Posted on

ఛలో ట్రాక్టర్‌ నగర్‌

దుక్కి దున్నడం మొదలు పంట కోత , నూర్పిడికి రైతులు యంత్రాల మీదే ఆధారపడుతున్నారు. ఈ యంత్రాలను ఎలా ఉపయోగించాలో తెలియక రైతులు పాత పద్ధతులనే అవలంబిస్తున్నారు. ఆధునిక యంత్ర పరికరాలను ఉపయోగించడంలో రైతులకు శిక్షణ ఇచ్చేందుకు కేంద్ర ప్రభుత్వం అనంతపురం జిల్లా గార్లదిన్నె మండల కేంద్రం సమీపంలో దక్షిణ క్షేత్ర వ్యవసాయ యంత్రాల శిక్షణ, పరీక్షణ సంస్థ (ట్రాక్టర్‌ నగర్‌)ను ఏర్పాటు చేసింది. వివిధ కోర్సుల్లో యువకులకు ఉపకార వేతనం, వసతి ఇచ్చి మరీ శిక్షణ ఇచ్చే ఆ సంస్థ విశేషాలు.
ఆధునిక యంత్రాల వాడకంలో యువరైతులకు శిక్షణ
దక్షిణ భారతదేశంలో ఆంధ్రప్రదేశ్‌, తమిళనాడు, కేరళ, కర్ణాటక, పాండిచ్చేరి, ఒడిశా, తెలంగాణ రాష్ట్రాలకు చెందిన యువరైతులకు శిక్షణనిచ్చేందుకు 1983 సంవత్సరంలో 500 ఎకరాల విస్తీర్ణంలో ట్రాక్టర్‌ నగర్‌ను ఏర్పాటుచేశారు. ఏదైనా నూతన వ్యవసాయ పరికరం తయారైన అనంతరం దాన్ని పరీక్షించి బహిరంగ మార్కెట్‌లోకి తరలించేందుకు ఈ సంస్థ ధ్రువీకరణ తప్పనిసరి. ఏటా ట్రాక్టర్‌ నగర్‌లో సీజన్‌కు అనుగుణంగా ఆయా యంత్రాలను ఉపయోగించడంలో శిక్షణ ఇస్తున్నారు. ఇప్పటివరకు 34 వేల మందికి పైగా ఇక్కడ ఆధునిక యంత్రాల వాడకంపై శిక్షణ పొందడం విశేషం.
ట్రాక్టర్‌ నగర్‌లో పలు రకాల కోర్సులను నిర్వహిస్తున్నారు. యూజర్‌ లెవల్‌ కోర్సుల్లో ఒక వారం నుంచి ఆరు వారాలు వరకు వివిధ రకాలపై శిక్షణనిస్తున్నారు. వ్యవసాయంలో శక్తి వినియోగంపై నాలుగు వారాలు, వివిధ యంత్రీకరణ యంత్రాల ఎంపికలో ఆరు వారాలు, పవర్‌ టిల్లర్‌ను నడపడం, యాజమాన్య పద్ధతులు రెండు వారాలు, మహిళా రైతులకు వివిధ వ్యవసాయ పనిముట్ల వాడకంపై మూడు రోజులు, బిందు-తుంపర సేద్యం చేసే విధానంపై ఒక వారం, సస్యరక్షణ పరికరాల ఎంపిక, వినియోగంపై ఒక వారం.. ఇలా పలు కోర్సులను రూపకల్పన చేసి నిపుణుల చేత శిక్షణ ఇప్పిస్తున్నారు. యూజర్‌ లెవల్‌ కోర్సులకు కనీసం విద్యార్హత 8వ తరగతి. వయస్సు 18 ఏళ్ళు పూర్తి అయి ఉండాలి. పొలం, వ్యవసాయ యంత్రాలు కలిగిన వారికి ప్రాధాన్యతనిస్తారు.
కోర్సులపై ఉచితంగా శిక్షణనిస్తారు. శిక్షణ పొందే విద్యార్థులకు రోజుకు రూ.175 చొప్పున ఉపకార వేతనం కూడా ఇస్తారు. శిక్షణా కేంద్రానికి వచ్చి వెళ్లేందుకు అయ్యే రవాణా ఖర్చులు అందిస్తారు. ట్రాక్టర్లు, డీజిల్‌ ఇంజన్లు, పవర్‌ టిల్లర్లు, వ్యవసాయ యంత్రాలు, హైడ్రాలిక్‌ సిస్టమ్స్‌, ఆటో ఎలక్ట్రికల్‌ పరికరాలు, బ్యాటరీ మరమ్మతులు, భూమి చదును చేసే యంత్రాల నిర్వహణ, బుల్‌డోజర్‌ నిర్వహణలపై ఒకటి నుంచి నాలుగు వారాల వ్యవధిలో శిక్షణా తరగతులు నిర్వహిస్తున్నారు. టెక్నీషియన్‌ లెవల్‌ కోర్సులకు ఐటీఐ (డీజల్‌/ మోటర్‌ మెకానిక్‌ కోర్సులు) పూర్తి చేసి ఉండాలి. ఈ కోర్సులకు వారానికి రూ. 50లు చొప్పున ఫీజు చెల్లించాల్సి ఉంటుంది. ట్రాక్టర్‌ నగర్‌లో శిక్షణ పొందే యువత, రైతులకు అధునాతన వసతి గృహంలో వసతి, భోజన సదుపాయం కూడా కల్పిస్తున్నారు. సంస్థ ఆవరణలోనే విజ్ఞాన సమాచార కేంద్రం విద్యార్థులకు అందుబాటులో ఉంది.
శిక్షణతో ఎంతో ప్రయోజనం
అన్ని రకాల పంటలకు సంబంధించిన ఆధునిక యంత్ర పరికరాలను ట్రాక్టర్‌ నగర్‌లో ప్రదర్శనకు ఉంచాం. వీటిని ఎలా ఉపయోగించాలి? ఎలా మరమ్మతులు చేయాలనే అంశాలపై కోర్సులు రూపొందించి, యువతకు శిక్షణ ఇస్తున్నాం. వ్యవసాయ శాఖ ద్వారా ప్రతి యంత్రానికి ప్రభుత్వం సబ్సిడీ అందిస్తోంది. రైతులు సద్వినియోగం చేసుకోవాలి.
Credits : Andhrajyothi
Posted on

వరినాటే యంత్రం..

