాపారంలోకి అడుగుపెట్టాం. దీని ద్వారా మరో పదిమందికి ఉపాధి కూడా అందించగలుగుతున్నాం.
బసవ నవీన్‌కుమార్‌ (సెల్‌ 9160608085),
శేరెడ్డి శివారెడ్డి (సెల్‌ 9492051986)
 
సేంద్రియ పద్ధతిలో ఖర్చు తక్కువ
సేంద్రియ పద్ధతిలో సాగు చేయడం వల్ల ఖర్చు తగ్గుతుంది. తెగుళ్లు రాలేదు. నాణ్యమైన కాయలు రావడం వల్ల మంచి ధర వచ్చింది. ఏటా ఒకే పంట కాకుండా పంట మార్పిడి పాటించడం వల్ల ప్రయోజనం వుంటుంది. డ్రిప్‌ కోసం ఉద్యాన శాఖ సబ్సిడీ ఇచ్చింది. విత్తనాల మీద కూడా సన్నకారు రైతులకు సబ్సిడీ ఇస్తే రైతులకు మేలు జరుగుతుంది.
 గాడి తిరుపతిరెడ్డి, రైతు, ములకలపల్లి
Credits : Andhrajyothi

మిర్చి రైతును ముంచిన వైరస్‌

ఈ ఏడాది మిర్చి రైతును వైరస్‌ దెబ్బ తీసింది. తామరపురుగు ద్వారా వ్యాపించిన వైరస్‌ మిర్చి దిగుబడిని దెబ్బతీసింది. మిర్చి సాగుకు ప్రసిద్ధి చెందిన వరంగల్‌ జిల్లాలో దీనివల్ల 30ు దిగుబడి తగ్గిందంటున్నారు రైతులు
మిర్చి దిగుబడులను డిసెంబర్‌, జనవరి మాసాల్లో వచ్చిన తీవ్ర చలిగాలులు ఒక రకంగా దెబ్బతీస్తే, ఆ చలిగాలుల ప్రభావంతో విజృంభించిన వైరస్‌ రైతుకు తీవ్ర నష్టం చేకూర్చింది. ఖరీఫ్‌ ప్రారంభంలో సకాలంలో వర్షాలు రావడంతో రైతులు ఉత్సాహంగా మిర్చి సాగు చేశారు. ఏపుగా పెరిగే దశలో మిర్చి పంటవైరస్‌ బారిన పడింది. వరంగల్‌ జిల్లాలోని నర్సంపేట, వర్థన్నపేట, ములుగు, ఏటూరునాగారం, పరకాల, భూపాలపల్లి ప్రాంతాల్లోని మిర్చి రైతులు వైరస్‌ కారణంగా తీవ్రంగా నష్టపోతున్నారు.
తామర పురుగుతో వ్యాప్తి
ఏటా మిర్చి పంటకు సాధారణంగా వైరస్‌ రూపంలో అనేక రకాల తెగుళ్ళు సోకుతాయి. ఈసారి ప్రత్యేకంగా జెమినీ, కుకుంబర్‌ లాంటి వైర్‌సల ప్రభావం ఎక్కువైందని వ్యవసాయ శాస్త్రవేత్తలు చెబుతున్నారు. తామర పురుగు కుట్టడం వల్ల ఆకులు ముడుచుకుపోయాయి. ఆ తామర పురుగుల ద్వారా ఆ మొక్కలో వున్న వైరస్‌ ఇతర చెట్లకు వ్యాప్తి చెందింది. దీంతో మిర్చి పంట మొత్తంపై వైరస్‌ ప్రభావం పడుతున్నది. దీన్ని సకాలంలో గుర్తించకపోవడం, గుర్తించినప్పటికీ సరియైున మందులను వాడకపోవడం వల్ల వైరస్‌ వ్యాప్తి చెందింది. కొందరు రైతులు వ్యవసాయ నిపుణులను సంప్రదించకుండా బయో మందులను విపరీతంగా పిచికారీ చేశారు. వాటివల్ల వైరస్‌ తగ్గకపోగా మరింత వ్యాప్తి చెందింది. డిసెంబర్‌, జనవరి మాసాల్లో చలితీవ్రత వల్ల కూడా దిగుబడులు తగ్గాయి. ఈ రెండు కారణాల వల్ల ఈ ఏడాది చాలా ప్రాంతాల్లో ఎకరాకు 20 క్వింటాలు రావలసిన చోట 15 క్వింటాళ్ల దిగుబడి మాత్రమే వచ్చిందన్నారు రైతులు. అన్ని రకాల వాతావరణ ప్రతికూల పరిస్థితులను తట్టుకునే ఎల్‌పీఏ- 625 లాంటి మరికొన్ని రకాలను వృద్ధి చేయడంతో పాటు, ఆ వంగ డాలను రైతులకు అందుబాటులో వుంచాలని వారు కోరుతున్నారు. అలాంటి వంగడాల గురించి ప్రభుత్వం పెద్ద ఎత్తున ప్రచారం చేస్తే రైతుల్లో అవగాహన పెరుగుతుందని నిపుణులు భావిస్తున్నారు.
 
