జిగురు అట్టలతో పత్తిలో తెల్లదోమకు చెక్‌ 

  • కర్షకుడికి ఏదీ పరిపూర్ణ ‘మద్దతు’? 
  • మాటల మంత్రంగానే అన్నదాతా సుఖీభవ.. 
  • పంటకు సమృద్ధి ధర వస్తేనే రైతన్న బతుకు నవనవ!! 

పత్తిలో తెల్లదోమ నివారణకు జిగురు అట్టలు పెట్టాలని సూచిస్తున్నారు గుంటూరు సమీపంలోని లాంఫాం ఏడీఆర్‌ డాక్టర్‌ పావులూరి రత్నప్రసాద్‌.. ప్రస్తుత తరుణంలో పత్తి, వరి, రబీ అపరాల సాగులో ఎలాంటి జాగ్రత్తలు తీసుకోవాలనే అంశంపై ఆయన రైతులకు సూచనలు చేశారు. పత్తిలో తెల్ల దోమ నివారణకు జిగురు అట్టలు పెట్టాలి. 10 నుంచి 20 దాకా జిగురు అట్టలు పెడితే తెల్లదోమను సమర్ధంగా నివారించే వీలుంటుంది. ఈ సీజనలో పలు ప్రాంతాల్లో గులాబీ రంగు పురుగు పత్తి పంట మీద ఎక్కువగా కనిపిస్తున్నది. గులాబీ రంగు పురుగుల నివారణ కోసం సింథటిక్‌ పైరిధ్రాయిడ్స్‌ పిచికారి చేస్తే తెల్లదోమ పెరుగుతుంది. అందువల్ల మామూలు మందులు పిచికారి చేసుకోవాలి. యూరియా, పొటాష్‌ కలిపి వేస్తే.. మొక్కలు పుంజుకుంటాయన్నారు. రబీ సీజనులో నల్లనేలల్లో మినుము రకాల్లో పీయూ31, తిరుపతి బీజీ 104, ఘంటశాల బీజీ రకాల విత్తనాలు వేసుకోవడం మేలు. ఈ రకాలు ఎల్లో మెజాయిక్‌ తట్టుకుంటాయి. పత్తి పక్కన వేసే మినుములోనూ బంక అట్టలు పెట్టుకుంటే తెల్ల దోమల ఆశించకుండా ఉంటుంది. ఎర్ర నేలల్లో ఎల్లో మొజాయిక్‌ తట్టుకునే ఎల్‌బీజీ 752 రకం వాడితే మంచిది. పత్తి దెబ్బతిన్న పొలాల్లోనూ పత్తి పీకేసి, అపరాల సాగు చేపట్టవచ్చన్నారు. అక్టోబరు 15-25 మధ్య అపరాల సాగు ప్రారంభానికి అనుకూలమైన వాతావరణం ఉన్నది. 

Credits : Andhrajyothi

ఆక్వాకు ఊతం..ఉత్పత్తి లక్ష్యం 

  • 2020కి రూ.70 వేలకోట మత్స్య… ఉత్పత్తుల సాధనకు ప్రభుత్వం కృషి
  • కేంద్ర సాయంతో వడివడిగా అడుగులు…సత్ఫలితాలిస్తున్న సర్కారు చర్యలు
అమరావతి, అక్టోబరు 23 (ఆంధ్రజ్యోతి) : విశాలమైన కోస్తా తీరం.. అపారమైన మత్స్యసంపద.. కావల్సినన్ని మానవ వనరులు.. వీటితోపాటు ప్రభుత్వ ప్రోత్సాహకాలు.. ఇవన్నీ మత్స్య ఉత్పత్తుల్లో రాష్ట్రాన్ని అగ్రస్థానంలో నిలుపుతున్నాయి! ఉత్పత్తితో పాటు ఉపాధి కల్పనలోనూ యువతకు ఈ రంగం భారీ అవకాశాలు కల్పిస్తోంది. దీంతో రాబోయే రోజుల్లో మత్స్య రంగానికి మరింత ఊతమివ్వాలని ప్రభుత్వం సంకల్పించింది. కేంద్రం సాయంతో ఈ పరిశ్రమను భారీస్థాయిలో అభివృద్ధి చేసేందుకు శ్రీకారం చుడుతోంది. ఇప్పుటికే ప్రభుత్వం అందించే ప్రోత్సాహంతో ఏటా 20 నుంచి 30 శాతానికి పైగా మత్స్య పరిశ్రమ వృద్ధి సాధిస్తోంది. ఇదే స్ఫూర్తితో 2020కి రాష్ట్రంలో రూ.70 వేలకోట్ల ఉత్పత్తులను సాధించాలని ప్రభుత్వం లక్ష్యంగా నిర్దేశించుకుంది. దీనిని సాధించేందుకు ఇటు ఆక్వా రైతులతో పాటు మత్స్యకారుల కోసం అనేక సంక్షేమ పథకాలను ప్రవేశపెట్టి లక్ష్యం వైపు వడివడిగా అడుగులేస్తోంది. రాష్ట్ర వ్యాప్తంగా దాదాపు 10లక్షలకు పైగా కుటుంబాలు మత్స్య పరిశ్రమపై ఆధారపడ్డాయి. సముద్ర ఉత్పత్తులను భారీగా పెంచాలని అధికారంలోకి రాగానే టీడీపీ ప్రభుత్వం నిర్ణయించి అనేక ప్రోత్సాహాలు అందించింది. 2014-15లోరాష్ట్రంలో సముద్ర ఉత్పత్తుల విలువ దాదాపు రూ.30 వేల కోట్లుగా ఉంది. ఇందులో భాగంగా రెండేళ్లలో వీటి విలువ దాదాపు రూ.40 వేల కోట్లకు చేరుకుంది. ప్రస్తుతం రాష్ట్రంలో సముద్ర ఉత్పత్తులు 25 లక్షల మెట్రిక్‌ టన్నులకు పైగా ఉంది. వీటి ద్వారా రూ.16 వేల కోట్లు.. విదేశీ మారకద్రవ్యం రూపంలో వస్తోంది. అనుకున్న లక్ష్యాలు పూర్తి చేసేందుకు ప్రభుత్వం.. మత్స్య పరిశ్రమల్లో నిపుణులైన ఇద్దరిని సలహాదారులుగా నియమించింది.

మత్స్యకారులకు అండగా.. 

మత్స్యకారులు, సముద్ర ఉత్పత్తుల పెంపకందార్లకు ప్రభుత్వం భారీ ప్రోత్సాహకాలిస్తోంది. అంతేగాక ఈరంగంలో వృద్ధి శాతాన్ని దృష్టిలో ఉంచుకుని బడ్జెట్‌ కేటాయింపులు కూడా పెంచింది. గత ఏడాది రూ.187.19 కోట్లు కేటాయించిన ప్రభుత్వం.. ఈ ఏడాది రూ.339 కోట్లు ఇచ్చింది. అలాగే నూతన మత్స్య విధానాన్ని ప్రకటించింది. అసైన్డ్‌ భూముల్లోనూ చేపలు, రొయ్యల చెరువులు ఏర్పాటు చేసుకోవచ్చని ప్రకటించింది. వేట నిషేధ కాలంలో జాలర్ల జీవన భృతిని నాలుగు వేలకు పెంచింది. ఈ కాలంలో కుటుంబానికి 30 కిలోల బియ్యాన్ని అందిస్తోంది. వీటితోపాటు రూ.20 ప్రీమియంతో గ్రూప్‌ యాక్సిడెంట్‌ ఇన్సూరెన్స్‌ స్కీం అమలు చేస్తోంది మత్స్యకారులు పట్టిన చేపల్ని వెంటనే అమ్ముకోలేని పరిస్థితుల్లో వాటిని నిల్వ ఉంచుకోవడానికి ఐస్‌ బాక్సుల్ని రాయితీ ధరలకు ప్రభుత్వం అందిస్తోంది. ‘మత్స్య మిత్ర’ పేరుతో మత్స్యకార కుటుంబాల్లోని మహిళలు.. చేపలు అమ్ముకోవడానికి, మార్కెటింగ్‌కు రూ.లక్ష రివాల్వింగ్‌ ఫండ్‌ రూపంలో అందిస్తోంది. ఆధునిక పద్ధతుల్లో చేపల వేట సాగించేందుకు సాంకేతిక సహకారం అందించడంతో పాటు మర పడవలు, మోటార్లు, వలలు కూడా సబ్సిడీ ధరలకు అందిస్తుంది. జాలర్ల కోసం బయోమెట్రిక్‌ ఐడీకార్డులు, యానిఫాం అందజేయాలని నిర్ణయించింది. కేంద్ర, రాష్ట్ర ప్రభుత్వాలు సంయుక్తంగా రాష్ట్రంలోని ఉప్పాడ(తూర్పుగోదావరి), జువ్వలదిన్నె(నెల్లూరు), ఓడరేవు(ప్రకాశం) ప్రాంతాల్లో మినీ ఫిషింగ్‌ హార్బర్స్‌ నిర్మించబోతున్నాయి. వీటికోసం దాదాపు రూ.200కోట్లు ఖర్చు చేయబోతున్నాయి.

