కాంపాకు హరిత హారం 

 పచ్చదనం వాపస్‌కు సంకల్పం చెప్పుకొన్నాం
కాంపా నిధులు రూ.500 కోట్లు ఇవ్వండి
కేంద్ర అటవీ శాఖకు రాష్ట్ర ప్రభుత్వం వినతి
నిధుల కోసం రేపు ఢిల్లీకి మంత్రి రామన్న 

హైదరాబాద్‌, జూన్ 12 (ఆంధ్రజ్యోతి): హరిత హారం లక్ష్యం.. మొక్కల పెంపకం! అడవుల పునరుద్ధరణ! ‘కాంపా’ పథకం ఉద్దేశం.. ప్రత్యామ్నాయంగా అడవుల పెంపకం.. పచ్చదనం పునరుద్ధరణ! రెండు పథకాల లక్ష్యాలూ ఒకటే! అదే సమయంలో.. భూతాపాన్ని తగ్గించి పర్యావరణాన్ని పరిరక్షించాలన్న కేంద్ర ప్రభుత్వ సంకల్పానికీ పచ్చదనమే మార్గం! ఈ నేపథ్యంలోనే, హరిత హారం కార్యక్రమానికి కాంపా నిధులను ఉపయోగించుకోవాలని తెలంగాణ ప్రభుత్వం భావిస్తోంది. ఈ పథకం కింద రాష్ట్రానికి మరిన్ని నిధులను ఇవ్వాలని కోరుతోంది. వాస్తవానికి, ఉమ్మడి ఆంధ్రప్రదేశ నుంచి విడిపోయాక తెలంగాణ రాష్ట్ర కాంపా ఖాతాలో రూ.1400 కోట్లున్నాయి. వీటి నుంచి వార్షిక కార్యాచరణ ప్రణాళిక కింద ఏటా 10 శాతం నిధులు అంటే.. రూ.140 కోట్లను కేంద్రం విడుదల చేస్తోంది. అయితే.. హరితహారం కార్యక్రమాన్ని అమలు చేస్తున్నందున అధిక మొత్తంలో కాంపా నిధులు విడుదల చేయాలని తెలంగాణ ప్రభుత్వం కేంద్ర అటవీ శాఖపై ఒత్తిడి తెస్తోంది. ఈ ఏడాది కనీసం రూ.500 కోట్ల కాంపా నిధులనైనా విడుదల చే యాలని కోరుతోంది. ఇందులో భాగంగా, ఈనెల 14న కేంద్ర పర్యావరణ, అటవీ శాఖ మంత్రి ప్రకాశ్‌ జవడేకర్‌తో రాష్ట్ర అటవీ శాఖ మంత్రి జోగు రామన్న సమావేశం కానున్నట్లు తెలిసింది.

దారి మళ్లుతున్న కాంపా నిధులు

అభివృద్ధి కార్యక్రమాల కోసం నిర్మూలించిన అటవీ ప్రాంతానికి ప్రత్యామ్నాయంగా మరోచోట అడవిని పునరుద్ధరించడానికే కాంపా నిధులను ఉపయోగించాలి. కానీ, ఈ నిధులను గతంలో తెలంగాణ అటవీ శాఖ అరణ్య భవన్లో ఫర్నిచర్‌, గ్లాస్‌ ఫిటింగ్‌ కోసం ఖర్చు చేసిందన్న విమర్శలు ఉన్నాయి. తెలంగాణలోనే కాకుండా చాలా రాష్ట్రాల్లోని అటవీ శాఖలు కాంపా నిధులను దుర్వినియోగం చేస్తూనే ఉన్నాయి. సాంస్కృతిక కార్యక్రమాల నిర్వహణకు, కంప్యూటర్లు, ల్యాప్‌టా్‌పలు, ఫర్నిచర్‌, వాహనాల కొనుగోలు వంటి అటవీయేతర కార్యకలాపాలకు కాంపా నిధులను ఖర్చు చేస్తున్నాయి. ఈ నేపథ్యంలోనే కాంపా నిధులను సద్వినియోగం చేయడానికి కేంద్రం కూడా సహకరించాలని రాష్ట్ర ప్రభుత్వం కోరుతోంది. నిజానికి, అభివృద్ధి కార్యక్రమాల కోసం అటవీ ప్రాంతాన్ని ఉపయోగించుకున్నందుకు కేంద్ర, రాష్ట్ర ప్రభుత్వాలు, పరిశ్రమలు తదితర సంస్థలు కేంద్ర అటవీ శాఖకు చెల్లించిన పరిహార నిధులనే కాంపా నిధులు అంటారు. వివిధ రాషా్ట్రల నుంచి కేంద్ర అటవీ శాఖ వసూలు చేసిన ఈ నిధులు ప్రత్యేక ఖాతాలో జమవుతాయి. ఈ ఖాతా సుప్రీం కోర్టు అధీనంలో ఉంటుంది. ఖాతాను నిర్వహించేందుకు ప్రత్యేక అథారిటీ ఉంటుంది. దీనినే కాంపన్సేటరీ ఎఫారెస్టేషన ఫండ్‌ మేనేజ్‌మెంట్‌ అథారిటీ (సీఏఎమ్‌పీఏ- కాంపా) అని పిలుస్తారు. గతంలో కాంపా నిధులను దుర్వినియోగం చేసిన నేపథ్యంలో సుప్రీం కోర్టు స్పష్టమైన మార్గదర్శకాలను నిర్దేశించింది. రాషా్ట్రల నుంచి జమయిన మొత్తం నిధి నుంచి ఏటా 10 శాతం నిధులను యాన్యువల్‌ ప్లాన కింద విడుదల చేయాలి. ఆ నిధులను ఖర్చు చేసినట్లు యుటిలిటీ సర్టిఫికెట్లు సమర్పిస్తే తర్వాత ఏడాదిలో మరో పది శాతం నిధులను విడుదల చేయాలి. కానీ, చాలా రాష్ట్రాల్లో కాంపా నిధులు ఇప్పటికీ దుర్వినియోగం అవుతున్నాయనే ఆరోపణలు ఉన్నాయి. అదే సమయంలో, తెలంగాణ ప్రభుత్వం ప్రస్తుత ఆర్థిక సంవత్సరం బడ్జెట్లో హరిత హారానికి రూ.48 కోట్లను కేటాయించింది. హరిత హారానికి, పర్యావరణ పరిరక్షణకు ప్రభుత్వం అత్యధిక ప్రాధాన్యం ఇవ్వడమే కాకుండా ఈ ఒక్క ఏడాదిలోనే 40 కోట్ల మొక్కలను నాటాలని లక్ష్యంగా నిర్ణయించుకుంది. ఈ నేపథ్యంలోనే హరిత హారానికి మరింత చేయూత ఇచ్చేలా కాంపా నిధులను పెద్దఎత్తున విడుదల చేయాలని కోరుతోంది.

Credits : Andhrajyothi

కళ తప్పుతున్న నూజివీడు మామిడి

  • తగ్గుతున్న సాగు విస్తీర్ణం తెగుళ్లు..
  • కార్బైడ్‌ నిషేధం.. జీఎస్‌టీతో షాక్‌
 
యావత్‌ భారతానికి మధురమైన మామిడి రుచులు పంచే ఆంధ్రప్రదేశ్‌లో క్రమంగా సాగు విస్తీర్ణం తగ్గుతున్నది. పూత ఆలస్యం కావడం వల్ల ఈ ఏడాది మామిడి దిగుబడులు తగ్గే అవకాశం వుంది. కార్బైడ్‌ వినియోగంపై నిషేధం, జీఎస్‌టీ, ప్రభుత్వం నుంచి ఎలాంటి మద్దతు లభించకపోవడం మామిడి రైతులకు శాపంగా మారింది.
ఆంధ్రజ్యోతి ప్రతినిధి, నూజివీడు:మామిడి దిగుబడిలో దేశంలోనే ఆంధ్రప్రదేశ్‌ మొదటి స్థానంలో ఉంది. రాష్ట్రంలోని పలు జిల్లాల్లో 4.5 లక్షల ఎకరాల్లో మామిడి సాగవుతున్నది. సాలీనా 38.60 లక్షల మెట్రిక్‌ టన్నుల దిగుబడి వస్తోంది. నూజివీడు ప్రాంతంలో మామిడి అధికంగా సాగవుతున్నది. కొన్నాళ్లుగా రాష్ట్రంలో ప్రతికూల వాతావరణ పరిస్థితులు నెలకొనడం మామిడి దిగుబడులపై తీవ్ర ప్రభావం చూపుతున్నాయి. మామిడి కాయను మగ్గించటానికి ఉపయోగించే కార్బైడ్‌ నిషేధం వల్ల రైతులు నిస్సహాయ పరిస్థితుల్లో పడ్డారు. జీఎస్టీ కారణంగా ఇతర ప్రాంత వ్యాపారులు మామిడిని దిగుమతి చేసుకునేందుకు ముందుకు రావడం లేదు. ఈ అంశాల ప్రభావంతో రాష్ట్రంలో మామిడి సాగు విస్తీర్ణం గణనీయంగా తగ్గుతున్నది.
గత సీజన్‌లో రాష్ట్రవ్యాప్తంగా 38.65 లక్షల మెట్రిక్‌ టన్నుల మామిడి దిగుబడి రాగా, ప్రస్తుత సీజన్‌లో మామిడిపూతను గమనిస్తే అందులో 50 శాతం దిగుబడి రావడం కూడా కష్టమంటున్నారు శాస్త్రవేత్తలు. డిసెంబర్‌లో రావాల్సిన మామిడిపూత, ఫిబ్రవరి మొదటి వారానికి వచ్చింది. దీనివల్లే దిగుబడి భారీగా తగ్గే అవకాశం వుంది. మామిడికాయను మగ్గించటానికి ఉపయోగించే కార్బైడ్‌ని ప్రభుత్వం ప్రత్యామ్నాయం సూచించకుండా నిషేధించింది. దీనివల్ల ముఖ్యంగా బంగినపల్లి కాయను కొనుగోలు చేయటానికి ఇతర రాష్ర్టాల వ్యాపారులు ఎవరూ ముందుకు రావడం లేదు. దీంతో పండిన పంటను కొనుగోలు చేసేవారు లేక రైతులు తీవ్రంగా నష్టపోతున్నారు. నగదురహిత లావాదేవీలు జరపాలనే ప్రభుత్వ ఆదేశాలు కూడా మామిడి రైతుల్ని దెబ్బతీశాయి. సాధారణంగా మామిడి వ్యాపారం నగదుతోనే చేస్తారు. పంట తీసుకువెళ్లాక బ్యాంకుల్లో డబ్బు జమచేయకపోతే తీవ్రంగా నష్టపోతామనే భయంతో రైతులు వ్యాపారులకు పంట విక్రయించడం లేదు
నూజివీడులోని మామిడి తోటలకు కొన్నేళ్లుగా రాతిమంగు, బూడిద తెగులు, ముడ్డిపుచ్చు తెగులు తదితర చీడపీడల ఉధృతి పెరిగింది. ఫలితంగా కాయల నాణ్యత దెబ్బతింటోంది. నూజివీడులో మామిడి పరిశోధన కేంద్రం వున్నా అది నామమాత్రంగా మారింది. మామిడి పంటపై ఎలాంటి పరిశోధనలు జరగకపోవడం, తెగుళ్లను తట్టుకునే వంగడాలను అభివృద్ధి చేయకపోవడం, తెగుళ్ళను అరికట్టడంలో రైతులకు మార్గదర్శనం చేయడంలో విఫలం కావడంతో రైతులు ప్రత్యామ్నాయ పంటల వైపు మళ్లుతున్నారు.
నూజివీడు రైల్వేస్టేషన్‌ నుంచి ఢిల్లీ, ముంబై తదితర ప్రాంతాలకు 1999 నుంచి ఎగుమతులు జరుగుతున్నాయి. 1999లో 29 ర్యాక్‌ల ద్వారా 7,498 టన్నుల మామిడి ఇతర రాష్ర్టాలకు ఎగుమతి అయింది. 2000 సంవత్సరంలో 24 ర్యాక్‌ల ద్వారా 18,298 టన్నులు, 2004లో అత్యధికంగా 50 ర్యాక్‌ల ద్వారా 48,658 టన్నులు, 2014లో 21 ర్యాక్‌ల ద్వారా 35వేల టన్నులు, 2015లో 25 ర్యాక్‌ల ద్వారా 14వేల టన్నుల మామిడి ఇతర రాష్ర్టాలకు ఎగుమతి అయింది. 2016 నుండి ఇప్పటిదాకా ఎగుమతులు జరగలేదు. ఏటా సరాసరి రూ.5 కోట్ల వరకు రైల్వేకు సెస్‌ ద్వారా ఆదాయం లభించింది.
తక్షణ సాయం లేదంటే మామిడిమాయం!
నూజివీడు ప్రాంతంలో దుర్భిక్ష పరిస్థితులు, సాగునీటి కొరతను దృష్టిలో వుంచుకుని మామిడి రైతులందరికీ 90 శాతం సబ్సీడీతో డ్రిప్‌ ఇరిగేషన్‌ సౌకర్యం కల్పించాలి. సేంద్రియ వ్యవసాయం వైపు దృష్టి సారించేలా రైతులకు అవగాహన కల్పించాలి. నకిలీ పురుగుమందులు, ఎరువులు లేకుండా మంచి వాటిని సబ్సిడీపై ప్రభుత్వమే రైతులకు అందించాలి. కార్బైడ్‌కు ప్రత్యామ్నాయంగా, మామిడికాయను మగ్గించటానికి అవసరమైన పద్ధతులను రైతులకు చూపాలి. రైతుకు పంటను అమ్ముకోవడానికి సరైన మార్కెటింగ్‌ సౌకర్యం కల్పించి, కొనుగోలుదారుల నుండి పంట సొమ్ము రైతులకు చేరేలా ప్రభుత్వమే బాధ్యత వహించాలి.
Credits : andhrajyothi

కొబ్బరి, మామిడి మొక్కల నిధి

మేలైన కొబ్బరి మొక్కలను ఉత్పత్తి చేసేందుకు 1991లో అశ్వారావుపేటలో 49 ఎకరాల విస్తీర్ణంలో ఉద్యానశాఖ ఆధ్వర్యంలో కొబ్బరి విత్తనోత్పత్తి క్షేత్రం ఏర్పాటైంది. దేశంలోని పలు రాష్ట్రాలకు మేలైన కొబ్బరి మొక్కలను ఎగుమతి చేసిన ఘనత ఈ క్షేత్రానిది.
కొబ్బరి విత్తనోత్పత్తి క్షేత్రంలో పాతికేళ్ల క్రితం కేరళలో లభించే మేలురకాలైన హైబ్రీడ్‌ కొబ్బరి రకాల మొక్కలను ఉత్పత్తి చేశారు. ఇందుకోసం కొబ్బరి విత్తనోత్పత్తి క్షేత్రంలో, అచ్యుతాపురం ఉద్యానశాఖ నర్సరీలోను ఈస్ట్‌కోస్టల్‌, అండమాన్‌ ఆర్డినరీ, లక్కడాల్‌ ఆర్డినరీ మదర్‌ప్లాంట్‌లను పెంచారు. ఈ ప్లాంటులోని స్టిక్స్‌ను కొత్తగా పెంచిన మేలురకాలైన పొట్టిరకం కొబ్బరి మొక్కలకు క్రాసింగ్‌ చేయడం ద్వారా మేలురకాలైన కొబ్బరి విత్తన ఉత్పత్తిని చేసేవారు.
 