ప్రతికూల వాతావరణతో వైరస్‌
విపరీతమైన చలి పరిస్థితుల కారణంగా ఈ ఏడాది మిర్చికి వైరస్‌ సోకింది. ఆ వైరస్‌ తామర పురుగుల ద్వారా మిర్చి పంటకు వ్యాప్తి చెందింది.. దీనికి తోడు విపరీతమైన బయో మందులు వాడడం వల్ల వైరస్‌ నాశనం కాక పోగా వృద్ది చెందింది. సకాలంలో సస్యరక్షణ చర్యలు చేపట్టడం వల్ల రైతులు కొంతయినా పంటను కాపాడుకోగలిగారన్నారు ఏరువాక కేంద్రం కో ఆర్టినేటర్‌ ఉమారెడ్డి.
Credits : Andhrajyothi

కలుపు కష్టాలకు చెల్లు

పత్తి చేలలో, కూరగాయల సాగులో కలుపు తీయడానికి కూలీల కొరతతో రైతులు పడుతున్న ఇబ్బందులను గమనించి, వారికి ఉపయోగపడే యంత్రం రూపొందించాలని ఆలోచించాడు ఓ యువకుడు. కలుపు తీయడంతో పాటు గొర్రుగా కూడా ఉపయోగించుకునే యంత్రాన్ని రూపొందించాడు.
రాజన్న సిరిసిల్ల జిల్లా తంగళ్లపల్లి మండలం చిన్నలింగపూర్‌ గ్రామానికి చెందిన కొడుముంజ ప్రవీణ్‌కుమార్‌ అనే యువకుడు రైతులకు ఉపయోగపడే కొత్త యంత్రాలు ఆవిష్కరిస్తున్నాడు. ఏడో తరగతి వరకే చదువుకున్న ప్రవీణ్‌… మోటర్‌ వైండింగ్‌లో ఏడాది పాటు శిక్షణ పొందాడు. గ్రామంలో వ్యవసాయ విద్యుత్తు మోటర్ల మరమ్మతులు చేస్తుండేవాడు. జిల్లెల్ల గ్రామంలో షాప్‌ ఏర్పాటుచేసుకుని వైండింగ్‌తో పాటు లేత్‌ మిషన్‌, వెల్డింగ్‌ పనులు చేయడం మొదలుపెట్టాడు. మొదట సైకిల్‌తో కలుపు తీసే పరికరం రూపొందించాడు. ఆ తరువాత తక్కువ శ్రమతో సునాయాసంగా కలుపుతీసే లక్ష్యంతో సుజికి ఇంజన్‌తో కలుపుతీసే యంత్రాన్ని తయారుచేశాడు. దాని ఇంజన్‌ స్పీడ్‌ ఎక్కువగా వుండటంతో అది సరిగా పనిచేయలేదు. దాంతో ఈసారి స్కూటర్‌ ఇంజన్‌తో ప్రయోగం చేసి విజయం సాధించాడు ప్రవీణ్‌. ఇంజిన్‌లో రెండు లీటర్ల పెట్రోలు పోస్తే ఎకరంలో కలుపు తీస్తుంది.
ఈ యంత్రంతో కూలీల సమస్య తీరడంతో పాటు డబ్బు, సమయం కూడా ఆదా అవుతుంది. ఓ రైతు సహకారంతో 15 వేలు ఖర్చు చేసి కలుపు యంత్రాన్ని సిద్ధం చేశాడు ప్రవీణ్‌. ముందుగా స్టాండ్‌ తయారుచేసి దానికి ఇంజన్‌తో పాటు బేరింగ్‌లు, చైనులు బిగించాడు. అనంతరం స్కూటర్‌ లేక ఆటోకు చెందిన పాత హ్యాండిల్‌ను బిగించి గేరు, బ్రేక్‌ అక్కడే ఏర్పాటుచేశాడు. కేవలం కలుపు తీయడం కాకుండా బహుళ ప్రయోజనకరంగా ఈ యంత్రాన్ని తీర్చిదిద్దాడు. కలుపు తీయడంతో గొర్రుగా కూడా ఈ యంత్రాన్ని ఉపయోగించవచ్చంటాడు ప్రవీణ్‌.
 ఆంధ్రజ్యోతి ప్రతినిధి, తంగళ్లపల్లి,
 