ఆక్వా వర్సిటీ.. మత్స్యవాణి 
మత్స్య సంబంధమైన శాసీ్త్రయ పరిశోధనలు, అధ్యయనం కోసం పశ్చిమగోదావరి జిల్లా భీమవరంలో ఆక్వా వర్సిటీ ఏర్పాటు చేయాలని ప్రభుత్వం నిర్ణయించింది. దీనికి అనుబంధంగా ఈ ఏడాది నుంచి కాలేజీలు ఏర్పాటు చేసి, కోర్సులు ప్రారంభించేందుకు సన్నాహాలు చేస్తోంది. రాష్ట్ర వ్యాప్తంగా 300 మంది మండల ఫిషరీస్‌, ఎక్స్‌టెన్షన్‌ ఆఫీసర్లను ఔట్‌ సోర్సింగ్‌ పద్ధతిలో నియమించడానికి ప్రభుత్వం సిద్ధమవుతోంది. వీరిలో ఒక్కొక్కరికీ 500 హెక్టార్ల చొప్పున అప్పగించి.. మత్స్య సంపద వృద్ధికి తోడ్పడేలా చర్యలు తీసుకోబోతున్నారు. అంతేకాకుండా ఆక్వా రైతులకు సలహాలిస్తూ, సందేహాలు తీర్చడం కోసం మత్స్యవాణీ కార్యక్రమానికి రాష్ట్ర ప్రభుత్వం రూపొందించింది. ఇప్పటికే ఐదు వేల మంది రైతులు ఈ కార్యక్రమంలో అనుసంధానమయ్యారు. వీరికి ప్రభుత్వం సిమ్‌కార్డులు అందించి.. వీటి ద్వారా రైతులకు రోజుకు నాలుగుసార్లు ఫోన్లలో సమాచారం అందిస్తారు. ఇలా మత్స్య ఉత్పత్తులు పెంచేందుకు ప్రభుత్వం ప్రోత్సాహకాలు అందిస్తోంది.

Credits : Andhrajyothi

రబీలో ఆరుతడి పంటలు మేలు 

  • నీటి లభ్యతను బట్టే పంటలు సాగు
  • శాస్త్రవేత్తల సూచనలు పాటిస్తే దిగుబడుల శాతం పెరుగుతుంది
ప్రస్తుత పరిస్థితుల దృష్ట్యా ఈ ఏడాది రబీలో ఆరుతడి పంటల సాగు శ్రేయస్కరమని, వీలైనంత వరకు వరిని సాగు చేయకపోవడం మేలంటున్నారు నంద్యాల ప్రాంతీయ వ్యవసాయ పరిశోధనా స్థానం ఏడీఆర్‌ డాక్టర్‌ బి.గోపాల్‌రెడ్డి. నీటి తడుల లభ్యతను బట్టి రబీలో రైతులు పంటలు సాగు చేసి అధిక దిగుబడులు సాధించాలని రైతులకు సూచించారు. రబీలో రైతులు ఎలాంటి జాగ్రత్తలు తీసుకోవాలి? ఏఏ పంటలు వేసుకోవాలి? అధిక దిగుబడులకు పాటించాల్సిన పద్ధతులు తదితర విషయాలపై ఆయన ఆంధ్రజ్యోతితో మాట్లాడారు.
 

ఆంధ్రప్రదేశ్‌లో ఏ నేలలు రబీలో అధిక దిగుబడులకు అనువుగా ఉంటాయి? 

రబీ సీజన్‌లో నేలల స్వభావం బట్టి మూడు రకాలుగా విభజించి రైతులు పంటలను సాగు చేసుకోవాలి. వర్షాధారంపై ఆధారపడిన నేలలు, నీటి పారుదల కింద ఆరుతడి పంటలు సాగుకు అనువుగా ఉన్న నేలలు, నీటి పారుదల, బోరు బావుల కింద వరిని సాగు చేసేందుకు అనువుగా ఉన్న నేలలను బట్టి రైతులు సాగుకు సన్నద్ధం కావాలి.
 

ఏ పంటల సాగుకు రబీ అనుకూలంగా ఉంటుంది..? 

వర్షాధారం కింద నల్లరేగడి భూముల్లో తెల్లకుసుమ, ధనియాలు, వాము పంటలను సాగు చేసేందుకు అనుకూలం. నీటి పారుదల కింద ఆరుతడి పంటల్లో వేరుశనగ, మొక్కజొన్న, ప్రొద్దుతిరుగుడు, మినుములు, పెసర పంటల సాగుకు అనుకూలం. పప్పుశనగ, కుసుమ, ధనియాలు, వాము పంటలను నేలలో తేమ స్వభావాన్ని బట్టి నవంబర్‌ 15 వరకు విత్తుకోవచ్చు. కొర్రపంటను కూడా నీటి తడుల ఆధారంగా సాగు చేయవచ్చు. ఆవాలు కూడా మంచి దిగుబడులు వస్తాయి. కర్నూలు జిల్లాలో ప్రస్తుత పరిస్థితిని బట్టి, నీటి లభ్యత ఆధారంగా 4-5 లక్షల హెక్టార్లల్లో పప్పు శనగను సాగు చేసే అవకాశం ఉంది.
 

రబీలో వరి సాగు అనుకూలంగా ఉంటుందా..? 

ప్రస్తుత పరిస్థితిని బట్టి వీలైనంత వరకు వరిని రైతులు సాగు చేయకపోవడమే మంచిది. నీటి పారుదల కింద వరిని సాగు చేసే రైతులు నీటి లభ్యతను బట్టి మధ్యకాలిక, స్వల్పకాలిక రకాలను మాత్రమే సాగు చేసుకోవాలి. దీర్ఘకాలిక రకాలను(కర్నూలు సోనా) సాగు చేయరాదు.
 

రబీ పంటల సాగులో రైతులు ఎలాంటి జాగ్రత్తలు తీసుకోవాలి..? 

రబీలో పంటల సాగులో విత్తన శుద్ధికి ప్రాధాన్యం ఇవ్వాలి. ఎకరాకు జింక్‌ 20 కేజీల చొప్పున చల్లుకోవాలి. సింగిల్‌ సూపర్‌ పాస్పేట్‌ వాడని రైతులు సల్ఫర్‌ ఎరువును 8 నుంచి 10 కేజీల ప్రకారం ఎకరాకు వేసుకోవాలి. ఆయా పంటల్లో సోకే తెగుళ్ళ పట్ల జాగ్రత్తగా ఉండాలి. శనగ పైరు తొలి దశలో పచ్చరబ్బరు పురుగు ఆశించకుండా నివారణ చర్యలు చేపట్టాలి. పెసర, మినుములో పల్లాకు తెగులు తట్టుకునే రకాలను విత్తుకోవాలి. శిలీంద్రనాశినితో, కీటక నాశినితో(ఇమడాక్లోఫ్రిడ్‌) విత్తనశుద్ధి చేసుకోవాలి. రసం పీల్చే పురుగులను సకాలంలో నివారించుకొని పల్లాకు తెగులు రాకుండా జాగ్రత్త పడాలి.
 

ఆరుతడి పంటల సాగులో ఎలాంటి జాగ్రత్తలు తీసుకుంటే అధిక దిగుబడులు వస్తాయి? 

మూడు తడుల నీటి లభ్యత ఉంటే కందిని సాగు చేయాలి. విత్తన మోతాదు పెంచుకొని దగ్గర దగ్గరగా 3 నుంచి 4 అడుగుల దూరంలో విత్తుకోవాలి. సకాలంలో నీటి తడులను ఇవ్వాలి. నాలుగు తడుల నీటి లభ్యత ఉంటే మొక్కజొన్న సాగుకు ఎంతో అనుకూలం. మొక్కజొన్నలో మంచిపేరు ఉన్న హైబ్రీడ్‌ రకాలను ఎన్నుకోవాలి. పైరు నీటి ఎద్దడికి గురికాకుండా సకాలంలో నీటి తడులు ఇవ్వాలి. మూడు తడుల అవకాశం ఉంటే జొన్న పంటను రబీలో సాగు చేయవచ్చు. పైరు తొలి దశలో కాండం ఈగ ఆశించకుండా కార్పోఫిరాన్‌ గుళికలను వాడి నివారించుకోవాలి. రెండు తడులు ఇవ్వగలిగితే కొర్రపంటను కూడా సాగు చేయవచ్చు. రెండు తడుల నీటి లభ్యత ఉంటే ఆవాలు కూడా సాగు చేయవచ్చు. పప్పు శనగకు నీటి లభ్యత ఉంటే పంట 30-35 రోజుల మధ్య స్పీంకర్ల ద్వారా నీటిని అందిస్తే 15 నుంచి 20 శాతం అధిక దిగుబడి పొందవచ్చు.
 

రబీలో పంటల సాగులో అనువైన రకాలు? 