పొట్టిరకాలు భేష్‌
ఈ క్షేత్రంలో కేరళలో దొరికే మేలురకాలైన పొట్టిరకం కొబ్బరి చౌఘాట్‌, ఆరంజ్‌ డ్వాప్‌(డీఓడీ), గంగ బొండాం, మలియన్‌ ఆరంజ్‌ డ్వాప్‌(ఎంవోడీ), మలియన్‌ గ్రీన్‌ డ్వాప్‌(ఎన్‌జీడీ), మలియన్‌ ఎల్లో డ్వాప్‌(ఎంవైడీ) లాంటి కొబ్బరి మొక్కలను 40 ఎకరాల్లో పెంచారు. ముందుగా పెంచిన మదర్‌ప్లాంట్లలోని కాయను, ఈ విత్తనానికి క్రాసింగ్‌ చేయడం ద్వారా గోదావరి గంగ, డీఎక్స్‌డీ, ఐఎక్స్‌డీ లాంటి మేలురకాల విత్తనాలను ఉత్పత్తి చేసేవారు. ఈ మొక్కలు ఒక్కోటి 150 నుంచి 180 వరకు దిగుబడిని ఇస్తాయి. ఈ రకాలను కేరళ, ఛత్తీ్‌సగఢ్‌, ఒడిసా, తమిళనాడుతో పాటు తెలుగు రాష్ర్టాలలోని వివిధ జిల్లాలకు సరఫరా చేసేవారు. ఈ విత్తనం కేరళలో దొరికే నాణ్యత కలిగి, చీడపీడలను తట్టుకొని అధిక దిగుబడులను ఇచ్చే కొబ్బరి రకాలను ఉత్పత్తి చేసింది.
ప్రస్తుతం కొబ్బరి, మామిడి మొక్కల ఉత్పత్తి…
ఈ క్షేత్రం ఏర్పాటై 27 ఏళ్లు దాటింది. అప్పుడు నాటిన మొక్కలు బాగా పెద్దవి అయిపోయాయి. ప్రస్తుతం కొబ్బరి క్రాసింగ్‌ చేయడం లేదు. అయితే అప్పట్లో ఫార్మ్‌లో పెంచిన మేలురకాలైన చెట్టు నుంచి చౌఘాట్‌, గంగాబొండాం, మలియన్‌ ఆరంజ్‌ డ్వాప్‌, మలియన్‌ గ్రీన్‌ డ్వాప్‌, మలియన్‌ ఎల్లో డ్వాప్‌ వంటి మేలురకాలైన పొట్టిరకం విత్తనాలను ఉత్పత్తి చేస్తున్నారు. వీటికి ప్రస్తుతం మార్కెట్‌లో మంచి డిమాండ్‌ ఉంది. వీటితో పాటు బంగినపల్లి, చిన్నరసం, పెద్దరసం, తోతాపురి, పునాస రకాలైన మామిడి అంట్లను ఈ క్షేత్రంలో ఉత్పత్తి చేస్తున్నారు. కొబ్బరి మొక్క ఒక్కోదానిని రైతులకు రూ.35, మామిడి అంటును రూ.30లకు ఉద్యానశాఖ సరఫరా చేస్తోంది. శాస్త్రీయ పద్ధతిలో, శాస్త్రవేత్తల పర్యవేక్షణలో అంట్లు కట్టడం, విత్తనాన్ని నాటడం, మొక్కలను పెంచడంతో నాణ్యమైన మొక్కలు రైతులకు అందుబాటులో ఇవ్వగలుగుతుంది. ప్రైవేటు నర్సరీలలో ఒక్కో మొక్క రూ.300 నుంచి రూ.1000 వరకు వ్రికయిస్తున్నారు. అంతకంటే నాణ్యమైన మొక్కలను ఉద్యాన నర్సరీల్లో అందించడం విశేషం.
– ఆంధ్రజ్యోతి ప్రతినిధి, అశ్వారావుపేట
 
రైతులకు మేలురకం మొక్కలు
ప్రస్తుతం కొబ్బరి విత్తనోత్పత్తి క్షేత్రం ద్వారా ఏటా రూ.33 లక్షల ఆదాయం వస్తోంది. తెలుగు రాష్ర్టాల మొత్తంలో ఉద్యానశాఖ ఆధ్వర్వంలో ఏర్పాటుచేసిన కొబ్బరి విత్తనోత్పత్తి క్షేత్రం ఇది ఒక్కటే. ఈ క్షేత్రం ద్వారా కొబ్బరి, మామిడి మేలురకాలైన మొక్కలను ఉత్పత్తి చేసి, అతి తక్కువ ధరకు రైతులకు సరఫరా చేస్తున్నాం.
కిషోర్‌, ఉద్యానశాఖ అధికారి,
కొబ్బరి విత్తనోత్పత్తి క్షేత్ర ఇన్‌చార్జ్‌
Credits : andhrajyothi

ఈ మొక్క నిజంగానే మాట్లాడుతోంది!

ఈ భూమిపై మనుషుల కంటే ముందే ప్రకృతి ఉంది. చెట్టు, చేమ, పుట్ట, నీరు, నిప్పు, గాలి.. ఇలా ప్రకృతిలో మిళితమై మనిషిని భూమ్మీద బతికేలా చేస్తున్నాయి. ప్రకృతిలో మానవుడితో పాటు చెట్లకు కూడా ప్రతిస్పందించే గుణం ఉంది. ఇటీవల వచ్చిన ‘అ!’ సినిమాలో ‘చెట్లకు వీపుండదా?.. వాటికి దురదుండదా?’ అనే డైలాగ్ కూడా వినే ఉంటారు. వాటికి దురద ఉంటుందో లేదో అనే విషయాన్ని పక్కన పెడితే మనిషి చేసే చర్యలకు వాటి నుంచి స్పందనలు వస్తుంటాయి. అయితే మొక్కలను పూర్తీగా అర్థం చేసుకున్న కొంతమంది మాత్రమే వాటి స్పందనలను గ్రహించగలుగుతారు. అవి అడగకముందే వాటికి నీళ్లు పోస్తారు. ఒకరకంగా చెప్పాలంటే అలాంటి ప్రకృతి ప్రేమికులు వాటిని కూడా తమ సొంతవాళ్లలాగే భావిస్తారు. వాటితో ముచ్చటిస్తూ ఆలనాపాలనా చూస్తారు. అయితే ప్రకృతి ప్రేమికులను చూసి మరికొంతమంది కూడా ప్రభావితమవుతున్నారు. వాళ్లలా తాము కూడా మొక్కలతో మమేకమవ్వాలని తాపత్రపడుతున్నారు. అలాంటి వాళ్ల కోసమే మార్కెట్లోకొచ్చింది ఓ కొత్త మొక్క.
‘సర్‌.. మేడమ్‌.. ప్లీజ్‌! నీరు లేక ఎండిపోతున్నా! కొన్ని నీళ్లు పోసి నన్ను రక్షించండి! స్వచ్ఛమైన ఆక్సిజన్‌ అందించి.. మీ ఆరోగ్యాన్ని కాపాడుతా..’ అంటూ ఆ మొక్క చిలక పలుకులు పలుకుతోంది! తన ఆవేదనను అర్థం చేసుకొమ్మంటూ వేడుకుంటోంది. హైదరాబాద్‌లోని బిర్లా సైన్స్‌ సెంటర్‌లో ఇటీవల జరిగిన జాతీయ సైన్స్‌ దినోత్సవంలో ‘మాట్లాడే మొక్క’ అందరిని ఆలోచింపజేసింది. సిరిసిల్లకు చెందిన బుధవారపు మల్లేశం అనే వ్యక్తి ‘వాటర్‌ ఆస్కింగ్‌ సెన్సర్‌’తో ఈ మాట్లాడే మొక్కను రూపొందించారు. ఈ మొక్కకు ఇప్పుడు ఆదరణ పెరుగుతోంది. చాలామంది ఆ మొక్కను పెంచుకోవడానికి ఆసక్తి చూపిస్తున్నారు.
Credits : Andhrajyothi
02-03-2018 

సేంద్రియ ఆపిల్‌ సాగుకు పచ్చజెండా!

Organic apple grown green!

సీసీఎంబీ పర్యవేక్షణలో ఫలప్రదమవుతున్న ఆపిల్‌ ప్రయోగాత్మక సాగు

తెలంగాణలోని కెరిమెరిలో సేంద్రియ ఆపిల్‌ సాగుకు శ్రీకారం

అరకు సహా తెలుగు రాష్ట్రాల్లోని అనేక ప్రాంతాలు అనుకూలం..

మరో రెండేళ్లలో సాగు పద్ధతిని ప్రమాణీకరిస్తామంటున్న సీసీఎంబీ శాస్త్రవేత్తలు

సేంద్రియ ఆపిల్‌ సాగు ఆనందకరం..
సీసీఎంబీ శాస్త్రవేత్తలతో పాటు ఉద్యాన శాఖాధికారుల, వ్యవసాయాధికారుల సహాయంతోనే ఆపిల్‌ను సాగు చేస్తున్నా. రసాయనిక ఎరువులు, పురుగుమందులతో సాగు చేసిన పత్తిలో ఏటా నష్టాలు రావటంతో గడచిన ఏడేళ్లుగా ప్రకృతి సేద్యం చేస్తున్నాను. సీసీఎంబీ శాస్త్రవేత్తల తోడ్పాటుతో సేంద్రియ ఆపిల్‌ సాగుకు శ్రీకారం చుట్టడం ఆనందంగా ఉంది. ఈ విధానంలో ఎటువంటి ఇతర ఇబ్బందులు లేవు.

కాండం కుళ్లు, రసం పీల్చే పురుగులు, తెగుళ్ల బెడద లేదు. ఎరువులు, పురుగు మందులు కొనే పనిలేకపోవటంతో ఖర్చు తగ్గింది. కష్టపడితే చాలు. ఒక వారం కషాయాలు పిచికారీ ఆలస్యమయినా మొక్కలకు చీడపీడలను తట్టుకునే శక్తి వచ్చింది. అయితే, మాది మారుమూల ప్రాంతం కావడంతో ప్రకృతి సేద్యంలో పండించిన పంటలను మార్కెట్లో అధిక ధరకు అమ్ముకోవటం ఇబ్బందికరంగా ఉంది. ప్రభుత్వం సహకరించాలి.

కశ్మీర్‌ లోయలోనే కాదు తెలంగాణ, ఆంధ్రప్రదేశ్‌లలోనూ ప్రకృతి సేద్య విధానంలో ఆపిల్‌ పండ్లను సాగు చేసి మంచి దిగుబడులు సాధించవచ్చని నిరూపిస్తున్నారు సేంద్రియ రైతు కేంద్రే బాలాజీ.  కుమురం భీం ఆసిఫాబాద్‌ జిల్లా కెరిమెరి మండలం ధనోరా ఆయన స్వగ్రామం. ఐదెకరాల పొలంలో ఆపిల్‌తో పాటు అనేక ఏళ్లుగా మామిడి, బత్తాయి, దానిమ్మ, అరటి, బత్తాయి తోటలను ప్రకృతి వ్యవసాయ పద్ధతిలో సాగు చేస్తున్నారు. పండ్ల తోటల్లో బంతి, పసుపు, కొత్తమీరలను అంతర పంటలుగా సాగు చేస్తూ మంచి దిగుబడులు సాధిస్తున్నారు. ఈ అనుభవంతో బాలాజీ సేంద్రియ ఆపిల్‌ సాగుకు శ్రీకారం చుట్టారు.

ఆపిల్‌ మొక్కలకు పూత, కాత వచ్చింది..
ఆపిల్‌ నేషనల్‌ జీనోమ్‌ ప్రాజెక్టుకు హైదరాబాద్‌లోని సెంటర్‌ ఫర్‌ సెల్యులార్‌ అండ్‌ మాలిక్యులర్‌ బయాలజీ(సీసీఎంబీ) చీఫ్‌ కోఆర్డినేటర్‌గా వ్యవహరిస్తోంది. ప్రధాన శాస్త్రవేత్తలు డా. రమేశ్‌ కె.అగర్వాల్, డా. ఎ. వీరభద్రరావు ఈ కార్యక్రమాన్ని పర్యవేక్షిస్తున్నారు. విశాఖపట్నం జిల్లా అరకు ప్రాంతంలో డా. జోగినాయుడు ఆధ్వర్యంలో ఆపిల్‌ సాగుపై అధ్యయనం జరుగుతోంది.

అదేవిధంగా, మినీ కశ్మీరంగా పేరుపొందిన కెరెమెరి పరిసరాల్లో ఆపిల్‌ ప్రయోగాత్మక సాగుకు 2015 మేలో సీసీఎంబీ శాస్త్రవేత్తలు శ్రీకారం చుట్టారు. స్థానిక వాతావరణం, ఉష్ణోగ్రతలను పరిశీలించారు. చుట్టూ కొండలు, నడి వేసవిలోనూ ఉష్ణోగ్రతలు 35 డిగ్రీల సెంటీగ్రేడ్‌కు మించకపోవటం వంటి కారణాలతో ధనోరా గ్రామం ఆపిల్‌ సాగుకు అనువైన ప్రాంతం అని సీసీఎంబీ నిర్ధారించింది.

శాస్త్రవేత్తలు బాలాజీ పొలానికి వచ్చి మట్టి పరీక్షలు జరిపారు. తొలుత కొన్ని ఆపిల్‌ మొక్కలను సాగు చేసి వాటి ఎదుగుదల బావుండటంతో బాలాజీని ప్రోత్సహించారు. 8–10 డిగ్రీల ఉష్ణోగ్రతలోనూ సాగుకు అనువైన  ఆపిల్‌ రకాలుగా గుర్తించిన హెచ్‌.ఆర్‌.ఎం.ఎన్‌.–99, బిలాస్‌పూర్, నివోలిజన్, అన్న, రాయల్‌ బెలిషియస్‌ తదితర ఆపిల్‌ రకాలను సాగు చేస్తున్నారు. హెచ్‌.ఆర్‌.ఎం.ఎన్‌.–49 రకాన్ని హిమాచల్‌ ప్రదేశ్‌కు చెందిన రైతు శాస్త్రవేత్త హరిమాన్‌ శర్మ ఈ వంగడాన్ని అభివృద్ధి చేశారు.