చేయూతతో అద్భుతాలు
ప్రభుత్వం, ప్రైవేట్‌ రంగ సంస్థలు సహకరిస్తే రైతులకు ఉపయోగపడే యంత్రాలు తయారు చేయగలననే నమ్మకం వుంది. తక్కువ ఖర్చుతో కొత్త యంత్రాలు తయారుచేసే ప్రక్రియను నిరంతరం కొనసాగిస్తున్నాను. రైతులకు ఈ రకంగా సేవచేయడం సంతోషంగా వుంది.
 కొడుముంజ ప్రవీణ్‌,
చిన్నలింగపూర్‌
Credits : Andhrajyothi

ప్రకృతి సేద్య యోధుడు

  • ప్రతివారం ఉచిత శిక్షణ.. అవగాహన కార్యక్రమాలు
గుంటూరు జిల్లా వట్టిచెరుకూరు మండలం కొర్నెపాడులో యడ్లపల్లి వెంకటేశ్వరరావు రైతు నేస్తం శిక్షణా సంస్థను ఏడాదిన్నర క్రితం ప్రారంభించారు. తెలుగు రాష్ట్రాలకు చెందిన రైతులు ప్రతి ఆదివారం ఈ శిక్షణా కేంద్రంలో పాల్గొంటున్నారు. వ్యవసాయ, అనుబంధ శాఖలకు చెందిన వివిధ రంగాల్లోని నిపుణులు, విశ్రాంత శాస్త్రవేత్తలతో రైతులకు అవగాహన తరగతులు నిర్వహిస్తున్నారు. ప్రధానంగా రసాయనిక ఎరువులు, పురుగు మందులు ఉపయోగించకుండా సేంద్రియ, ప్రకృతి సేద్యం ద్వారా రైతులకు నాణ్యమైన వ్యవసాయ ఉత్పత్తులు వస్తాయని శిక్షణ ఇస్తున్నారు.
కొర్నెపాడులోని శిక్షణా కేంద్రం వద్ద సుమారు 10 ఎకరాల విస్తీర్ణంలో అనేక రకాల పంటలను ఎరువులు, పురుగు మందులు ఉపయోగించకుండా పండిస్తున్నారు. దీంతో పాటు తెలుగు రాష్ట్రాల్లో సేంద్రియ వ్యవసాయ ఉత్పత్తుల మార్కెటింగ్‌కు సంబంధించి ప్రత్యేక యాప్‌ను ఏర్పాటుచేశారు. తెలంగాణ ప్రభుత్వంతో సేంద్రియ, ప్రకృతి వ్యవసాయ ఉత్పత్తుల మార్కెటింగ్‌ కోసం రైతు నేస్తం సంస్థ ఎంవోయూ కుదుర్చుకుంది.
వ్యవసాయరంగ నిపుణులైన స్వామినాథన్‌, ప్రకృతి సేద్యం, పెట్టుబడి లేని సాగు సృష్టికర్త సుభాష్‌ పాలేకర్‌ సలహాలతో యడ్లపల్లి వెంకటేశ్వరరావు ముందడుగు వేస్తున్నారు. తెలుగు రాష్ట్రాల్లో ప్రకృతి సేద్యం, సేంద్రియ వ్యవసాయ ఉత్పత్తులను మార్కెటింగ్‌ చేసి రైతుల ఆదాయాన్ని పెంచడమే లక్ష్యంగా కృషి చేస్తున్నామని వెంకటేశ్వరరావు తెలిపారు.
Credits : Andhrajyothi

ఆకుకూరల పల్లెలు!