  • 30 శాతం ఆదా..
  • ఎకరంలో నాట్లకు 3 వేల అద్దె
డీజిల్‌ సహాయంతో బురదలో నడిచే ఈ వరినాటు యంత్రం (ప్యాడీ ట్రాన్స్‌ప్లాంటర్‌) ఐదెకరాలకు పైగా భూమి వున్న రైతులకు ప్రయోజనకరం. కూలీల కొరతను అధిగమించడం, ఉత్పత్తి ఖర్చు తగ్గడంతో పాటు ఈ యంత్రం వల్ల 20 శాతం దిగుబడి అధికంగా వస్తున్నది. రోజుకు ఈ యంత్రం ఆరెకరాల పొలంలో వరి నాటుతుంది. ఇరవై సెంటీమీటర్ల దూరంతో వరినాటును క్రమం తప్పకుండా బురదలో వేస్తుంది.
కూలీల కంటే ఖర్చు తక్కువ
మాములుగా కూలీలతో పొలంలో వరినాటు వేయడానికి ఎకరానికి రూ.4500 నుంచి రూ.5000 వేలు ఖర్చు అవుతుంది. యంత్రం సహాయంతో నాటు వేయడం ద్వారా ఎకరానికి రూ.3 వేలు అద్దె చెల్లిస్తే సరిపోతుంది. కూలీలతో పోల్చి చూస్తే రూ.1500లు రైతుకు మిగలడమే కాకుండా కూలీల సమస్యను అధిగమించవచ్చు. దుక్కి దున్ని పొలాన్ని దమ్ము చేసుకున్న తర్వాత వరి నాటే రోజున నలుగురు కూలీల సహాయంతో ఈ యంత్రంతో రోజుకు ఆరెకరాల నారు నాటుకోవచ్చు.
నారును సిద్ధం చేసుకోవడం ఇలా…
యంత్రానికి అవసరమైన నారును ముందుగానే ప్రత్యేకంగా ఎర్రమట్టి, గొర్రెలు-పశువుల ఎరువుతో పాటు మరికొన్ని సేంద్రియ ఎరువులను వినియోగించి ట్రేలలో నారును పెంచాలి. మట్టిని సన్నగా చేసి ట్రేలో ఎంత మోతాదులో మట్టి వేయాల్సి ఉంటుందో అంతే మోతాదులో ట్రేల్లోని గదులను పూర్తిగా ఎరువుల మిశ్రమంతో నింపాలి. ఎర్రమట్టి, గొర్రెలు, పశువుల ఎరువు, ఇతర సేంద్రియ ఎరువులను సన్నని పొడిగా మార్చేందుకు ప్రత్యేకంగా గిర్ని (మర) ఉంటుంది. ఇది వరి నాటే యంత్రం వెంటే వస్తుంది.
యంత్ర యజమాని ఇచ్చిన సలహాలు, సూచనల ప్రకారం ఎరువుల మిశ్రమాన్ని తయారుచేసుకుని వరి విత్తనాలను సిద్ధంగా ఉంచుకోవాలి. ముందుగానే ఎన్ని ఎకరాల్లో వరి నాటు వేస్తారో ఖచ్చితంగా నిర్ధారించుకోవాలి. దాని మేరకు అవసరమైన ట్రేలను సమకూరుస్తారు. ఎరువుల మిశ్రమంతో నింపిన తర్వాత ట్రేలను మరో యంత్రం వద్ద ఉంచుతారు. ఆ యంత్రంలో వరి విత్తనాలు పోస్తారు. ఒక్కో ట్రేలో ఎన్ని విత్తనాలు అవసరమో ఆ మేరకు విత్తనాలను ఆటోమెటిక్‌గా తీసుకుంటుంది.
సబ్సిడీ ఇస్తే రైతులు రెడీ
తొలిసారిగా యాసంగి సీజన్‌లో వరినాటు యంత్రంతో ప్రయోగం చేశాను. ఇది విజయవంతమైతే వచ్చే ఖరీఫ్‌ సీజన్‌కల్లా రెండు యంత్రాలను కొనుగోలు చేస్తాను. విదేశాలల్లో దీనిని ఎక్కువగా వినియోగిస్తారు. యంత్రం ఖరీదు ఎక్కువగా వుంది. ప్రభుత్వం సబ్సిడీ ఇస్తే పలువురు రైతులు దీనిని కొనుగోలు చేసేందుకు ముందుకు వస్తారు.
– వి.యాదగిరిరెడ్డి, పెద్దారెడ్డిపేట గ్రామ రైతు, పుల్‌కల్‌ మండలం
వరి నాట్లు వేసేందుకు సరికొత్త యంత్రం అందుబాటులోకి వచ్చింది. కూలీల కంటే తక్కువ ఖర్చుతో నాట్లు వేసే ఈ యంత్రం ఖరీదు 28 లక్షలు రూపాయలు. రోజుకు ఆరెకరాల పొలంలో వరి నాటే ఈ యంత్రం రైతులకు వరం అంటున్నారు నిపుణులు.
– ఆంధ్రజ్యోతి ప్రతినిధి, సంగారెడ్డి
Posted on

సోలార్‌ పవర్‌ స్ర్పేయర్‌

 

తక్కువ ఖర్చుతో సౌకర్యవంతమైన సోలార్‌ పవర్‌ స్ర్పేయర్‌, బోరుబావి మోటార్‌ను రిమోట్‌ సాయంతో ఆన్‌ చేసి ఆఫ్‌ చేసే పరికరాన్ని తయారు చేశారు వరంగల్‌ రూరల్‌ జిల్లాకు చెందిన ముప్పారపు రాజు.
తక్కువ ఖర్చుతో, ఎక్కువ ప్రయోజనం వున్న వ్యవసాయ పరికరాలు తయారుచేస్తూ అందరి మన్ననలు పొందుతున్నారు వరంగల్‌ రూరల్‌ జిల్లా దుగ్గొండి మండలం గోపాలపురం గ్రామానికి చెందిన ముప్పారపు రాజు. డిగ్రీ వరకు చదివిన రాజు ఇప్పటికే పలు వ్యవసాయ పరికరాలను తయారుచేసి ప్రశంసలు పొందారు.
తాజాగా సోలార్‌ పవర్‌ స్ర్పేయర్‌, ఆటోమెటిక్‌ స్టార్టర్‌, కలుపు తీసే కొడవలిని తయారు చేశారు. పంటలకు తెగుళ్లు సోకినప్పుడు వాటిని నివారించేందుకు మందులు పిచికారీ చేస్తారు రైతులు. అందుకోసం పెట్రోల్‌తో నడిచే స్ర్పేయర్లు మార్కెట్‌లో అందుబాటులో వున్నాయి. వాటికంటే సౌకర్యవంతంగా, శబ్దం లేకుండా, తక్కువ ఖర్చుతో సోలార్‌ పవర్‌ స్ర్పేయర్‌ను తయారు చేశారు రాజు.
ఈ పరికరంతో తక్కువ శ్రమతో వేగంగా మందులు స్ర్పే చేయవచ్చు. ఐదు లీటర్ల ట్యాంక్‌, డీసీ మోటార్‌, సోలార్‌ ప్యానల్‌ వంటి పరికరాలతో ఈ స్ర్పేయర్‌ను తయారు చేశారు. సోలార్‌ పవర్‌ ప్యానల్‌ను ఫ్లైవుడ్‌ చెక్కకు బిగించి రైతు తలకి ఎండ తగలకుండా అమర్చారు. ప్లాస్టిక్‌ ట్యాంక్‌ ఉపయోగించి, ఎక్కవ దూరం మందును చల్లే విధంగా ఆ పరికరాన్ని మరింత మెరుగ్గా తీర్చిదిద్దారు.
3 గంటలు ఎండలో ఉంచితే ఈ పరికరాన్ని 8 గంటలు వాడవచ్చు. 10 అడుగుల వరకు దూరం వరకు స్ర్పే చేయగలుగుతుంది. ఈ పరికరానికి పెద్దగా మరమ్మతులు అవసరం లేదు. దీన్ని తయారు చేయడానికి రూ.6 వేలు ఖర్చయినట్టు రాజు తెలిపారు. మార్కెట్‌లో దీన్ని రూ.8 వేలకు విక్రయిస్తున్నారు. పెట్రోల్‌తో నడిచే పవర్‌ స్ర్పేయర్‌ రూ.10 నుంచి రూ. 20వేల వరకు ధర పలుకుతున్నది.
రైతులు విద్యుత్‌ ప్రమాదాలు బారిన పడకుండా ఉండేందుకు రిమోట్‌తో పనిచేసే బోరుబావి మోటార్‌ను తయారు చేశారు రాజు. దూరం నుంచే మోటార్‌ను ఆన్‌, ఆఫ్‌ చేయవచ్చు. రేడియో తరంగాలతో పనిచేస్తే ట్రాన్స్‌మీటర్‌, రిసీవర్‌ను తీసుకుని దానిని స్టార్టర్‌కి అనుసంధానం చేసి ట్రాన్స్‌మీటర్‌ని నొక్కినప్పుడు మోటార్‌ ఆన్‌ అవుతుంది. ఆఫ్‌ నొక్కగానే ఆగిపోయేలా దీన్ని రూపొందించారు. స్థానికంగా దొరికిన పరికరాలతో దీన్ని తయారు చేయడం విశేషం. రిమోట్‌ 300 మీటర్ల దూరం వరకు పనిచేస్తుంది.
– ఆంధ్రజ్యోతి ప్రతినిధి, వరంగల్‌ రూరల్‌
Credits : Andhrajyothi
Posted on