సీసీఎంబీ సరఫరా చేసిన ఆపిల్‌ మొక్కలను 2015 ఆగస్టులో బాలాజీ నాటారు. తొలుత 2 అడుగులు లోతు, వెడల్పు ఉండేలా గుంతలు తవ్వుకున్నారు. గుంతకు 10 కిలోలు పశువుల ఎరువు వేశారు. సాళ్లు, మొక్కల మధ్య ఆరు మీటర్ల దూరం ఉండేలా నాటుకున్నారు. ఆపిల్‌ మొక్కలకు నష్టం కలిగించే రసంపీల్చే పురుగుల నివారణకు వారానికోసారి కలుపు తీయిస్తున్నారు.

ప్రతి 20 రోజలకోసారి మొక్కకు లీటరు జీవామృతం ఇస్తున్నారు. చీడపీడల నివారణకు వారానికోసారి 20 లీటర్ల నీటికి లీటరు దశపత్ర కషాయం కలిపి పిచికారీ చేస్తున్నారు. ఈ ఏడాది మార్చిలో పూత వచ్చింది. నెల రోజుల్లో కాయలు ఒక మోస్తరుగా పెరిగాయి. వేసవిలో నాలుగు రోజులకోసారి బోరుతో నీటి తడి ఇచ్చారు. అయితే ఆపిల్‌ చెట్లకు మూడేళ్ల వయసు వచ్చే వరకు కాపు తీయవద్దని సీసీఎంబీ శాస్త్రవేత్తలు చెప్పటంతో బాలాజీ పూతను తీసేస్తున్నారు. పరిశోధన కోసం రెండు చెట్లకు మాత్రమే కాయలు పెంచుతున్నారు. గుంతలు తవ్వేందుకు, మొక్కలు నాటేందుకు, కలుపు నివారణకు, ఇనుప కంచె, కూలీలకు, రూ. 3 లక్షల వరకు ఖర్చయిందని బాలాజీ తెలిపారు.

సేంద్రియ పండ్ల సాగులో పదేళ్ల అనుభవం
బాలాజీ అనేక ఏళ్లుగా ఎకరంలో బత్తాయిని సాగు చేస్తున్నారు. చెట్టుకు క్వింటా నుంచి క్వింటాన్నర వరకు బత్తాయిల దిగుబడి వస్తోంది. రూ. 60 వేల వరకు ఖర్చవుతుండగా, ఏడాదికి రూ. లక్ష నికరాదాయం వస్తోంది. జీవామృతం, దశపత్ర కషాయాలను వీటి సాగులో వాడతారు. బత్తాయిలో అల్చింతను అంతరపంటగా మడుల్లో సాగు చేస్తున్నారు. రబీలో గోధుమను సాగు చేస్తున్నారు. ఎకరాకు 4 క్వింటాళ్ల దిగుబడి వస్తోంది.

గతేడాది ఆగస్టు నెలలో ఎకరంలో దానిమ్మ, మరో ఎకరంలో టిష్యూకల్చర్‌ అరటì  మొక్కలను నాటుకున్నారు. ఇందులో బంతిని అంతరపంటగా సాగు చేశారు. 40 క్వింటాళ్ల పూల దిగుబడి వచ్చింది. రూ. 30 వేల నికరాదాయం లభించింది. రెండేళ్ల క్రితం దశేరి, బంగినపల్లి మామిడి మొక్కలను రెండెకరాల్లో నాటారు. ఎకరాలో అంతరపంటగా దానిమ్మను సాగు చేశారు.

అర ఎకరాలో పసుపును సాగు చేస్తున్నారు. చిన్న మడులను ఏర్పాటు చేసి వేసవిలో కొత్తిమీర సాగు చేస్తున్నారు. తెలంగాణ రాష్ట్ర ఉత్తమ రైతుగా ఎంపికైన బాలాజీ జూన్‌ 2న ముఖ్యమంత్రి కేసీఆర్‌ చేతుల మీదుగా రూ. లక్ష నగదు పుర స్కారాన్ని అందుకున్నారు.
– సర్పం ఆనంద్, సాక్షి, కెరెమెరి, కుమురంభీం ఆసిఫాబాద్‌ జిల్లా

రాష్ట్ర ప్రభుత్వాలు, ఉద్యాన వర్సిటీలు ఆపిల్‌ సాగుకు తోడ్పాటునందించాలి!
ఆపిల్‌ సాగుకు తెలంగాణ, ఆంధ్రప్రదేశ్‌లలో కొన్ని ప్రాంతాలు అనుకూలంగా ఉన్నట్లు రెండేళ్లుగా సాగుతున్న మా అధ్యయనంలో రుజువైంది. హెచ్‌.ఆర్‌.ఎం.ఎన్‌. తదితర రకాలు మైదాన ప్రాంతాల్లో సైతం బాగా పెరుగుతున్నాయి. కోరాపుట్‌ (ఒడిశా)లో, అరకులో, రిషివ్యాలీలో, విజయనగరం జిల్లా సాలూరులో, నాందేడ్‌లో, వికారాబాద్‌ జిల్లా అనంతగిరి హిల్స్‌లో, ఆదిలాబాద్‌ జిల్లా కెరిమెరిలో ఆపిల్‌ పండ్ల సాగు సాధ్యమేనని తేలింది. ఆపిల్‌.. గులాబీ కుటుంబానికి చెందిన మొక్క.

గులాబీ మాదిరిగానే మన దగ్గర కూడా సాగు చేయొచ్చు. శీతాకాలంలో కనీసం 100–150 గంటల పాటు 10–12 డిగ్రీల సెంటీగ్రేడ్‌ ఉష్ణోగ్రత నమోదైతే ఫలితాలు బాగుంటాయి. మెదక్‌లో కూడా 5 డిగ్రీల ఉష్ణోగ్రత నమోదైన సందర్భాలున్నాయి. కాబట్టి, ఆపిల్‌ మొక్కలు పెరుగుదల, పూత, కాత నిలబడటం వరకు సమస్య లేదు. అయితే, సమగ్ర సాగు పద్ధతిని ప్రమాణీకరించాల్సి ఉంది. ఇందుకు మరో రెండేళ్లు సమయం పడుతుంది.

ఒకేసారి విస్తారంగా పొలాల్లో కాకుండా పెరటి తోటల్లో సాగు చేయించాలి. ఈ విషయమై తెలంగాణ, ఆంధ్రప్రదేశ్‌ ప్రభుత్వాలు, ఉద్యాన వర్సిటీలు, ఉద్యాన శాఖలు శ్రద్ధాసక్తులు కనబరిస్తే పని సులువు అవుతుంది. వీరు ఆసక్తి చూపితే రానున్న డిసెంబర్‌ – జనవరి నెలల్లో మొత్తం 20 వేల ఆపిల్‌ మొక్కలను ఈ రెండు రాష్ట్రాల్లో ప్రయోగాత్మక సాగుకు అందించడానికి సిద్ధంగా ఉన్నాం. కేరళ, కర్ణాటక, ఛత్తీస్‌గఢ్, చిత్తూరు రైతులు ఆపిల్‌ సాగుపై ఆసక్తి చూపారు.

Credits : https://www.sakshi.com/news/family/938484

అడవి పందులు, కోతుల పీడ విరగడయ్యేదెలా?

Wild pigs and monkeys to get sick?

అడవి పందులు, కోతుల వల్ల తెలుగు రాష్ట్రాల్లో పంటలకు తీవ్ర నష్టం

డా. వాసుదేవరావు సారథ్యంలో ప్రొ. జయశంకర్‌ తెలంగాణ రాష్ట్ర వ్యవసాయ విశ్వవిద్యాలయంలో విస్తృత అధ్యయనం

అడవి పందులను పారదోలే ‘ఆర్తనాదాల యంత్రం’.. కోతులను బెదరగొట్టే తుపాకీకి రూపకల్పన

పంటల రక్షణకు మరికొన్ని ఉపాయాలను రూపొందించిన శాస్త్రవేత్తలు

అడవి పందులు, కోతుల సంఖ్య, పంట నష్టంపై క్షేత్రస్థాయి గణాంకాలు సేకరించడం అవసరమంటున్న శాస్త్రవేత్తలు

అడవిలోని పందులు, కోతుల వంటి జంతువులకు ఆహార కొరత ఏర్పడితే ఏమవుతుంది? అవి దగ్గర్లోని పంట పొలాలపై వచ్చి పడుతూ ఉంటాయి. అడవి బలహీనమవుతున్న కొద్దీ పంటల మీద వీటి దాడి తీవ్రమవుతూ వస్తున్నది. ఆంధ్రప్రదేశ్, తెలంగాణ రాష్ట్రాల్లోని చాలా జిల్లాల్లో  రైతులకు అడవి పందులు, కోతుల బెడద గత ఐదారేళ్ల నుంచి పెను సమస్యగా పరిణమించింది. వీటిని పారదోలి పంటలను కాపాడుకునే పద్ధతులపై ప్రొ. జయశంకర్‌ తెలంగాణ రాష్ట్ర వ్యవసాయ విశ్వవిద్యాలయంలోని అఖిల భారత సకశేరుక చీడల యాజమాన్య విభాగం గత కొన్నేళ్లుగా అధ్యయనం చేస్తున్నది. విభాగం అధిపతి, ముఖ్య శాస్త్రవేత్త డా. వైద్యుల వాసుదేవరావు సారథ్యంలోని శాస్త్రవేత్తల బృందం అడవి పందులు, కోతులను పంట పొలాల నుంచి దూరంగా పారదోలేందుకు అనేక పద్ధతులను రూపొందించింది. ఇవి రైతులకు ఊరటనిస్తున్నాయి. ఇబ్బడి ముబ్బడిగా సంతతిని పెంచుకుంటున్న అడవి పందులు, కోతులను నిర్మూలిస్తే తప్ప తమ కష్టాలు తీరవని కొందరు రైతులు గగ్గోలు పెడుతున్నారు. అయితే, వన్యప్రాణి రక్షణ చట్టం ప్రకారం వీటి కాల్చివేత నేరం.

కిం కర్తవ్యం?!
అడవి పందులు, కోతుల సంఖ్య ఎంత? వీటి వల్ల ఏయే పంటల్లో జరుగుతున్న నష్టం ఎంత? స్పష్టంగా తెలియదు! గణాంకాలు అందుబాటులో లేకపోవడంతో విధాన నిర్ణయాలు తీసుకోవడానికి వీలుకావడం లేదన్నది ఒక వాదన. సమస్య తీవ్రతపై క్షేత్రస్థాయి గణాంకాలు సేకరించినప్పుడే వీటిని పూర్తిస్థాయిలో ఎదుర్కొనే మరింత సమర్థవంతమైన మార్గాలు వెదకడం సాధ్యమవుతుందని అఖిల భారత సకశేరుక చీడల(వెర్బట్రేట్‌ పెస్ట్‌) యాజమాన్య విభాగం అధిపతి డా. వాసుదేవరావు స్పష్టం చేస్తున్నారు.  పాలకులారా వింటున్నారా..?!

అడవి పందులు పంటల వాసనను  పసిగట్టి పొలాలపై దాడి చేస్తుంటాయి..
అడవి పల్చబడిపోవటం వల్ల వ్యవసాయం కూడా దెబ్బతింటున్నది. అడవిలో మానులు నరికివేతకు గురవడంతో అడవి జంతువులు, పక్షులకు ఆహారం దొరకడం లేదు. దాంతో అవి ఆకలి తీర్చుకోవడానికి రైతుల పంట పొలాలపైకి దాడి చేస్తున్నాయి. ఇందువల్లనే అడవి పందులు, కోతుల వంటి జంతువుల వల్ల తెలుగు రాష్ట్రాల్లో రైతులకు జరుగుతున్న పంట నష్టం ఏటేటా పెరుగుతున్నదే తప్ప తగ్గటం లేదు. అయితే, ఈ సమస్యపై పాలకులు అంతగా దృష్టి పెట్టకపోవటంతో రైతులకు కష్టనష్టాలే మిగులుతున్నాయి.

∙మన దేశంతోపాటు బర్మా, అమెరికా, రష్యా తదితర దేశాల్లో అడవి పందుల బెడద ఎక్కువగా ఉంది. ఇతర దేశాల్లో వీటిని కాల్చి లేదా విషం పెట్టి చంపుతున్నారు. కానీ, మన దేశంలో వివిధ కారణాల వల్ల వన్యప్రాణి సంరక్షణకే అధికంగా మొగ్గు చూపుతున్నాం

► అడవి పందులు సామాన్యంగా వర్షాకాలం ముగిసిన తర్వాత పంట పొలాలపై ఎక్కువగా దాడి చేస్తుంటాయి. గడ్డి భూములు, అటవీ పరిసర ప్రాంతాలు, నదీ పరీవాహక ప్రాంతాలు, పంట పొలాల సమీపంలో రాత్రి వేళల్లో సంచరిస్తూ ఉంటాయి

► అనేక రకాల పంటలు, దుంపలు, మట్టిలోని వేరు పురుగులు, పాములు, చిన్న జంతువులను తింటాయి. కలుపు మొక్క తుంగ గడ్డలను ఇష్టపడతాయి

► పరిపక్వ దశలోని మొక్కజొన్నకు 23–47%, వేరుశనగకు 20–48%, చెరకుకు 18–36%, వరికి 11–30%, జొన్నకు 10–20% చొప్పున పంట దిగుబడి నష్టం కలిగిస్తాయి. కంది, పెసర, వరి, శనగ, కూరగాయ పంటలకు కూడా అడవి పందులు నష్టం చేస్తాయి

► ఘాటైన వాసనను వెదజల్లే పసుపు, అల్లం, వాము, ఆవాలు.. ముళ్లను కలిగి ఉండే వాక్కాయ, కుసుమ, ఆముదం పంటల జోలికి అడవి పందులు రావు

► పంటలకు నష్టం కలిగించడంతోపాటు వైరస్‌ సంబంధమైన జబ్బులను ఇతర జంతువుల్లో వ్యాపింప చేస్తాయి

► అడవి పందుల్లో వాసన పసిగట్టే గుణం ఎక్కువ. కాబట్టి, దూరం నుంచే ఎక్కడ ఏ పంట ఉందో గ్రహిస్తాయి. చూపు, వినికిడి శక్తి తక్కువ

► ఆహార సేకరణకు 15–35 వరకు కలసి గుంపులుగా సంచరిస్తాయి. ఆడ పందులు నాయకత్వం వహిస్తాయి

► అడవి పందులు వర్షాకాలంలో 4–12 పిల్లలను కంటాయి ∙అడవి నుంచి బయటకు వచ్చిన అడవి పందులు సర్కారు తుమ్మ చెట్లలో నివాసం ఏర్పాటు చేసుకొని.. రాత్రుళ్లు పంటల పైకి దాడి చేస్తున్నాయి.