  • చిత్తూరు సరిహద్దు మండలాల రైతులకు నిత్యం ఆదాయం
  • మామిడిలో అంతర పంటగా సాగు
ఈ కాలంలో నిత్యం ఆకుకూరలు తినే అలవాటు పెరగడంతో వాటికి గిరాకీ పెరిగింది. దాన్ని గుర్తించిన చిత్తూరు నగరానికి చుట్టుపక్కల వుండే మండలాల రైతులు ఆకుకూరల సాగుకు ప్రాధాన్యతనిస్తూ నిత్యం ఆదాయం పొందుతున్నారు.
చిత్తూరు నగరానికి సరిహద్దుల్లో వుండే చిత్తూరు రూరల్‌, యాదమరి, గుడిపాల, గంగాధర నెల్లూరు, పెనుమూరు, తవణంపల్లె, పూతలపట్టు, ఐరాల మండలాలకు చెందిన రైతులు ఆకుకూరల సాగును నమ్ముకుని లాభాలు పొందుతున్నారు. ఈ మండలాల్లోని 15కు పైగా గ్రామాల రైతులంతా రెండు నుంచి మూడెకరాల విస్తీర్ణంలో ఆకు కూరలను సాగు చేస్తున్నారు.
సాగుచేస్తున్న ఆకుకూరల్లో సిర్రాకు (సిరికూరాకు) ఎక్కువగా వుంది. దీంతోపాటు పాలకూర, చుక్కాకు, మెంతాకు, దంటుకూరాకు, పుదిన కూడా విస్తృతంగా సాగు చేస్తున్నారు ఇక్కడి రైతులు. చిత్తూరు నగరంలో 1.90 లక్షల కుటుంబాలున్నాయి. వీటిలో దాదాపు 25 శాతం కుటుంబాల వారు నిత్యం ఏదో ఒక పూట విధిగా ఆకుకూరను ఆహారంలో తీసుకుంటారు. చిత్తూరు నగరవాసులు రోజుకు 4,500 నుంచి 5 వేల ఆకుకూరల కట్టలను కొనుగోలు చేస్తున్నట్లు అంచనా.
ఆకుకూర కట్ట డిమాండును బట్టి రూ.5 నుంచి రూ.10 వరకు ధర పలుకుతుంది. ప్రస్తుతం మార్కెట్‌లో సిరికూరాకు కట్ట రూ.3 నుంచి రూ.4 వరకు పలుకుతోంది. దీన్నిబట్టి చూస్తే రోజుకు చిత్తూరు నగరంలో రూ.15 వేల నుంచి రూ.20 వేల వ్యాపారం జరుగుతోంది. వీధుల్లో తిరుగుతూ అమ్మేవాళ్లు రోజు సాయంత్రం పొలాలకెళ్ళి ఆకుకూరలను సేకరించి కట్టలు కట్టి ఇళ్ళకు తెచ్చుకుంటారు. బస్సు సౌకర్యం వుంటే బస్సుల్లో, లేకుంటే ఆటోలు, అవీ లేకుంటే స్కూటర్ల ద్వారా తెల్లవారుజామునే నగరానికి చేరుకుని అమ్మకాలను చేపడతారు.
తెచ్చిన ఆకుకూరలను తెల్లారేసరికల్లా అమ్మేసి తిరిగి గ్రామాలకు చేరుకుని యథావిధిగా పొలం పనులకు వెళ్ళడం చిత్తూరు సరిహద్దుల్లో వుండే గ్రామాల రైతుల నిత్యకృత్యం. చిత్తూరు జిల్లాలో మామిడి సాగు ఏటికేడు విపరీతంగా పెరుగుతోంది. దానికి తోడు కొత్తగా మామిడిమొక్కలను నాటిన పొలాల్లో ఐదారేళ్ళ వరకు అంతరపంటగా ఆకుకూరలు, కూరగాయలతో పాటు పశువులకు అవసరమైన పశుగ్రాసం సాగు చేసుకోవచ్చు. ఆకుకూరల సాగులో ఆదాయాన్ని రుచిచూసిన రైతులంతా తమ మామిడి తోటల్లో అంతరపంటగా ఆకుకూరల సాగుకే అధిక ప్రాధాన్యతనిస్తూ నిత్యం ఆదాయం ఆర్జిస్తున్నారు.
మా ఊరంతా ఇదే సాగు
మా ఊరులో వుండే రైతులంతా ఆకుకూరల సాగును చేస్తావున్నాం. దీంతో రోజూ చేతికి డబ్బు వస్తాది. ఇంటి ఖర్చులకు ఇబ్బంది వుండదు. మామిడి తోటలో అంతరపంటగా సాగు చేయడం వల్ల పని కూడా తక్కువ. ఉండేదాంట్లోనే కొంత కూరాకు విత్తనాలను చల్లేస్తాం. ఖర్చు కూడా పెద్దగా వుండదు.
– చిన్నస్వామి, కొత్తగొల్లపల్లె
ఇప్పుడు రేటయితే లేదు
ఆకుకూరలకు రేటుంటేనే లాభం. ఒక్కోసారి కూరాకు కట్ట రూపాయి కూడా పలకదు. అదే కట్ట ఒకప్పుడు రూ. 10 కూడా పలుకుతుంది. ఆటో ఖర్చు రూ. 150 అవుతుంది. దీంతో కొంత బొప్పాయి సాగు చేయాలనుకున్నాం. అయితే ఎప్పటినుంచో సాగు చేస్తున్నాం కాబట్టి కూరాకును వదలాలంటే మనసురావడం లేదు.
– జ్యోతి, నల్లిశెట్టిపల్లె, తవణంపల్లె మండలం
Credits : Andhrajyothi