పప్పు శనగలో ఎన్‌బీఈజీ-49, ఎన్‌బీఈజీ -47, ఎన్‌బీఈజీ-3, ఎన్‌బీఈజీ-119, జేజీ-11, జాకీ-9218, కేఏకే -2, విహార్‌ రకాలు అనుకూలం. కందిలో ఆశ, లక్ష్మి, అమరావతి(ఎల్‌ఆర్‌జీ-52), వేరుశనగలో కదిరి-9, కదిరి-6, హరితాంధ్ర, ధరణి రకాలు, మొక్కజొన్నలో బీఎంహెచ్‌ -177తో పాటు స్వల్ప, మద్యకారిక రకాల్లో పేరెన్నికగన్న కంపెనీల విత్తనాలు, కొర్రలో ఎస్‌ఐఏ-3085, సూర్యనంది, ఆవాలులో క్రాంతి, పూసాబోల్డ్‌, పూసా ధరణి, పూసా వైభవ్‌, వరి కోసిన తరువాత సంఘం రకం రైతులు సాగు చేసుకోవచ్చు.
 

రైతులు ఇంకా ఏమైనా జాగ్రత్తలు పాటించాలా..: 
నీటి లభ్యత ఉంటేనే వరి సాగు చేయాలి. లేదంటే వరి సాగు చేయవద్దు. ఆరుతడి పంటల వైపు రైతులందరూ దృష్టిసారించాలి. శాస్త్రవేత్తల సూచనలకు అనుగుణంగా పంటల సాగులో మెలకువలు పాటిస్తే మంచి దిగుబడులు సాధించవచ్చు.

– ఆంధ్రజ్యోతి, నంద్యాల
‘‘దుక్కుల కాలం మొదలైందంటే దానర్థం.. మానవ నాగరికతకు ఊపిరిలూదే కళను అన్నదాత మొదలుపెట్టాడనే!’’
-డేనియల్‌ వెబ్‌స్టర్‌ (అమెరికా రాజనీతిజ్ఞుడు)
Credits : AndhraJyothi

ప్రకృతి సేద్యం.. ప్రజలకు అమృతం 

పశ్చిమగోదావరి జిల్లా నాచుగుంటలో 26 మంది రైతులు ‘కామధేను సంక్షేమ సంఘం’గా ఏర్పడ్డారు. ప్రభుత్వ సహకారంతో 60 ఎకరాల భూమిని ప్రకృతి ఆధారిత వ్యవసాయ క్షేత్రంగా తీర్చిదిద్దారు. అద్భుత విజయాలు సాధిస్తున్నారు. ఆ విజయాల స్ఫూర్తితో రాష్ట్రవ్యాప్తంగా గో ఆధారిత, ప్రకృతి వ్యవసాయదారుల సమితుల ఏర్పాటుకు శ్రీకారం చుట్టారు. సేంద్రియ పంటలతో ప్రజలకు ఆరోగ్యాన్ని పంచుతూ రైతులోకానికి మార్గదర్శకంగా నిలిచిన ఆ సంఘం సారథి భూపతిరాజు రామకృష్ణరాజు ‘ఆంధ్రజ్యోతి’తో ముచ్చటించారు.

ప్రకృతి వ్యవసాయదారులను ప్రభుత్వం మూడేళ్లు ఆదుకోవడంద్వారా ప్రోత్సహించాలి. ఎరువుల వినియోగం ఉండదు కాబట్టి రాయితీ రూపంలో ఆదా అయ్యే నిధులను రైతుల కోసం మళ్లిస్తే వారు నిలదొక్కుకుని సేంద్రియ సాగుతో అద్భుతాలు చేస్తారు – భూపతిరాజు రామకృష్ణరాజు, ‘కామధేను సంక్షేమ సంఘం’ అధ్యక్షుడు (పశ్చిమ గోదావరి జిల్లా )

ప్రకృతి సేద్యంతో అద్భుతాలు చేస్తున్న 26 మంది రైతన్నలు 

దేశవ్యాప్తంగా సేంద్రియ ఉత్పత్తుల వినియోగదారులు ఇప్పుడు ఆ రైతులవైపే చూస్తున్నారు. మొదట్లో చాలామంది రైతుల కుటుంబ సభ్యులే సాగు గిట్టుబాటు కావడంలేదంటూ నసపెట్టారు. ఇప్పుడు సాటి రైతులంతా వారిని అనుసరిస్తుంటే సంతోషిస్తున్నారు. ‘గో ఆధారిత,. ప్రకృతి వ్యవసాయం చేసేందుకు నాచుగుంట పరిధిలో 26 మంది రైతులం కలిసి కామధేను రైతుసంఘంగా ఏర్పడ్డాం. 2007లో సేంద్రియ వ్యవసాయం ప్రారంభించాం. వరుసగా మూడేళ్లు వేదిక్‌ ఆర్గానిక్‌ సర్టిఫికేషన్‌ సంస్థ సేంద్రియ వ్యవసాయ భూములనుంచి మట్టి తీసుకెళ్లి పరీక్షించి, సర్టిఫికెట్‌ జారీచేసింది. సేంద్రియ సాగుతో ఉత్పత్తయ్యే పంటలకు సాగుద్వారా ఆవిర్భవించే సారవంతమైన మట్టిని పరీక్షించాకే సర్టిఫికెట్‌ ఇస్తారు. అది పొందితే సేంద్రియ ఉత్పత్తులను ఎక్కడైనా విక్రయించే అర్హత లభిస్తుంది. మా సంఘానికి ఆ సర్టిఫికెట్‌ లభించింది. సేంద్రియ సేద్యం ప్రారంభించాక మూడేళ్లపాటు ఎలాంటి ఫలం దక్కలేదు. ఈ పద్ధతిద్వారా భూమి సారవంతమై మా వ్యవసాయం పరుగులు తీస్తోంది’ అన్నారు సంఘం సారథి రామకృష్ణరాజు.

ఆరోగ్యం పంచుతున్నాం 

‘మిగిలిన రైతుల నుంచి ప్రజలు అనారోగ్యాన్ని కొంటుంటే మా దగ్గర ఆరోగ్యాన్ని కొంటున్నారని చెప్పడానికి గర్వంగా ఉంది. మా పంటలు బెంగుళూరు, పుణె, చెన్నై, షోలాపూర్‌, హైదరాబాద్‌, విశాఖవంటి మహానగరాలకు వెళ్తున్నాయి. వాటిని నేరుగా వినియోగదారులకే విక్రయిస్తున్నాం. ఎరువుల కోసం ప్రభుత్వం రూ.70వేల కోట్లు రాయితీకింద వెచ్చిస్తోంది. సేంద్రియ వ్యవసాయంలో ఎరువులకు స్థానం లేదు. జీవామృతాన్ని సొంతంగా చేసుకుని వాడుతున్నాం. ఆ విధంగా ప్రజాధనాన్ని ఆదా చేయడమేగాక ప్రజలకు ఆరోగ్యకరమైన ఉత్ప త్తులను అంది స్తున్నాం. ఇంతకు మించి రైతుగా కోరుకునేది ఏముంటుంది?’ అన్నారు.

విజ్ఞాన యాత్రలకు నిలయం 
నాచుగుంట ప్రకృతి వ్యవసాయ క్షేత్రం విజ్ఞాన యాత్రలకు నిలయంగా మారింది. వ్యవసాయ కోర్సులను అభ్యసించే విద్యార్థులు అధ్యయనం కోసం ఈ క్షేత్రాన్ని సందర్శిస్తూంటారు. శిక్షణ కోసం ప్రభుత్వం రైతుల్ని నేరుగా ఇక్కడికి పంపటం మరో విశేషం. పంటను పండించడమే కాదు. నేరుగా వినియోగదారులకు విక్రయించే స్థాయికి ప్రకృతి వ్యవసాయ దారులు ఎదిగారు. ‘నగరాలనుంచి నేరుగా వినియోగదారులే మమ్మల్ని సంప్రదిస్తారు. వారికి అవసరమైన ఉత్పత్తులను పంపుతున్నాం. వారు మా ఖాతాల్లో సొమ్ము నేరుగా వేస్తుంటారు. సేంద్రియ పద్ధతిలో బీపీటీ 25 బస్తాల దిగుబడినిస్తోంది. పీఎల్‌ రకం 30 బస్తాలు వస్తోంది. సేంద్రియ పద్ధతిలో ఉత్పత్తయ్యే పీఎల్‌ బియ్యం మార్కెట్‌లో కిలో రూ.46కు అమ్ముడుపోతుంది. బీపీటీ రకమైతే రూ.56 వంతున అమ్ముతున్నాం. ఎకరానికి రూ.50-60వేల మధ్య మిగులు చూస్తున్నాం. ఆరోగ్యకరమైన పంటలతో ఆరోగ్యవంతమైన సమాజానికి దోహద పడుతున్న ప్రకృతి వ్యవసాయదారులను ప్రభుత్వం ప్రోత్సహించాలి. ఈ రైతుల్ని ప్రభుత్వం మూడేళ్లు ఆదుకోవాలి. ఎరువులు వినియో గించం కాబట్టి పరోక్షంగా ప్రభు త్వానికి రాయితీ రూపంలో ఆదా అవుతుంది. దాన్నే ప్రకృతి ఆధారిత సేద్యానికి మూడేళ్లు మళ్లిస్తే రైతులు నిలదొక్కుకుంటారు. ఆ తర్వాత సేంద్రియ వ్యవసాయంతో అద్భుతాలు చేస్తారు. ప్రభుత్వాలు ఆ దిశగా ఆలోచించి, రైతులకు నేరుగా సహకారం అందించాలి’ అన్నారు రామకృష్ణరాజు.