ఆర్తనాదాల యంత్రంతో అడవి పందులకు చెక్‌
అడవి పందులను సమర్థవంతంగా పారదోలేందుకు శాస్త్రవేత్తలు అనేక పద్ధతులను రూపొందించారు. ఇందులో ముఖ్యంగా చెప్పుకోదగినది ‘ఆర్తనాదాల యంత్రం’(బయో అకౌస్టిక్స్‌). బెంగళూరుకు చెందిన గ్రుస్‌ ఎకోసైన్సెస్‌ సంస్థతో కలసి దీన్ని రూపొందించారు. గత మూడేళ్లుగా వివిధ రాష్ట్రాల్లో 155 మంది రైతుల క్షేత్రాల్లో ప్రయోగాత్మకంగా వాడుతున్నారు. రైతుల అనుభవాలు, సూచనలకు అనుగుణంగా దీన్ని పూర్తి స్థాయిలో అభివృద్ధి పరిచారు. ప్రొ. జయశంకర్‌ తెలంగాణ రాష్ట్ర వ్యవసాయ విశ్వవిద్యాలయం తరఫున త్వరలో కంపెనీతో అవగాహన ఒప్పందం జరగబోతోంది.

పులి, అడవి పంది తదితర అటవీ జంతువులు ఆపదలో ఉన్నప్పుడు బిగ్గరగా అరిచే ఆర్తనాదాలను 33 నిమిషాలపాటు రికార్డు చేశారు. ప్రతి జంతువు ఆర్తనాదాలకు మధ్యలో కొద్ది నిమిషాలపాటు.. ఇవి నిజమైన ఆర్తనాదాలేనని భ్రమింపజేయటం కోసం.. విరామం ఇచ్చారు. ఆర్తనాదాల యంత్రాన్ని పొలంలో కరెంటు స్థంభానికి లేదా మరేదైనా కర్రకు బిగించవచ్చు. విద్యుత్‌తో నడుస్తుంది. కరెంట్‌పోతే సౌరశక్తితో నడుస్తుంది. బ్యాటరీ 12–14 గంటలు పనిచేస్తుంది. జీఎస్‌ఎం సిమ్‌ టెక్నాలజీని వాడారు. రైతు పొలానికి వెళ్లకుండానే సెల్‌ ద్వారా ఆన్‌/ ఆఫ్‌ చేయొచ్చు. అరుపులు బాగా బిగ్గరగా (42–37 డెసిబుల్స్‌) 10–15 ఎకరాల వరకు వినిపిస్తాయి.

అడవి పందులను అరికట్టే జీవకంచెలు: మొక్కజొన్న, జొన్న పంటల చుట్టూ ఆముదం మొక్కలను 4 వరుసలు దగ్గర దగ్గరగా విత్తుకొని అడవి పందులు లోపలికి రాకుండా చూడవచ్చు. ఆముదం పంటపై ముళ్లు వీటిని అడ్డుకుంటాయి. వేరుశనగ పొలానికి చుట్టూ కుసుమ పంటను 4 వరుసలు వత్తుగా విత్తుకోవాలి. పొలం చుట్టూతా దగ్గర దగ్గరగా వాక్కాయ చెట్లు పెంచటం ద్వారా పొలంలోపలికి అడవి పందులు రాకుండా అడ్డుకోవచ్చు. వాక్కాయ చెట్టుకు ఉండే ముళ్లు వీటిని అడ్డుకుంటాయి. ఈ పంటల ద్వారా అదనపు ఆదాయం కూడా వస్తుంది.

ఇనుప ముళ్ల కంచెలు: చిన్న కమతాల్లో పంటలు పండించుకునే రైతులు ముళ్ల కంచెలు వేసుకోవడం ద్వారా అడవి పందుల నుంచి పంటను కాపాడుకోవచ్చు. బార్బ్‌డ్‌ వైర్‌తో 3 వరుసలుగా పంట చుట్టూ కంచెగా నిర్మించాలి. 2 అడుగుల గుండ్రటి కంచెను పంట చుట్టూ వేయాలి. దీన్నే పోలీస్‌ కంచె అని కూడా అంటారు.

చైన్‌ లింక్‌ ఫెన్స్‌ను పొలం చుట్టూ వేసుకొని పంటను రక్షించుకోవచ్చు. భూమి లోపలికి 9 అంగుళాల మేరకు దీన్ని పాతాలి. లేకపోతే కంచె కింద మట్టిని తవ్వి.. కంత చేసుకొని పొలంలోకి పందులు వస్తాయి. హెచ్‌.డి.పి.ఇ. చేపల వలను పొలం చుట్టూ వేసుకోవచ్చు. 3 ఇంచుల కన్ను ఉండే వలను వాడాలి. 3 అడుగుల ఎత్తు, 2 అడుగుల వలను భూమి మీద పరచి.. మేకులు కొట్టాలి. ఈ వలలో అడవి పందుల గిట్టలు ఇరుక్కుంటాయి.

కందకాలు: పొలం చుట్టూ కందకాలు తవ్వటం ద్వారా అడవి పందులను అడ్డుకోవచ్చు. కందకం 3 అడుగుల వెడల్పు, 2 అడుగుల లోతు ఉండాలి. పొలం చుట్టూతా ఒకటే కందకం తవ్వాలి. ఎక్కడా గట్టు వదలకూడదు. పొలం గట్టుకు అడుగు దూరంలో తవ్వాలి. పందులు దూకి రాలేవు. వాన నీటి సంరక్షణ జరుగుతుంది. పక్క పొలాల నుంచి పురుగులు కూడా మన పొలంలోకి రావు.

విషగుళికలు: పొలం చుట్టూ కర్రలు పాతి ఫోరేట్‌ గుళికలను గుడ్డ మూటల్లో వేలాడగట్టాలి. 200 గ్రా. గుళికలను కిలో ఇసుకలో కలపాలి. ఈ మిశ్రమాన్ని 100 గ్రా. చొప్పున తీసుకొని చిన్న, చిన్న రంధ్రాలు పెట్టినగుడ్డలో మూట గట్టాలి. 3 – 5 మీటర్ల దూరంలో కర్రలు పాతి వాటికి వేలాడ గట్టాలి.ఈ గుళికల ఘాటు వాసన పందులు పంట వాసనను పసిగట్టకుండా గందరగోళపరుస్తాయి. కాబట్టి పొలంలోకి రావు.

కోడిగుడ్డు ద్రావణం పిచికారీ: పంట చుట్టూ అడుగు వెడల్పున నేలపై గడ్డిని తవ్వేసి.. కోడిగుడ్డు ద్రావణాన్ని పిచికారీ చేస్తే పొలంలోకి పందులు రావు. కుళ్లిన లేదా మామూలు కోడిగుడ్లను పగలగొట్టి ఒక పాత్రలో పోసుకోవాలి. 25 మి.లీ. కోడిగుడ్డు ద్రావణాన్ని లీటరు నీటికి కలిపి పొలం చుట్టూ పిచికారీ చేయాలి.

పంది కొవ్వు + గంధకం పూత: పొలం చుట్టూ 3 వరుసల నిలువు కంచె మాదిరిగా కొబ్బరి తాళ్లు కట్టాలి. పంది కొవ్వులో గంధకాన్ని 3:1 నిష్పత్తిలో కలిపి.. ఆ మిశ్రమాన్ని తాళ్లకు పూయాలి. పందులైనా ఇతర జంతువులైనా ఒక గుంపు ఉన్న చోటకు మరొక గుంపు రావు. పంది కొవ్వు–గంధకం వాసన తగలగానే ఇక్కడ వేరే గుంపు ఉందని భ్రమపడి పందులు వెళ్లిపోతాయి.

వెంట్రుకలు: మనుషులు క్షవరం చేయించుకున్నప్పుడు రాలే వెంట్రుకలు తీసుకువచ్చి.. పొలం చుట్టూ ఒక అడుగు వెడల్పున వేయాలి. గడ్డిని చెక్కి శుభ్రం చేసిన నేలపై వెంట్రుకలు వేయాలి. అడవి పందులు ముట్టెతో వాసన చూసినప్పుడు ఈ వెంట్రుకలు ముక్కులోకి వెళ్లి గుచ్చుకుంటాయి. దాంతో వెనుదిరిగి వెళ్లిపోతాయి.

కోతులకు తిండి పెట్టటం మానితే 30% పంట నష్టం తగ్గుతుంది!
తెలుగు రాష్ట్రాల్లో పంట పొలాలకు అడవి పందులతోపాటు కోతుల బెడద ఎక్కువగా ఉంది. వీటి సంతతి వేగంగా పెరుగుతుండటంతో పంట నష్టం ఏటేటా పెరుగుతున్నది. అడవుల్లో, రోడ్ల పక్కన వివిధ రకాల పండ్ల చెట్లను అభివృద్ధి పేరిట నరికివేస్తుండటం వల్ల కోతులు ఆహారం కోసం పంటల మీదకు వస్తున్నాయని నిపుణులు చెబుతున్నారు.

ప్రజల్లో కొన్ని రకాల సెంటిమెంట్ల కారణంగా కోతులకు పండ్లు, ఇతర ఆహార పదార్థాలను తినిపించడం కూడా కోతుల సంతతి తామరతంపరగా పెరిగి సమస్యాత్మకంగా తయారవుతున్నదన్నది నిపుణుల మాట. కోతులకు మనుషులు ఆహారం వేయటం మానేస్తే వీటి మూలంగా జరుగుతున్న పంట నష్టం 30% మేరకు తగ్గిపోతుందని గత రెండేళ్లుగా ఈ సమస్యపై అధ్యయనం చేస్తున్న ప్రొ. జయశంకర్‌ తెలంగాణ రాష్ట్ర వ్యవసాయ విశ్వవిద్యాలయం ముఖ్యశాస్త్రవేత్త డా. వాసుదేవరావు చెప్పారు.

మన ప్రాంతాల్లో సాధారణంగా కనిపించే కోతులకు తోక పొట్టిగా, ముడ్డి ఎర్రగా ఉంటుంది. ఆగస్టు – అక్టోబర్‌ నెలల మధ్య ఇవి పిల్లలను పెడుతూ ఉంటాయి. ఆడ కోతుల సంఖ్య చాలా ఎక్కువగా ఉండటం వీటి సంతతి వేగంగా పెరగటానికి ప్రధాన కారణమవుతోంది. సాధారణంగా ఒక మగ కోతికి 2.8 ఆడ కోతుల చొప్పున ఉండాలి. కానీ, తాము నిర్వహించిన సర్వేలో ప్రతి మగ కోతికి 6.7 ఆడకోతులు ఉన్నాయని తేలినట్లు డా. వాసుదేవరావు ‘సాక్షి సాగుబడి’తో చెప్పారు.

కోతులు తినని పంటలు: కోతుల బెడద బాగా తీవ్రంగా ఉన్న ప్రాంతాల్లో వాటికి నచ్చని పంటలను సాగు చేయటం మేలని డా. వాసుదేవరావు సూచిస్తున్నారు. పసుపు, అల్లం, కంద, చేమగడ్డ, బంతి, మిర్చి, ఆవాలు, సజ్జ వంటి పంటల జోలికి కోతులు రావని ఆయన తెలిపారు. ఇతర పంటలను సాగు చేసే రైతులు కోతులు తినని పంటలను సరిహద్దు రక్షక పంటలుగా వత్తుగా కొన్ని సాళ్లు వేసుకోవటం వల్ల ప్రయోజనం ఎంత వరకూ ఉంటుందన్న కోణంలో అధ్యయనం జరుగుతోంది.

రోడ్ల వెంట చెట్ల నరికివేతతో సమస్య తీవ్రం..: మన పూర్వీకులు రోడ్లకు ఇరువైపులా నేరేడు, చింత, మద్ది, రావి తదితర పండ్ల జాతులు, మోదుగ, బూరుగ వంటి మకరందాన్ని అందించే పూల చెట్లను ఎంతో ముందు చూపుతో నాటేవారు. ఆ చెట్లపై ఆధారపడి కోతులు ఆకలి తీర్చుకుంటుండేవి. అయితే, రోడ్ల విస్తరణలో భాగంగా మన ముందు తరాల వారు నాటిన పెద్ద చెట్లన్నిటినీ నరికేశాం. అదే విధంగా అడవిలో కూడా పెద్ద మాన్లు నరికివేతకు గురయ్యాయి. చిన్న చెట్లతో కూడిన అడవులే పల్చగా మిగిలాయి. దీంతో కోతులకు చెట్ల ద్వారా ఆహారం లభించక పంటల మీదే ఆధారపడాల్సిన అనివార్య పరిస్థితి వచ్చిందని డా. వాసుదేవరావు అంటున్నారు.

హరితహారం, సామాజిక అడవుల పెంపకం వంటి ప్రభుత్వ కార్యక్రమాల్లో ఇతర పరాయి ప్రాంతపు వృక్ష జాతులకు బదులు సంప్రదాయక పండ్ల జాతుల మొక్కలు నాటాల్సిన ఆవశ్యకత ఉందని ఆయన సూచిస్తున్నారు. వాణిజ్యదృష్టితో టేకు, యూకలిప్టస్‌ వంటి మొక్కలను నాటడం కన్నా పండ్లు, పూల జాతి చెట్లను ఎక్కువగా పెంచి, కోతులను ఆ ప్రాంతాలకు తీసుకెళ్లి వదిలేలా దీర్ఘకాలిక ప్రణాళికలు ఉండాలి. ప్రణాళికలన్నీ మనుషుల ఆర్థిక అవసరాలు, సౌలభ్యాన్ని మాత్రమే దృష్టిలో పెట్టుకొని రచిస్తున్నారని.. సకల జీవరాశి మనుగడను దృష్టిలో పెట్టుకోవాల్సిన అవసరం ఉందనేది ఆయన సూచన.

సోలార్‌ ఫెన్సింగ్‌: కోతులు, అడవి పందులు పంటను పాడు చేయకుండా పొలం చుట్టూ జీఏ వైరుతో సోలార్‌ ఫెన్సింగ్‌ వేసుకోవచ్చు. తక్కువ విస్తీర్ణంలో ఉన్న పొలాలకు ఇది ఉపకరిస్తుంది. ఇది షాక్‌ కొడుతుంది, అయితే చనిపోయే అంత తీవ్రత ఉండదు. కాబట్టి, జంతువులు బెదిరి పారిపోతాయి. ఎకరానికి రూ. 15 వేల ఖర్చుతో ఏర్పాటు చేసుకోవచ్చు. ఆర్తనాదాల యంత్రాన్ని కూడా ఈ సోలార్‌ ఫెన్సింగ్‌కు అనుసంధానం చేసే యోచన ఉందని డా. వాసుదేవరావు తెలిపారు.