వేప కషాయంతో కాయ ఈగకు చెక్‌

వివిధ పంటల సంరక్షణకు రైతులు ఏ చర్యలు తీసుకోవాలనే అంశంపై ఆంధ్రప్రదేశ్‌ రైతాంగానికి ఆచార్య ఎన్‌.జి. రంగా వ్యవసాయ విశ్వవిద్యాలయ శాస్త్రవేత్తలు ఈ దిగువ సూచనలు చేస్తున్నారు.
కంది పంటను శనగపచ్చ పురుగు, మారుకా మచ్చల పురుగు కొన్ని ప్రాంతాలలో ఎక్కువగా ఆశిస్తోంది. వీటి నివారణకు నొవాల్యురాన్‌ ఒక మి.లీ. లేదా ఇనూమెక్టిన్‌ బెంజోయేట్‌ 0.4 గ్రా. లేదా కోరాజన్‌ 0.3 మి.లీ. లేదా ఫ్లూబెంటామైడ్‌ 0.2 మి.లీ. లేదా స్పైనోసాడ్‌ 0.3 మి.లీ. లేదా ఇండాక్సికార్బ్‌ 0.75 మి.లీ. ఒక లీటరు నీటికి కలిపి 10 రోజుల వ్యవధిలో రెండు మూడు సార్లు పురుగు మందులు మార్చి మార్చి పిచికారీ చేసి నివారించుకోవచ్చు.
పంటలో మారుకా మచ్చల పురుగు గూళ్లు గనుక ఎక్కువగా గమనించినట్లయితే పై మందులకు 1.0 మి.లీ. నువాన్‌ మందును ఒక లీటరు నీటిలో కలిపి పిచికారీ చేసుకోవాలి. రెండు సంవత్సరాల నుండి పిందె, కాయ దశలో కాయ ఈగ ఉధృతి కూడా ఎక్కువగా ఉంది. కాయ ఈగ ఆశించినపుడు నష్టం బయటకు కనిపించదు. కాబట్టి పిందె దశలో ఐదు శాతం వేపగింజల కషాయం పిచికారీ చేసినట్లయితే తల్లి పురుగు గుడ్లు పెట్టకుండా నివారించుకోవచ్చు. పిందె దశలో థయాక్లోప్రిడ్‌ 0.7 మి.లీ. లేక డైమిథోయేట్‌ 2.0 మి.లీ. లేక ప్రొఫెనోఫాస్‌ 2.0 మి.లీ. లీటరు నీటికి కలిపి పిచికారీ చేయాలి.
వరిలో కలుపు నివారణకు బ్యూటాక్లోర్‌ 50 శాతం ఇ.సి. 1 నుండి 1.5 మిల్లీలీటర్లు లేదా అక్సాడయార్టిల్‌ 35 గ్రాములు లేదా ప్రిటిలాక్లోర్‌ 50 శాతం ఇ.సి. 500 మి.లీ. లేదా పైరజో సల్ఫ్యూరాన్‌ 80 గ్రా. ఏదో ఒక దానిని ఎకరానికి 20 కిలోల పొడి ఇసుకతో కలిపి నాటిన మూడు నుండి ఐదు రోజులలో పలుచగా నీరు ఉంచి పొలంలో సమానంగా వెదజల్లాలి.
Credits : Andhrajyothi

ఈ యంత్రం కథే వేరు!