ప్రకృతి సేద్యానికి జీవామృతం 

ప్రకృతి సేద్యంలో ఆరోగ్యవంతమైన పంటల ఉత్పత్తికి భూమిలో పోషక విలువను పెంచే జీవామృతం కారణం. పదిలీటర్ల గోమూత్రం. పదికిలోల అవుపేడ, 180 లీటర్ల నీరు, రెండు కిలోల ఉలవపిండి, 2 కిలోల నల్లబెల్లం, ఒక కిలో చెట్టు కింద మట్టి లేదా పుట్టమట్టిని డ్రమ్‌లో మిశ్రమం చేస్తున్నాం. వారం రోజులపాటు ఊరబెట్టాక జీవామృతం తయారవుతుంది. దీనిలో ఏముందిలే అని అంతా అనుకోవచ్చు. గోమూత్రంలో 23 రకాల సూక్ష్మ పోషకాలుంటాయి. ఒక గ్రాము పేడలో 300 కోట్ల బాక్టీరియా ఉంటాయని శాస్త్రవేత్తలు గుర్తించారు. ఇది చల్లితే పైరు ఏపుగా పెరుగుతుంది. ఎరువులు వాడాల్సిన అవసరం లేదు.

విష అవశేషాలకు తావే లేదు 
ఎరువులు, పురుగుమందుల వాడకం వల్ల వ్యవసాయ ఉత్పత్తుల్లోనూ ఆ అవశేషాలు మిగిలే ఉంటాయి. ప్రకృతి సేద్యం అందుకు పూర్తిగా భిన్నం. తెగుళ్ల నివారణిలో 5 లీటర్ల గోమూత్రం, 5 కిలోల ఆవుపేడ, 5 లీటర్ల నీటిలో కలిపి రెండు రోజులు నానబెడతాం. బాగా కలిపి మూడో రోజున వడగట్టాలి. అందులో 200 గ్రాముల పాల ఇంగువ (ముద్ద ఇంగువ)ను లీటరున్నర గోరువెచ్చని నీటిలో కలిపిన ద్రావణాన్ని మిశ్రమం చేస్తాం. ఇది ఎకరం పొలంలో చల్లుకోవచ్చు. కీటక నివారణిలోనూ వేప, గానుగ, ఉమ్మెత్త, జిల్లేడు, కుక్కతులసి, నేలవేము ఆకులు, కిలో వెల్లుల్లి దంచి అందులో వేపనూనెను మిశ్రమం చేస్తే కషాయం తయారవుతుంది. దీనిలో రూ.10 విలువ చేసే కారం, మైలతుత్తం, ఇంగువను కలిపి చల్లితే పైరుపై కీటకాలను నివారిస్తుంది. విష పురుగులు క్షీణిస్తాయి. మిత్ర కీటకాలకు ఎటువంటి హాని ఉండదు. సేంద్రియ వ్యవసాయంలో ఇటువంటి ఔషధీయ పద్ధతులు అనేకం ఉన్నాయి. రైతు కాయకష్టమే తప్ప పెద్దగా పెట్టుబడి పెట్టాల్సిన అవసరం లేదు. పైగా ఆరోగ్యమైన ఉత్పత్తులు చేతికి అందుతాయి.
– రొక్కం కిశోర్‌, తాడేపల్లిగూడెం

Credits : Andhrajyothi

కరివేపాకు సాగుతో కాసుల పంట

  • మార్కెటింగ్‌ సౌకర్యం కల్పిస్తే మరిన్ని అద్భుతాలు

కరువుతో సతమతమవుతున్న రైతును కరివేపాకు సాగు ఆదుకుంటోంది. కడపజిల్లా జమ్మలమడుగు మండలం ఎస్‌.ఉప్పలపాడులో 350 ఎకరాల్లో రైతులు కరివేపాకు సాగుచేస్తూ ఆదాయం పొందుతున్నా, కష్టానికి తగిన ప్రతిఫలం అందటం లేదు. ప్రభుత్వం ముందుకొచ్చి మార్కెటింగ్‌ సౌకర్యం కల్పిస్తే ఆరుగాలపు కష్టం దళారుల పాలుకాకుండా ఉంటుందని వారు ప్రభుత్వానికి మొరపెట్టుకుంటున్నారు.

ప్రభుత్వంనుంచి వచ్చే ప్రయోజనాలు తెలుసుకుని సాధించుకోవాలంటే రైతులు సంఘటితమై కలిసికట్టుగా నడవాల్సిందే.
– ‘రైతు స్వరాజ్య వేదిక’ రాష్ట్ర కమిటీ సభ్యుడు కిరణ్‌ కుమార్‌ విస్సా. 

కడపజిల్లా ఎస్‌.ఉప్పలపాడు రైతులు కొన్నేళ్లుగా పత్తి, శనగ తదితర పంటలు సాగుచేస్తున్నారు. సకాలంలో వర్షాలు కురవక, పంటలు చేతికందక నష్టాలపాలవుతున్నారు. మరోవైపు సాగు పెట్టుబడి గణనీయంగా పెరిగి, దిగుబడి నామమాత్రమై అప్పుల్లో కూరుకుపోయారు. ఈ నేపథ్యంలో గురప్ప అనంతపురంజిల్లాలోని బంధువుల గ్రామానికి వెళ్లి కరివేపాకు సాగుగురించి తెలుసుకున్నాడు. దశాబ్దాలుగా సాగుచేస్తున్న పంటలతో నష్టపోతున్నందున కొత్త పంటవైపు మొగ్గుదామనుకున్నాడు ఆ రెతు. అలా గురప్ప తొలిసారి గ్రామంలో కరివేపాకు సాగుకు శ్రీకారంచుట్టారు. తొలి ప్రయత్నంలోనే ఆయన మంచి లాభాలు గడించడంతో ఇతర రైతులు కూడా కరివేపాకు సాగు చేపట్టి నష్టాలనుంచి గట్టెక్కారు. ప్రస్తుతం ఉప్పలపాడులో 350 ఎకరాల మేర కరివేపాకు సాగవుతుండటం విశేషం.

ధరలో హెచ్చుతగ్గులు

కరివేపాకు సాగుకు గుంటూరు, విజయవాడ ప్రాంతాల నుంచి రైతులు విత్తనాలు తెచ్చుకుంటున్నారు. ఎకరాకు 90 కిలోలదాకా విత్తనం కావాలి. ఇందుకోసం రూ.70 వేలు ఖర్చవుతుంది. ఒకసారి విత్తనం వేస్తే నేల స్వభావాన్ని బట్టి రెండుమూడేళ్లకుపైగా దిగుబడి వస్తూనే ఉంటుంది. ఎకరాకు 5 ప్యాకెట్ల ఫాస్పేట్‌ వాడాల్సి వస్తుందని, ఇందుకు రూ.5 వేలు ఖర్చవుతుందని చెబుతున్నారు. చీడపీడల నివారణకు పది రోజులకొకసారి పురుగు మందులు పిచికారీ చేస్తారు. నాలుగు నెలలకు ఒక కోత వంతున ఎకరాకు 6టన్నుల దిగుబడి వస్తుంది. దిగుబడి బాగుంటే 10 టన్నులు కూడా వస్తుంది. ఆకును నేరుగా మార్కెట్‌కు తీసుకెళ్తే రైతుకు మంచి లాభం వస్తుంది. కానీ, ఎక్కడికి తీసుకెళ్లాలో రైతులకు తెలియకపోవడంతో దళారులు రంగప్రవేశం చేస్తున్నారు. వ్యాపారులు కొందరు పొలం దగ్గరకే వచ్చి కిలోల వంతున కరివేపాకు కొనుగోలు చేస్తుంటారు. ప్రస్తుతం రైతుకు కిలోకు రూ.2 వస్తుండగా డిసెంబరు ప్రాంతంలో రూ.15-20దాకా లభిస్తుంది. ఖర్చులుపోగా ఏటా ఎకరానికి రూ.50వేల నుంచి లక్షవరకు ఆదాయం పొందిన రైతులు కూడా ఉన్నారు. ‘‘మా పంటను తక్కువ ధరకు కొని వ్యాపారులు ప్రధాన నగరాల్లో అమ్మి మంచి లాభాలు గడిస్తున్నారని తెలుసు. కానీ, ఏం చేయాలో తెలియక వచ్చినదానితో సరిపెట్టుకుంటున్నాం’’ అంటున్నాడు గురప్ప.