కోతులను, పక్షులను పారదోలే గన్‌: కోతులను, పక్షులను బెదరగొట్టి పారదోలటానికి నల్లని పెద్ద తుపాకీని డా. వాసుదేవరావు రూపొందించారు. అనేక పరీక్షల అనంతరం, ప్రయోగాత్మకంగా వాడి చూసిన రైతుల అనుభవాలను బట్టి దీన్ని మెరుగుపరుస్తున్నారు. కోతుల మీదకు ఈ తుపాకీతో పేపర్‌ బాల్స్‌ను ప్రయోగిస్తే.. దాని నుంచి పెద్ద శబ్దం వస్తుంది. బాల్స్‌ దెబ్బ తిన్న కోతులు మళ్లీ ఆ పొలం వైపు రావని చెబుతున్నారు. ప్రయోగాలు పూర్తయిన తర్వాత రైతులకు అందుబాటులోకి రానుందని ఆయన తెలిపారు.

అడవి పందులు కోతుల లెక్కలు తీయాలి
అడవి పందులు, కోతులు తదితర అటవీ జంతువులు పంటలకు నష్టం కలిగిస్తున్నాయి. అయితే, ఈ పరిస్థితి దాపురించడానికి కారణం మనుషులమే. కాబట్టి వాటి ఆవాస ప్రాంతాలను పరిరక్షిస్తూ ప్రత్యామ్నాయ ఆహార పంటలను పండిస్తూ వన్య జీవుల పరిరక్షణ కూడా ఒక బాధ్యతగా గుర్తించి నిర్వర్తించటం మన కర్తవ్యం. జంతువులను పంట పొలాల నుంచి దూరంగా పారదోలే పద్ధతులపై పరిశోధనలు చేపట్టాం. వన్య ప్రాణులకు ముప్పు కలిగించని పర్యావరణ హిత పద్ధతులను రూపొందిస్తున్నాం. వాటికి పునరావాస ప్రాంతాలను రూపొందించాలని ప్రభుత్వాన్ని కోరుతున్నాం. తద్వారా వివిధ వన్యజాతులు మనుగడ సాగించడానికి అనువైన పరిస్థితులు, పర్యావరణ సమతుల్యత ఏర్పడుతుంది. తద్వారా రైతులోకానికి కూడా మేలు జరుగుతుంది. అభివృద్ధి పేరిట వన్యజీవుల ఆవాసాలలోకి చొచ్చుకొని పోయిన మానవులు వన్య జీవుల ఉనికిని ప్రశ్నిస్తున్నారు. సమస్త జీవకోటికి జీవించే హక్కు ఉంది. జీవించే హక్కును కాలరాసే అధికారం మానవునికి నిక్కచ్చిగా లేదు. మానవజాతి ఇప్పటికైనా వన్యజీవుల ఆవాస ప్రాంతాలను ధ్వంసం చెయ్యకుండా.. వాటిని కాపాడే బాధ్యత తీసుకోవాలి.. అడవి పందులు, కోతులు ఎన్ని ఉన్నాయి? వీటి వల్ల పంటలకు జరుగుతున్న నష్టం ఎంత? వంటి విషయాలపై ఇప్పటి వరకు అధికారిక అంచనాలు అందుబాటులో లేవు. ప్రభుత్వాలు పూనికతో కచ్చితమైన గణాంకాలను సేకరిస్తే.. అడవి పందులు, కోతుల బారి నుంచి పంటలను పూర్తిగా కాపాడుకోవటం సాధ్యమవుతుంది. అడవిలో పులులు, చిరుత పులుల మాదిరిగా అడవి పందులు, కోతుల కచ్చితమైన గణాంకాల సేకరణ అసాధ్యమేమీ కాదు. గణాంకాలు సేకరిస్తే.. పంట నష్టాలను పూర్తిగా నివారించటం సాధ్యమవుతుంది.

 

ఆర్తనాదాల యంత్రం వరి పంటను కాపాడింది!
4 ఎకరాల్లో ఈ ఏడాది వరి సాగు చేశాను. పంట వేసిన 30 రోజుల తర్వాత ప్రొ. జయశంకర్‌ వ్యవసాయ యూనివర్సిటీ శాస్త్రవేత్తలు ఇచ్చిన ఆర్తనాదం యంత్రాన్ని పొలంలో కరెంటు స్థంభానికి బిగించాను. అడవి జంతువుల ఆర్తనాదాలను వినిపించటం ద్వారా అడవి పందులు పంట జోలికి రాకుండా ఇది కాపాడింది. ఈ యంత్రం లేకపోతే ఎకరానికి కనీసం రూ. 5 వేల పంట నష్టం జరిగి ఉండేది.  పదేళ్ల నుంచి అడవి పందులతోపాటు కోతుల సమస్య కూడా బాగా పెరిగిపోయింది. మూసీ నదికి అటూ ఇటూ ఉన్న గ్రామాల్లో సమస్య చాలా ఎక్కువగా ఉంది. ఇళ్లలో ఫంక్షన్లు చేసుకోవటానికి కూడా కోతుల వల్ల భయపడాల్సిన పరిస్థితి ఏర్పడింది.

ఉప్పు చేపల వాసనకు కోతులు పరారీ!
మా ఇంటి పెరట్లో జామ, మామిడి, సీతాఫలం, నిమ్మ వంటి అనేక పండ్ల చెట్లున్నాయి. కాయలను కోతులు బతకనివ్వటం లేదు. ఐదారు ఉప్పు చేపలను గుడ్డలో మూటలు కట్టి నెల క్రితం 6 చోట్ల వేలాడదీశాను. కోతులు ఏయే మార్గాల ద్వారా వస్తున్నాయో అక్కడ కట్టాను. అప్పటి నుంచి కోతులు ఆప్రాంతానికి వచ్చినా మా చెట్ల మీదకు రాలేదు. ఉప్పు చేపల వాసనతో తమకు ముప్పు పొంచి ఉందని భీతిల్లి కోతులు వెళ్లిపోతున్నాయి. ఈ చేపలను వాసన తగ్గిపోయిన తర్వాత రెండు నెలలకోసారి మార్చాలి. వర్షాకాలంలో నెలకోసారి మార్చాలి… మా తోటకు అడవి పందుల బెడద ఉంది. పంది కొవ్వు+గంధకం మిశ్రమంలో తాడును ముంచి.. ఆ తాళ్లను వ్యవసాయ క్షేత్రం చుట్టూ ఉన్న ముళ్ల కంచెకు కట్టాం. తల వెంట్రుకలను సేకరించి పొలం చుట్టూ వేసిన తర్వాత అడవి పందులు రావటం లేదు.

అడవి పందులు పంటలను బతకనివ్వటం లేదు..
ఎమ్మే, బీఈడీ చదివా. ఉద్యోగం రాలేదు. పదేళ్లుగా వ్యవసాయం చేస్తున్నా. ఐదారేళ్ల నుంచి అడవి పందుల సమస్య పెరుగుతూ వచ్చింది. అడవిలో తినటానికి గడ్డల్లేక పొలాల మీదకు వస్తున్నాయి. ఏ పంట వేసినా కష్టంగానే ఉంది. మొదట్లో మొక్కజొన్న కంకులను మాత్రమే తినేవి. ఇప్పుడు వరి కంకులను, చివరికి పత్తి కాయలను కూడా నమిలేస్తున్నాయి. అన్ని ఊళ్లలో వీటి సంఖ్య బాగా పెరిగిపోయింది. సంవత్సరం క్రితం శాస్త్రవేత్తలు ఇచ్చిన ఆర్తనాదాల యంత్రాన్ని 8 ఎకరాల వరి పొలంలో పెట్టా. అడవి పందులు రాలేదు. పొలం చుట్టూ వేసుకోవటానికి ఫెన్సింగ్‌ జాలీని ప్రభుత్వం సబ్సిడీపై ఇవ్వాలి. కొరకరాని కొయ్యలుగా మారిన అడవి పందులను చంపటమే శాశ్వత పరిష్కారం.

Credits : https://www.sakshi.com/news/family/wild-pigs-and-monkeys-get-sick-946246

కునప జలానికి కేరళ పెద్దపీట

Vrikshayurveda Organic Farming - Sakshi

‘వృక్షాయుర్వేదం’లో పేర్కొన్న కునపజలం ద్రావణాన్ని సేంద్రియ సాగులో వినియోగించమని కేరళ వ్యవసాయ విశ్వవిద్యాలయం రైతులకు సిఫారసు చేస్తున్నది. గత ఏడాదిన్నర కాలంగా దీనిపై అధ్యయనం చేసి, సంతృప్తికరమైన ఫలితాలు పొందిన తర్వాత కేరళ శాస్త్రవేత్తలు దీని వాడకాన్ని ప్రోత్సహిస్తున్నారు. ఇటీవల గ్రేటర్‌ నోయిడాలో ముగిసిన ప్రపంచ సేంద్రియ మహాసభలో ఏర్పాటైన కేరళ ప్రభుత్వ స్టాల్‌ను సందర్శించిన వారికి కునపజలం గురించి ప్రత్యేకంగా వివరించడం విశేషం. కునప జలాన్ని రెండు పద్ధతుల్లో తయారు చేయవచ్చు. మాంసం/గుడ్లతో ‘నాన్‌ హెర్బల్‌ కునపజలం’.. పశువులు తినని కలుపు మొక్కల ఆకులతో ‘హెర్బల్‌ కునపజలం’ తయారు చేసి వాడుకోవచ్చని కేరళ వ్యవసాయ విశ్వవిద్యాలయం రైతులకు సూచిస్తోంది...

నాన్‌ హెర్బల్‌ కునపజలం
కావలసిన పదార్థాలు: మాంసం/చేపలు : 2 కిలోలు లేదా 25 కోడిగుడ్లు; ఎముకల పొడి : 1 కిలో; వరి పొట్టు : 1 కిలో; కొబ్బరి చెక్క : 1 కిలో; మొలకెత్తిన మినుములు: అర కిలో (మినుముల మొలకలు దొరక్కపోతే పెసల మొలకలు వాడొచ్చు); నీరు : 85 లీటర్లు; తాజా ఆవు పేడ (దేశీ ఆవు పేడ శ్రేష్టం) : 10 కిలోలు; దేశీ ఆవు మూత్రం : 15 లీటర్లు; తేనె : పావు కిలో; నెయ్యి : పావు కిలో ; బెల్లం : 2 కిలోలు; పాలు : 1 లీటరు

తయారీ పద్ధతి : ఐదు లీటర్ల నీటిలో మాంసం లేదా చేపలు లేదా కోడిగుడ్లు + ఎముకల పొడి + వరి పొట్టు + కొబ్బరి చెక్క + మొలకెత్తిన మినుములను వేసి ఉడకబెట్టాలి. ఇనప పాత్రను, ఇనప గంటెను వాడాలి. నీరు సగానికి తగ్గే వరకు ఉడకబెట్టాలి. తర్వాత పొయ్యి మీద నుంచి దింపి, చల్లారబెట్టాలి. చల్లారిన ద్రావణాన్ని ఒక ప్లాస్టిక్‌ డ్రమ్ములోకి పోయాలి. తర్వాత ఆవు పేడ, ఆవు మూత్రం, తేనె, బెల్లం, నెయ్యి, పాలతోపాటు మిగిలిన 80 లీటర్ల నీటిని కూడా ప్లాస్టిక్‌ డ్రమ్ములో పోయాలి. ఈ ద్రావణాన్ని వెదురు కర్రతో రోజుకు మూడు సార్లు మూడేసి నిమిషాల పాటు కలియతిప్పండి. సవ్యదిశలో కొంత సేపు, వ్యతిరేక దిశలో మరికొంత సేపు తిప్పాలి. ఇలా 15 రోజులు ఇలా కలియతిప్పిన తర్వాత ‘నాన్‌ హెర్బల్‌ కునపజలం’ వాడకానికి సిద్ధమవుతుంది. లీటరు నీటికి 50 మిల్లీ లీటర్ల కునపజలాన్ని కలిపి.. ఆ ద్రావణాన్ని పంటలపై పిచికారీ చేయాలి.

ప్రయోజనాలు: దీన్ని చల్లిన తర్వాత పంట మొక్కలకు, చెట్లకు వేరు వ్యవస్థ పటిష్టమవుతుంది. కొత్త వేర్లు పుట్టుకొస్తాయి. మొక్కలు ఏపుగా పెరుగుతాయి. ఆడ పూల సంఖ్య పెరుగుతుంది. పండ్ల చెట్లపై పిచికారీ చేస్తే పండ్ల రుచి పెరుగుతుంది. పండ్లు, కూరగాయల రుచి, వాసన, నాణ్యత మెరుగుపడతాయి. పూల రంగు మెరుగై, ఆకర్షణీయంగా అవుతాయి.
ఉపయోగించేదెలా? : పంటలు పిలక దశలో, పూత దశలో లీటరు నీటికి 50 ఎం.ఎల్‌. కునపజలాన్ని కలిపి పిచికారీ చేయాలి. తోటలపై ఇదే మోతాదులో ఏడాదికి ఆరుసార్లు పిచికారీ చేయాలి.

హెర్బల్‌ కునపజలం
పశువులు తినని జాతి మొక్కల ఆకులతో హెర్బల్‌ కునపజలం తయారు చేసుకోవాలి. ఆకులు తుంచినప్పుడు పాలు కారని జాతులు, గడ్డి జాతికి చెందని మొక్కల ఆకులు వాడాలి. వావిలి, రేల, కానుగ, అడ్డసరం, టక్కలి, కుక్క తులసి (అడవి తులసి), గాలి గోరింత, గిరిపుష్టం (గ్లైరిసీడియా) తదితర జాతుల మొక్కల ఆకులు ఉపయోగపడతాయి.

కావలసిన పదార్థాలు : ఆకులు  : 20 కిలోలు; దేశీ ఆవు తాజా పేడ : 10 కిలోలు; మొలకెత్తిన మినుములు : 2 కిలోలు; బెల్లం : 2 కిలోలు; దేశీ ఆవు మూత్రం : 15 లీటర్లు ; నీరు : 180 లీటర్లు

తయారీ పద్ధతి : సేకరించిన ఆకులను కత్తిరించి ఈనెలను తీసేయండి. ఆకుల ముక్కలను, పైన చెప్పుకున్న పదార్థాలను ఒక డ్రమ్ములో నాలుగు, ఐదు పొరలుగా వేయండి. 180 లీటర్ల నీరు డ్రమ్ములో పోయండి. వెదురు కర్రతో రోజుకు రెండు సార్లు 3 నిమిషాల పాటు.. సవ్యదిశలో కొంత సేపు, అపసవ్య దిశలో మరికొంత సేపు కలియతిప్పండి.  15 రోజుల తర్వాత వాడకానికి హెర్బల్‌ కునపజలం సిద్ధమవుతుంది.