  • 15 పంటలు కోసే కంబైన్డ్‌ హార్వెస్టర్‌
  • తాజాగా మార్కెట్‌లోకి వచ్చిన కంబైన్డ్‌
హార్వెస్టర్‌ రైతులను అమితంగా ఆకర్షిస్తున్నది. 15 రకాల పంటలను కోసేందుకు వీలుగా ఈ కొత్త యంత్రాన్ని రూపొందించారు. తక్కువ సమయంలో, తక్కువ ఖర్చుతో గింజ నాణ్యతకు నష్టం కలగకుండా పంటను కోయడం దీని ప్రత్యేకత.
ఇప్పటివరకు వరి, మొక్కజొన్న వంటి పంటలు కోసేందుకు వేరు వేరు కోత యంత్రాలు రైతులకు అందుబాటులో ఉన్నాయి. అయితే 15 పంటలను కోసేందుకు అనువుగా నూతన టెక్నాలజీతో రూపొందించిన కంబైన్డ్‌ హార్వెస్టర్‌ ఇప్పుడు రైతులకు అందుబాటులోకి వచ్చింది. ఇది మొక్కజొన్న వంటి పంటలను కోసి, మొక్కజొన్న కంకులను నూర్పిడి చేసి మొక్కజొన్న గింజలను బయటకు తీసుకువస్తుంది. దీనివల్ల రైతులకు సమయం ఆదా కావడంతో పాటు కూలీల కొరతను అధిగమించే వీలుంది. కోతల సమయంలో పంట నష్టం కూడా చాలా తక్కువగా ఉండటం ఈ యంత్రం ప్రత్యేకత.
అడ్వాన్స్‌డ్‌ ఇంజిన్‌తో రూపొందించిన ఈ యంత్రంలోని బీటర్‌, బీటర్‌ గ్రేట్‌ అనే టెక్నాలజీ చెత్తాచెదారాన్ని ఏమాత్రం ధాన్యంలో కలవకుండా వేరు చేస్తుంది. 100 హెచ్‌పీ సామర్థ్యం ఉన్న ఇంజిన్‌తోపాటు 14 అడుగుల వెడల్పుతో బ్లేడ్‌లను ఏర్పాటు చేశారు. గింజలను నిల్వ చేసుకునే ట్యాంక్‌ సామర్ధ్యం 1800 కిలోలు. ఎకరం మొక్కజొన్న పంటను కేవలం 45 నిమిషాల్లో కోసి ధాన్యం మన ముందుంచుతుంది.
వరి, మొక్కజొన్న సోయాబీన్‌, క్లస్టర్‌ బీన్‌, గోధుమలు, కందులు, శనగలు, జొన్నలు, సజ్జలు, ఆవాలు, బఠాణీలు, బార్లీ, పొద్దుతిరుగుడు, కొత్తిమీర వంటి పంటలను కోసే విధంగా ఈ మిషన్‌ను రూపొందించారు.
ఈ యంత్రాన్ని పూర్తిగా జీపీఎస్‌ టెక్నాలజీని వినియోగించి రూపొందించారు. దీంతో ఈ యంత్రం యజమాని ఇంట్లో కూర్చొనే మిషన్‌ ఎక్కడ నడుస్తుంది? ఎంతసేపు నడిచింది? ఎంత విస్తీర్ణంలో పంట కోత చేసింది? తదితర వివరాలను స్మార్ట్‌ ఫోన్‌ ద్వారానే తెలుసుకోవచ్చు. దీని ధర రూ. 27 లక్షలు. సాధారణంగా కూలీలతో ఒక ఎకరం మొక్కజొన్న పంటను హార్వెస్టింగ్‌ చేయాలంటే మూడు నుంచి నాలుగు రోజుల సమయం పడుతుంది. రూ.7 వేల నుంచి రూ.8 వేల వరకు ఖర్చువుతుంది. ఈ యంత్రంతో కేవలం 45 నిమిషాల్లో పంట చేతికి వస్తుంది. కేవలం మూడు వేల నుంచి 3,500 రూపాయలు మాత్రమే ఖర్చవుతుంది.
Credits : Andhrajyothi