సేంద్రియ పసుపు సాగుకుశ్రీకారం

తెలంగాణలోనే తొలిసారి ప్రయోగం.. విజయపథంలో మహబూబాబాద్‌ రైతులు
సేంద్రియ సాగు అంటే లాభాలు పెద్దగా వుండవని, పండించిన పంట అమ్ముకోడానికి తంటాలు పడాలని భావిస్తుంటారు. ్ఞ అయితే సేంద్రియ పద్ధతుల్లో పసుపు సాగును చేపట్టి విజయం సాధించారు ఆలేరు గ్రామానికి చెందిన ముగ్గురు రైతులు.
మహబూబాబాద్‌ జిల్లా ఆలేరు గ్రామానికి చెందిన రూపిరెడ్డి గోపాల్‌రెడ్డి, చిన్నముప్పారంకు చెందిన కాలేరు నేతాజీ, వావిలాలకు చెందిన బానోత్‌ బోజ్యానాయక్‌ తెలంగాణలోనే తొలిసారిగా ఏసీసీ-48 ప్రతిభ దేశవాళీ రకం పసుపును సేంద్రియ పద్ధతిలో సాగుకు శ్రీకారం చుట్టారు. ఆంధ్రప్రదేశ్‌లోని గుంటూరు జిల్లా గుండెమెడ గ్రామానికి చెందిన వ్యవసాయ శాస్త్రవేత్త చంద్రశేఖర్‌ ఆజాద్‌ తన వ్యవసాయ క్షేత్రంలో కేవలం 14 కిలోల ఏసీసీ-48 దేశవాళీ రకం పసుపు వంగడాలతో అధిక దిగుబడులు సాధించాడని యూట్యూబ్‌లో చూశారు ఈ ముగ్గురు రైతులు. వెంటనే ముగ్గురూ ఆ వ్యవసాయ కేత్రం వెళ్లి పసుపు పంటను పరిశీలించారు. రైతుల ఆసక్తికి ముగ్ధుడైన చంద్రశేఖర్‌ ఆజాద్‌ తలో 3 క్వింటాళ్ల పసుపు విత్తనాలను ఉచితంగా అందజేశారు. ఆజాద్‌ సూచనల మేరకు గోపాల్‌రెడ్డి 4 ఎకరాలు, నేతాజీ 3 ఎకరాలు, బానోత్‌ బోజ్యానాయక్‌ 3 ఎకరాలలో సాగు చేపట్టారు.
ప్రస్తుతం వారి పసుపు పంట చీడపీడలు లేకుండా అద్భుతంగా ఉంది. డిసెంబర్‌ నెలలో పంట చేతికి రానుంది. సేంద్రియ పద్ధతిలో సాగు చేసిన ఏసీసీ-48, ఎసీసీ-79 పసుపు వంగడాలు స్వల్పకాలిక వంగడాలు కావడం, ఏడు నెలల కాలంలోనే పంట చేతికి వస్తుండటంతో రైతులు వీటిపై ఆసక్తి చూపుతున్నారు. సాధారణ సాగుతో పసుపులో నీరు నిలిచి దుంపకుళ్లు, వేరుకుళ్లు వస్తుంది. వేరుకుళ్లు, దుంపకుళ్లును నివారించడానికి బోదె పద్ధతిని ఎంచుకున్నారు. పసుపు తేమతో పండే పంట కాబట్టి నీరు నిలవకుండా ఉండటానికి బోదె పద్ధతి అనుసరిస్తున్నారు. బోదె వలన పసుపుకొమ్ములు సాగి అత్యధికంగా ఊరుతుంది. సాళ్ల మధ్య దూరం ఉండటం వలన పసుపు ఎక్కువ దిగుబడి వస్తుంది. తక్కువ నీటితో ఎక్కువగా సాగు చేసుకునే అవకాశం ఉంది. బోదె పద్ధతిలో ఎకరానికి 3 క్వింటాళ్ల పసుపు సీడ్‌ సరిపోతుంది. సాధారణ సాగుకు 8 క్వింటాళ్ల పసుపు సీడ్‌ అవసరం అవుతుంది. దీంతో ఉద్యాన శాఖ ఈ సాగును ప్రోత్సహిస్తోంది.
 ఆంధ్రజ్యోతి ప్రతినిధి,
నెల్లికుదురు
సాగు సులభం లాభాలు పుష్కలం
ఎసీసీ 48, ఏసీసీ 79 రకం పసుపు వంగడాలను సేంద్రియ, బోదె పద్ధతిలో సాగు చేయడం వలన ఎకరానికి పచ్చి పసుపు 250 నుంచి 300 క్వింటాళ్లు వచ్చే అవకాశం ఉంది. ఎండు పసుపు 45 నుంచి 50 క్వింటాళ్లు దిగుబడి వచ్చే అవకాశం ఉంది. ఈ వంగడాల్లో కర్కిమిన్‌ (రంగు) 9.3 శాతం ఉంటుంది. మిగిలిన పసుపు రకాల కంటే సేంద్రియ పసుపులో కర్కిమిన్‌ శాతం చాలా అధికం. ఎకరానికి సుమారు 250 క్వింటాళ్ల దిగుబడి వస్తే ఒక ఎకరంలో పండించిన సేంద్రియ పసుపు సీడ్‌ను ఇతర రైతులకు విక్రయిస్తే క్వింటాకు రూ. 4 వేల చొప్పున 250 క్వింటాళ్లకు 10 లక్షల ఆదాయం వచ్చే అవకాశం ఉందని రైతులు ఆశాభావం వ్యక్తం చేస్తున్నారు.
ఆజాద్‌ సూచనలు భేష్‌
గుంటూరుకు చెందిన వ్యవసాయ శాస్త్రవేత్త చంద్రశేఖర్‌ ఆజాద్‌ సూచనల మేరకు సేంద్రియ పద్ధతిలో సాగు చేసి సక్సెస్‌ దిశలో పయనిస్తున్నాం. ఉద్యానవన శాఖ అధికారులు సేంద్రియ ఎరువులు ఇచ్చి పోత్సహిస్తున్నారు. మా పసుపును సీడ్‌ కోసం ఇతర రాష్ట్రాల వ్యవసాయ శాఖ వారు కొనుగోలు చేయడానికి సిద్ధంగా ఉన్నారు.
– రూపిరెడ్డి గోపాల్‌రెడ్డి, రైతు, ఆలేరు
సేంద్రియంతో అధిక దిగుబడి
బోదె పద్ధతి సేంద్రియ పసుపు సాగుతో అధిక దిగుబడులు వచ్చే అవకాశం ఉంది. డిసెంబర్‌లో పంట చేతికందుతుంది. ఎకరానికి పచ్చి పసుపు 250 నుంచి 300ల క్వింటాళ్ల దిగుబడి వచ్చే అవకాశం ఉంది. మా కృషికి ఐఐఎస్‌ఆర్‌ సంస్థచే గుర్తింపు పొందడం ఆనందంగా ఉంది.
నేతాజీ, రైతు, చిన్నముప్పారం
Credits : Andhrajyothi
Posted on