పిచికారీ పద్ధతి :  వార్షిక పంటలు పిలక దశలో, పూత దశలో లీటరు నీటికి 50 ఎం.ఎల్‌. చొప్పున కునపజలాన్ని కలిపి పిచికారీ చేయాలి. తోటలపై ఇదే మోతాదులో ఏడాదికి ఆరుసార్లు పిచికారీ చేయాలి.

గమనిక: కేరళ ప్రభుత్వ ప్రకృతి వ్యవసాయ ప్రచారకర్త, యువ రైతు అయిన సూరజ్‌ పప్పుధాన్యాల పిండితో తయారు చేసిన కునప జలాన్ని వాడుతున్నారు. మాంసం, గుడ్లు లేదా ఆకులకు బదులు పప్పుధాన్యాల పిండిని ఆయన వాడుతున్నారు. సూరజ్‌ను 085475 70865 నంబరులో సంప్రదించవచ్చు.

సేంద్రియ పంటలు..నిర్ధారిత సాగు పద్ధతులు!
సంపూర్ణ సేంద్రియ సేద్య రాష్ట్రంగా కేరళను తీర్చిదిద్దాలని ఆ రాష్ట్ర ప్రభుత్వం కంకణం కట్టుకుంది. ఈ దిశగా కేరళ వ్యవసాయ విశ్వవిద్యాలయం నిర్మాణాత్మక కృషి చేపట్టింది. వివిధ పంటల సేంద్రియ సాగు పద్ధతులపై విస్తృత పరిశోధనల అనంతరం ‘ప్యాకేజ్‌ ఆఫ్‌ ప్రాక్టీసెస్‌ రికమెండేషన్స్‌ (ఆర్గానిక్‌) క్రాప్స్‌ –2017’ పేరిట 328 పేజీల సమగ్ర సంపుటిని కేరళ వ్యవసాయ విశ్వవిద్యాలయం ఇటీవల విడుదల చేసింది. వరి, చిరుధాన్యాలు, సుగంధ ద్రవ్యాలు, పండ్ల తోటలు, కలప పంటలు, పత్తి సహా అనేక పంటల సేంద్రియ సాగుకు అనుసరించాల్సిన పద్ధతులు.. కషాయాలు, ద్రావణాల తయారీ, మోతాదు, వాడే పద్ధతులు.. సేంద్రియ పద్ధతుల్లో పశువుల పెంపకం.. మేడలు మిద్దెలపై సేంద్రియ ఇంటిపంటల సాగు తదితర అంశాలను సమగ్రంగా ఇందులో పొందుపరిచారు. గ్రేటర్‌ నోయిడాలో ఇటీవల జరిగిన ప్రపంచ సేంద్రియ మహాసభలో ఏర్పాటైన కేరళ ప్రభుత్వ స్టాల్‌లో ‘ప్యాకేజ్‌ ఆఫ్‌ ప్రాక్టీసెస్‌ రికమెండేషన్స్‌ (ఆర్గానిక్‌) క్రాప్స్‌ –2017’ పుస్తకాన్ని విక్రయించారు. ధర రూ. 300 (పోస్టేజీ అదనం). పోస్టు ద్వారా తెప్పించుకోదలచిన వారు సంప్రదించాల్సిన చిరునామా:

Director of Extention,
Kerala Agricultural University,
KAU Main Campus,
KAU P.O., Vellanikkara, NH- 47
Thrissur, Kerala – 680656
Phone No: 0487-2438011.

Credits : https://www.sakshi.com/news/family/vrikshayurveda-organic-farming-952397

కళాత్మక వరి పొలం!

Artful rice field! - Sakshi

అగ్రి టూరిజం

చేస్తున్న పనికి కళను, సృజనాత్మకతను జోడిస్తే చాలు.. అద్భుతమైన కళాకృతులు కళ్లముందు ప్రత్యక్షమవుతాయి. ఈ సూత్రం కేన్వాసుకే కాదు.. పొలానికి కూడా వర్తిస్తుంది! వరి పొలానికి కళాకాంతులు అద్దితే.. అది సందర్శకులను ఆకర్షించే పర్యాటక స్థలంగా మారిపోతుంది. జపాన్‌లోని ఇనకటడె అనే గ్రామం రైస్‌ పాడీ ఆర్ట్‌కు పెట్టింది పేరు. డజన్ల కొద్దీ రంగు రంగుల దేశీ వరి వంగడాలను భారీ కళాకృతుల రూపంలో నాటి సాగు చేయడంతో పచ్చని వరి పొలాలు పర్యాటక స్థలాలుగా మారి కాసులు కురిపిస్తున్నాయి.

ఈ అగ్రి టూరిజం టెక్నిక్‌.. మహారాష్ట్రలోని దొంజె ఫట అనే గ్రామాన్ని సైతం పర్యాటక కేంద్రంగా మార్చి వేసింది. జపాన్‌లో సంచలనం సృష్టిస్తున్న పాడీ ఆర్ట్‌ గురించి ఇంటర్నెట్‌ ద్వారా తెలుసుకున్న.. పుణేకి చెందిన శ్రీకాంత్‌ ఇంగాల్‌హలికర్‌ అనే ఇంజనీర్‌ తన ఐదెకరాల వరి పొలంలో 40 మీటర్ల భారీ వినాయకుడు, తదితర కళాకృతులను రూపొందించారు. ఆకుపచ్చని వరి పొలంలో నల్లగా ఉండే వరి మొక్కలను నాటడం ద్వారా ఆహ్లాదకర దృశ్యాన్ని ఆవిష్కరించారు.

credits : https://www.sakshi.com/news/family/artful-rice-field-1043080

డాబా మీద పండించేద్దాం!

చిన్నప్పుడు అమ్మ చందమామని చూపించి గోరుముద్దలు తినిపించిన డాబా
పతంగులు ఎగరేస్తూ మెట్ల మీద పడి దెబ్బలు తగిలించుకున్న డాబా
చదువు వంక పెట్టి పక్కింటమ్మాయిని చూడ్డానికి ఇష్టంగా ఎక్కిన డాబా
పెళ్లయ్యాక నెచ్చెలితో స్వీట్‌ నథింగ్స్‌ చెప్పుకున్న డాబా
కుటుంబమంతా కలిసి వెన్నెల్లో కబుర్లు కలబోసుకున్న డాబా.
మేడ, మిద్దె డాబా… పేరేదైనా దానితో అనుబంధం మాత్రం ఎవరికి వారికే ప్రత్యేకం. ఇప్పుడా డాబానే ఒత్తిడిని మాయం చేసే చలువ పందిరి అవుతోంది. కూరగాయలు పండించే మిద్దె తోటై మురిపిస్తోంది

ఒకప్పుడు డాబా మీదికి వెళ్తే… ఓ పక్కన మెట్ల మీదుగా పైకి పాకిన సన్నజాజి తీగ విరబూసి కన్పించేది. పెరటి వైపునుంచీ సపోటా చెట్టు కొమ్మో, జామచెట్టు కొమ్మో పలకరించేవి. కొబ్బరాకులు గాలికి ఊగుతూ చీకట్లో భయపెట్టేవి. పక్కింటి వారి మామిడి కొమ్మ ఒకటి అలా అందీ అందనట్లు పిట్టగోడను తాకుతుంటే లేత పిందెలు ఊరించేవి. చాపో పరుపో వేసుకుని పడుకుంటే పైన చందమామా చుట్టూ చల్లని గాలీ… హాయిగా నిద్రపట్టేసేది.

ఇప్పుడో… నీళ్ల ట్యాంకులకు తోడు రకరకాల సైజుల్లో డిష్‌ యాంటెన్నాలూ, స్విచ్‌బాక్సులూ, సెల్‌ఫోన్‌ టవర్లూ, కేబుల్‌ వైర్లతో గందరగోళానికి అర్థంలా ఉంటాయి డాబాలు. అక్కడికి వెళ్లి ప్రకృతిని ఆస్వాదించే తీరికా, శుభ్రంచేసి ఉపయోగించుకునే ఓపికా ఉన్నవారు అదృష్టవంతులే. ఇక అపార్ట్‌మెంట్లకైతే పైకప్పు మీద ఏ ఒక్కరి హక్కూ ఉండదు. అది సమష్టి సొత్తు కావడంతో ఎవరికి పుట్టిన బిడ్డరా వెక్కి వెక్కి ఏడుస్తోంది అన్నట్లు తయారైంది నగరాల్లో డాబాల పరిస్థితి.

ఒక్క హైదరాబాదునే తీసుకుంటే అక్కడ ఉన్న భవనాల పైకప్పు దాదాపు 40వేల ఎకరాల వైశాల్యం ఉంటుందట. అందులో సగం విస్తీర్ణాన్ని కూరగాయల పెంపకానికి ఉపయోగించినా ఎన్నో సమస్యలు తీరతాయంటున్నారు ఉద్యానవన నిపుణులు. రసాయన ఎరువులూ క్రిమిసంహారకాలూ వాడని తాజా కూరగాయలు తక్కువ ఖర్చులో లభిస్తాయి. కేవలం 200చ.మీ. స్థలం ఉంటే అందులో ఒక్క కూరగాయలే కాదు, పండ్లూ, పూలూ చాలా పండించవచ్చు.

క్రీస్తు పూర్వమే…
డాబాపైన మొక్కలు పెంచడమనేది ఇప్పుడు కొత్తగా కనిపెట్టిన విషయమేమీ కాదు. క్రీస్తుపూర్వం మెసపొటేమియా నాగరికత నాటికే ఈ పద్ధతి ఉందట. భవనం అందంగా కనిపించడం కోసం రోమన్లు ముందువైపు ఇంటి పైకప్పు ప్రత్యేకంగా కట్టించి దాని మీద మొక్కలు పెంచి పూల తీగెలు కిందికి వేలాడేలా చేసేవారట. రోమ్‌, ఈజిప్టు లాంటి చోట్ల పురావస్తు తవ్వకాల్లో బయటపడిన పలు భవనాల్లో ఇలాంటి పైకప్పు తోటలు కన్పించాయని చరిత్ర చెబుతోంది. పురాతన ప్రపంచానికి చెందిన ఏడు వింతల్లో ఒకటైన హ్యాంగింగ్‌ గార్డెన్స్‌ కూడా ఎత్తైన భవనాల మీద పెంచిన తోటలే.

ఇప్పటికీ చాలా దేశాల్లోని నగరాల్లో చల్లదనం కోసమూ, మొక్కలు పెంచాలన్న కోరిక ఉండీ స్థలం లేనప్పుడూ డాబాలనే ఆశ్రయిస్తున్నారు. అయితే ఎక్కువగా లతలూ పూల మొక్కలకూ ప్రాధాన్యమిస్తున్నారు. గుబురుగా పచ్చని పొదలుగా ఎదిగే మొక్కల్నే పెంచుతున్నారు. ఆసక్తి ఉన్నవాళ్లు సరదాగా ఒకటీ అరా హైబ్రిడ్‌ పండ్లమొక్కలను పెంచినా కూరగాయల పెంపకానికి డాబాలను వాడడం అంతగా లేదు. అలాంటిది వాటి మీద కూరగాయలను పెంచడం ఈ మధ్య కాలంలోనే మొదలైంది. కొంతకాలం క్రితం వరకూ అక్కడక్కడా మాత్రమే కన్పించిన ఈ మిద్దె తోటలు సోషల్‌ మీడియావల్ల త్వరగా ప్రాచుర్యం పొందాయి. హైదరాబాద్‌, వైజాగ్‌ లాంటి నగరాల్లోనే కాక భద్రాచలం, కొత్తవలస లాంటి పట్టణాల్లోనూ వందలాది ఔత్సాహికులు మిద్దెతోటలను పెంచుతున్నారు.

ప్రయోజనాలు ఎన్నో!
మొక్కల పెంపకం ఇష్టమైన అభిరుచిగా ఉండేవారు చాలామందే ఉంటారు. దానికి తోడు మిద్దెతోటల ప్రయోజనాలు తెలియడంతో మరింత ఎక్కువగా వాటిని పెంచడానికి ఇష్టపడుతున్నారు. ‘తాజాగా అప్పటికప్పుడు మొక్కలనుంచి కోసి వండుకుంటుంటే ఆ ఆనందమే వేరు’ అంటారు సికింద్రాబాద్‌లోని మల్కాజ్‌గిరికి చెందిన సూర్యకుమారి. ‘బజారులో ఏం కొన్నా వాటి మీద ఏ పురుగు మందులు చల్లారో, ఎన్ని రసాయన ఎరువులు వాడారోనన్న సందేహం వదలదు. పైగా పండ్లను మగ్గబెట్టడానికీ రసాయనాలను వాడుతున్నారు. ఆ భయాలు లేకుండా కూరగాయలనూ, పండ్లనూ ఇంటిమీదే చక్కగా పండించుకోవచ్చు’ అంటారామె. మొక్కలు పెంచడం ఆమెకు చిన్నప్పటినుంచీ ఇష్టమే. ఉద్యోగరీత్యా ఇన్నాళ్లూ సాధ్యం కాని ఆ కోరికను ఇపుడు సొంతింటి మీద తోట పెంచి తీర్చుకుంటున్న సూర్యకుమారి 900 చదరపు అడుగుల డాబా మీద నలుగురు మనుషులకు సరిపోను కూరగాయలను తేలిగ్గా పండించగలుగుతున్నారు. పువ్వులంటే ఇష్టంతో ఏకంగా 30 రకాల మందారాలను తమ తోటలో పూయిస్తున్నారామె.అరటి, మామిడి లాంటి పండ్లమొక్కల్నీ, ఔషధ మొక్కల్నీ కూడా పెంచుతున్నారు సఫీల్‌గూడ అనంతనగర్‌ కాలనీకి చెందిన కొలను పద్మావతి. మొదట పూలమొక్కలు పెంచిన ఆమె ఫేస్‌బుక్‌ మిత్రుల స్ఫూర్తితో కూరగాయలూ ఆకుకూరలూ పండించడం మొదలుపెట్టారు. తమ కుటుంబానికి సరిపోగా చుట్టుపక్కలవారికీ పంచుతున్నారు పద్మావతి. సొంతింటి డాబాని ఇంత బాగా ఉపయోగించుకోవడం తనకెంతో తృప్తినిస్తోందంటారామె.