ప్రభుత్వ సహకారంతో మరింత సాగు
ఈ ప్రాంతంలో వందలాది రైతులు కరివేపాకు సాగు చేస్తున్నా దీనికి సంబంధించిన ఉద్యానశాఖ అధికారులెవరూ ఇటువైపు కన్నెత్తి చూడటం లేదు. దీంతో తాము నష్టపోతున్నామని రైతులు ఆవేదన వ్యక్తం చేస్తున్నారు. పంటకు తెగుళ్లు వ్యాపిస్తే గతంలో దీన్ని సాగు చేసిన రైతుల సలహాలతోనే నివారణ చర్యలు చేపట్టాల్సి వస్తున్నదని వారు చెప్పారు. అలాంటి సమయంలో శాస్త్రవేత్తలు సలహాలు అందిస్తే మెరుగైన దిగుబడులు సాధిస్తామని రైతులు చెబుతున్నారు. కరివేపాకు పంటకు మార్కెటింగ్‌ సౌకర్యం కల్పిస్తే మేం పడిన కష్టం దళారుల పాలు కాకుండా ఉంటుందని వారు చెబుతున్నారు. ఈ పంట సాగుకు రుణ సౌకర్యం, బీమా లాంటివి కల్పిస్తే మరింత స్థాయిలో కరివేపాకు సాగు విస్తీర్ణం పెరిగే అవకాశాలు ఉన్నాయి.
– ఆంధ్రజ్యోతి, ప్రొద్దుటూరు 

మార్కెట్‌ సౌకర్యం కల్పించాలి
కరివేపాకు సాగు లాభదాయకంగా ఉంది. చుట్టుపక్కల గ్రామాల్లో ఎక్కడా ఈ పంటను సాగు చేయడంలేదు. ఎక్కువ ఖర్చుండదు. టెన్షన్‌ ఉండదు. ప్రభుత్వం మార్కెటింగ్‌ సౌకర్యం కల్పించగలిగితే రైతులకు మరింత ఆదాయం చేకూరుతుంది. మార్కెట్లో ఉన్న రేటు మాకు తెలియడంలేదు. వ్యాపారులు అడిగిన ధరకు ఇచ్చేస్తు న్నాం. కానీ, వారు అధిక ధర లభించే ప్రాంతాల్లో విక్ర యిస్తూ లాభాలు గడిస్తున్నారు.

– కృష్ణ, ఉప్పలపాడు

ప్రభుత్వ మద్దతు కావాలి 
మేం సాగు చేసిన పంటను అధికారులు పరిశీలించి తగిన సలహాలు, సూచనలు ఇవ్వగలిగితే మరింత దిగుబడి సాధిస్తాం. ఈ పంట సాగుకు రుణ సౌకర్యంతోపాటు బీమా సౌకర్యాన్ని కూడా కల్పించాలి. పంటకు తెగుళ్లు వ్యాపిస్తే ఏ అధికారిని కలువాలనో కూడా మాకు తెలియడంలేదు. ఈ పంట సాగు చేసిన పక్క రైతులను అడిగి వారు చెప్పిన మందును పిచికారీ చేస్తున్నాం.

– హరి, ఎస్‌.ఉప్పలపాడు
Credits : Andhrajyothi

సీజనల్‌ పంటలతో లాభాలు భళా 

మెరుగైన అవగాహన, చిన్నచిన్న జాగ్రత్తలు, కొద్దిపాటి పరిజ్ఞానంతో లాభాల పంట పండించవచ్చని నిరూపిస్తున్నారు మిడ్జిల్‌ మండలం బొమ్మరాసిపల్లి, మున్ననూర్‌ గ్రామ రైతులు తిరుపతిరెడ్డి, ఆంజనేయులు. సంప్రదాయ సాగు పద్ధతులతో ఎందరో రైతులు నష్టపోవడాన్ని గమనించి సీజనల్‌ పంటల సాగుతో లాభాలార్జిస్తున్న వారి విజయగాథ ఇది.
మహబూబ్‌నగర్‌ జిల్లా మున్ననూర్‌ రైతు ఆంజనేయులు పత్తి, జొన్న, మొక్కజొన్న సాగుచేసేవాడు. సరైన దిగుబడులు రాక అప్పులు తీర్చడం తలకుమించిన భారమయ్యేది. దాంతో సీజనల్‌ పం టలపై దృష్టి సారించారు. తన పొలంలోని బోరు ఆధారంగా ప్రస్తుతం టమాటా, మిర్చి, వంగ, బంతి సాగుచేస్తున్నారు. శ్రావణమాసం నుంచి కొన్ని నెలలు పూలకు మంచి గిరాకీ ఉంటుంది. దీంతో వినాయకచవితికి 45 రోజులముందు బంతి నాటుతున్నారు. ఎకరా సాగుకు రూ.25వేలతో మదనపల్లినుంచి బంతినారు తెచ్చి నాటారు. అలాగే రూ.4వేల ఖర్చుతో టమాటా నారు తెచ్చి నాటారు. ప్రసుతం అది కోతదశకొచ్చింది. కిలో రూ.8-10 మధ్య పలికితే లాభాలు అధికంగా ఉంటాయి. ప్రస్తుతం ధర తక్కువగా ఉన్నా మరింత పెరుగుతుందని ఆ రైతు ఆశిస్తున్నారు. బంతిపూల ద్వారా కూడా మంచి లాభాలు వస్తున్నట్లు చెప్పారు. ఇక సీజనల్‌ పంటలతోపాటు ప్రతి నీటిబొట్టు సద్వినియోగం దిశగా డ్రిప్‌ విధానం అమలుచేశాడు. రెండున్నర ఎకరాల్లో డ్రిప్‌కు రూ.13,500 ఖర్చవగా మునుపటికన్నా రెండింతల విస్తీర్ణంలో పంటలు సాగు చేస్తున్నానని ఆ రైతు వివరించారు.

కీర సాగుతో లాభం బోలెడు 
బొమ్మరాసిపల్లి గ్రామంలో తిరుపతిరెడ్డి కూడా సీజనల్‌ పంటలతో అధికలాభాలు గడిస్తున్నాడు. ప్రస్తుతం కీర వినియోగం పెరగడంతో వేసవిలోనే కాకుండా అన్ని సీజన్లలో దీనికి గిరాకీ పెరిగింది. గత ఏడాది కీర సాగులో తిరుపతిరెడ్డి అధిక దిగుబడితోపాటు మంచి లాభాలూ పొందాడు. ఆ స్ఫూర్తితో గత సంవత్సరం రెండెకరాల్లో కీర సాగుచేయగా ఈ ఏడాది సాగు విస్తీర్ణాన్ని మూడు ఎకరాలకు పెంచాడు. పొలంలో కొంత మేరకు డ్రిప్‌ ఏర్పాటు చేసుకున్నాడు. గత ఏడాది రెండు ఎకరాల్లో డ్రిప్‌ ఏర్పాటు చేసుకునేందుకు రూ.50 వేలదాకా ఖర్చయింది. పొలం మొత్తం డ్రిప్‌ పెట్టుకోవాలంటే చాలా డబ్బు ఖర్చవుతుందన్నాడు. డ్రిప్‌ కోసం ప్రభుత్వం సబ్సిడీ ఇవ్వాలని ఆ ప్రాంత రైతులంతా కోరుతున్నారు. కీర పంటను సాగు చేసేందుకు అవసరమైన విత్తనాలను కొనుగోలు చేసేందుకు ఒక్కో ఎకరాకు పది వేల రూపాయలు ఖర్చవుతుందని తెలిపాడు. మందుల కోసం మరో ఆరు వేల వరకు ఖర్చవుతుందని, ఈ ఖర్చులు పోగా ఎకరాకు గణనీయంగానే లాభాలు వస్తున్నాయని చెప్పాడు తిరుపతిరెడ్డి. – ఆంధ్రజ్యోతి, కల్వకుర్తి

కీర సాగే కుటుంబాన్ని కాపాడింది 
కీర కాకుండా ఇతర పంటల సాగు కాలంలో ఎప్పుడూ విత్తనాలు, ఎరువులకు అప్పుతేవడం… నష్టపోవడం మామూలైంది. కనీసం తిండిగింజలైనా వచ్చే వి కాదు. చేతిలో చిల్లి గవ్వ మిగలకపోగా ఏటికేడు అప్పులు పెరిగేవి. ఆ సమయంలో కీరసాగుతో లాభా ల పంట పండుతుందని తెలిసింది. ఇప్పుడు లాభాలు తప్ప నష్టం అనే మాట లేదు. కీర సాగే మా కుటుంబాన్ని కాపాడింది. ఇప్పుడు మా కుటుంబమంతా కంటి నిండా నిద్ర పోతున్నది. – తిరుపతిరెడ్డి, బొమ్మరాసిపల్లి 

కూరగాయలతో లాభాలు 
జొన్న, మొక్కజొన్న, పత్తి సాగులో ఎప్పుడూ నష్టాలే. ఫలితంగా అప్పులు మిగిలాయి. నాకు పొలంలో బోరు ఉంది. ఆ నీటితో కూరగాయల సాగు ప్రారంభించాను. ఆ తర్వాత మా కుటుంబం పరిస్థితి పూర్తిగా మారిపోయింది. ఇప్పుడు పంటల సాగు ఖర్చులుపోగా లాభాలు కళ్లజూస్తున్నాం. భవిష్యత్‌లోనూ కూరగాయల సాగు కొనసాగిస్తాను.
– ఆంజనేయులు, మున్ననూర్‌

Credits : Andhrajyothi

వరి సాగుతో రైతన్నలకు సిరి

 

ఆంధ్రజ్యోతి, బాపట్ల: ఆంధ్రప్రదేశ్‌లో ఎక్కువ విస్తీర్ణంలో సాగవుతున్న ప్రధాన ఆహారపంట వరి. దేశ ఆహార భద్రత వరి పంటపైనే ఎక్కువగా ఆధారపడి ఉంది. కాబట్టి భవిష్యత్తులో తక్కువ విస్తీర్ణం, తక్కువ నీరు, తక్కువ పెట్టుబడులతో మరింత ఎక్కువ దిగుబడులు సాధించాల్సిన అవసరం ఎంతైనా ఉంది. వరిసాగులో నాణ్యమైన విత్తన ఎంపిక నుంచి పంటకోత వరకు సరైన యాజమాన్య పద్ధతులు పాటించాలి. తద్వారా సాగుఖర్చు తగ్గించుకుని మంచి దిగుబడులు పొందవచ్చునంటున్నారు బాపట్ల వ్యవసాయ శాస్త్రవేత్తలు. 