వినూత్న ఆవిష్కరణల మల్లేశం

దిగుబడి ఖర్చులు పెరగడం, కూలీలు దొరక్కపోవడం, వ్యవసాయ పరికరాల ధరలు చుక్కల్లో వుండటంతో రైతులే శాస్త్రవేత్తలుగా మారుతున్నారు.యాదాద్రి భువనగిరి జిల్లా
అడ్డగూడూరు మండలం ఆజీంపేట గ్రామానికి చెందిన బొమ్మగాని మల్లేశం రైతులకు ఉపయోగపడే పలు రకాల పరికరాలు రూపొందించి ముఖ్యమంత్రి కేసీఆర్‌
ప్రశంసలు అందుకున్నారు.
రైతులు చేలకు క్రిమిసంహారక మందు పిచికారి చేయడానికి చేతిపంపు లేదా పెట్రోల్‌తో నడిచే తైవాన్‌ స్ర్పేయర్‌ వాడతారు. పెట్రోల్‌ ఖర్చు భారం రైతుపై పడకుండా వుండాలన్న ఆలోచనతో సోలార్‌ పవర్‌ స్ర్పేయర్‌ను రూపొందించాడు మల్లేశం. దానికి చార్జింగ్‌ బ్యాటరీని అమర్చాడు. సోలార్‌ స్ర్పేయర్‌ పనితీరును పరిశీలించిన రైతులతో పాటు సీఎం కేసీఆర్‌ ఆ యువరైతును

అభినందించారు.

విత్తనం విత్తే యంత్రం
మల్లేశం విత్తనం విత్తే యంత్రాన్ని రూపొందించాడు. కూలీల చేత విత్తనాలు వేయిస్తే కుప్పలు కుప్పలుగా పడటం లేదా దూ రంగా పడటం, గాలికి నాగటి సాలులో కాకుండా బయట పడుతుంటాయి. మల్లేశం రూపొందించిన విత్తనం విత్తే పరికరంతో కూలీలు, పశువుల అవసరం లేకుండా రైతు ఒక్కరే విత్తనం వేసుకోవచ్చు. ముందు విత్తనం పడుతుండగా వెనుక నుంచి విత్తనం పడిన సాలును పూడ్చుకుంటూ వస్తుంది ఈ పరికరం. కుందెనలో విత్తనం పోసి అవి తగినంత మోతాదులో వచ్చేలా రేకును సరిచేస్తారు. కోలలాగా ఉన్న పైపును రైతు లాగుతుంటే కింద అమర్చిన కర్రుతో సాలు వచ్చి మధ్యన అమర్చిన చక్రం ద్వారా విత్తనం సాలులో కావాల్సినంత ఎడంగా పడుతుంది.
బావిలో నీళ్లు అయిపోగానే…
ఇప్పుడు రైతులంతా ఆటోమేటిక్‌ స్టార్టర్లు వాడుతున్నారు. దీంతో బావిలో నీరు అయిపోయినా మోటార్‌ తిరుగుతూనే ఉంటుంది. అలా గంటలు గంటలు నడిచి బుష్‌లు, బేరింగులు దెబ్బతినడం, మోటారు కాలిపోవడం జరుగుతున్నది. అలా రైతు నష్టపోకుండా ఉండేందుకు మల్లేశం బావిలో నీళ్లు అయిపోగానే ఆటోమేటిక్‌గా స్టార్టరు ఆగిపోయేలా ఓ చిన్న పరికరాన్ని రూపొందించాడు.
యూరియా చల్లే యంత్రం
వరి నాటే సమయంలో రైతులు యూరియా చేతితో గుప్పుతారు. అలా చేయడం వల్ల కుప్పలుగా పడటం, అసలే పడకపోవడం జరుగుతుంది. అలా కాకుండా సోలార్‌తో యూరియా చల్లే యంత్రాన్ని మల్లేష్‌ రూపొందించాడు. డబ్బాలో యూరియా పోసి దానికి అమర్చిన డీసీ మోటారు ద్వారా ఫ్యాన్‌ తిరుగుతుంటే యూరియా అందులోంచి సమానంగా సుమారు 12 అడుగుల వెడల్పుతో పడుతుంది. రైతులకు ఉపయోగపడే ఇన్ని పరికరాలు రూపొందించిన ఈ యువ రైతుకు ఇటీవల రాష్ట్ర ప్రభుత్వం నుంచి జిల్లాస్థాయి గ్రామీణ శాస్త్రవేత్త అవార్డు లభించింది.
 
ఆంధ్రజ్యోతి ప్రతినిధి, మోత్కూరు
ప్రభుత్వం సహకారం ఉంటే..
నూతన పరికరాలు తయారీ కోసం ఖర్చు చేసే ఆర్థిక స్థోమత నాకు లేదు. స్వచ్ఛంద సంస్థలు, మిత్రులు అందిస్తున్న సహకారంతో నూతన పరికరాలు రూపొందిస్తున్నాను. ప్రభుత్వం సహకారం అం దిస్తే రైతులకు ఉపయోగపడే మరిన్ని నూతన పరికరాలు రూపొందిస్తాను.
బొమ్మగాని మల్లేశం, రైతు
Credits : Andhrajyothi
Posted on

