కోకో సాగు భళా

  • కొబ్బరిలో అంతరపంటగా సాగు
  • కోనసీమకు తరగని ఆదాయం
కోనసీమ కొబ్బరి రైతులకు కోకో సాగు లాభాలను తెచ్చిపెడుతోంది. కొబ్బరిలో అంతరపంటగా కోకోను సాగు చేస్తూ తక్కువ ఖర్చుతో అధిక లాభాలు గడిస్తున్నారు. ఉద్యానవన శాఖ కోకో సాగుకు ప్రోత్సాహకాలు అందించడం రైతులకు వరంగా మారింది.
కోకోను కేడ్బరీ చాక్లెట్లు, ఐస్‌క్రీమ్స్‌ వంటి ఉత్పత్తుల్లో ఉపయోగిస్తుంటారు. అంతర్జాతీయంగా మంచి గిరాకీ ఉండ డంతో కోనసీమ రైతులు కోకో సాగుపై దృష్టి పెట్టారు. కొబ్బరితోటల్లో అంతరపంటగా కోకో సాగు చేసేందుకు హెక్టారుకు రూ.20వేలు వంతున ఉద్యానవన శాఖ ప్రోత్సాహకంగా రైతులకు అందిస్తున్నది. సబ్సిడీపై రెండు రూపాయలకే కోకో మొక్కను అందిస్తున్నది. మూడేళ్లపాటు హెక్టారుకు రూ.6వేలు వంతున కోకో మొక్కల ఎదుగుదలకు వీలుగా ఆకులను తొలగించేందుకు రైతులకు ప్రభుత్వం సాయం అందిస్తోంది. వీటితోపాటు చీడపీడల నివారణకు ప్రభుత్వ పథకాలు ద్వారా కూడా ప్రోత్సాహకాలు అందిస్తున్నారు. ఈ నేపథ్యంలో కోనసీమలోని అయినవిల్లి లంకకు చెందిన విద్యావేత్త విళ్ల దొరబాబు తన 24 ఎకరాల కొబ్బరితోటలో కోకోను అంతరపంటగా సాగు చేస్తూ లాభాలు గడిస్తున్నారు. ప్రభుత్వం రాయితీపై అందించిన కోకో మొక్కలను ఎకరాకు 225 చొప్పున నాటారు. రెండున్నరేళ్ల అనంతరం ఏపుగా పెరిగిన కోకో మొక్కలు ఆదాయాన్ని అందించడం మొదలెట్టాయి.
ఒక్కో కోకో మొక్కకు సగటున కిలో గింజలు ఉత్పత్తి అవుతాయి. మొక్కలు దిగుబడికి రావడాన్ని గమనించిన రైతులు ఆ సమాచారాన్ని ఉద్యానవన శాఖాధికారుల ద్వారా కోకో గింజలు కొనుగోలు చేసే ఏజెన్సీలకు అందిస్తారు. దీనిపై ఆ ఏజెన్సీలకు చెందిన ప్రతినిధులు నేరుగా ఎంపికచేసిన ప్రాంతాలతో పాటు రైతుల పొలాల వద్దకు కూడా వచ్చి శుద్ధిచేసిన గింజలను కొనుగోలు చేసి తరలించుకుపోతారు. గతంలో అంతర్జాతీయ మార్కెట్‌లో కిలో రూ.260 ఉండే కోకో గింజలు ధర ప్రస్తుతం రూ. 180 ఽమాత్రమే పలుకుతోంది. ధర తగ్గడం పట్ల రైతులు కొంత నిరాశకు గురవుతున్నారు. ప్రధానంగా కేడ్బరీ కంపెనీకి చెందిన మార్కెటింగ్‌ అధికారులు రైతుల వద్దకే వచ్చి వీటిని కొనుగోలు చేసుకుపోవడం రైతులకు పెద్ద ఊరట. కోకో సాగుతో ఎంత లేదన్నా ఎకరానికి 20 నుంచి 30 వేల రూపాయల వరకు ఆదాయం వస్తుంది. యేడాదిలో రెండుసార్లు దిగుబడి వస్తుంది.
22 ఏళ్లుగా సాగు
ఎంబీఏ, బీఎల్‌ చేసినా వ్యవసాయం అంటే నాకు ఆసక్తి. 22 ఏళ్లుగా కొబ్బరితోటలో కోకో సాగు చేస్తున్నాను. ప్రారంభంలో కోకో గింజల మార్కెటింగ్‌ ఇబ్బందిగా వుండేది. కొనుగోలు చేసేవారు లేకపోవడంతో పంటను వదిలేసిన సందర్భాలూ వున్నాయి. ఉద్యానవన శాఖ చొరవతో ఇప్పుడు మార్కెటింగ్‌ ఇబ్బందులు లేవు. పైగా రాయితీలు కూడా ఇస్తున్నారు. అంతరపంటగా కోకో సాగు కొబ్బరి రైతులకు వరం.
Credits : Andhrajyothi

ఇజ్రాయెల్‌ ఆగ్రో టెక్నాలజీ వేస్ట్‌!