దిగుబడి పెంచే మల్చింగ్‌ యంత్రం

ఉద్యాన పంటల సాగులో రైతులు నీరు, ఎరువులు, పోషకాలు వృథా కాకుండా మల్చింగ్‌ పద్ధతిని పాటిస్తున్నారు. ఇప్పటివరకు మల్చింగ్‌ పద్ధతిని రైతులు స్వయంగా చేపట్టేవారు. ఆధునిక యంత్రం ద్వారా మల్చింగ్‌కు అవకాశం వుండటంతో రైతులు అటువైపు దృష్టి సారించారు.
ఇంతకాలం ఉద్యాన రైతులు ఓదెలు కట్టి ప్లాస్టిక్‌ ఫిలిం (అగ్రి ఫిలిం)ను ఉపయోగించి మల్చింగ్‌ చేసేవారు. దాంతో మొక్క చుట్టూ వ్యాపించి ఉన్న వేరు వ్యవస్థను ఈ ఫిలిం కప్పి ఉంచుతుంది. ఫలితంగా సాగునీరు ఆదా అవడమే కాకుండా కలుపు నివారణకు కూలీలను నియమించే ఖర్చు తగ్గుతుంది. గతంలో ఎరువులు కూడా మొక్క చుట్టూ ఉన్న వేరు వ్యవస్థకు సక్రమంగా అందేవి కావు. మల్చింగ్‌ పద్ధతి ద్వారా ఎరువులు మొక్కకు సక్రమంగా అందడంతో నాణ్యమైన ఉత్పత్తి, అధిక దిగుబడి వస్తున్నది. తెగుళ్లు, కీటకాలు ఆశించడం కూడా తక్కువ. దీంతో ఉద్యాన రైతులకు మల్చింగ్‌ వరంగా మారింది.
మల్చింగ్‌ ప్రక్రియను మరింత సులభతరం చేసేందుకు ఆధునిక యంత్రం ఒకటి అందుబాటులోకి వచ్చింది. ట్రాక్టర్‌ ద్వారా ఈ మల్చింగ్‌ను చేపడుతున్నారు. ఈ యంత్రం ధర రూ.65,100 కాగా, ప్రభుత్వం రైతాంగానికి 50 శాతం రాయితీ ద్వారా రూ.32,550కు యంత్రాన్ని అందిస్తోంది. ఈ యంత్రం ఓదెలు కడుతుంది. మనుషులతో పోలిస్తే ఈ యంత్రం వేగంగా, తేడా లేకుండా ఓదెలు కడుతుంది. మనుషులతో ఓదెలు కట్టాలంటే నాలుగు వేలు ఖర్చయ్యేది.
ఈ యంత్రంతో రెండు వేలతోనే ఓదెలు సిద్ధం అవుతాయి. ప్రధానంగా టమోటా, మిరప, కర్బూజ, పూలతోటలు, కూరగాయల తోటలకు ఈ విధానం ఎంతో ప్రయోజనకరంగా ఉంటుందని రైతులు చెబుతున్నారు. మల్చింగ్‌ పద్ధతిలో పంట నేలను తాకదు. దాంతో పంట సురక్షితంగా వుంటుంది. ఈ తరహా పంటకు మార్కెట్‌లో మంచి ధర కూడా పలకడంతో రైతులు అధిక లాభాలు పొందవచ్చు.
మంచి డిమాండ్‌
ఉద్యాన రైతులకు మల్చింగ్‌ వల్ల ఎన్నో ప్రయోజనాలున్నాయి. మల్చింగ్‌ యంత్రం రైతుకు డబ్బు ఆదా చేయడంతో పాటు నాణ్యమైన దిగుబడులు అందించేందుకు తోడ్పడుతుంది. అందరికీ మల్చింగ్‌ యంత్రం పై సబ్సిడీ వుంది. రాయచోటి డివిజన్‌లో ఇప్పటివరకు 8 మల్చింగ్‌ యంత్రాలను అందించాం.
– వనిత, ఉద్యాన అధికారి, రాయచోటి
రైతులకు ఎంతో మేలు
పేపర్‌ మల్చింగ్‌ యంత్రం వల్ల కలుపు మొక్కలు పెరగవు. చీడపీడల సమస్య కూడా ఉండదు. క్రిమిసంహారక మందులు కూడా కొంత ఆలస్యంగా కొట్టినా కూడా పెద్దగా సమస్య ఉండదు. నేను టామోటా, దోస పంటలను ఈ విధానంలోనే సాగు చేశాను. సాటి రైతుల్ని ఈ దిశగా ప్రోత్సహిస్తున్నాను.
– పెద్దిరెడ్డి, రైతు, చిన్నమండెం మండలం