అప్పుల ఊబిలో ఈము రైతులు

తెలుగు రాష్ట్రాల్లో వందలాది మంది రైతులు ఎనిమిదేళ్లుగా ఈము పక్షుల పెంపకం చేపట్టారు. తెలంగాణలో 120 మంది రైతులు ఈము పక్షులను పెంచుతున్నారు. సుమారు రూ.13 కోట్ల వరకు బ్యాంకుల అప్పుల్లో కూరుకుపోయారు.
ఈము పక్షుల గుడ్లు, పిల్లలు కొవ్వుద్వారా వచ్చే నూనెకు మంచి డిమాండ్‌ ఉందని అప్పట్లో కేంద్ర, రాష్ట్ర ప్రభుత్వ శాఖలు ప్రచారం చేశాయి. ఈము పక్షిపిల్ల ధర రూ. 5 వేలు, నూనె ధర కేజీ రూ.2 వేల నుంచి 4 వేల వరకు ఉంటుందని చెప్పడంతో ఒక్కో రైతు రూ.5 లక్షలు విలువైన వంద పిల్లలను కొనుగోలు చేశారు. రెండేళ్లపాటు ఎలాంటి ఆదాయం లేకుండా వీటిని పెంచారు.
రైతులు భారీగా పెట్టుబడులు పెట్టి ఆస్ర్టేలియా జాతికి చెందిన ఈము పక్షులను వేలంవెర్రిగా పెంచుకొన్నారు. పిల్లలు పెద్దవై గుడ్లుపెట్టి అవి కూడా పిల్లలు కూడా కావడంతో ఒక్కో యూనిట్‌లో వంద నుంచి 300 వరకు పెరిగాయి.
అయితే ఈము పక్షులను కానీ, పిల్లలను కాని, నూనెను కానీ కొనే నాథుడులేక పక్షులను పెంచే శక్తిలేక బ్యాంకుల నుంచి తెచ్చిన అప్పులు తీర్చే దారిలేక రైతులు కష్టాల్లో చిక్కుకున్నారు. ఈము పక్షులను పెంచే పరిస్థితి లేక స్థానికంగా వాటి మాంసాన్ని విక్రయించగా, మరికొందరు అడవుల్లో కూడా వదిలేశారు. రాష్ట్రవ్యాప్తంగా ప్రస్తుతం ఈముపక్షుల యూనిట్లన్నీ ఖాళీ అయ్యాయి. బ్యాంకుల్లో తెచ్చిన అప్పులు భారమయ్యాయి. గత నాలుగేళ్లుగా అప్పులు తీర్చలేక రైతులు ప్రభుత్వ సహాయం కోసం ఉమ్మడి రాష్ట్రంగా ఉన్నప్పటి నుంచే పోరాటం చేస్తున్నారు.
కనికరించని ప్రభుత్వం
తెలంగాణలో 120 మంది రైతులకు సుమారు రూ.13 కోట్లు, ఆంధ్రాలో 350 మంది రైతులకు రూ.84 కోట్లు రుణాలున్నాయి. ఏపీ ప్రభుత్వం వడ్డీని బ్యాంకుల ద్వారా మాఫీచేయిస్తూ అసల్లో 25 శాతం రైతులు, 25 శాతం బ్యాంకులు, 50 శాతం ప్రభుత్వం భరించేలా నిర్ణయం తీసుకుంది. తెలంగాణలో మాత్రం తమ రుణాలు మాఫీచేయాలని, ఆదుకోవాలని ఈముపక్షుల పెంపకందారులు కేంద్ర, రాష్ట్ర మంత్రులను కలిసి తమగోడు చెప్పుకొన్నా ఇప్పటివరకు ఈ సమస్య పరిష్కారం కాలేదు.
ఈముపక్షుల రైతు సంఘం నాయకుడిగా ఖమ్మానికి చెందిన బొల్లేపల్లి హరిబాబు కూడా పలుసార్లు మంత్రులను కలిశారు. అయితే ఎలాంటి భరోసా లభించకపోవడంతో అప్పులు తీర్చే దారిలేక ఆత్మహత్య చేసుకున్నారు. ఈ నేపథ్యంలో ఈము రైతుల్ని తెలంగాణ ప్రభుత్వం తక్షణం ఆదుకోవాలని రైతు సంఘ నేతలు, పి.వెంకటేశ్వరరెడ్డి, ఆర్‌. రమణారెడ్డి కోరుతున్నారు.
Credits : Andhrajyothi
Posted on

బహుళ ప్రయోజనాల డ్రమ్‌సీడర్‌

విత్తనాలు వేసేందుకు రైతులకు వ్యవసాయ శాఖ రాయితీపై డ్రమ్‌సీడర్‌లను సబ్సిడీపై అందిస్తున్నది. విదేశాల నుంచి దిగుమతి అయ్యే ఈ పరికరం ఏదో ఒక విత్తనం నాటేందుకు మాత్రమే ఉపయోగపడుతుంది. కానీ విజయనగరానికి చెందిన దమరసింగి బాబూరావు అన్ని విత్తనాలను నాటడంతో పాటు బహుళ ప్రయోజనాలున్న యంత్రాన్ని సొంతంగా తయారుచేసి జాతీయ, అంతర్జాతీయ గుర్తింపును పొందారు.
విజయనగరం జిల్లా పార్వతీపురానికి చెందిన దమరసింగి బాబూరావు చదివింది పదోతరగతే. వెల్డింగ్‌ షాప్‌ నడుపుకుంటూ జీవనం సాగించే ఆయన సరైన యంత్రాలు లేక రైతులు పడుతున్న కష్టాలను గమనించారు. ప్రభుత్వం రైతులకు సరఫరా చేసే డ్రమ్‌సీడర్‌ను మరింత ఉపయోగిపడేలా తీర్చిదిద్దడం ఎలా అని ఆలోచించారు. అన్ని రకాల విత్తనాలతో పాటు పురుగుల మందులు పిచికారీ చేసేందుకు వీలుగా బహుళ ప్రయోజనాలున్న డ్రమ్‌ సీడర్‌ను సొంతంగా తయారు చేశారు. ఈయన తయారుచేసిన డ్రమ్‌సీడర్‌ వరి, మొక్కజొన్న, వేరుశనగ, జొన్న, నువ్వులు, పెసలు, మినుములు, చోడి, కందులు ఇలా గింజ రకాలన్నింటినీ విత్తుకునే వీలుంది. ఒకేసారి వివిధ రకాల విత్తనాలు విత్తుకునే వెసులుబాటు ఈ యంత్రం వల్ల కలుగుతుంది.
సాధారణంగా నారు పోసి నాట్లు వేయాలంటే ఎకరాకు వరి విత్తనాలు 30 కిలోలు అవసరం. ప్రభుత్వం రైతులకు అందిస్తున్న డ్రమ్‌సీడర్‌ ద్వారా అయితే 15 కిలోల విత్తనాలు అవసరం. కాని బాబూరావు ఆవిష్కరించిన డ్రమ్‌ సీడర్‌ ద్వారా ఎకరాకు కేవలం 3 కిలోల వరి విత్తనాలు సరిపోతాయి. వ్యవసాయ శాఖ ద్వారా ప్రభుత్వం అందిస్తున్న సీడర్లు ద్వారా ఒక్కోసారి దగ్గర విత్తనాలు పడిపోవటం. ఒకే దగ్గర కొన్నిచోట్ల రెండేసి విత్తులు పడిపోతాయి. బాబూరావు తయారు చేసిన యంత్రంలో విత్తన రకం ఆధారంగా ఎడ్జెస్ట్‌మెంట్‌ చేయటం ద్వారా ఖచ్చితంగా దూరం ఆధారంగా ఒకే విత్తనం పడే విధంగా ఏర్పాట్లున్నాయి.
కేవలం 30 నిముషాల్లో విత్తడం పూర్తి చేయడం వల్ల రైతుకు డబ్బు కూడా ఆదా అవుతున్నది. ఇదే యంత్రం ద్వారా పురుగుల మందులను పిచికారీ చేసే ఏర్పాటు కూడా చేశారు బాబూరావు. ఇన్ని ప్రయోజనాలున్న బాబూరావు తయారుచేసిన ఈ వినూత్న యంత్రం దేశ, విదేశాల్లో గుర్తింపు పొందింది. దీని ఖరీదు రూ.45 నుంచి రూ.48 వేల వరకు ఉంది. డ్రమ్‌సీడర్‌తో బాబూరావు ఆవిష్కరణలను విడిచిపెట్టలేదు. మొక్కజొన్న పొత్తుల నుంచి గింజలను విడదీసేందుకు చిన్న రైతులకు ఉపయోగపడేలా మనుషులే ఆపరేట్‌ చేసుకునే విధంగా ఒక పరికరాన్ని తయారు చేశారు బాబూరావు.
రైతుల్ని ఆదుకుంటే ఆనందం
గత నెలలో ముఖ్యమంత్రి నుంచి గోల్డ్‌ మెడల్‌ అందుకున్నాను. తెలంగాణ, పాండిచ్చేరి, పంజాబ్‌, బెంగాల్‌లో ప్రదర్శనలిచ్చాను. నాబార్డ్‌ నుంచి నూతన ఆవిష్కరణల అవార్డుతో పాటు మరెన్నో అవార్డులు అందుకున్నాను. ఎన్ని అవార్డులు అందుకున్నా రైతులకు మరింత ఉపయోగపడటంలో నిజమైన ఆనందం లభిస్తుంది. కొత్త ఆవిష్కరణలు చేయాల్సిందిగా ప్రైవేటు కంపెనీలు ఆహ్వానిస్తున్నాయి. ప్రభుత్వం ప్రోత్సహిస్తే మరిన్ని పరికరాలు తయారు చేసేందుకు సిద్ధం.
– డి. బాబూరావు
Credits : Andhrajyothi
Posted on