  • తెలుగు రైతులూ పారాహుషార్‌!
చిన్న రైతులను నిర్వీర్యం చేసే ఇజ్రాయెల్‌ వ్యవసాయ సాంకేతిక పరిజ్ఞానం పట్ల తెలుగు రాష్ట్రాల రైతులు అప్రమత్తంగా వుండాలని హెచ్చరిస్తున్నారు పాలస్తీనా ప్రజలు, రైతుల సంక్షేమం కోసం 15 ఏళ్లుగా కృషి చేస్తున్న ఉద్యమకారిణి, రచయిత్రి మరెన్‌ మాంటోవని. స్టాప్‌ ద వాల్‌ ఉద్యమం, పాలస్తీనీయుల భూమి పరిరక్షణ ఉద్యమాల్లో కీలక పాత్ర పోషిస్తున్న ఆమె తెలుగు రాష్ట్రాలు ఇజ్రాయెల్‌ ఆగ్రో టెక్నాలజీ ఉచ్చులో ఎలా చిక్కుకుంటున్నాయనే అంశంపై హైదరాబాద్‌ లో పాలస్తీనా రైతులతో స్కైప్‌ ద్వారా ఇష్టాగోష్టి ఏర్పాటు చేశారు. ఆ సందర్భంగా మరెన్‌ ‘కృషి’తో మాట్లాడారు.
ఇజ్రాయెల్‌ ఆగ్రో టెక్నాలజీతో ఎడారిని సైతం సస్యశ్యామలం చేస్తామని చెబుతున్నారు. అందులో నిజం లేదంటారా?
ఇజ్రాయెల్‌కు చెందిన నెటాఫిమ్‌ సంస్థ భారత్‌తో సహా పలు ప్రపంచ దేశాల్లో ఇదే విషయాన్ని ప్రచారం చేసుకుంటున్నది. పాలస్తీనా ప్రజల నుంచి వారి జీవితాలను, భూమిని, వనరులను లాక్కుని, అక్కడి రైతుకు నీరివ్వకుండా, సొంత భూముల్లో సేద్యం చేయనివ్వకుండా ఇజ్రాయెల్‌ దమనకాండ సాగిస్తున్నది. అలాంటి దేశం ప్రపంచానికి అద్భుతమైన వ్యవసాయ సాంకేతిక పరిజ్ఞానాన్ని అందిస్తామని చెబితే ఎలా నమ్మగలం. తెలుగు రాష్ట్రాలకు డ్రిప్‌ ఇరిగేషన్‌ పరికరాలు అందిస్తున్న కంపెనీల్లో ఇజ్రాయెల్‌ దేశానికి చెందిన నెటాఫిమ్‌ కీలకంగా మారింది.
ఈ కంపెనీ ఇజ్రాయెల్‌ ప్రభుత్వానికి తొత్తు. కుప్పంలో ఇజ్రాయెల్‌ టెక్నాలజీ ప్రయోగం ఎంతవరకు విజయవంతం అయిందో అందరికీ తెలిసిందే. ఆ టెక్నాలజీ పర్యావరణ హితం కాదని, సుస్థిర వ్యవసాయానికి అనుకూలం కాదని తేలింది. పలు అంతర్జాతీయ సంస్థలు నెటాఫిమ్‌ను నాణ్యత కలిగిన కంపెనీల జాబితా నుంచి తొలగించాయి. అయినా తెలుగు ప్రభుత్వాలు ఇజ్రాయెల్‌ సాంకేతిక పరిజ్ఞానం అంటూ వందల కోట్లు వృధా చేస్తున్నాయి.
పాలస్తీనా రైతులు పడుతున్న కష్టాలకు నెటాఫిమ్‌కు ఎలా సంబంధం వుందంటారు?
గత ఏడు దశాబ్దాలుగా 75 శాతం పాలస్తీనీయులను ఇజ్రాయెల్‌ పాలకులు వారి మాతృభూమి నుంచి తరిమివేశారు. పాలస్తీనీయులకు చెందిన 93 శాతం వ్యవసాయ భూముల్ని లాక్కున్నారు. పాలస్తీనా రైతులు సాగు చేసుకునేందుకు నీరివ్వడం లేదు. బందూకుల పహారా మధ్య రైతులు దైన్యంగా సాగు చేసుకుంటున్నారు. దురాక్రమించిన భూభాగాన్ని విభజిస్తూ ఇజ్రాయెల్‌ భారీగా సరిహద్దు గోడను నిర్మిస్తున్నది. ఈ క్రమంలో పాలస్తీనా రైతులకు ప్రాణాధారమైన లక్షలాది ఆలివ్‌ చెట్లను కూకటివేళ్లతో పెకలించి వేస్తున్నది. దురాక్రమించిన పాలస్తీనా భూభాగంలో ఇజ్రాయెల్‌ పట్టణాలను, పరిశ్రమలను నిర్మించింది. అలా ఏర్పాటైన పరిశ్రమల్లో ఒకటి నెటాఫిమ్‌. ఈ కంపెనీ ఇజ్రాయెల్‌ ప్రభుత్వం ఏజెంట్‌. లక్షల మంది పాలస్తీనీయుల ఉసురుపోసుకుంటున్న అలాంటి కంపెనీతో తెలుగు ప్రభుత్వాలు చేతులు కలపడం ఎంతవరకు సమంజసమో ఆలోచించాలి.
డ్రిప్‌ ఇరిగేషన్‌ను 1966లో ప్రపంచానికి తనే పరిచయం చేశానని నెటాఫిమ్‌ చెప్పుకుంటున్నది కదా?
అందులో ఏమాత్రం నిజం లేదు. చిన్న రైతులు, పాలస్తీనా ప్రజల కన్నీళ్ల మధ్య ఎదిగిన ఆ కంపెనీ తెలుగు రైతుల సంక్షేమం కోసం పనిచేస్తానంటే ఎలా నమ్మగలం? డ్రిప్‌ ఇరిగేషన్‌ పరిజ్ఞానంలో తమకు తిరుగులేదని ఆ సంస్థ తెలుగు ప్రభుత్వాలకు నమ్మబలుకుతోంది. గత ఏడాది తెలంగాణ ప్రభుత్వం డ్రిప్‌ ఇరిగేషన్‌ సబ్సిడీల రూపంలో 274 కోట్లు ఖర్చు చేసింది. ప్రభుత్వం సిఫారసు చేస్తున్న 28 కంపెనీల్లో నెటాఫిమ్‌ ఒకటి. కానీ తెలుగు ప్రభుత్వాలకు ఇజ్రాయెల్‌ ప్రభుత్వ ఏజెంట్‌ అయిన నెటాఫిమ్‌ ముందు నుంచే వల వేస్తున్నది. నెటాఫిమ్‌ పరికరాల నాణ్యతను అధ్యయనం చేసేందుకు తెలంగాణ ప్రభుత్వం వెయ్యి మంది వ్యవసాయ విస్తరణాధికారులను ఇజ్రాయెల్‌ పంపింది. అందుకోసం కోట్లు ఖర్చు చేసింది. ఆ తరువాత వ్యవసాయ అధికారులు సహజంగానే నెటాఫిమ్‌ పరికరాలను రైతులకు సూచిస్తారు. అలా ఆ సంస్థ తెలుగు రైతుల్ని మోసం చేస్తున్నది.
కుప్పం తరహా ప్రయోగం నిష్ఫలం అంటారా?
1995లో కుప్పంలో ఇజ్రాయెల్‌ ఆగ్రో టెక్నాలజీతో చేపట్టిన ప్రాజెక్టు వల్ల చిన్న రైతులు ఎంతో నష్టపోయారు. తెలంగాణ ప్రభుత్వం నేటికీ ఇజ్రాయెల్‌ ఆగ్రో టెక్నాలజీ వెంటపడుతూనే వున్నది. 2015లో జీడిమెట్లలో ఇండో – ఇజ్రాయెల్‌ వ్యవసాయ ప్రాజెక్టు చేపట్టారు. 10 ఎకరాల్లో బిందుసేద్యం, పాలీ, నెట్‌ సాగు పద్ధతుల్లో పండ్లు, కూరలు, పూలు ప్రయోగాత్మకంగా పెంచుతున్నారు. గత ఏడాది ఈ ప్రాజెక్టు కోసం తెలంగాణ ప్రభుత్వం 12.4 కోట్లు ఖర్చు చేసింది. ములుగులో ఇదే తరహాలో 11 కోట్లు ఖర్చు చేసి 50 ఎకరాల భూమిని సిద్ధం చేశారు. అందులో ఇజ్రాయెల్‌ టెక్నాలజీతో పండ్ల తోటల సాగుకు 18 కోట్ల కేటాయించారు. స్థానిక సాగు పద్ధతుల్ని వదిలేసి ఇజ్రాయెల్‌ ఆగ్రో టెక్నాలజీ వెంటపడటం విచారకరం.
తెలుగు ప్రభుత్వాలు, రైతులకు మీరిచ్చే సలహా?
ఇజ్రాయెల్‌ ఆగ్రో టెక్నాలజీ పెద్ద రైతులు, పెద్ద కమతాలను ఉద్దేశించి రూపొందింది. చిన్న రైతులకు అది ఏమాత్రం ఉపయోగపడదని పాలస్తీనా రైతులు ముక్తకంఠంతో చెబుతున్నారు. చిన్న రైతులు అధిక సంఖ్యలో వున్న తెలంగాణ, ఆంధ్రప్రదేశ్‌ రాష్ట్రాలకు ఈ సాంకేతిక పరిజ్ఞానం ఉపయోగపడదు. స్థానిక వనరులు, అవసరాలకు అనుగుణమైన టెక్నాలజీని ఉపయోగించుకుంటే వ్యవసాయం లాభసాటి అవుతుంది.
Credits : Andhrajyothi