డాబా తోటల వల్ల వ్యక్తిగతంగానే కాదు సమాజానికీ ప్రయోజనం ఉందంటారు తుమ్మేటి రఘోత్తమరెడ్డి. ఆయన సింగరేణి నుంచి వచ్చి హైదరాబాదులో స్థిరపడాలనుకున్నప్పుడు నగరంలో అపార్ట్‌మెంట్‌కన్నా శివార్లలో సొంత ఇల్లు కట్టుకోవడానికే మొగ్గు చూపారు. అందుకు కారణం మొక్కల పెంపకం పట్ల ప్రేమే. ఇల్లు పూర్తికాగానే తోటపనీ ప్రారంభించారు. దాదాపు 1230 చదరపు అడుగుల తోటలో కూరగాయలూ, ఆకుకూరలూ, పండ్లూ పండిస్తున్నారు. 8 అంగుళాల మడి లోతులో 20 అడుగుల పొడవు బొప్పాయిని పెంచారాయన. ఏడేళ్లుగా బయట కూరగాయలు కొనలేదని గర్వంగా చెప్తారు. ఆయన తోటలో సపోటా, అంజీర, నారింజ లాంటి పండ్లే కాదు ఆవాలు కూడా పండిస్తారు. ‘మిద్దెతోట’ పేరుతో తన అనుభవాలను క్రోడీకరించి ఔత్సాహికులకు ఉపయోగపడేలా ఓ పుస్తకం రాశారు రఘోత్తమరెడ్డి.

వేడీ కాలుష్యమూ తగ్గుతాయి
‘నగరాలను కాంక్రీట్‌ అరణ్యాలంటారు కదా… ఆ ప్రభావం తగ్గడానికి అత్యంత చౌక విధానం మిద్దెతోటల పెంపకం’ అనే రఘోత్తమరెడ్డి అందుకు కారణాలూ వివరిస్తారు. డాబాలన్నీ తోటలైతే ఎటుచూసినా హాయి గొలిపే పచ్చదనమే కన్పిస్తుందనీ, పైకప్పులన్నీ చల్లగా ఉండడం వల్ల ఇళ్లలో ఏసీల వాడకం తగ్గుతుందనీ అంటారు. కాలుష్యం తగ్గుతుంది. చల్లని శుభ్రమైన గాలి వస్తుంది. రూఫ్‌ గార్డెన్ల నిర్వహణ ఖర్చూ తక్కువే. ఒక్కసారి కొద్ది మొత్తం పెట్టుబడి పెడితే చాలు, ఏళ్ల తరబడి ప్రయోజనాలు పొందవచ్చు. రాలిన ఆకులూ అలములతోనే ఎరువు తయారవుతుంది. చేసే శ్రమ వ్యాయామం అవుతుంది.మానసిక ప్రశాంతత లభిస్తుంది. తోటలను పెంచుతున్నవారి మాటలే కాదు, అధ్యయనాలూ ఈ విషయాలను రుజువు చేస్తున్నాయి.

అమెరికాలోని షికాగో సిటీ హాల్‌ రూఫ్‌ గార్డెన్‌కి పేరొందింది. రూఫ్‌ గార్డెన్‌ వల్ల ఉష్ణోగ్రతల్లో ఏమాత్రం తేడాలు ఉంటాయో పరిశీలించడానికి శాస్త్రవేత్తలు ఆ భవనంలో ప్రయోగాలు చేశారు. వారి పరిశీలనలో తేలిందేమిటంటే- రూఫ్‌ గార్డెన్‌ ఉన్న భవనానికీ లేని భవనానికీ ఉష్ణోగ్రతలో 10డిగ్రీల సెల్సియస్‌ (50 డిగ్రీల ఫారెన్‌హీట్‌) తేడా ఉందని. సాధారణంగానే పట్టణాలూ నగరాల్లో చెట్లు చాలా తక్కువగా ఉంటాయి కాబట్టి శివార్ల కన్నా అక్కడ 5 డిగ్రీల వరకూ ఉష్ణోగ్రత ఎక్కువ ఉంటుందంటారు. అర్బన్‌ హీట్‌గా పేర్కొనే ఈ అధిక ఉష్ణోగ్రతలను నియంత్రించడానికి డాబా తోటలు బాగా పనికొస్తాయంటున్నారు నిపుణులు.

ఇలా చేయవచ్చు!
డాబా మీద తోట పెంచాలనుకునేవారు ఒక్కో మొక్కా పెట్టుకుంటూ నెమ్మదిగా పెంచుకోవచ్చు. లేదంటే ఒకేసారి అందుబాటులో ఉన్న స్థలాన్ని ఒక ప్రణాళిక ప్రకారం తోటగా అభివృద్ధి చేసుకోవచ్చు. తోట వల్ల భవనానికి నష్టం జరగదు. ఎలాంటి డాబా అయినా తోటను మోయగల సామర్థ్యం ఉంటుంది. డాబా మీద తోటకి 8 అంగుళాల మందంలో మట్టి చాలు. భవనం బీమ్‌లను బట్టి వెడల్పుగా మడులు కట్టుకుంటే ఆ బరువు సమంగా వ్యాపిస్తుంది. మట్టిని డాబా నేల మీద నేరుగా పోయకుండా ప్లాస్టిక్‌ టబ్బుల్లో, తొట్లలో, కాంక్రీట్‌తో ప్రత్యేకంగా కట్టిన మడుల్లో పోసి మొక్కలు పెంచుతారు కాబట్టి నీరు కానీ మొక్కల వేళ్లు కానీ కప్పులోకి వెళ్లడమనేది ఉండదు. కొత్తగా ఇల్లు కట్టుకునేవారు తోటను కూడా దృష్టిలో పెట్టుకుని అందుకు తగినట్లుగా కట్టుకుంటే మంచిదంటారు రఘోత్తమరెడ్డి. ఆయన తోటపనిని ఒక కళలాగా సాధన చేస్తున్నారు. కుండీలకు ఎర్రరంగు వేసి ముగ్గులతో తీర్చిదిద్దుతారు. మొక్కల మధ్య టెర్రకోట బొమ్మల్ని అందంగా అలంకరిస్తారు. ఏడాదికోసారి మొక్కల వేళ్లు దెబ్బతినకుండా పైపైన మట్టిని కాస్త పెళ్లగించి తీసి ఆ మేరకు కొత్త మట్టిని చేరిస్తే చాలు, ఏడాదికి రెండు పంటలు తేలిగ్గా పండించుకోవచ్చంటున్నారు ఈ అనుభవజ్ఞులంతా.
ఇన్ని ప్రయోజనాలు ఉన్నాయి కాబట్టే ప్రభుత్వాలూ ఉద్యానశాఖల ద్వారా ఆసక్తిగల వారికి శిక్షణ ఇచ్చి, కిట్లనూ సరఫరా చేస్తున్నాయి.

ఇంటి మీద ఓ తోట ఉంటే…
ఉదయమే పక్షుల కిలకిలారావాలు వినవచ్చు.
లేలేత ఆకులపై మంచుబిందువుల్లో ప్రతిఫలించే తొలి కిరణాల సౌందర్యాన్ని ఆస్వాదించవచ్చు.
ఇక తోటపనితో ఒంటికి వ్యాయామమూ,
మనసుకు ఉల్లాసమూ లభిస్తాయి.
మొత్తం మీద మిద్దెతోటల పెంపకం ఓ ఆరోగ్యకరమైన కాలక్షేపం.
మరింకెందుకు ఆలస్యం? వెంటనే ఓ మొక్క నాటి, రేపటి తోటకు శ్రీకారం చుట్టేయండి.

మొక్కలు నా ఆరోప్రాణం

నాకు ఊహ తెలిసినప్పటినుంచీ పూలమొక్కలు పెంచుతున్నాను. చదువై పోయి హైదరాబాద్‌ రాగానే ఉద్యోగంలో చేరాను. గది వెదుక్కున్న రెండో రోజే మొక్క తెచ్చుకుని పెట్టుకున్నా. ఎవరింటికి వెళ్లినా ఓ మొక్క ఇచ్చి రావడం నాకు అలవాటు. అద్దెఇళ్లల్లో ఉంటున్నప్పుడు కొంతమంది యజమానులు అభ్యంతరం చెప్పేవారు. అందుకని కేవలం మొక్కల కోసమే సొంతిల్లు కట్టుకున్నా. మా డాబా మీద నేను పెంచని పూలమొక్కలూ కూరగాయల మొక్కలూ లేవు. మునగ చెట్టు కాస్తే వీధిలో ఉన్న వాళ్లందరికీ పంచినా అయిపోవు. అయితే ఇక్కడ కోతుల బాధ ఎక్కువ. అందుకని మొత్తం డాబాకి సరిపోనూ ఇనుప పంజరం లాగా గ్రిల్‌ తయారుచేయించాం. అలా కోతుల నుంచి మొక్కల్ని రక్షించుకుంటున్నాం.

– పార్థసారథి, సికింద్రాబాద్‌
ఆరోగ్యానికి తోటపని

తోటపని శరీరానికీ మనసుకీ కూడా మంచి వ్యాయామం. మాకు సొంత వ్యాపారం ఉంది. రోజూ ఉదయం కాసేపు తోటపని చేస్తే ఒత్తిళ్లనుంచి విముక్తి లభిస్తుందన్న ఉద్దేశంతో గత ఏడాదే డాబా మీద కూరగాయల సాగు ప్రారంభించాం. ఇప్పుడు నెలకి ఇరవై రోజులు మా తోటలో కాసిన కూరగాయలే వండుకుంటున్నాం. ఫేస్‌బుక్‌లో ‘ఇంటిపంట’ అనే గ్రూప్‌లో చేరాను. అక్కడే రూఫ్‌గార్డెన్‌ సంగతులన్నీ తెలుసుకున్నాను. వివిధ దేశాలకు చెందిన నిపుణులు సభ్యులుగా ఉన్న ఈ గ్రూప్‌లో అందరూ తమ అనుభవాలనూ నైపుణ్యాలనూ పంచుకుంటారు. సలహాలూ సూచనలూ ఇచ్చిపుచ్చుకుంటారు. సిటీలోనే నాకు తెలిసిన వాళ్లు ఇంకా చాలామంది చేతనైన రీతిలో ఇంటిపంటల్ని పండిస్తున్నారు.

– గాంధీ ప్రసాద్‌, చింతల్‌, హైదరాబాద్‌
పల్లెనుంచీ వచ్చినవాళ్లం…

మొక్కలు పెంచకుండా ఉండలేం. అందుకే ఐదంతస్తుల బిల్డింగ్‌లో పెంట్‌హౌస్‌ కొనుక్కున్నాం. ఇంటి ముందున్న స్థలమంతా ముందు పూలమొక్కలు పెట్టాం. ఆ తర్వాత కూరగాయలూ పెంచుతున్నాం. ఎనిమిదేళ్లయింది. ఉల్లిపాయలు తప్ప ఇంకేమీ బయట కొనం. మునగ చెట్టు కూడా ఉంది. నిమ్మ, బత్తాయీ, సపోటా లాంటి పండ్ల మొక్కలు కూడా పెంచుతున్నాం. వేసవిలో మా మొక్కలకు పూసిన మల్లెపూలు కోయడానికి గంట పడుతుంది. ఫ్లాట్స్‌లో ఎవరూ అభ్యంతరం చెప్పలేదు. అయినా తగిన జాగ్రత్తలు తీసుకుంటే రూఫ్‌ గార్డెన్‌ వల్ల ఏ ఇబ్బందీ ఉండదు.

– నీలిమ, కూకట్‌పల్లి, హైదరాబాద్‌
ఇది సరైన సమయం

డాబా మీద తోట ఏర్పాటుచేయాలనుకున్నవారు ఎప్పుడైనా మొదలుపెట్టవచ్చు. కాకపోతే ఫిబ్రవరి నెల వాతావరణం పనులు చేసుకోవడానికి అనువుగా ఉంటుంది. ఇప్పుడు నాటితే వేసవిలో వాడుకోవడానికి ఆకుకూరలూ, కూరగాయలూ చేతికందివస్తాయి. సారవంతమైన మట్టీ మాగిన పశువుల ఎరువూ చాలు మొక్కలు పెట్టుకోడానికి. మొక్కలకు పేనూ పురుగూ లాంటివి కన్పించగానే వాటిని వెంటనే చేత్తో తొలగించాలి. అదుపు తప్పిన స్థాయిలో ఉన్నదనుకుంటే కొద్దిగా వేపనూనె నీళ్లలో కలిపి చల్లితే సరిపోతుంది. తోటపనికి రోజూ ఒక అరగంట కేటాయిస్తే చాలు కాబట్టి డాబా ఉన్నవారు ఎవరైనా తోటల్ని పెంచుకోవచ్చు. సెలవు రోజు రెండు మూడు గంటలు చేసుకోవచ్చు

– రఘోత్తమరెడ్డి, నారపల్లి, రంగారెడ్డి జిల్లా
పురుగుమందులు అమ్మేవాణ్ని…

నేను పురుగుమందు వ్యాపారం చేసేవాణ్ని. ఆ మందుల్నే రైతులు కూరలపై చల్లడం చూసి తట్టుకోలేకపోయా. ఆ కూరగాయలు కొనడం మానేస్తే ఏంచేయాలని ఆలోచించి వంకాయ విత్తనాలు తెచ్చుకుని ఇంట్లో కుండీలో నాటాను. అలా మొదలైంది మా మిద్దెతోట సాగు. ఉన్న స్థలమంతా ఇల్లుకట్టేసుకోవడంతో డాబా మీదే కూరగాయలు పెంచుతున్నాం. పురుగుమందుల వ్యాపారం పూర్తిగా మానేసి పాలేకర్‌ సేంద్రియ విధానాలను అధ్యయనం చేశా. ఇప్పుడు వెయ్యి
చదరపు అడుగుల డాబా మీద నేను పండించని పంట లేదు. ఈ ప్రాంతంలో ద్రాక్ష పండదు. మా డాబామీద పండించాను. ఔషధ మొక్కలూ పెంచుతాను. కూరగాయలూ ఆకుకూరలూ మామూలే. మా తోట చూడడానికీ, నేర్చుకోడానికీ చాలామంది వస్తుంటారు.  వైజాగ్‌లోనే నాకు తెలిసి దాదాపు 200 మంది డాబాల మీద తోటల్ని పెంచుతున్నారు. బీపీ, షుగర్‌ లాంటి సమస్యలు ఒకప్పుడు ఉండేవి. ఏ చికిత్సా తీసుకోకుండానే ఇప్పుడు ఆరోగ్యంగా ఉన్నా. ఇంతకన్నా ఏం కావాలి.

– కర్రి రాంబాబు, కొత్తవలస, విజయనగరం జిల్లా
మన ఇల్లూ -మన కూరగాయలూ

నగరాల్లో నివసించేవారు ఇంటివద్దే కూరగాయల్ని పెంచుకునేలా ప్రోత్సహించే కార్యక్రమానికి తెలంగాణ ప్రభుత్వం పెట్టిన పేరిది. రాష్ట్రీయ కృషి వికాస్‌ యోజన అనే పథకం కింద దీనికి ప్రభుత్వం ఆర్థికసాయమే కాకుండా అవసరమైన వస్తువులనూ అందజేస్తుంది.