సాగులో సరికొత్త సృష్టి

  • నయా పరికరాలతో సాగుబడి
  • ఇంజనీరింగ్‌ చేసి తండ్రి కోసం ఓ తనయుడు
  • టెన్త్‌ చదివి కళ్లు చెదిరే ఆవిష్కరణలతో మరో రైతు
  • కొలిమి అనుభవంతో సాగు యంత్రాల తయారీ
  • విత్తులు వేసే మల్టీ మిషన్‌
  • పొత్తులు యేరే చేతి పరికరం

ఎవరో వచ్చిందాకా వారు ఆగలేదు. వారే చక్రం పట్టారు. యంత్రం తిప్పారు. నయా సాగు పరికరాలకు వారే సృష్టికర్తలు అయ్యారు. తండ్రి తిప్పలు చూడలేని కుమారుడు.. తన ఇంజనీరింగ్‌ చదువుల సారాన్ని సేద్యంలోకి మళ్లించాడు. ఆదా, ఆసరా దిశగా ఆవిష్కరణలు చేశాడు. ఇక రైతే.. పొలంబాటలో ప్రయోగాలకు తెరతీసిన వైనం, వ్యవ సాయ యంత్రీకరణలో నూత్న చరిత్రని లిఖించింది.

కూలీలను పెట్టుకొని రైతులు విత్తనాలు నాటిస్తుంటారు. సాలు సాలులో విత్తనం ఎలా పడుతుందనేది దగ్గరుండి చూసుకొంటారు. విత్తనానికీ విత్తనానికీ మధ్య ఎడం పెరుగుతుంటే కూలీలను హెచ్చరిస్తుంటారు. ఉపాధి హామీ పథకం పనులు ఊళ్లో పెరిగిపోయాక.. కూలీలు దొరకడం కష్టం అయిపోయింది. దీనికోసం ప్రభుత్వం విత్తనాలు నాటే యంత్రాలను రైతులకు అందుబాటులోకి తెచ్చింది. వాటితో రైతుల అవసరాల చాలామటుకు తీరుతున్నాయి. కానీ, పక్కాగా అవి పని చేస్తున్నాయని చెప్పలేం. డ్రమ్‌ సీడర్‌ తయారీ సమయంలో దీనిపై బాబూరావు దృష్టి పెట్టారు. ప్రభుత్వం సరఫరా చేస్తున్న యంత్రాన్ని ఉపయోగించినప్పుడు.. ఒక్కోసారి విత్తనాలు మరీ దగ్గరగా పడుతుంటారు. కొన్ని చోట్ల రెండేసి విత్తులు పడతాయి. కానీ, రైతులకు విత్తన ఆదా చేసేలా బాబూరావు తన మిషన్‌ని సిద్ధం చేశాడు. విత్తన రకం ఆధారంగా సర్దుబాటు చేసుకొనే వెసులుబాటు ఉండటం ఈ యంత్రం ప్రత్యేకత. ఈ డ్రమ్‌ సీడర్‌కు అనుబంధంగా చిన్నపాటి నాగళ్లు ఉంటాయి. విత్తనం పడకముందు అవి.. అక్కడ సాలు చేస్తాయి. విత్తనం నాటగానే.. దాని మీద మట్టిని కప్పుతాయి. పురుగు మందు పిచికారీకి ఈ యంత్రానికి ప్రత్యేక సిలెండర్‌ ఏర్పాటు చేశారు.
కాలం, ఖర్చు ఆదా
సాధారణంగా ఎకరా విస్తీర్ణంలో విత్తనాలు వేయాలంటే మూడు నుంచి నాలుగు వేలు ఖర్చు అవుతుంది. అదే బాబూరావు యంత్రంతో ఆరు వందల నుంచి వెయ్యి రూపాయలతో పని అయిపోతుంది. స్టెయిన్‌లెస్‌ స్టీల్‌ రాడ్లుతో తయారుచేయడం వల్ల తేలికగా ఇద్దరు మనుషులు లాగొచ్చు. తయారీకి రూ.48వేలు ఖర్చు అయిందని బాబూరావు తెలిపారు.
గింజలను వేరుచేసి..
మొక్కజొన్న పొత్తుల నుంచి గింజలను విడదీసేందుకు పెద్దపెద్ద మిషన్లు, దానికి అనుసంధానంగా ట్రాక్టర్‌ తప్పనిసరిగా ఉండాలి. వీటిని ప్రభుత్వం రైతులకు సమకూరుస్తోంది. మార్కెట్‌లో లక్ష రూపాయలకు దొరికే వాటిని ప్రభుత్వం రూ.50 వేలుకు అందిస్తోంది. కానీ, చిన్న, సన్నకారు రైతుల కోసం మాన్యువల్‌గా పనిచేసే యంత్రాన్ని బాబూరావు తయారుచేశాడు. నాలుగు కండెల నుంచి ఒకేసారి గింజలు తొలగించవచ్చు. ఇలా గంటలో క్వింటా నుంచి, ఒకటిన్నర క్వింటాళ్ల గింజలు వొలిచేస్తుంది. గత మార్చి 24న హైదరాబాద్‌లో జరిగిన కార్యక్రమంలో నేషనల్‌ ఇనిస్టిట్యూట్‌ ఆఫ్‌ రూరల్‌ డెవలప్ మెంట్‌ అండ్‌ పంచాయతీరాజ్‌ నుంచి ఇన్నొవేషన్‌ అవార్డును బాబూరావు పొందాడు. పాండిచ్చేరిలో జరిగిన జాతీయస్థాయి వ్యవసాయ పరిశోధనలు, ప్రదర్శనలలో పాల్గొని బహుమతి గెలుచుకొన్నాడు.
రైతుల కోసమే..
ఎన్నో కంపెనీలు నాకు ఆహ్వానాలు పంపించాయి. తమతో కలిసి పనిచేయాలని అనేక సంస్థలు పిలిచాయి. అయితే, రైతులను, వ్యవసాయాన్ని వదులుకొనే వెళ్లడం నాకు ఇష్టం లేదు. నా పరిశోధనల వల్ల రైతులకు ఏ కొంచెం మేలు కలిగినా నాకదే పదివేలు. నేను చిన్నరైతును. ప్రయోగాలు చేసేంత స్తోమత లేదు. అందువల్ల ఎక్కువగా ఈ రంగంలో పనిచేయలేకపోతున్నాను. ప్రభుత్వం ప్రోత్సహిస్తే మరిన్ని ఆవిష్కరణలు చేయగలుగుతాను.
– దమరసింగి బాబూరావు
విజయనగరం జిల్లా పార్వతీపురానికి చెందిన దమరసింగి బాబూరావు చదివింది పదో తరగతి. వ్యవసాయం చేస్తాడు. అన్‌సీజన్‌లో వెల్డింగు పనులతో కడుపు నింపుకొంటాడు. ఈ కొలిమి అనుభవంతో రైతులకు సాగులో తోడ్పడే అనేక పరికరాలను బాబూరావు తయారుచేశాడు. ఉదాహరణకు, ప్రభుత్వం రాయితీపై రైతులకు డ్రమ్‌ సీడర్‌లను రాయితీపై అందిస్తోంది. దాని ద్వారా ఎకరా పొలంలో పంట వేయడానికి 15 కేజీలు విత్తనం కావాలి. బాబూరావు తయారుచేసిన డ్రమ్‌ సీడర్‌ ద్వారా నాటడానికి మూడు కిలోల విత్తనాలు చాలు. విత్తడానికి బహుళ ప్రయోజన యంత్రాన్ని బాబూరావు సిద్ధం చేశాడు.
Credits : Andhrajyothi
Posted on