‘మకామ్‌’.. మహిళా రైతుల చైతన్య వేదిక

‘మకామ్‌’ అంటే ‘మహిళా కిసాన్‌ అధికార్‌ మంచ్‌’.
‘మకామ్‌’ వేదిక ద్వారా మహిళా రైతుల హక్కులు, వారికందాల్సిన ప్రభుత్వ పథకాలు, ప్రయోజనాల గురించి అవగాహన పెంపొందిస్తున్నాం.
స్ఫూర్తి
డా.రుక్మిణీ రావు… పట్టణాల్లోనే కాదు గ్రామీణ
ప్రాంతాల్లోని మహిళా హక్కుల కోసం… దళిత స్త్రీలు, బాలలు, మహిళా రైతుల హక్కుల కోసం… చట్టాల్లో మార్పులు తేవడం కోసం ఎంతో కీలకంగా వ్యవహరించిన యాక్టివిస్టు. అందుకోసం ఆమె ‘మకామ్‌’ అనే మహిళా రైతుల హక్కుల వేదికను కూడా
ఏర్పాటుచేశారు. ‘మానవతా సమాజస్థాపనే తన లక్ష్యం’ అంటున్న రుక్మిణీరావును ‘నవ్య’ పలకరించింది. ఆ విశేషాలే ఇవి…
మనదేశంలో వ్యవసాయరంగంలో పనిచేస్తున్నది 70 శాతం మహిళా రైతులే. వారు పండిస్తే కాని మన నాలుగు వేళ్లూ నోట్లోకి పోవు. కానీ వారి హక్కుల పట్ల ప్రభుత్వాలతో పాటు సమాజం కూడా నిర్లక్ష్యంగా వ్యవహరిస్తోంది. ఇతర రాష్ట్రాలలో కొనసాగిస్తున్న లాభదాయకమైన వ్యవసాయ విధానాలను, పద్ధతులను ఆ రాష్ట్రాలకు చెందిన మహిళా రైతుల నుంచి తెలుసుకుని నూతన వ్యవసాయ సాగును ‘మకామ్‌’
అభివృద్ధిపరుస్తోంది.
పట్టణాల్లో, గ్రామాల్లో మహిళలపై జరుగుతున్న గృహహింస, వరకట్న వేధింపులు, లైంగిక దాడులు, అత్యాచారాలు… బాలలపై వేధింపులు, అత్యాచారాలకు వ్యతిరేకంగా… అలాగే దళితులు, వెనుకబడిన వర్గాల బాలల విద్య కోసం… బాల్య వివాహాలకు, భ్రూణహత్యలకు వ్యతిరేకంగా… సింగిల్‌ విమెన్‌ రక్షణ విషయంలో… ఇలా ఎన్నో సామాజిక సమస్యలపై గత రెండు దశాబ్దాలకు పైగా డా. రుక్మిణీరావు పనిచేస్తున్నారు. వీటికి సంబంధించి చట్టాలు తీసుకురావడంలో, ఉన్న చట్టాలకు కొత్త సవరణలు చేపట్టేలా కృషిచేయడంలో దేశవ్యాప్తంగా ఇతర యాక్టివిస్టులతో కలిసి పనిచేశారామె.
పట్టణాల నుంచి పల్లె మహిళల కోసం…
పట్టణ ప్రాంత మహిళల కోసం పనిచేయడంతో తన పోరాటం ప్రారంభమైందని రుక్మిణి తెలిపారు. తొలుత మహి ళల వరకట్న హత్యలపై దృష్టిసారించారామె. వరకట్న మరణాలకు సంబంధించిన చాలా కేసులను యాక్సిడెంటల్‌ మరణాలుగా పోలీసులు తేల్చడం రుక్మిణిలో ఆలోచనలను రేకెత్తించాయి. ఈ సమస్య పరిష్కారానికి ‘ప్రొ-యాక్టివ్‌ అప్రోచ్‌’ అవసరమని భావించారామె. వరకట్నం పేరుతో ఆడవాళ్లపై జరుగుతున్న హింసకు అడ్డుకట్ట వేయాలని 1981లో ‘సహేలీ రిసోర్స్‌ సెంటర్‌ ఫర్‌ విమెన్‌’ సంస్థను ఏర్పాటు చేశారు. అలా మొదలైన రుక్మిణీ రావు యాక్టివిజం విస్తృతస్థాయిలో కొనసాగుతూనే ఉంది. సమస్యలపై పోరాటానికి గ్రామాలలోని దళితులు, వెనుకబడిన వర్గాల మహిళలను బృందాలుగా ఏర్పరిచి వారిలో నాయకత్వ లక్షణాలను పెంపొందించారామె. ‘మకామ్‌’ కూడా ఈ లక్ష్యంతోనే ప్రారంభించారు. ఈ వేదిక ద్వారా మహిళా రైతుల హక్కులు, వారికందాల్సిన ప్రభుత్వ పథకాలు, ప్రయోజనాల గురించి అవగాహన పెంపొందిస్తున్నారు. ‘మకామ్‌’ అంటే ‘మహిళా కిసాన్‌ అధికార్‌ మంచ్‌’. దీనిని తెలుగులో ‘మహిళా రైతుల హక్కుల వేదిక’ అంటారు. ఈ ఆలోచనను పలు రాష్ట్రాలలోని స్వచ్ఛంద సంస్థలు కూడా అనుసరించడం విశేషం. అసలు గ్రామీణ ప్రాంత ప్రజల కోసం పనిచేయాలన్న ఆలోచన ఎలా వచ్చింది? అని అడిగితే ‘‘పట్టణ ప్రాంత మహిళలలో ఎక్కువమంది మధ్యతరగతి, ఉన్నత మధ్య తరగతి వర్గాలకు చెందినవారు. వారు ఆర్థికంగా కొంతమేర అండదండలున్నవాళ్లు కాబట్టి తమ హక్కుల సాధన కోసం కోర్టులను ఆశ్రయించగలరు. పైగా చట్టాలు, హక్కుల గురించి ఎంతోకొంత చైతన్యం ఉన్న వారు కూడా. కానీ గ్రామీణ మహిళలకు తమకోసం ప్రత్యేక చట్టాలున్నాయని, ఎన్నో హక్కులున్నాయనే విషయం తెలియదు. న్యాయస్థానాల ద్వారా న్యాయం పొందవచ్చని తెలిసినవారు వీళ్లలో చాలా తక్కువ. ఇకపోతే ప్రభుత్వం ఈ మహిళలకు అందిస్తున్న సంక్షేమ పథకాల గురించి అసలే తెలియదు. అందుకే గ్రామీణ మహిళా రైతులలో హక్కుల చైతన్యం పెంపొందించడం కోసం పనిచేయాలనుకున్నా’’ అంటారామె.
మహిళా రైతుల హక్కుల కోసం…
‘‘మకామ్‌’’ వేదికను 2014లో ప్రారంభించాం. మనదేశంలో వ్యవసాయరంగంలో పనిచేస్తున్నది 70 శాతం మహిళా రైతులే. వారు పండిస్తే కాని మన నాలుగు వేళ్లూ నోట్లోకి పోవు. కానీ వారి హక్కుల పట్ల ప్రభుత్వాలతో పాటు సమాజం కూడా నిర్లక్ష్యంగా వ్యవహరిస్తోంది. ఈ నేపథ్యంలో మహిళా రైతులు పడుతున్న శ్రమకు గుర్తింపు లేకపోవడాన్ని గమనించాం. ‘మకామ్‌’ ఇతర రాష్ట్రాలలో కొనసాగిస్తున్న లాభదాయకమైన, అభివృద్ధిదాయకమైన వ్యవసాయ విధానాలను, పద్ధతులను ఆ రాష్ట్రాలకు చెందిన మహిళా రైతుల నుంచి తెలుసుకుని నూతన వ్యవసాయ సాగును అభివృద్ధిపరుస్తోంది. అయితే మహిళా రైతులకు సంబంధించి ప్రస్తావించుకోవాల్సిన అంశాలు చాలానే ఉన్నాయి. మన దగ్గర మహిళా రైతు సంఘాలు లేనే లేవు. సాధారణ రైతు సంఘాలలో మహిళా రైతులు ఎంతమంది సభ్యులుగా ఉన్నారు? వారు అడుగుతున్న డిమాండ్లకు ఏ మేర స్పందిస్తున్నారు? మహిళా రైతుల అవసరాలను గుర్తిస్తున్నారా? ప్రభుత్వ వ్యవసాయ పథకాలు, కార్యక్రమాలు, అభివృద్ధి కార్యక్రమాలలో బడ్జెట్‌లో 30 శాతం మహిళా రైతులకు కేటాయించాలని ఆర్థిక సర్వే ప్రభుత్వానికి సూచించినా ఆ దిశగా ఎటువంటి ప్రణాళికా ప్రభుత్వాలు చేపట్టలేదు. అలాగే పంటలకు మద్దతు ధర పెంచితేనే మహిళా రైతులకు లాభం. ఆదివాసీ ప్రాంతాలలో మహిళా రైతులు సేంద్రియ వ్యవసాయం సాగిస్తున్నారు. వారి పెట్టుబడులకు, కూలీ ఖర్చులకు అధిక కేటాయింపులు కావాలి. అలాగే వ్యవసాయంలో మహిళా రైతుల పనిభారాన్ని తగ్గించడానికి, ఆహార భద్రత కల్పించడానికి కూడా బడ్జెట్‌లో కేటాయింపులు చేయాలి. విచారకరమైన విషయం ఏమిటంటే ప్రభుత్వ గణాంకాలలో మహిళలకు రైతులుగా గుర్తింపు లేదు! జెండర్‌ పరంగా గణాంకాలను రికార్డు చేసే పద్ధతి కరువవడం వలన ప్రభుత్వ చేపడుతున్న చర్యలు మహిళా రైతులకు ఎంతవరకు అందుతున్నాయనేది అంచనా వేయలేని పరిస్థితి.
అలాగే అడవి నుంచి ఆహార సేకరణ చేసే ఆదివాసీ మహిళలకు, అడవుల నుంచి పొందాల్సిన ప్రయోజనాలను దూరం చేస్తున్నారు. అందుకే మహిళా రైతులకు గుర్తింపు, రాయితీలు, అన్ని రకాల పథకాల హక్కులను ఇవ్వాలని ‘మకామ్‌’ డిమాండ్‌ చేస్తోంది. రైతు ఆత్మహత్య కుటుంబాలలో మహిళలకు జీవనోపాధి సహాయం అందించడంతో సహా రుణ మాఫీతో సమగ్ర వ్యూహాన్ని రూపొందించాలి. దీనికి అవసరమైన బడ్జెట్‌ కేటాయింపులుండాలి. భూమి లేని వారికిచ్చే కిసాన్‌ క్రెడిట్‌ కార్డులను మహిళా రైతులకు కూడా ఇవ్వాలి. ఇవే కాకుండా భూమిలేని దళిత మహిళలకు భూమి కొనుగోలు పథకాలు, కనీస మద్దతు ధర, మహిళా రైతులకు డ్రిప్‌, భూగర్భజలాల పథకాలకు ప్రోత్సాహం వంటి వాటికోసం ‘మకామ్‌’ పోరాడుతోంది అని రుక్మిణీరావు అన్నారు.
నాగసుందరి, ఫోటో:ఎల్‌.అనిల్‌కుమార్‌రెడ్డి
Credits : Andhrajyothi