ఆంధ్రప్రదేశ్‌లో ఖరీఫ్‌, రబీ సీజన్లలో సుమారు 22.11 లక్షల హెక్టార్లలో కాల్వలు, చెరువులు, బావులు కింద వరి పంట సాగుచేస్తున్నారు. ఏటా సుమారు 68.64 లక్షల టన్నుల ఉత్పత్తి సాధిస్తున్నారు రైతన్నలు. సరాసరి ఎకరానికి 1240 కిలోల దిగుబడి లభిస్తున్నది. కోస్తాంధ్రలో సార్వా (ఖరీఫ్‌) జూన్‌ నుంచి నవంబర్‌ వరకు, రాయలసీమలో జూన్‌ నుంచి డిసెంబర్‌ వరకు ఉంటుంది. అదే దాళ్వా అయితే నవంబర్‌ నుంచి మార్చి వరకు ఉంటుంది. వరి పంట విస్తీర్ణం, ఉత్పత్తి, ఉత్పాదకత ఆ ప్రాంతంలోని వర్షపాతం, నీటి లభ్యతమీద ఆధారపడి ఉంటాయి.
 

మేలైన యాజమాన్య పద్ధతులు 
వరి వంగడాల ఎంపిక: వివిధ ప్రాంతాలకు అనువైన వరివంగడాలను ఎంపిక చేసుకోవాలి. విత్తన ఎంపికలోనే దిగుబడి ఆధారపడి ఉంటుంది. మంచి విత్తనం ఎంపికతో రైతుకు మేలు చేకూరుతుంది.
విత్తనశుద్ధి: కిలో విత్తనానికి మూడు గ్రాముల కార్బండిజిమ్‌ను కలిపి 24 గంటలు తర్వాత నారుమడిలో చల్లుకోవాలి. దంపనారు అయితే లీటర్‌ నీటికి ఒక గ్రాము కార్బండిజిమ్‌ కల్పి ఆ ద్రావణంలో విత్తనాలను 24 గంటలు నానబెట్టి, 24 గంటలు మండెకట్టి మొలకలను దంపనారుమడిలో చల్లుకోవాలి. కిలో విత్తనాలు నానబెట్టటానికి లీటర్‌ మందు నీరు సరిపోతుంది.

వరి విత్తనాలలో నిద్రావస్థను తొలగించటం: కోత కోసిన వెంటనే విత్తనాలను వాడుకోవాలంటే వరి గింజలలోని నిద్రావస్థను తొలగించి అధిక మొలకశాతం రాబట్టటానికి లీటర్‌నీటికి తక్కువ నిద్రావస్థ ఉన్న విత్తనాలకైతే 6.3 మిల్లీలీటర్లు లేదా విజేత లాంటి ఎక్కువ నిద్రావస్థ ఉన్న విత్తనాలకైతే 10మిల్లిలీటర్‌లు గాఢ నత్రికామ్లం కలిపి ఆ ద్రావణంలో 24 గంటలు నానబెట్టి మరో 24 గంటల పాటు మండెకట్టాలి.

విత్తన మోతాదు: నాటే పద్ధతికి 20 నుంచి 25కిలోలు, వెదజల్లటానికి (భూముల్లో) 24 నుండి 30కిలోలు, వెదజల్లటానికి గోదావరి జిల్లాలో 10 నుండి 12 కిలోలు గొర్రుతో విత్తటానికి (వర్షాధారపు వరి) 30 నుంచి 36 కిలోలు అవసరం ఉంటుంది. శ్రీ పద్ధతిలో అయితే ఎకరానికి రెండు కిలోల విత్తనాలు సరిపోతాయి.

ఆరోగ్యవంతంగా నారు పెంచటం ఇలా 

  • నారుమడిని 10 నుంచి 12 రోజుల వ్యవధిలో మూడు దఫాలు దమ్ముచేసి చదును చేయాలి. నీరుపెట్టటానికి, తీయటానికి వీలుగా కాల్వలు ఏర్పాటు చేయాలి.
  • 5 సెంట్ల నారుమడికి రెండుకిలోల నత్రజని, ఒక కిలో భాస్వరం, కిలో పొటాష్‌నిచ్చే ఎరువులను దుక్కిలో వేయాలి. చలి ఎక్కువగా ఉండే ప్రాంతాలలో భాస్వరం రెట్టింపు చేయాలి.
  • మొలక కట్టిన విత్తనాన్ని సెంటుకు 5 కిలోల చొప్పున చల్లుకోవాలి.
  • నారు ఒక ఆకు పూర్తిగా పురివిచ్చుకునే వరకు ఆరుతడులు ఇచ్చి తర్వాత పలుచగా నీరు నిల్వ కట్టాలి.
  • జింకు లోపాన్ని గమనిస్తే లీటర్‌ నీటికి రెండు గ్రాముల జింకు సల్ఫేట్‌ ద్రావణాన్ని పిచికారీచేయాలి. చలి ఎక్కువగా ఉండే దాళ్వా వరిసాగులో జింకు లోపం లక్షణాలు ప్రస్ఫుటంగా కనిపిస్తాయి.
  • విత్తిన 10 రోజులకు కార్బోప్యూరాన్‌ 3జి గుళికలను సెంటు నారుమడికి 160 గ్రాముల చొప్పున వేయాలి లేదా మోనోక్రోటోఫాస్‌ 1.6 మిల్లీ లీటర్లు లేద క్లోరోపైరిఫాస్‌ 2మిల్లిలీటర్లు లీటర్‌ నీటికి కలిపి విత్తిన 10రోజులకు, 17 రోజులకు పిచికారీ చేయాలి. లేదంటే నారుతీయటానికి ఏడు రోజుల ముందు సెంటు నారుమడికి 160 గ్రాముల కార్బోప్యూరాన్‌ గుళికలు ఇసుకలో కలిపి పలుచగా నీరుంచి వేయాలి.

Credits : Andhrajyothi

స్థానిక మొక్కలు బంగారం! 

 

  • వేప, కానుగ, దిరిశెన, చింత చెట్లతో జీవవైవిధ్యం..
  • అంతర్జాతీయ పర్యావరణ సంస్థ సభ్యులు ఆచార్య బి. రవిప్రసాదరావు

కేవలం అందంగా ఉండేవి కాకుండా జీవవైవిధ్యానికి మేలు చేసే మొక్కల్ని పెంచాలి. స్థానికంగా లభించే మొక్కలు మాత్రమే వర్షాభావ పరిస్థితుల్ని తట్టుకుంటాయి. స్థానికేతర మొక్కలకు ఆ శక్తి ఉండదు. తెలుగు రాష్ట్రాల్లో ఒక్కొక్క అడవిలో ఒక్కో చెట్టు ఏపుగా పెరుగుతుంది. ఆ చెట్ల మొక్కల్ని అడవుల్లోనే పెంచి, వాటిని ప్రజలు నాటుకుంటే పర్యావరణానికి ఎంతో మేలు జరుగుతుందంటున్నారు అంతర్జాతీయ పర్యావరణ పరిరక్షణ సంస్థ సభ్యులు, అనంతపురంలోని శ్రీకృష్ణ దేవరాయ విశ్వవిద్యాలయం జీవవైవిధ్య పరిరక్షణ విభాగం ఆచార్యులు బి. రవిప్రసాద రావు.