సహాయం పొందడానికి అర్హతలు: కనీసం 50 – 200 చదరపు
అడుగుల మధ్య స్థలం(బాల్కనీ, ఇంటి పైకప్పు, పెరడు ఏదైనా సరే) ఉండాలి. ఆసక్తి కలవాళ్లెవరైనా తమ చిరునామా, పాస్‌పోర్టు సైజు ఫొటోతో ఉద్యానవనశాఖ కార్యాలయంలో దరఖాస్తు చేసుకోవచ్చు.

ఏమిస్తారంటే: ప్రస్తుతం ఉద్యానవనశాఖ రెండురకాల కిట్లను ఇస్తోంది. ఇంటికి రెండు కిట్లతో పాటు ఉచితంగా సాగులో శిక్షణ కూడా ఇస్తుంది. కిట్‌ ‘ఎ’ యూనిట్‌ ధర రూ.6 వేలు. 50శాతం సబ్సిడీ.
కిట్‌ ‘బి’ ధర రూ.1900. పెరట్లో సాగు చేయాలనుకునేవారికి మట్టి మిశ్రమం అవసరం ఉండదు కాబట్టి మరింత తక్కువ ధరకే ఈ కిట్లు లభిస్తాయి.

సిల్పాలిన్‌ కవర్లు, గ్రోబ్యాగ్స్‌, మట్టి మిశ్రమం, విత్తనాలు, వేపపిండి, వేపనూనె, తోటపనికి అవసరమైన ఇతర పనిముట్లు… ఈ కిట్లలో ఉంటాయి.

పూర్తి సమాచారం …
http:///horticulture.tg.nic.in వెబ్‌సైట్‌లోని అర్బన్‌ ఫామింగ్‌ విభాగంలో చూడవచ్చు. డౌన్‌లోడ్‌ చేసుకోవడానికి వీలుగా దరఖాస్తు ఫారం కూడా అందులోనే ఉంది.

– పద్మశ్రీ యలమంచిలి

Credits : EENADU  30th January 2018

ప్రమాదపు అ౦చున అమెరికా స‍౦యుక్త రాష్ట్రాల నైరుతీ ప్రా౦త సతతహరిత అరణ్యాలు

సారా౦శ౦ :  వాతావరణ మార్పు నేపథ్య౦లో జరిగిన విస్తృత విశ్లేషణలో పరిశోధకులు అమెరికా స‍౦యుక్త రాష్ట్రాల యొక్క నైరుతీ ప్రా౦త౦లోని సతతహరిత అరణ్యాలయొక్క భయ౦కర భవిష్యత్తు గురి౦చి తెలిపారు. క్షేత్రస్థాయి నివేదికలు, ప్ర్రా౦తీయ అ౦చనాలు మరియు క౦ప్యూటర్ నమూనాలను ఉపయోగి౦చి,ఈ అడవులు 2050 నాటికి 70 శాత౦ మరియు 2100 నాటికి 100 శాత౦ నష్టపోతాయని అ౦చనా.

పూర్తి కథన౦ : 

గ్లోబల్ వార్మి౦గ్ నేపథ్య౦లోని అ౦చనాల ప్రకార౦, 2100 నాటికి మెరికా స‍౦యుక్త రాష్ట్రాల యొక్క నైరుతీ ప్రా౦త౦లోని సతతహరిత అరణ్యాలలోని నీడిల్ లీఫ్ సతత హరిత వృక్షాలు మరణిస్తాయని నేచర్ క్లైమేట్ చే౦జ్’ అనే పత్రికలో ప్రచురి౦చబడిన ఒక పరిశోధనా పత్ర౦లో తెలుపబదినది.

గ్లోబల్ వార్మి౦గ్ నేపథ్య౦లోని అ౦చనాల ప్రకార౦, 2100 నాటికి మెరికా స‍౦యుక్త రాష్ట్రాల యొక్క నైరుతీ ప్రా౦త౦లోని సతతహరిత అరణ్యాలలోని నీడిల్ లీఫ్ సతత హరిత వృక్షాలు మరణిస్తాయని నేచర్ క్లైమేట్ చే౦జ్ అనే పత్రికలో ప్రచురి౦చబడిన ఒక పరిశోధనా పత్ర౦లో తెలుపబదినది.

ఈ పరిశోధనా బృ౦ద౦లో డెలావర్ విశ్వవిద్యాలయనికి చె౦దిన ప్రొఫెస్సర్ సారా రౌసెర్ కూడా ఉన్నారు.  పై అ౦చనాలకొరకు ఈ బృ౦ద౦ క్షేత్రస్థాయి ఫలితాలు, విభిన్న ప్రా౦తీయ అ౦చనాలు మరియు వివిధ స౦క్లిష్టతల ప్రప౦చ‌ అనుకరణ నమూనాలను పరిగణలోకి తీసుకున్నారు.

” మేము ఈ సమస్యను ఏ విధ౦గా పరిశోధి౦చినా కూడా మాకు ఒకే ఫలిత౦ వచ్చి౦ది. ఈ ఏకాభిప్రాయ౦ మాకు ఈ అటవీ వృక్షాల‌ మరణాల అ౦చనాలో నమ్మక౦ కలిగిస్తు౦ది ” అని డెలావర్  విశ్వవిద్యాలయ౦లోని కాలేజ్ ఆఫ్ ఎర్త్,ఓషన్ అ౦డ్ ఎన్విరాన్మె౦ట్ లో భూగోళ శాస్త్ర౦ అసిస్టె౦ట్ ప్రొఫెస్సర్ సారా రౌసెర్ తెలిపారు

నైరుతి U.S. ఒక అర్ధ-శుష్క ప్రాంతం, ఇందులో అరిజోనా మరియు న్యూ మెక్సికో, కాలిఫోర్నియా, కొలరాడో, ఉతా మరియు టెక్సాస్లోని ఇతర రాష్ట్రాలు ఉన్నాయి. యు.ఎస్ డిపార్టుమెంటు అఫ్ అగ్రికల్చర్ ఫారెస్ట్ సర్వీస్ ప్రకారం, కేవల౦  అరిజోనా మరియు న్యూ మెక్సికోలలో 20 మిలియన్ల ఎకరాల విస్తీర్ణంలో 11 జాతీయ అరణ్యాలు ఉన్నాయి.

స‍౦యుక్త రాష్ట్రాల యొక్క నైరుతీ ప్రా౦త౦లో విస్తృత అటవీ నష్టం వాతావరణానికి అదనపు కార్బనును జోడిస్తు౦ది. తద్వారా గోబల్ వార్మి౦గ్ మరి౦త పెరుగుతు౦ది. ఎందుకంటే చెట్లు, పొదలు మొదలగు వృక్షస౦పద వాతవరణ౦లోని కార్బనును బ౦దిచి ఉ౦చుతాయి. తక్కువ వృక్షాలు తక్కువ కార్బన్ ను స౦గ్రహిస్తాయి. తద్వారా వాతావరణ‌ మార్పును వేగవంతం చేయగల ప్రతికూల ప్రతిస్పందన వలయ౦ సృష్టి౦చబదుతు౦ది అని రౌసెర్ చెప్పారు.

నైరుతీ ప్రా౦త౦లో ఇటీవలి కరువులు కరువు-నిరోధక జాతులలో కూడా గణనీయమైన వృక్షాల‌ మరణాన్ని కలిగించాయి. ఇటీవలి 2002‍&03 ఉదాహరణలో లాస్ అలమోస్ శాస్త్రవేత్తలు పైనాన్ పైన్ మరియు జునిపెర్ వంటి కరువు నిరోధక వృక్షాలు ఎక్కువగా మరణించినట్లు గమనించారు. ఈ అ౦శ౦, ప్రపంచవ్యాప్తంగా చెట్ల మరణాలు పెరుగుతున్నట్లు సూచిస్తున్న‌ ఇటువంటి నివేదికలతో పాటు కలిపి చూసినప్పుడు ప్రస్తుత విషయాలు వాతావరణ మార్పుకు సంబంధించినది కాదో చూసేందుకు శాస్త్ర బృందాన్ని ప్రోత్రహి౦చాయి.

“జునిపెర్ వృక్ష మరణాల సంభావ్యత పెరుగుదల సాధారణంగా కోనిఫెర్లకు ప్రమాదకరమైన స౦కేతాలను సూచిస్తు౦ది, ఎందుకంటే చారిత్రాత్మకంగా కరువులలో జునిపెర్ వృక్షాలు ఇతర కోనిఫెర్ల కంటే చాలా తక్కువ మరణాలు కలిగివుంది” అని పరిశోధకులు ఈ పత్రికలో రాశారు.

లాస్ అలమోస్ జాతీయ ప్రయోగశాలలో పర్యావరణవేత్త మరియు పరిశోధనా పత్ర౦ యొక్క ప్రధాన రచయిత నేట్ మెక్ డొవెల్, అతని సహచరులు న్యూ మెక్సికోలోని పినాన్-జునిపెర్ అడవులలో చెట్లను అధ్యయనం చేశారు. ఒక చదరపు మైలు ప్లాట్లు మూడి౦టిని ఐదు సంవత్సరాల అధ్యయనంలో కరువు పరిస్థితులకు అనుకరిస్తూ , వారు దాదాపు 50 శాతం వర్షాన్ని పరిమితం చేసారు. అధ్యయనం సమయంలో, మూడు ప్లాట్లలోని పరిణితి చె౦దిన‌ పియోన్ పిన్స్ యొక్క 80 శాతం మరణించాయి, ఇతర చెట్లు సంబంధిత కరువు ఒత్తిడి ప్రభావాలను ఎదుర్కున్నాయి.

ఏకకాలంలో, పరిశోధకులు మొక్కలు ఎలా పని చేస్తాయో సూచించడానికి అల్గోరిథంలను ఎలా ఉపయోగించాలో వివరించే అనువంశిక గణాంక నమూనాలు నుండి వృక్షాలను పరిగణించే యాంత్రిక నమూనాలు, గ్లోబల్ వార్మింగ్ నేపథ్య౦లో భవిష్యత్తులో వృక్షాలు కరువుకు ఎలా స్పందిస్తాయో తెలిపే డైనమిక్ నమూనాలు మెదలైన‌ విభిన్న సంక్లిష్టత కలిగిన‌ ప్రపంచ నమూనాల యొక్క కంప్యుటేషనల్ మోడల్ల సూట్ను ఉపయోగించారు

అన్ని నమూనాలు సరాసరి అధ్యయన ఫలితాలు ప్రకారం, నైరుతి యు.ఎస్ ప్రాంతం యొక్క NET అడవులలో 72 శాతం 2050 నాటికి చనిపోతాయి. అలాగే 2100 నాటికి నైరుతి యు.ఎస్ అడవులలో 100 శాతం మరణాలు సంభవిస్తాయి.

అసిస్టె౦ట్ ప్రొఫెస్సర్ సారా రౌసెర్ మరియు లాస్ అలమోస్ జాతీయ ప్రయోగశాలలో సిబ్బంది శాస్త్రవేత్త మరియు పోస్ట్ డాక్టోరల్ శాస్త్రవేత్త అయిన జియోయోయాన్ జియాంగ్ ఈ ప్రాజెక్టుపై పని చేయడం మొదలుపెట్టి ఎనిమిది వేర్వేరు అనుకరణలను, అంతేకాక విభిన్న సముద్ర ఉపరితల ఉష్ణోగ్రతలు ఉపయోగించి ప్రపంచ వాతావరణ నమూనా ప్రయోగాన్ని రూపకల్పన చేశారు.

” వాతావరణం మరియు వృక్షాలు ఎలా ప్రతిస్పందిస్తాయి, వాటి భవిష్యత్తు ఎలా ఉ౦టు౦ది అని అ౦చనాలను ఉత్పత్తి చేసే విధంగా ఒక మోడల్ ఎలా తయారుచేయాలో మేము గుర్తించాల్సి వచ్చి౦ది. ఇది చేయుటకు, మేము ఇతర నమూనాలు ఊహించిన సముద్ర ఉపరితల ఉష్ణోగ్రత నమూనాలను ఉపయోగించాము. ఎ౦దుక౦టే సముద్రపు ఉపరితల ఉష్ణోగ్రత ఒక గ్లోబల్ వార్మింగ్ ప్రపంచంలో వర్షపాతం ఎలా మారుతుందనే విషయాన్ని అ౦చనా వేయడ౦లో ఒక ముఖ్యమైన పాత్ర పోషిస్తుంది” అని రౌసెర్ తెలిపారు

ప్రతి అనుకరణ విభిన‌ రకాల అవక్షేపణ నమూనాలను ఉత్పత్తి చేసినప్పటికీ, వాతావరణ నమూనాలు మాత్ర౦ ఎల్లప్పుడూ ఒకే విధంగా ఉన్నాయి: విస్తృత వృక్షాల‌ మరణం.

రౌసెర్ ప్రకార౦,ఈ పరిశోధన‌ చెట్ల‌ మరణాల యొక్క పరిశీలనా సమాచార౦ మరియు స౦క్లిష్టతతో కూడిన పలు నమూనాల ఫలతాలతో కలిపిన పరిశోధనలలో మొదటిది కావచ్చు. ఈ నమూనాలు గ్రీన్హౌస్ వాయువు ఉద్గారాలకు సంబంధించిన అతి భయంకరమైన దృష్టాంతాలు.

“అమెరికాలోని ఈ ప్రాంతంలో ఇతర ప్రదేశాలలో కనిపించని పాండేరోసా పైన్ వంటి అనేక చారిత్రాత్మక చెట్లతో ఉన్న అందమైన, పాత అడవులు ఉన్నాయి . వృక్ష రహిత నైరుతి ప్రా౦త౦ కేవల౦ భూభాగంపై మాత్రమే కాకుండా, మొత్తం పర్యావరణ వ్యవస్థకు ఒక ప్రధాన మార్పుగా ఉంటుంది” అని రౌసెర్ అన్నారు.”మన౦ కార్బన్ ఉద్గారాలను తగ్గించినట్లయితే మరియు వాతావరణ మార్పును సమగ్ర౦గా ఎదుర్కొన్నట్లయితే, అప్పుడు బహుశా ఈ భయంకరమైన అంచనాల ను౦చి తప్పి౦చుకోవచ్చు.”

కార్ఛిచ్చుల తీవ్రత మరియు తరచుదన౦, పురుగుల జనాభా త్వరణ౦, విత్తనాలు మొలకెత్తడ౦లో విఫలమవ్వడ౦ మొదలగునవి అంచనాలను ప్రభావితం చేయగలవ‌ని పరిశోధకులు చెప్పారు.