జయ్యారంలో పచ్చ బంగారం!

కాలికట్‌, గుంటూరు, బీహార్‌ నుంచి తీసుకువచ్చిన కొత్తరకం పసుపు వంగడాలు మహబూబాబాద్‌ రైతులకు పసిడి కురిపిస్తున్నాయి. ఏసీసీ-79, ఏసీసీ-48, రాజేంద్ర సోనాలి వంగడాలు అధిక దిగుబడులు ఇవ్వడంతో పాటు మంచి ధర కూడా పలకడం విశేషం.
 
ఆంధ్రజ్యోతి ప్రతినిధి, మహబూబాబాద్‌ అగ్రికల్చర్‌ 
ఇరవై ఏళ్లుగా సంప్రదాయ పద్ధతిలో పసుపు సాగు చేస్తున్న మహబూబాబాద్‌ జిల్లా జయ్యారం రైతులు ఇటీవల కొత్త వంగడాలను ఎన్నుకున్నారు. ఏసీసీ-79, ఏసీసీ-48, రాజేంద్ర సోనాలి రకం వంగడాలు అధిక దిగుబడులు అందిస్తూ రైతులకు సిరులు కురిపిస్తున్నాయి. ఈ రకాల పసుపుకు ఆకుమచ్చ, దుంపకుళ్లు, తెగుళ్లు దరిదాపులకు కూడ రావు. పంటకాలం ఏడు నెలలే కావడంతో ఈ పసుపు చేతికి వచ్చిన తర్వాత రెండవ పంటగా కూరగాయలు, ఇతర స్వల్పకాలిక రకాలు వేసి లాభాలు గడించవచ్చు.
ఈ పసుపు సాగులో కూలీల సమస్య, వేసవిలో నీటి సమస్య ఉండదు. బోజ పద్ధతిలో బిందుసేద్యం, సేంద్రియ పద్ధతి, ఆధునిక పద్ధతి ద్వారా ఈ పసుపును జిల్లాలోని చిన్నగూడూరు మండలం జయ్యారం గ్రామంలోని కొంతమంది రైతులు పండిస్తూ, విజయం సాధించి లాభాల బాటలో పయనిస్తున్నారు. కాలికట్‌, గుంటూరు నుంచి ఏసీసీ-79, ఏసీసీ-48 రకాలను క్వింటాలుకు రూ.7500 చొప్పున తీసుకువచ్చారు వల్లూరి కృష్ణారెడ్డి. ఎకరంలో పసుపు ముక్కలు కట్‌ చేసి బోజ పద్ధతిలో నాటారు. డ్రిప్‌ ఇరిగేషన్‌ ద్వారా నీటిని అందించారు. పసుపు చేను ఎత్తు పెరగకపోవడం ఈ వండగం ప్రత్యేకత. మధ్యాహ్నం సమయంలో ఆకులు ముడుచుకునే గుణం ఉండడంతో సూర్యరశ్మి చెట్ల అడుగుభాగంలో తగులుతుంది.
దీంతో పసుపు వేర్లు ఎక్కువగా పెరిగి దుంపలు అధికంగా వచ్చాయి. జూన్‌ మొదటి వారంలో విత్తనాలు వేస్తే జనవరి 15 కల్లా పంటకాలం ముగుస్తుంది. సాధారణ పసుపు సాగుకంటే ఈ పసుపు పంటకాలం తక్కువగా వుండటంతో వేసవిలో నీటి సమస్య, కూలీల సమస్య ఉండదు. ఎకరానికి 195 క్వింటాళ్ల దిగుబడి వచ్చింది. ఒక్కగడ్డ కిలో 800 గ్రాముల వరకు ఊరింది. ఈ కొత్తరకం పచ్చి పసుపును విత్తనాల కోసం ఉమ్మడి జిల్లా నుంచే కాకుండా ఇతర జిల్లాల నుంచి కూడ జయ్యారం వచ్చిన రైతులకు క్వింటాకు రూ.5 వేల చొప్పున విక్రయిస్తున్నారు ఈ రైతు. ఈ పసుపుపై పెట్టుబడి రూ.76 వేలు కాగా రూ. 8.74 లక్షల ఆదాయం వచ్చింది. కురికిమన్‌ (పసుపురంగు) అధికంగా ఉండడంతో ధర ఎక్కువగా పలుకుతోంది. మరో రైతు బొల్లంపల్లి శ్యాంసుందర్‌రెడ్డి ఏసీసీ-48, 79 రకాలను తీసుకువచ్చి బోజ పద్ధతిలో కాకుండ సంప్రదాయ పద్ధతిలో నాగలి కట్టి ఎకరం సాగు చేశారు. ఎకరానికి రూ.50 వేల వరకు ఖర్చయింది. 150 క్వింటాళ్ల దిగుబడి వచ్చింది. పెట్టుబడి పోను రూ.4.50 లక్షల ఆదాయం వచ్చిందని ఆయన తెలిపారు.
అవగాహన సదస్సుతో మేలు: కృష్ణారెడ్డి
ఆదిలాబాద్‌ జిల్లా ధనోరాలో జరిగిన పసుపు అవగాహన సదస్సుకు వెళ్లాను. అక్కడ బోజ పద్ధతిలో రిటైర్డ్‌ శాస్త్రవేత్త ఎల్‌.కిషన్‌రెడ్డి చెప్పినట్టుగా ఈ కొత్తరకం వంగడాలను సాగు చేయడంతో అధిక లాభాలు వచ్చాయి.
Credits : Andhrajyothi