ఆంధ్రప్రదేశ్ జీవవైవిధ్య అట్లాస్‌ను రూపొందించడంతో పాటు నిజామాబాద్‌లో కూడా విస్తృతంగా పరిశోధనలు చేశారు.
తెలుగు రాష్ట్రాల్లోని అరుదైన వృక్ష జాతుల్ని ఎలా కాపాడుకోవాలంటారు?
ఆంధ్రప్రదేశ్‌లో మూడు వేల రకాల వృక్షజాతులు ఉన్నాయి. అందులో 500 వరకు చెట్లు కాగా మిగిలినవి గుల్మాలు, పొదలు. ఒక్కో అటవీ ప్రాంతంలో ఒక్కో మొక్క చక్కగా పెరుగుతుంది. ఆయా అడవుల్లోని అరుదైన చెట్లను అటవీ శాఖ వారు గుర్తించాలి. ఆ చెట్ల మొక్కలను అభివృద్ధి చేసి, వాటిని గ్రామాల్లో పెంచుకునేలా చేయాలి. అప్పుడే ఆ వృక్షజాతులు పదిలంగా ఉంటాయి. గతంలో పక్షులు అరుదైన వృక్షాల వ్యాప్తికి తోడ్పడేవి. అడవులు విస్తీర్ణం తగ్గి, పక్షులు కూడా తగ్గిపోతున్నాయి. అందుకోసం మనమే ఆ వృక్షాలను కాపాడేందుకు నడుంకట్టాలి.

కొన్నేళ్లుగా మొక్కలు విస్తృతంగా నాటుతున్నా వృక్షాలుగా ఎదుగుతున్నవి చాలా స్వల్పం. ఇందుకు కారణం? 

మొక్కలు నాటడం మీద ఉన్న శ్రద్ధ వాటి ఆలనా పాలనా చూసుకోవడం మీద ఉండటం లేదు. సరైన పరిజ్ఞానం లేక నీరు ఎక్కువగా అసరమయ్యే మొక్కల్ని నాటుతున్నారు. మొక్కలు నాటాక కొన్నాళ్ల వరకు నీళ్లు పోసినా ఆ తరువాత ఎవరూ పట్టించుకోవడం లేదు. దాంతో ఆ మొక్కలు చెట్లుగా ఎదగక ముందే చనిపోతున్నాయి. వృక్ష శాస్త్రవేత్తల సూచనలు తీసుకుని పర్యావరణానికి మేలు చేసేవి, మనం ఉండే ప్రాంతంలో తక్కువ నీటితో పెరిగే మొక్కలనే నాటుకోవడం ఉత్తమం.
 

మన శీతోష్ణ పరిస్థితులను తట్టుకునే మొక్కలు ఉత్తమం అంటారా? 

స్థానిక మొక్కలు మన శీతోష్ణస్థితులను తట్టుకోగలుగుతాయి. వేప, కానుగ, చింత వంటి మొక్కలు కొన్నాళ్లు నీరు లేకున్నా బతుకుతాయి. పైగా స్థానికేతర మొక్కలకు ఎలాంటి జీవివైవిధ్య విలువ ఉండదు. ఆ మొక్కలు కేవలం అందాన్నిస్తాయి. ఇటీవల తెలుగు రాష్ట్రాల్లో వచ్చిన పెనుగాలులకు అనేక స్థానికేతర వృక్షాలు కుప్పకూలిపోయాయి. రాయలసీమలో బాగా పెరిగే నారివేప చెట్టు ఒక్కటి కూడా ఆ గాలికి పడిపోలేదు. స్థానిక జాతులకు ఉన్న బలం అలాంటిది. ఎన్ని మొక్కలు నాటాం అనే దాని కంటే ఎలాంటి మొక్కలు నాటుతున్నాం అనే అంశాన్ని దృష్టిలో ఉంచుకోవాలి. తురాయి చెట్టు పూలు పూసిన కొద్ది రోజులు మాత్రమే అందంగా ఉంటుంది. అంతకు మించి దానివల్ల ప్రయోజనం ఉండదు. యూకలిప్టస్‌ మొక్క ఎదిగేందుకు చాలా నీరు అవసరం. పైగా ఆ మొక్క పెరిగి పెద్దదైనా దాని వల్ల లభించే ప్రయోజనం స్వల్పం. ఆ చెట్టు పక్షులు, క్రిమి కీటకాదులకు నెలవుగా పనిచేయదు. ఇలాంటి మొక్కల కంటే జీవవైవిధ్యానికి తోడ్పడే వేప, తుమ్మ, కానుగ వంటి మొక్కలు విరివిగా నాటాలి.

పర్యావరణానికి మేలు చేయడంతో పాటు తెలుగు రాష్ట్రాల్లో ఎక్కడైనా చక్కగా పెరిగే అవకాశాలున్న మొక్కలు ఏవంటారు? 
వేప, కానుగ, కొండ తంగేడు, శింశుప, దిరిశెన, చింత మొక్కలు తెలుగు రాష్ట్రాల్లోని అన్ని ప్రాంతాల్లో చక్కగా పెరుగుతాయి. పక్షులకు, క్రిమికీటకాలకు ఆహారాన్ని, నీడను కల్పిస్తాయి. తెల్ల తుమ్మ చెట్టు తెలుగు రాష్ట్రాల్లోని అన్ని నెలల్లో చక్కగా పెరుగుతుంది. పచ్చదనం కోసం రెయిన్ ట్రీ, గ్రీన్ బటన్ ఉడ్‌ మొక్కలు నాటుకోవడం ఉత్తమం. వీటితో పాటు ఔషధ విలువలు ఉన్న మొక్కలను ఇళ్లలో పెంచుకోవడం ఉత్తమం. తులసి వంటి చెట్లను పెంచుకోవడం వల్ల బహుళ ప్రయోజనాలు ఉంటాయి. 

Credits : Andhrajyothi

కందుకూరు… కామధేనువు! 

కరువనగానే అనంతపురం జిల్లా పేరు ఠక్కున గుర్తొస్తుంది. ఆ జిల్లాలోని కందుకూరును కూడా కరువు బాధిస్తుంది. కానీ, ఆ గ్రామస్థులకు మాత్రం పాడి పుణ్యమా అని 30 ఏళ్లుగా ఆ కష్టాలు దరిచేరడం లేదు. పాడి ఆ గ్రామానికి ఎలా కళాకాంతులు తెచ్చిందో చూద్దాం రండి!
అనంతపురం రూరల్‌ మండలంలోని కందుకూరు గ్రామంలోనూ జిల్లాలోని మిగిలిన ప్రాంతాల తరహాలోనే పంటలు ఎండిపోయి కనిపిస్తాయి. కానీ, అక్కడి రైతులకు అప్పులబాధ లేదు. ఆర్థిక కష్టాలతో ఒక్కరు కూడా ఆత్మహత్యకు పాల్పడిన దాఖలాల్లేవు. కారణం… వాళ్లు ఆవుల్ని నమ్ముకున్నారు! పంటలు ఎండినా 1500కుటుంబాలున్న కందుకూరును పాడి ఆదుకుంటోంది. గ్రామంలో 3వేల ఆవులుండగా నికరంగా పాలిచ్చేవి రెండువేలుంటాయి. రోజుకు 4000 లీటర్లదాకా పాలు ఆ ఊరినుంచి జిల్లాకేంద్రంలోని ప్రైవేటు పాలకేంద్రానికి వెళతాయి. ఇందుకోసం ఆ డెయిరీవారే గ్రామంలో సేకరణ కేంద్రం ఏర్పాటు చేశారు.
 

నెలకు రూ.30 లక్షల ఆదాయం 
కందుకూరు పాడి రైతుల నికరాదాయం నెలకు రూ.30లక్షల పైమాటే. జెర్సీ ఆవులు పూటకు 10 లీటర్ల సగటుచొప్పున రోజుకు 20 లీటర్ల పాల దిగుబడి వస్తుంది. లీటరుకు రూ.26 వంతున 2వేల ఆవులిచ్చే 4వేల లీటర్ల పాలకు నిత్యం రూ.1.04 లక్షల రాబడి వస్తోంది. ఈ లెక్కన నెలకు రూ.31.2 లక్షలు రైతులకు అందుతోంది. కందుకూరులో రైతులందరికీ పొలాలున్నా రోజులో అధిక కాలాన్ని పాడిపశువుల కోసమే కేటాయిస్తారు. వారంతా తమ పిల్లలను ఉన్నత చదువులు చదివించడంతోపాటు వయసొచ్చిన అమ్మాయిలకు మంచి సంబంధాలు చూసి పెళ్లి చేస్తున్నారు. ఊళ్లో అప్పులున్న రైతులే లేరు. పథకాల గురించి గానీ, ఎవరో వచ్చి ఏదో చేస్తారనిగానీ వారు ఎదురుచూడరు. ఒక్కో ఆవు రోజుకు రూ.520ఆదాయం సమకూరుస్తోంది. మేత ఖర్చు మహా అంటే పచ్చిగడ్డి, తౌడు, మొక్కజొన్న దాణా కలిపి రూ.100కు మించదు. కాబట్టి నికరంగా రూ.420 ఆదాయం ఉంటుంది. కొందరు నెలకు రూ.లక్ష దాకా సంపాదిస్తున్నారు. పంట రాకపోయినా ఆవులే కామధేనువుల్లా ఆదుకుంటున్నాయని గ్రామస్థులు సంతోషం వ్యక్తం చేస్తున్నారు.

ఆవు మా ఇంటి మహలక్ష్మి – పెద్దన్న 
ఆవు మా ఇంటి మహలక్ష్మి. నేను పాతికేళ్లకిందట ఓ ఆవును కొన్న తర్వాత కష్టాలనుంచి ఒడ్డునపడ్డాను. 13ఏళ్ల క్రి తం మరో ఆవును కొంటే ఇప్పుడు 13కాగా, 6 పాలిస్తున్నా యి. ఇద్దరు కూతుళ్లకు పెళ్లి చేశాను.