బీడు భూముల్లో చందన పరిమళం

ఎర్ర చందనం.. మలబారు వేప సాగు, మిశ్రమ పంటలుగా శ్రీగంధం, ఆపిల్‌ బెర్రిస్‌ తీరొక్క పంట సాగుతో లాభాల బాటలో గజ్జెల్లి శ్రీరాములు
బీడు భూములు చందన పరిమళాలు వెదజల్లుతున్నాయి. సాంప్రదాయేతర వ్యవసాయం వల్లనే లాభం ఉంటుందని ఆ రైతు భావించాడు. అందరూ పత్తి సాగు వైపు పరుగులు పెడుతుంటే ఆయన మాత్రం ఆ వైపు తొంగి చూడలేదు. వాణిజ్య పంటలే మేలని భావించి 32 ఎకరాల్లో యూకలిప్టస్‌, మలబారు వేప, ఎర్ర చందనం, నిమ్మ, సపోట, టేకు, ఆపిల్‌ బెర్రి, శ్రీగంధం సాగు చేస్తున్నారు వరంగల్‌ అర్బన్‌ జిల్లా నందనం గ్రామానికి చెందిన గజ్జెల్లి శ్రీరాములు..
నందనం గ్రామంలో వాగు పరీవాహక ప్రాంతంలో గజ్జెల్లి శ్రీరాములు భూములున్నాయి, ఇసుక మేట ఉన్న భూములు కావడంతో మెట్ట పంటలు పండించాల్సి ఉంటుంది. పత్తి పంట వేస్తే ఎంతో లాభం వస్తుందని ఎంతో మంది సలహా ఇచ్చారు. పత్తి పంట సాగు అంటే జూదం లాంటిదని శ్రీరాములు అభిప్రాయం. అందుకే వాణిజ్య పంటల వైపు మొగ్గారు. వ్యయసాయ నిపుణులు, ఉద్యానవన అధికారుల సలహాతో సాగు ప్రారంభించారు. తనకున్న 32 ఎకరాల భూమిలో తక్కువ పెట్టుబడితో, కూలీల అవసరం అంతగా ఉండని పంటల సాగు ప్రారంభించారు.
మలబారు వేప
ఇపుడు మార్కెట్లో ఫర్నీచర్‌, ఇంటి నిర్మాణానికి అవసరమైన అన్ని రకాల పరికరాల తయారీ మలబారు వేప తోనే తయారవుతోంది. నిపుణుల సలహాతో రాజమండ్రి నుంచి మలబారు వేప మొక్కలను తెప్పించి 7 ఎకరాల్లో సాగు చేస్తున్నారు. దాదాపు ఎకరానికి లక్ష రూపాయలు సాగు ఖర్చు అవుతుందని ఆ రైతు వివరించారు. ఐదేళ్ళలో ఎకరానికి ఐదు లక్షల రూపాయల వరకూ ఆదాయం వచ్చే అవకాశముంది.
సపోట, నిమ్మ తోటలు
సపోట, నిమ్మ తోటలు 4 ఎకరాల చొప్పున సాగు చేస్తున్నారు శ్రీరాములు. సపోట ఈమధ్యే మొదటి పంట వచ్చింది. సేంద్రియ ఎరువులు మాత్రమే వాడుతున్నారు. ఉసిరి 200 చెట్లు, ఆపిల్‌ బెర్రీ మరో చోట ఉన్న నాలుగు ఎకరాల్లో సాగు చేస్తున్నారు. వీటిని సాగు యూకలిప్టస్‌ సైతం ఐదు ఎకరాల్లో సాగు చేస్తున్నారు.
– ఆంధ్రజ్యోతి ప్రతినిధి, వరంగల్‌ అర్బన్‌
ఎర్ర చందనం తోట
ఎనిమిది ఎకరాల్లో ఎర్ర చందనం సాగు చేపట్టారు. తెలంగాణ భూములు ఎర్ర చందనం సాగుకు పనికి రావని చాలా మంది చెబుతారు. అది నిజం కాదు అంటారు శ్రీరాములు. తెలంగాణ భూములు ఎర్రచందనం సాగుకు అనువైనవే అనేందుకు తన ఎనిమిది ఎకరాల్లోని ఎర్రచందనం చెట్లే ప్రత్యక్ష నిదర్శనం అంటారాయన. దీనికి ప్రత్యేక మైన సాగు విధానం ఏదీ లేదు. ఇతర పంటలకు పడాల్సినంత కష్టం అంత కంటే ఉండదు. డ్రిప్‌ ద్వారా అవసరం అయినంత నీటిని అందించాలి. సులభంగా రొటేవేటర్‌ తిరిగేంత వెడల్పులో మాత్రం మొక్కల మధ్య దూరం ఉంచాలి. కలుపు లేకుండా ఉంచితే మొక్క ఎదుగుదల బాగా ఉంటుందన్నారు శ్రీరాములు.
పెట్టుబడి స్వల్పం.. లాభాలు ఘనం
పత్తి, వరి పంటలకంటే దీర్ఘకాలంలో దిగుబడి వచ్చే ఈ తరహా వాణిజ్య పంటలు మేలు. పత్తి సాగు జూదం లాంటిది. పత్తి ప్రధాన పంటగా కాకుండా అంతర పంటగా వేసుకుంటే మంచిది. వాణిజ్య పంటలు పండించే అవగాహన లేకపోవడంతో రాష్ట్రంలో పెద్దగా ఉత్సాహం చూపడం లేదు. ఇప్పుడిపుడే కొంత మంది ముందుకు వస్తున్నారు. 32 ఎకరాల్లో ఈ పంటలనే సాగు చేస్తున్నాను. పెట్టుబడి పెద్దగా అవసరం లేదు. బిందు సేద్యం ద్వారా నీరు అందిస్తే సరిపోతుంది. కేవలం సేంద్రియ ఎరువులను మాత్రమే వాడుతాను. ఆర్గానిక్‌ ఫుడ్‌ స్టోర్‌ను నడిపే సంస్థ సలహాలతో వ్యవసాయం చేస్తున్నాను.
– గజ్జెల్లి శ్రీరాములు, రైతు, నందనం. ఫోన్‌: 94410 60544
Credits : Andhrajyothi
Posted on