మేలు చేసే మినీట్రాక్టర్‌

కలుపు తీసేందుకు,   పురుగుల మందు చల్లేందుకు సకాలంలో కూలీలు దొరకక రైతులు చాలా సందర్భాల్లో నష్టపోతున్నారు. ఈ రెండు సమస్యలకు పరిష్కారం చూపే మినీ ట్రాక్టర్‌ రైతులకు వరంగా మారింది.
నాలుగు లక్షల రూపాయల ధర ఉన్న ఈ మినీ ట్రాక్టర్‌ను కొనుగోలు చేసే రైతులకు ప్రభుత్వం లక్ష రూపాయల సబ్సిడీ ఇస్తున్నది. ముఖ్యంగా పత్తి, కంది, చెరుకు పంటలలో, మామిడి తోటలు పూల తోటలలో కలుపు తీస్తుంది. పేరుకుపోయిన గడ్డి, పిచ్చి మొక్కలను తొలగిస్తుంది. అంతేగాక చిన్న ట్రాక్టర్‌కు వెనక ఉన్న తిరిగే పరికరం (పీ.టీ.వో) ద్వారా పంపు బిగించి, ప్రత్యేకంగా ఏర్పాటుచేసుకున్న ట్యాంకుకు అనుసంధానిస్తున్నారు. దీని ద్వారా ఆయా పంట పొలాల్లో క్రిమిసంహారక మందును పిచికారీ చేసుకునే అవకాశం కూడా వుంది. ఈ ట్రాక్టర్‌ ద్వారా ఒక్క రోజుకు నాలుగు ఎకరాల విస్తీర్ణంలో కలుపు తీయడం, క్రిమిసంహారక మందును పిచికారి చేసే వీలున్నది. ఈ పని చేసేందుకు నలభై మంది కూలీలు అవసరమవుతారు. అందుకోసం 12 వేల రూపాయల ఖర్చవుతుంది. మినీ ట్రాక్టర్‌తో పని వేగంగా జరగడంతో పాటు ఖర్చు కూడా తక్కువ. దీంతో రైతులు ఈ ట్రాక్టర్‌ పట్ల ఆసక్తి చూపుతున్నారు. సొంతంగా ట్రాక్టర్‌ను కొనుగోలు చేయలేని రైతులు గంటకు నాలుగు వందల రూపాయల అద్దె చెల్లించి సేవలు పొందుతున్నారు.
భలే ప్రయోజనం
చిన్న ట్రాక్టర్‌ సన్న, చిన్నకారు రైతులకు కూడా ఎంతో ఉపయోగకరంగా ఉంది. కూలీల కొరత ఉన్న ఈ పరిస్థితులలో చిన్న ట్రాక్టర్‌ రైతులను ఆదుకుంటుంది. వ్యవసాయ యంత్రాలను ప్రభుత్వం యాభై శాతం సబ్సిడీపై ఇస్తే రైతులకు మరింత ప్రయోజనం కలుగుతుంది.
 బుచ్చిరెడ్డి,
హత్నూర మండలం, బడంపేట
Credits : Andhrajyothi

రైతుకు వరం

 
ఆంధ్రజ్యోతి ప్రతినిది: పంటల సాగులో రైతులకు అవసరమైన సమాచారాన్ని అందించేందుకు ఆచార్య ఎన్జీ రంగా వ్యవసాయ విశ్వవిద్యాలయం అన్నపూర్ణ కృషి ప్రసార సేవ కార్యక్రమాన్ని నిర్వహిస్తోంది. ఇందుకోసం టోల్‌ ఫ్రీ నంబరు(1800 425 341)ను ఏర్పాటు చేసింది. ఈ నంబరుకు దేశంలో ఎక్కడి నుంచైనా మాట్లాడవచ్చు. ఉమ్మడి ఆంధ్రప్రదేశ్‌లో 23 జిల్లాల్లోని రైతుల సమస్యలకు ఇటు ఏపీలోని 13 జిల్లాల ఏరువాక కేంద్రం/ కృషి విజ్ఞాన కేంద్రాలకు, అటు తెలంగాణలోని పాత 10 జిల్లాల్లోని ఏరువాక/కృషి విజ్ఞాన కేంద్రం శాస్త్రవేత్తలతో రైతులు నేరుగా మాట్లాడవచ్చు. టోల్‌ ఫ్రీ నంబరుకు ఫోన్‌ చేయగానే ఆటోమేటిక్‌గా ఏ జిల్లా రైతు సమస్య అయితే, ఆ జిల్లాలోని ఏరువాక/ కృషి విజ్ఞాన కేంద్ర ప్రధాన శాస్త్రవేత్తకు కాల్‌ అనుసంధానం అవుతుంది. వ్యవసాయ, ఉద్యాన పంటలతో పాటు పశువుల యాజమాన్యం, చేపల పెంపకంపై రైతులు తమ సందేహాలకు సలహాలు పొందే వీలుంది. ఫోన్‌కు ఎస్‌ఎంఎస్‌లు కూడా పంపుతారు. ఈ సేవలు పొందటానికి సంబంధిత జిల్లా కృషి విజ్ఞాన కేంద్రం/ ఏరువాక కేంద్రంలో రైతులు తమ వివరాలను తప్పనిసరిగా నమోదు చేసుకోవాలి. నెంబరును ఉచితంగా నమోదు చేస్తారు. అదనపు సమాచారం కోసం 99896 25239, 97006 51031, 91778 04355 సంప్రదించవచ్చని అన్నపూర్ణ కృషి ప్రసార సేవ ఇన్‌ఛార్జి డాక్టర్‌ పున్నారావు తెలిపారు. టోల్‌ ఫ్రీ నంబరుకు కాకుండా నేరుగా ఏరువాక కేంద్రం/ కృషి విజ్ఞాన కేంద్రం ఫోన్‌ నంబర్లకు ఫోన్‌ చేస్తే, రైతుకు కాల్‌ ఛార్జీలు పడతాయి.
ఏపీలోని 13 జిల్లాల ఏరువాక కేంద్రం/ కృషి విజ్ఞాన కేంద్రాల ప్రధాన శాస్త్రవేత్తల నంబర్లు ఇవీ : శ్రీకాకుళం – కృషి విజ్ఞాన కేంద్రం- 99896 23822, విజయనగరం- ఏరువాక కేంద్రం- 99896 23801, విశాఖపట్నం- ఏరువాక కేంద్రం – 99896 23802, తూర్పుగోదావరి- ఏరువాక కేంద్రం- 99896 23803, పశ్చిమగోదావరి- కృషి విజ్ఞాన కేంద్రం- 99896 23823, కృష్ణా- కృషి విజ్ఞాన కేంద్రం- 99896 23824, గుంటూరు- ఏరువాక కేంద్రం- 99896 23806, ప్రకాశం- కృషి విజ్ఞాన కేంద్రం- 99896 23827, నెల్లూరు- కృషి విజ్ఞాన కేంద్రం – 99896 23828, కడప – కృషి విజ్ఞాన కేంద్రం- 99896 23826, కర్నూలు- ఏరువాక కేంద్రం- 99896 23910, అనంతపురం- కృషి విజ్ఞాన కేంద్రం- 99896 23825, చిత్తూరు – కృషి విజ్ఞాన కేంద్రం- 80085 00320.
Credits : Andhrajyothi