పిల్లల్ని చదివించుకున్నా – దాసరి లక్ష్మీనారాయణ
పాడివల్లనే మా ఇల్లు కళకళలాడు తోంది. నా ముగ్గురు కొడుకుల్లో ఒకరిని డిగ్రీ, ఇద్దర్ని ఎంబీఏ చదివించాను. ఓ కొడుకు రైల్వేలో ఉద్యోగం చేస్తున్నాడు. రెండెకరాల పొలం, ఇల్లు, స్థలం కూడా కొన్నాను.


సాగుకన్నా పాడి మేలు – వీరనారాయణరెడ్డి 

మాకు తోట ఉన్నా ఫలితంలేదు. ఇప్పు డు 4 ఆవులున్నాయి. నెలకు 15వేలదాకా ఆదాయం వస్తోంది. మా పిల్లల్ని ప్రైవేట్‌ స్కూల్లో చదివిస్తున్నా. ప్రభుత్వం రుణాలిస్తే మా బతుకులు ఇంకా బాగుపడతాయి.

జీవితం హ్యాపీ – ఓబిలేసు
కరువుకాటుతో సొంతూరు వదిలి కందుకూరుకు వచ్చాను. ఇక్కడివాళ్లను చూసి నేనూ ఒక ఆవును కొన్నాను. అది 15 లీటర్ల పాలిస్తోంది. జీవితం ఏ ఇబ్బందులూ లేకుండా సాగిపోతోంది.
Credits : Andhrajyothi

కుంటల నిండా సిరులు 

  • కరువు సీమకు ‘సంజీవిని’ 
  • వలస వెతల స్థానంలో 
  • మొదలయిన సాగు కతలు 
  • కర్నూలులో 25 వేల పంట కుంటలు 
  • ఖర్చు చెల్లింపులో రాష్ట్రంలోనే ఫస్ట్‌ 
కర్నూలు, జూలై 10: కర్నూలు జిల్లా పెద్దకడబూరు మండలం కల్లుకుంట గ్రామానికి చెందిన ఉశేన్‌ మొదట్లో అందరిలాగే ఆలోచించాడు. ‘‘పావు ఎకరా పొలం పోవడం తప్ప ఫలితం ఏమిటంటా’’ అంటూ, పంట కుంటల గురించి చెప్పడానికి ప్రయత్నించిన అధికారులను అతడూ ప్రశ్నించాడు. భూగర్భ జలాలు నిండితే ఎవరికంటా లాభం, కడుపులేమైనా నిండుతాయా అంటూ ‘పంట సంజీవిని’పై పెదవి విరిశాడు. ఇప్పుడు ఆ విషయం గుర్తుకు వస్తే చాలు, ఆ రైతులో ఒకింత సిగ్గరితనం కనిపిస్తుంది. పంటలు వేసి మబ్బుల వైపు చూసే రోజులు గతించిపోయినందుకు ఆయన కళ్లలో ఆనందం విచ్చుకొంటుంది. ఉశేన్‌కు గ్రామంలో 4.5 ఎకరాల పొలం ఉంటుంది. పొలాన్ని తడపటానికి బోర్లు వేసి బాగా నష్టపోయాడు. ఈ పరిస్థితుల్లో రెండు నెలల క్రితం అధికారులు ఉశేన్‌ను కలిసి ‘పంట సంజీవిని’ గురించి వివరించారు. పొలంలో పంట కుంట తవ్వుకొంటే పొలానికి నీటి సంవృద్ధి పెరుగుతుందని చెప్పడానికి ప్రయత్నించారు.  మొదట మొండికేసిన ఉశేన్‌ త్వరలోనే చైతన్యం పొందాడు. 10/10/2 సైజులో నీటి కుంటను పొలంలో తవ్వుకున్నాడు. ‘‘మీటరు లోతు తవ్వగానే నీటి ఊట మొదలైంది. ఆ నీటిని తోడేస్తూ మూడు మీటర్ల లోతు తవ్వాను. మట్టి కుంగి పోకుండా చుట్టూ రాతి కట్టడం కట్టుకున్నాను. ఇప్పుడు ఈ నీటి కుంట.. చిన్న పాటి చెరువును తలపిస్తోంది’’ అని ఉశేన్‌ సంబరంగా వివరించాడు. ‘పంట సంజీవిని’లో భాగంగా అధికారులు ఇచ్చిన ఆయిల్‌ ఇంజన్‌తో నీళ్లను పొలానికి పెడుతున్నానని, మరో ఏడాది వర్షాలు పడకపోయినా పంటలకు దిగులు లేదని ఉశేన్‌ ధీమాతో చెబుతున్నాడు. ఒకనాడు కరువుకాటకాలు, వలస వెతలతో నిండిన తమ బతుకుల్లో ‘పంట సంజీవిని’ తెచ్చిన మార్పును, ఆ మార్పుని తమ ముంగిటకు తెచ్చిన కలెక్టర్‌ విజయమోహన్‌ పట్టుదల గురించి ఉశేన్‌లాగే.. మరికొందరు రైతులూ గుర్తు చేసుకొన్నారు.

ఊరు మారింది 
వాటర్‌షెడ్‌ పథకంలో భాగంగా, తవ్విన కుంటల్లో నీళ్లు నిండి.. వాటిని ఎలా వాడుకోవాలో తెలియని రోజుల్లో కలెక్టర్‌ ముందుకొచ్చిన వైనాన్ని కథలుకథలుగా కర్నూలు రైతులు చెప్పారు. మార్కెట్‌లో రూ.30 వేలు పలుకుతున్న ఆయిల్‌ ఇంజన్‌ను రూ.6,100కే అందించిన రాష్ట్ర ప్రభుత్వ యంత్రాంగానికి చేతులు ఎత్తి వారు మొక్కుతున్నారు. నిజానికి, 2011 నుంచి జిల్లాలో వాటర్‌షెడ్‌ పథకం అమల్లో ఉంది. ఈ స్కీం కింద 230 గ్రామాల్లో రెండేళ్ల క్రితం దాకా తవ్వింది వెయ్యి పంట కుంటలే. రైతులు ఉత్సాహంగా ముందుకు రావడంతో.. పంట సంజీవినిలో భాగంగా, ఈ కొద్ది కాలంలోనే 25 వేల పంట కుంటలు సిద్ధమయ్యాయి. కుంటల తవ్వకాల ఖర్చులో కర్నూలు ముందు వరసలో నిలిచింది. ఇప్పటిదాకా కుంటల కోసం రూ.68.83 కోట్లు ఖర్చుచేశారు. 587 ఆయిల్‌ ఇంజన్‌లను పంపిణీ చేశారు. దీనికోసం రైతులకు రూ.61లక్షల మేర రాయితీ కల్పించారు. అలాగే కోసిగి మండలం దొడ్డిబెళగల్‌ చిన్న గ్రామం. కానీ, పంట కుంటల విషయంలో చూపించిన పెద్దరికం ఇప్పుడు చుట్టుపక్కల ఊళ్లకు ఆదర్శంగా నిలిపింది. ఈ ఒక్క ఊరిలోనే 105 పంట కుంటలు కనిపిస్తున్నాయి. ఇప్పుడు చూస్తుండగానే కరువు పోయి పొలాలు పచ్చబడుతున్నాయని ఈ గ్రామానికి చెందిన వినియోగదారుల సంఘం అధ్యక్షుడు ప్రభాకర్‌ గౌడ్‌ వెల్లడించారు.

పంటే వద్దనుకొన్నా, మూడు కార్లు పండిస్తున్నా – ఎల్లప్ప, జాలవాడి, పెద్దకడబూరు మండలం 
‘‘నాకు 2.65 ఎకరాల భూమి ఉంది. వర్షాలు లేకపోవడంతో ఒక పంట పండించడమే కష్టమయ్యేది. అలాంటిది ఇప్పుడు ఏడాదిలో మూడు పంటలు పండించగలుగుతున్నాను. ఒకనాడు రూ.5 వేలకు కౌలుకు ఇచ్చిన భూమిలో ఈనాడు రూ.లక్ష లాభం చూస్తున్నాను. పంట కుంట పుణ్యాన ఇదంతా రెండేళ్లలోనే జరిగిపోయింది.’’

బోరునే నమ్ముకొంటే బాగుపడేవారం కాదు – ఈరన్న, దొడ్డిబెళగల్‌ 
కరువు తిష్టివేసిన గ్రామాల్లో దొడ్డిబెళగల్‌ ఒకటి. 500 అడుగుల లోతు బోరు వేసినా నీళ్లు పడేవి కావు. వలస పోయే కుటుంబాలు తప్ప ఊళ్లోకి వచ్చే బంధువులే కనిపించేవారు కాదు. పంట కుంటతో పరిస్థితి మారింది. ఇప్పటికీ బోరునే నమ్ముకొని ఉంటే భుగ్గయిపోయేవాడినన్నది ఈరన్న మాట.

Credits : Andhrajyothi