డెయిరీతో లాభాల భేరి

  • 100 గేదెలతో లక్షల్లో ఆర్జిస్తున్న ఖమ్మం యువకుడు
అతను ఉన్నత చదవులు చదివాడు. సొంత గ్రామమంటే ప్రాణం. వ్యవసాయం అంటే మక్కువ.. ఈ రెండు అంశాలు అతడిని పల్లెబాట పట్టించాయి. స్వగ్రామం చేరుకుని వ్యవసాయం ప్రారంభించాడు. అప్పటికే తండ్రి నడుపుతున్న పాడి పరిశ్రమను అభివృద్ధి చేసి ఉద్యోగం కంటే అధికంగా సంపాదించడంతో పాటు మరో పది మందికి ఉపాధి కూడా కల్పిస్తున్నాడు ఖమ్మం జిల్లాకు చెందిన నెల్లూరి రవి.
ఖమ్మంజిల్లా మధిర మండలం మాటూరుపేట గ్రామానికి చెందిన నెల్లూరి వెంకటేశ్వర్లు కుమారుడు రవి. జర్నలిజంలో పీజీ పూర్తిచేశారు. ఉద్యోగం కోసం పోరాటం చేయడం మనస్కరించలేదు. తల్లిదండ్రులను చూసుకుంటూ స్వగ్రామంలోనే నలుగురికీ ఉపయోగపడేలా ఏదైనా చేయాలని సంకల్పించారు. తండ్రి చేస్తున్న వ్యవసాయాన్ని మరింత అభివృద్ధి చేయాలని భావించారు. దానికి అనుబంధంగా నడుస్తున్న డెయిరీని ఆధునిక పద్ధతుల్లో నిర్వహిస్తే లాభాలు తప్పక వస్తాయని ఆలోచించారు.
2012లో 100 గేదెలతో ప్రారంభం…
2012లో మాటూరుపేటలోని 12ఎకరాల తన సొంత స్థలంలో రెండు షెడ్లు నిర్మించి కోటి రూపాయల పెట్టుబడితో 100 గేదెలతో డెయిరీ స్థాపించాడు. ఇందుకు బ్యాంకు నుంచి రూ.70 లక్షలను రుణంగా తీసుకున్నాడు. గ్రామానికి చెందిన 12 మంది సిబ్బందిని డెయిరీ నిర్వహణకు నియమించుకున్నారు. వంద గేదెలను కంటికి రెప్పలా కాపాడుకుంటున్నారు. వాటికి కావలసిన వసతులన్నీ స్వయంగా రవి సమకూర్చుతారు. దాణాగా పచ్చిగడ్డి, ఎండుగడ్డి, పెసరపొట్టు, డెయిరీల్లో వాడే బలపాలు, మొక్కజొన్న పిండి గేదెలకు ఆహారంగా ఇస్తున్నారు. ప్రతిరోజూ గేదెలతో పాటు షెడ్లను పరిశుభ్రంగా కడిగి డెయిరీని అద్దంలా ఉంచుతారు. గేదెలు, పరిసరాలు శుభ్రంగా ఉన్నప్పుడే పాల దిగుబడి, స్వచ్ఛత పెరుగుతాయంటారు రవి.
పాలు తీసేందుకు యంత్రాల వినియోగం
డెయిరీని సమర్థంగా నిర్వహించేందుకు తాను చదివిన చదువులను ఉపయోగిస్తున్నారాయన. గేదెల నుంచి పాలు తీసేందుకు యంత్రాలను వినియోగిస్తున్నారు. పాలు తీసే యంత్రాన్ని ఒక్కోటి రూ.50 వేలతో కొనుగోలు చేసి పాలు తీసేందుకు వినియోగించటంలో విజయవంతమయ్యారు. ఒక్కో గేదె రోజుకు 3 నుంచి 5 లీటర్ల పాలు రెండుపూటలా ఇస్తుంది. ఇలా తీసిన పాలను ఎలాంటి కల్తీ లేకుండా మధిర మార్కెట్‌కు తరలించి రెండు కేంద్రాల ద్వారా నేరుగా ప్రజలకు విక్రయిస్తున్నారు రవి. పాలకేంద్రాలకు ఇస్తే లాభం పరిమితంగా ఉంటుంది. మనం విక్రయించే పాలు స్వచ్ఛమైనవని వినియోగదారులు నమ్మితే పది రూపాయలు అధికంగా ఇచ్చి మరీ కొంటారు. అందుకే నేనే స్వయంగా పాలను విక్రయిస్తున్నానంటారు రవి.
సొంత మనుషులుంటే భేష్‌
సొంత మనుషులు ఉంటే పాడిపరిశ్రమ మరింత లాభసాటిగా ఉంటుందని రవి తండ్రి నెల్లూరి వెంకటేశ్వర్లు పేర్కొన్నారు. చిన్న స్థాయి నుంచి మొదలైన డెయిరీ ఈ రోజున ఈ స్థాయికి వచ్చింది. ఒక్కో గేదెకు రోజుకు రూ.75 వరకు ఖర్చవుతుంది లీటరు రూ. 60 కు నేరుగా ప్రజలకు విక్రయిస్తే రూ.180 వస్తాయి. సొంత మనుషులయితే పశువులను శ్రద్ధగా పాషిస్తారు. అప్పుడు దిగుబడులు కూడా బాగా వస్తాయి. నీటి సదుపాయం, సొంత మనుషులు ఉండి గడ్డి పెంచేందుకు అవసరమైన భూమి ఉంటే పరిశ్రమ మంచి లాభదాయకం అన్నారు వెంకటేశ్వర్లు.
పశువులకు మేత, నీటి వసతి ఎంత ముఖ్యమో వాటికి సకాలంలో వైద్యం చేయించడం కూడా అంతే ముఖ్యం. గేదెలకు అనారోగ్యం వచ్చినప్పుడు షెడ్డు వద్దకే వైద్యులను పిలిపించి వైద్యం చేయిస్తున్నారు ఈ తండ్రీకొడుకులు.
– ఆంధ్రజ్యోతి ప్రతినిధి, మధిర
యంత్రాలతో సక్సెస్‌
పాలు తీయడానికి యంత్రాలు వినియోగిచడం వల్ల ప్రయోజనం ఉండదనే అపోహ ఉండేది. కానీ పాలు తీసే యంత్రాలు కొని వాటిని ఉపయోగించడంలో మేం సక్సెస్‌ సాధించాం. ప్రజలకు నేరుగా స్వచ్ఛమైన పాలను అందించినప్పుడు నా శ్రమ ఫలించనట్టువుతుంది. మంచి లాభాలు కూడా వస్తాయి. అందుకే పాలను ప్రజలకు నేరుగా విక్రయిస్తున్నాను. పది మందికి ఉపాఽధి కల్పిస్తూ స్వగ్రామంలో ఉండటం ఆనందంగా ఉంది.
– నెల్లూరి రవి, మాటూరుపేట,
సెల్‌నెంబర్‌: 9848402111
Credits : Andhrajyothi