ఖర్జూర సాగు.. లాభాలు బాగు

ఖర్జూర అనగానే గుర్తొచ్చేది అరబ్‌ దేశాలు.. అధిక ఉష్ణోగ్రతల్లో పండే ఖర్జూరానికి గిరాకీ
నానాటికీ పెరుగుతోంది. నాణ్యమైన ఖర్జూరాలు కావాలంటే దిగుమతి చేసుకోవాల్సిందే.
ఈ పరిస్థితిని గమనించిన నల్లగొండ సమీపంలోని నర్సింగ్‌భట్ల గ్రామానికి చెందిన
బండారు ఆగమయ్య ఖర్జూర సాగు చేపట్టారు. గణనీయంగా లాభాలు గడిస్తూ
ఇతర రైతులకు ఆదర్శంగా నిలుస్తున్నారు.
ఎడారి పంటగా పేరుబడిన ఖర్జూరను నల్లగొండలో పండించాలనే ఆలోచనే సాహసంతో కూడుకున్నది. కానీ ఆగమయ్య ఆ దిశగా ఆలోచించారు. తనకున్న రెండెకరాల భూమిలో 2012లో ఖర్జూరపంట వేసేందుకు సిద్ధమయ్యారు. ఖర్జూర మొక్కలను కొనుగోలు చేసేందుకు గుజరాత్‌కు వెళ్లి ఒక్కో మొక్కను రూ.3వేల చొప్పున కొనుగోలు చేశారు. రెండెకరాల భూమిలో 120 మొక్కలను నాటారు. దుబాయి నుంచి దిగుమతి చేసుకున్న టిష్యూ కల్చర్‌ ఖర్జూర మొక్కలను ఇందుకు వినియోగించారు. నిజానికి చౌడు నేలల్లో ఎలాంటి పంటలు పండవు. అలాంటి నేలల్లో ఖర్జూరం పండించాలి కాబట్టి సాధారణ రకాలు కాకుండా టిష్యూ కల్చర్‌ మొక్కలను నాటారు. రెండు అడుగుల మేరకు గుంతలు తీసి రెండు ఎకరాల్లో మొక్కలు నాటారు. పూర్తిగా చౌడు భూమి కావటంతో ఆ గుంతల్లో ఎర్రమట్టిని పోసి మొక్కలు పెంచారు. ఒక్కో పాదు మధ్య 20 అడుగుల దూరం ఉండేలా ఎకరాకు 60 మొక్కల చొప్పున రెండెకరాల్లో 120 మొక్కలను నాటారు. వీటికి బోరు ద్వారా డ్రిప్‌ ఇరిగేషన్‌ పద్ధతిలో నీటిని అందిస్తున్నారు. అయితే వీటి కాత అంతా పరపరాగ సంపర్కం ద్వారా జరుగుతుంది. అందుకోసం ఎకరాకు 3 మగ ఖర్జూర చెట్లను నాటారు. ఈ మగ చెట్ల నుంచి వచ్చే కాయలను పొడి చేసి ఆ పొడిని ఆడ ఖర్జూర చెట్లకు వచ్చే గెలలపై చల్లుతారు. మొక్కలు కొనేందుకు ఖర్చు తప్ప ఖర్జూరం సాగుకు మిగిలిన ఖర్చులు తక్కువే. ఎకరానికి ఏడాదికి 10 వేల వరకు ఖర్చయిందన్నారు ఆ రైతు. కిలో ఖర్జూరను రూ. 120లకు మార్కెట్‌లో విక్రయిస్తున్నారు. ప్రస్తుతం నల్లగొండ జిల్లాలోనే ఈ పంటను అమ్మేందుకు సరిపోతోంది. అదేవిధంగా యాదాద్రి జిల్లాలోని చౌటుప్పల్‌ నుంచి కూడా కొంతమంది వ్యాపారులు వచ్చి ఖర్జూరను కొనుగోలు చేసి వెళ్తున్నారన్నారు ఆ రైతు. ఏటా జూలైలో పంట దిగుబడి వస్తుంది. ప్రతి చెట్టుకు మొదట్లో 20 కిలోల చొప్పున దిగుబడి రాగా ప్రస్తుతం సుమారు 80 కిలోల వరకు దిగుబడి వస్తోంది. తొలి ఏడాది 24 క్వింటాళ్లకు రూ. రెండు లక్షల ఆదాయం వచ్చినట్లు రైతు తెలిపారు. ప్రస్తుతం మార్కెట్‌లో ధర క్వింటాకు సుమారు రూ.12వేలు పలుకుతున్నది. దీంతో రూ.10 లక్షల ఆదాయం లభిస్తుంది. ఈ రైతు స్ఫూర్తితో జిల్లాలో ఖర్జూరం సాగు ఊపందుకుంటుందంటున్నారు వ్యవసాయ నిపుణులు.
లాభాలకు ఢోకా లేదు
పత్తి, మిరప పంటలను సాగు చేసి నష్టపోవటం కంటే ఖర్జూర చెట్లను పెంచుకుంటే మేలు. లాభాలకు ఢోకా వుండదు. పండిన ఖర్జూరాన్ని ఎండు ఖర్జూరగా మార్చటానికి ప్రాసెసింగ్‌ యూనిట్లు లేకపోవటంతో కోసిన నాలుగైదు రోజుల్లోనే పంటను అమ్ముకోవాల్సి వస్తోంది. మార్కెటింగ్‌ సౌకర్యం కల్పించడంతో పాటు పాలు ప్రాసెసింగ్‌ యూనిట్‌ ఏర్పాటుపై ప్రభుత్వం దృష్టి సారించాలి.
Credits : Andhrajyothi

పుట్టగొడుగుల పెంపకం.. నిత్యం ఆదాయం

స్వయంకృషితో పాలపుట్టగొడుగులు పెంచుతూ లాభాలు ఆర్జిస్తున్నారు కృష్ణా జిల్లా మొవ్వ మండలం ఆవిరిపూడి గ్రామానికి చెందిన మేడిశెట్టి ప్రసన్న. ఆరోగ్యశాఖలో సూపర్‌వైజర్‌గా పనిచేస్తూనే  తల్లిదండ్రుల ప్రోత్సాహంతో పుట్టగొడుగులు పెంచుతున్నారామె.
తక్కువ పెట్టుబడితో, కూలీల ఖర్చు లేకుండా పుట్టగొడుగుల్ని ఎవరైనా పెంచుకోవచ్చు. పట్టణాల్లో పుట్టగొడుగులకు మంచి గిరాకీ వుండటంతో మార్కెటింగ్‌ ఇబ్బందులు కూడా లేవు. దీంతో రాష్ట్రవ్యాప్తంగా పలువురు పుట్టగొడుగులు పెంచుతూ ఆదాయం పొందుతున్నారు. తొలుత ఎండుగడ్డిని అంగుళం సైజులో ముక్కలు ముక్కలుగా కట్‌ చేసుకోవాలి. అనంతరం గడ్డిని ఉడకబెట్టాలి. ఉడకబెట్టిన గడ్డిని 20 శాతం తేమ ఉండే విధంగా ఆరబెట్టుకోవాలి. పాలిథిన్‌ కవర్లను సంచులుగా తయారుచేసుకుని ఆరబెట్టిన గడ్డిని ఐదు వరసలుగా నింపాలి. సంచుల్లో కొద్దిపాటి గడ్డివేసి దానిపైన విత్తనాలు, మరలా దానిపై గడ్డి, దానిపై విత్తనాలు ఇలా ఐదు వరసలుగా సంచిని నింపుకోవాలి. ఈ విధంగా తయారు చేసిన సంచిని గాలి ఆడకుండా గట్టిగా మూసి ఉంచాలి. ఆ సంచికి 25 చిన్న చిన్న రంధ్రాలు పెట్టాలి. ఆ సంచులను 21 రోజులపాటు చీకటి గదిలో ఉంచాలి. పుట్టగొడుగుల తయారీలో భాగంగా మట్టిని సేకరించి దానిని నానబెట్టి తర్వాత ఉడకబెట్టాలి. ఉడకబెట్టిన మట్టిలో చాక్‌ పౌడర్‌ కలపాలి. తదుపరి డార్క్‌ రూమ్‌లో ఉంచిన బ్యాగులను 21 రోజుల తర్వాత బ్యాగును సగానికి కట్‌ చేసి తయారుచేసుకున్న మట్టిని నింపాలి.
అనంతరం ఈ బ్యాగులను వెలుతురు గదుల్లోకి మార్చాలి. 24 గంటల గడిచిన తర్వాత రోజుకు రెండుపూటలా పల్చగా తడుపుతూ ఉండాలి. 15 రోజులకు పుట్టగొడుగులు మొలకెత్తుతాయి. ఈ ప్రక్రియ మొత్తంలో 40 రోజులకు పుట్టగొడుగులు పూర్తిస్థాయిలో తయారవుతాయి. తయారైన పుట్టగొడుగులు రెండు నెలలపాటు కోసుకోవచ్చు. కేజీ విత్తనాలతో ఐదు కిలోల పుట్టగొడుగులు తయారవుతాయి. తయారైన పుట్టగొడుగులను ఆన్‌లైన్‌ ద్వారా కిలో రూ.200లకు హైదరాబాద్‌, కాకినాడ, విజయవాడలో విక్రయిస్తున్నట్లు తెలిపారు. కొనుగోలుదారులు తమ అకౌంట్‌లో ముందుగానే డబ్బులు వేస్తారని, అనంతరం వారి అడ్రస్‌ ప్రకారం సరుకులు పంపిస్తామని తెలిపారు.
ఆంధ్రజ్యోతి ప్రతినిధి, ఆవిరిపూడి (కూచిపూడి)
నెలకు 20 వేల ఆదాయం
కూలీలపై ఆధారపడకుండా కుటుంబసభ్యులే పనిచేసుకుంటే నెలకు రూ.20 వేల వరకు ఆదాయం లభిస్తున్నది. ప్రభుత్వం ప్రోత్సహిస్తే ఎక్కువ విస్తీర్ణంలో పుట్టగొడుగుల పెంపకాన్ని విస్తరించే ఆలోచనలో ఉన్నాను. –
ప్రసన్న
Credits : Andhrajyothi

సాఫ్ట్‌వేర్‌ జంట సేద్యం బాట

  • 400 గొర్రెల పెంపకంతో లాభాలు …
  • మాంసం విక్రయానికి సన్నాహాలు
 
ఉన్నత చదువులు చదివి ఉద్యోగాలు చేస్తున్నారు కిరణ్‌, సుష్మ దంపతులు. ఉద్యోగాలు సంతృప్తినివ్వకపోవడంతో స్వగ్రామం జనగామ జిల్లా చిల్పూరు మండలంలోని కృష్ణాజీగూడెం చేరుకున్నారు. గొర్రెలు, మేకల ఫామ్‌ ఏర్పాటు చేశారు. మంచి లాభాలు గడిస్తూ పది మందికి ఉపాధి కల్పిస్తున్నారు. మాంసం విక్రయాలు చేపట్టి వ్యాపారాన్ని మరింత విస్తరించాలని యోచిస్తున్న ఆ దంపతుల సక్సెస్‌ స్టోరీ. 
స్వయం ఉపాధికి బెస్ట్‌:  కృష్ణాజిగూడెంలో పుట్టిన కిరణ్‌ వరంగల్‌లో చదువుకున్నాడు. బెంగళూరు, ముంబాయి, హైదరాబాద్‌లలో సాఫ్ట్‌వేర్‌ ఉద్యోగం చేశాడు. భార్య సుష్మ కూడా ఉద్యోగిని, ఇద్దరికీ వారు చేస్తున్న ఉద్యోగాలు సంతృప్తినివ్వలేదు. ఇద్దరూ కలిసి స్వగ్రామం చేరుకున్నారు. మొదట 50 ఎకరాలు లీజుకు తీసుకుని వ్యవసాయం చేశారు. సేంద్రియ వ్యవసాయంలో అనుభవం లేకపోవడంతో లాభాలు రాలేదు. గొర్రెల ఫామ్‌ పెడితే లాభదాయకంగా వుంటుందని నిపుణులు సలహా ఇవ్వడంతో రెండెకరాల స్థలం కొనుగోలు చేసి గొర్రెల ఫామ్‌ నెలకొల్పారు. మొదటగా షెడ్‌ నిర్మించి 35 గొర్రెలతో ఫామ్‌ ప్రారంభించారు. ఒక్కో పొట్టేలును మూడు వేలకు కొనుగోలు చేసి వాటిని పెంచారు. మూడు నెలల్లో రెట్టింపు లాభాలు వచ్చాయి. ఆ ఉత్సాహంతో మరో నాలుగు షెడ్లు నెలకొల్పారు. ఇప్పుడు 400 గొర్రెలతో వారి ఫామ్‌ కళకళలాడుతోంది. గొర్రెలు, పొట్టేళ్ల కోసం నీటితొట్లను, దాణా తినేందుకు ట్రేలను ఏర్పాటు చేశారు. వాటి పిల్లల కోసం వేరుగా ఒక షెడ్‌ ఏర్పాటు చేశారు. మేతకు అవసరమైన పచ్చి జొన్న చొప్పను సొంతంగా పండించుకుంటే లాభదాయకం అని భావించారు. పదెకరాల భూమిని లీజుకు తీసుకుని పచ్చిజొన్న పండించారు. దీంతో ఖర్చు తగ్గి, ఆదాయం పెరిగింది. గొర్రెలు, పొట్టేళ్లను పెంచేందుకు పెద్దగా శ్రమ వుండదు. అవసరమైన మేరకు పనివాళ్లను నియమించుకుని ఫామ్‌ను శ్రద్ధగా అభివృద్ధి చేస్తున్నారు ఆ దంపతులు. పొట్టేళ్ల విక్రయం మంచి లాభాలను తెచ్చి పెడుతుందంటున్నారు సుష్మ. ఖర్చులు పోగా ఏటా రెండు లక్షలకు పైగా లాభాలు ఆర్జిస్తున్నారు ఆ దంపతులు.
మాంసం విక్రయ కేంద్రాలు
కేవలం పొట్టేళ్లు విక్రయిస్తే లాభాలు పరిమితంగా వుంటాయి. అలా కాకుండా మంచి వాతావరణంలో పెంచిన గొర్రెలు, పొట్టేళ్ల మాంసాన్ని విక్రయిస్తే వినియోగదారులను ఆకట్టుకోవడంతో పాటు అధిక లాభాలు పొందవచ్చని ఆలోచించారు కిరణ్‌, సుష్మ. ప్రస్తుతం మార్కెట్‌లో పొట్టేలు మాంసానికి మంచి డిమాండ్‌ ఉంది. గ్రామీణ ప్రాంతాల్లో కిలో రూ.400 ఉంటే, పట్టణ ప్రాంతాల్లో రూ.600ల పైచిలుకు ధర పలుకుతోంది. త్వరలో గ్రామాల్లోనే కాక, పట్టణాల్లో కూడా మాంసం విక్రయ కేంద్రాలు ఏర్పాటుచేసి, ప్రత్యేకంగా ప్యాకింగ్‌ చేసి విక్రయించాలని ఆలోచిస్తున్నారు. దీనివల్ల గ్రామీణ యువతకు ఉపాథి కల్పించేందుకు ఈ దంపతులు సన్నాహాలు చేస్తున్నారు.
 ఆంధ్రజ్యోతి వ్యవసాయ ప్రతినిధి, జగిత్యాల
గ్రామీణ, పట్టణ ప్రాంతాలకు చెందిన నిరుద్యోగ యువత గొర్రెల ఫామ్‌ ఏర్పాటు చేసుకుంటే మంచి లాభాలు వస్తాయి. ఫాం కోసం ఎక్కువ మంది పనివారు అవసరం లేదు. ఖర్చు. శ్రమ కూడా తక్కువే. శ్రద్ధగా పనిచేస్తే ఉద్యోగానికి మించి ఆదాయం వస్తుంది. కొండంత సంతృప్తి మిగులుతుంది.
 కిరణ్‌, సుష్మ
Credits : Andhrajyothi

ప్రకృతి వ్యవసాయ అశోకుడు

రిటైర్మెంట్‌ తరువాత జీవితం లేదనుకుంటారు చాలామంది. విద్యాధికారిగా పదవీ విరమణ చేసిన ఆయన ప్రకృతి వ్యవసాయాన్ని ఉద్యమంగా చేపట్టారు. ఏడేళ్లుగా ఉత్తమ దిగుబడులు సాధిస్తున్నారు. ప్రకృతి సేద్యంలో తన అనుభవాలను ఆరు రాష్ట్రాల రైతులకు పంచుతున్నారు. రెండు లక్షల మంది ప్రకృతి సైనికుల్ని తయారుచేసిన జగిత్యాలకు చెందిన కొక్కు అశోక్‌కుమార్‌ ప్రస్థానం ఇది.
మల్యాల మండలంలోని ఒగులాపూర్‌ శివారులో అశోక్‌కుమార్‌కు ఏడెకరాల వ్యవసాయ క్షేత్రం ఉంది. ఇందులో 15 ఏళ్లుగా అల్లం, పసుపు, కూరగాయలు, పూలు, మామిడి సాగు చేస్తున్నారాయన. గతంలో పంటలకు చీడపీడలు, తెగుళ్లు సోకి తీవ్రనష్టం చవిచూశారు. ఇలా ఎందుకు జరుగుతున్నదని శాస్త్రవేత్తలు, వ్యవసాయ అధికారులను అడిగినా ఫలితం లేకపోయింది. ఏడేళ్ల క్రితం హైదరాబాద్‌ రాజేంద్రనగర్‌లోని నేషనల్‌ ఇన్‌స్టిట్యూట్‌ ఆఫ్‌ ప్లాంట్‌ హెల్త్‌ మేనేజ్‌మెంట్‌ (ఎన్‌ఐపిహెచ్‌ఎం) సంస్థకు వెళ్లారు. సహజమైన ఎరువులు, పురుగుల మందులు వాడితే మీ సమస్యకు పరిష్కారం లభిస్తుందని వారు చెప్పారు. ఏడేళ్లుగా ఆ మార్గాన్ని అనుసరిస్తూ తక్కువ ఖర్చుతో అనూహ్య ఫలితాలు అందుకుంటున్నారు అశోక్‌ కుమార్‌. జీవామృతం, వర్మీ వాష్‌, వర్మీ కంపోస్ట్‌ తయారీ చేసి పంటలకు అందిస్తారాయన. ఆవుపేడ, ఆవు మూత్రం, పాడైన పండ్లు, పిండి గిర్నీల్లో వృథాగా ఉండే పరం పొట్టు వంటి వాటితో పాటు కోళ్లు, మేకలు, అడవి జంతువుల వ్యర్థాలతో జీవామృతం తయారుచేసి వినియోగిస్తుంటారు.
పంటలపై వేప గింజల కషాయం, వర్మీ వాష్‌, వర్టిసెల్లా, బవేరియా, ఫంగిసైడ్‌లను ప్రత్యేకంగా తయారుచేసి స్ర్పే చేయడం వల్ల ఎలాంటి చీడపీడలు పంటల దరికి చేరకుండా చేసి మంచి ఫలితాలను సాధిస్తున్నారు. మామిడి తోట మధ్యలోని ఖాళీ స్థలంలో అల్లం, పసుపు పంటలు, కూరగాయలు, పూల మొక్కలను సాగు చేసి అదనపు ఆదాయాన్ని పొందుతున్నారు. ఆయన ఏడెకరాల వ్యవసాయ క్షేత్రంలో ఒకే బోరుబావి వుంది. చుట్టుపక్కల రైతులు 200 అడుగుల లోతు బోర్లు వేశారు. ఈ రైతుకు మాత్రం 50 అడుగుల్లోనే పుష్కలంగా నీరు వస్తున్నది. బోరు బావి రీఛార్జ్‌ కావడానికి పక్కన కొండలు, గుట్టల నుంచి వచ్చే వర్షపు నీటికి అడ్డుకట్టలు వేసి ఒకచోట నిలిపి రీఛార్జ్‌ చేస్తున్నారు. దీంతో చుట్టుపక్కల రైతుల బావుల్లో కూడా నీరు పుష్కలంగా వస్తున్నది. ఇలాగే ప్రతి రైతు తమ భూములను, పంటలను, నేలను రక్షించుకోవడానికి చైతన్యవంతులు కావాలంటారు అశోక్‌కుమార్‌.
తన అనుభవాలను సాటి రైతులతో పంచుకోవడం ప్రారంభించారు అశోక్‌కుమార్‌. తెలంగాణ, ఆంధ్రప్రదేశ్‌లతోపాటు తమిళనాడు, ఢిల్లీ, కర్టాటక, రాజస్థాన్‌ రాష్ట్రాల్లో ప్రస్తుతం సుమారు 2 లక్షల మంది అనుయాయులు వున్నారు. 20 వేల మంది ఆయనలా ప్రకృతి సేద్యం చేస్తున్నారు. కేవలం రైతులే కాదు. శాస్త్రవేత్తలు, వ్యవసాయ విద్యార్థులు, పలు కంపెనీల ప్రతినిధులు వచ్చి ఆయన నుంచి సాగు పద్ధతులు తెలుసుకోవడం విశేషం. రైతులను చైతన్యవంతులను చేయడానికి పుస్తకాలను ముద్రించి పంపిణీ చేస్తున్నారు. వీడియోలు రూపొందించి యూట్యూబ్‌లో అందుబాటులో ఉంచుతున్నారు.
ప్రకృతి సేద్యమే రక్ష
ప్రకృతి సేద్యంతో తక్కువ ఖర్చుతో అధిక లాభాలు పొందవచ్చు. రైతులంతా ఈ మార్గాన్ని అనుసరిస్తే సాగుభూమి నిర్వీర్యం కాకుండా వుంటుంది. ప్రకృతి సిద్ధంగా పండించిన పంటలు ప్రజలకు ఆరోగ్యాన్ని పంచుతాయి. మనతో పాటు భావితరాలు క్షేమంగా వుండాలంటే ప్రకృతి సేద్యమే ఏకైకమార్గం.
Credits : Andhrajyothi